Read Akha Dawˬ daˬ 21 Bible Online

Dawˬ daˬ 21 - Akha bible

Dawˬ daˬ 21

¹Sahˬ paˬ tiˬ gʼaˬ-euˬ nui ma-ahˇ Sahˬpaˬ Miˬyehˇ uˆ lahˇ-eu-aˬ, lawˇ baˬ iˇ cuꞈ yoeˇ kʼehˬ bi baw-euˬ loꞈ-ehˇ awˬ-eu meh.

²Yawˬ ha neh noeˬ-euˬ tsaˬ ma lehˇ duˇ kʼawꞈ, nui noeˬ-ahˇ Sahˬpaˬ Miˬyehˇ yaˇ kʼaˬ daˇ gaˇ taˬ ngehˇ.

³Yaw tsaˬ yaw dawˇ jeˬ-ahˇ mˇ-awˬ. Lawˇ-eu shehˇ-eu jeˬ naˆ maˬ tseˇ, kʼoeˇ jeˬ-ahˇ Sahˬpaˬ Miˬyehˇ nui kʼahˇ shiˇ meh.

⁴Haiˬ-eu deuˬ-euˬ nui ma yaw huiˬ yaw mahˇ, iˬ baˇ huiˬ dui dui meh.

⁵Noeˬ dahˇ doe-awˇ mˇ-eu dehꞈ dzaˬ laˇ-awˇ, nui ma aˬ huˬ huˬ-eu shaˬ le tehꞈ-a.

⁶Maˬ tsaˬ maˬ dawˇ-eu laꞈ kʼoeˇ za-euˬ pyuˇ shuiˇ myawˬ gahˬ, tiˬ kʼehˇ laˇ kʼehˬ laꞈ kʼoeˇ byoˆ le-eu uˬ taꞈ, shiˇ-eu jeˬ-euˬ kʼaˬ meh laꞈ kʼoeˇ, 4 nawˬ-ahˇ sheuˬ uˇ yaꞈ tehꞈ-a.

⁷Maˬ tsaˬ maˬ dawˇ-eu deuˬ yaw haiˬ jeˬ mˇ-eu iˬ baˇ naꞈ-awˇ, yaw tsaˬ yaw dawˇ jeˬ mˇ-eu nui ma maˬ jaˆ-a.

⁸Tsawˇ doeˇ gaˇ jaw poˆ. Tsawˇ muiˬ gaˇ dawˇ shaˇ.

⁹Mehˬ boeˬ taˆ-eu miˬ zaˬ nehˬ-ehˇ dahˬ dzaˬ-eu naˆ maˬ tseˇ, nymˇ mˬ-ahˇ daˆ jawˇ leˇ-eu zaˬ dzehˬ meh.

¹⁰Haiˬ-eu deuˬ yaw doeˇ maˬ mˇ ni maˬ jawˇ coeˇ-ehˇ, gʼawˬ shaˬ gaˬ-eu jeˬ tiˬ pawꞈ-iˬ maˬ ahˇ-a.

¹¹Naˬ lehˬ-ahˇ diˬ paˇ-eu jeˬ-aˬ, dawˇ ga-ahˇ bi noeˬ gahˇ-eu meh. Yaw gahˇ deuˬ dawˬ mehˬ dawˬ tsoˆ gʼoˆ geuꞈ nya meh.

¹²Yaw tsaˬ yaw dawˇ Miˬyehˇ-aˬ, haiˬ-eu deuˬ-euˬ nymˇ jiˇ laꞈ kʼoeˇ kʼaˇ pyeuꞈ-eu luꞈ-eu siˬ nya jiˇ-awˇ, yaw haiˬ deuˬ-ahˇ kʼehˬ nehˬ kʼaˆ nehˬ-eu meh.

¹³Zaˬ coeˬ zaˬ-euˬ ngoeˇ dawˬ-ahˇ nawˇ maˬ naˇ haˬ naˇ, nawˬ-euˬ shaˇ dawˬ aˬ cawˬ-ahˇ maˬ gaˬ leˇ-a.

¹⁴Ciˬ cuˇ ni laꞈ sawˬ biꞈ kʼoeˬ-eu jeˬ-aˬ, nui pehˇ bi shuꞈ-iˇ-eu meh.

¹⁵Dawˇ coe ni yaˇ kʼaˬ daˇ ngeh, tsawˇ muiˬ laˬ kʼaˬ cehˇ-awˇ, tsawˇ doeˇ nui ma suˬ saˬ-eu meh.

¹⁶Nui ma-ahˇ maˬ noeˬ ni dehꞈ-eu deuˬ-euˬ mehˬ hu, shiˇ-eu jeˬ dawˬ luꞈ meh.

¹⁷Dzaˬ kuiˇ dawˇ kuiˇ gaˇ gaˬ-eu deuˬ, smˇ muiˬ maˬ muiˬ laˇ nya-a.

¹⁸Tsawˇ muiˬ kʼoeˇ taˆ mˇ-euˬ yaw doeˇ, yawˬ ha kʼoeˇ taˆ keuˆ le-eu meh.

¹⁹Mehˬ boeˬ taˆ-eu miˬ zaˬ nehˬ-ehˇ dahˬ dzaˬ-eu naˆ maˬ tseˇ, bawˇ tsahˬ bawˇ dahˇ-ahˇ jawˇ byoˆ-eu zaˬ dzehˬ meh.

²⁰Tsawˇ gahˇ byah-eu deuˬ dehꞈ poeˬ jawˇ poeˬ nya kʼawꞈ, aˬ dzawˬ aˇ gah deuˬ pyuˇ yaw kawˇ-ehˇ shehˆ dzeh-eu meh.

²¹Nawˇ ziˇ baw ziˇ za nya ni, gʼawˬ shaˬ gaˬ-eu nui ma ahˇ-awˇ yaw tsaˬ yaw dawˇ jeˬ mˇ-awˬ. Aˬ cawˬ nawˬ-ahˇ yaw zeu baw tehꞈ-a.

²²nui gahˇ ahˇ-eu guiˇ dzoeˬ tiˬ gʼaˬ, ziꞈ dah ni loꞈ piˇ taˬ-euˬ meuˬ-ahˇ deuˆ gʼaˬ-awˇ, meuˬ lahˇ deuˆ byaˆ tehꞈ-a.

²³Shaˬ zahˬ jaw dzeuˇ mawꞈ-eu aˬ cawˇ, dawˬ tmˇ dawˬ ngehˬ yahˇ-awˬ.

²⁴Aˬ dzawˬ aˇ gah aˬ cawˬ maˬ ngeuˇ-a, nui ma huiˬ-eu gʼaˬ meh.

²⁵Maˬ mˇ maˬ shaˇ nahˇ-eu nymˇ gawˬ aˬ da, yawˬ haˇ yawˬ ha kʼehˬ sehꞈ gaˇ duˇ-eu meh.

²⁶Yawˬ ha mawꞈ-eu jeˬ-ahˇ shaˇ noeˬ-eu jeˬ, aˬ yawꞈ daˬ luꞈ-euˬ kʼaˆ behˆ meh. Yaw tsaˬ yaw dawˇ tsawˇ haˬ-aˬ, kʼahˇ maˬ kʼoꞈ ni aˬ cawˬ-ahˇ biꞈ-eu meh.

²⁷Haiˬ-eu tsawˇ haˬ deuˬ lawˇ gaˇ shehˇ gaˇ Sahˬpaˬ Miˬyehˇ bye-awˇ, nui ma maˬ dawˇ-eu laꞈ kʼoeˇ lawˇ gaˇ bye dzehˬ-eu meh.

²⁸Jaˬ myawꞈ saˇ kiˇ geuꞈ gaˇ aˬ cawˬ maˬ jah-a. Ehˇ kʼawꞈ gaˇ kawˆ ja dahˇ nya-eu gʼaˬ-euˬ dawˬ-ahˇ jah-eu meh.

²⁹Yaw tsaˬ yaw dawˇ deuˬ ziꞈ dah ni gʼeh-awˇ, yaw haiˬ deuˬ aˬ cawˬ jah laˇ ni ya jahˇ gʼeh-eu meh.

³⁰Tsawˇ haˬ zaˬ-euˬ nui gahˇ, tsawˇ gahˇ hawˇ-eu bym-eu nya-eu jeˬ, Sahˬpaˬ Miˬyehˇ nui ma maˬ tsaˬ naˇ gaˇ dahˇ maˬ tsoeˬ-a.

³¹Nawˇ guiˇ deuˆ-eu mahˬ deuˬ lehˬ hmˬ taˬ nya kʼawꞈ, guiˇ deuˆ gʼaˬ ni jahˇ-eu gʼaˬ Sahˬpaˬ Miˬyehˇ meh.