Read Akha Dawˬ daˬ 23 Bible Online

Dawˬ daˬ 23 - Akha bible

Dawˬ daˬ 23

¹-6- Yaw huiˬ yaw mahˇ nehˬ-ehˇ hawˬ jawˬ jawˬ taꞈ ngeh, tsawˇ haˬ kʼoeˇ gʼaˬ aˬ suˇ gʼaˬ pyeuꞈ-eu gaˇ kawˆ maˬ ya ngehˇ ni noeˬ gahˇ-awˬ.

²Kuiˇ dui dui-eu dzaˇ miˇ-a lehˇ noeˬ-awˇ tiˬ dehˆ taˬ dzaˬ.

³Aˬ yawꞈ neh shaˇ dahˇ taˬ-euˬ dzaˇ muiˬ deuˬ-ahˇ nui kʼahˇ taˬ jaˆ. Aˬ yawꞈ nawˬ-ahˇ tsawˇ gahˇ gahˇ-eu maˬ siˬ. -7-

⁴Smˇ muiˬ muiˬ laˇ ni tehꞈ-ehˇ maˬ leh jeh ni noeˬ gahˇ-awˬ.

⁵Nawˬ-euˬ pyuˇ shuiˇ myawˬ gahˬ myaˆ tiˬ miˆ laꞈ kʼoeˇ tehꞈ-ehˇ byoˆ jiˇ nya meh. Kʼaˬ dzeˇ loꞈ-ehˇ aˬ dahˇ tsoꞈ laˇ-awˇ zaw byoˆ gʼeh nya-eu meh. -8-

⁶Tsawˇ tsiˇ-euˬ hawˬ jeh-ahˇ hawˬ jawˬ taˬ jawˬ leˇ. Aˬ yawꞈ neh shaˇ dahˇ taˬ-euˬ dzaˇ yaw kuiˇ-ahˇ nui kʼahˇ taˬ jaˆ.

⁷Yaw myaˬ myaˬ-ehˇ dzaˬ-awˬ lehˇ aˬ yawꞈ ehˇ kʼawꞈ, aˬ diˇ aˬ maˇ kʼoeˇ loꞈ-ehˇ ehˇ mawꞈ-eu maˬ ngeuˇ-a. Aˬ yawꞈ-euˬ nui ma laꞈ kʼoeˇ noeˬ luꞈ-eu jeˬ, aˬ yawꞈ kʼaˇ ngeuˇ-eu ngeuˇ meh.

⁸Nawˬ neh kʼaˇ dzaˬ ahˇ taˬ-euˬ jeˬ uˬ pehꞈ ya pehꞈ dzeh gaˇ keuˆ-awˇ, nawˬ neh aˬ yawꞈ-ahˇ ja poeˬ nehˬ-euˬ dawˬ deuˬ yawꞈ ngehꞈ-ehˇ pyeuꞈ-iˇ tehꞈ-a. -9-

⁹Tsawˇ uˬ-ahˇ aˇ poeˬ kʼaˆ-eu dawˬ taˬ ngehˬ nehˬ. Dawˬ yaw poeˬ aˬ yawꞈ maˬ siˬ nya-a. -10-

¹⁰Aˇ hu ba neh tsaˬ tsoˆ taˬ-euˬ miˇ kaˬ tiˬ jawˇ-iˬ taˬ teh jiˆ. Muˇ coe aˬ nmˇ-euˬ miˇ tsaˬ taˬ kʼaˆ geuꞈ.

¹¹Sahˬpaˬ Miˬyehˇ-aˬ, aˬ yawꞈ maꞈ-ahˇ haw piˇ-eu gʼaˬ kʼaˆ-eu gʼaˬ pyeuꞈ-eu loꞈ-ehˇ, aˬ yawꞈ maꞈ jawˇ paw pyawˬ-awˇ nawˬ-ahˇ kʼehˬ tehꞈ-a. -11-

¹²Nawˬ-ahˇ mehˬ-eu tsoˆ-eu saˬ laˬ-euˬ dawˬ-ahˇ naˇ haˬ-awˇ, nawˇ kʼaˇ gʼeh nya gaˇ keuˆ ni dzaw geuꞈ-awˬ. -12-

¹³Zaˬ-ahˇ mehˬ-eu tsoˆ-eu gʼaˇ duˬ taˬ nyi naˬ. Daˇ cuiˇ neh sawˇ-eu baˬ da neh aˬ yawꞈ maˬ shiˇ-a.

¹⁴Aˬ diˇ aˬ maˇ ehˇ leꞈ naˇ, kʼoeˇ loꞈ-ehˇ jahˇ-eu jeˬ aˬ yawꞈ-ahˇ ka kʼoꞈ gaˇ duˇ-eu meh. -13-

¹⁵Ngaˬ li-oˇ, nawˇ zaˬ siˬ tsawˇ gahˇ byah laˇ gaˇ, ngaˇ nui kʼahˇ shiˇ dui dui ma.

¹⁶Nawˇ tsawˇ gahˇ byah-eu dawˬ ngeh nya gaˇ ngaˇ kʼahˬ sehˇ jehˆ ma. -14-

¹⁷Iˬ baˇ mˇ-eu deuˬ-ahˇ myaˆ taˬ naˆ. Nawˬ-euˬ tiˬ ziˇ Sahˬ paˬ Miˬ yehˇ-ahˇ yaw zeu baw-eu jeˬ taˬ bi byoˆ-iˇ.

¹⁸Nawˇ kʼoeˇ loꞈ-ehˇ dehꞈ naˇ, nawˇ yaw dehꞈ dehꞈ-eu gaˇ ma saˇ lehˆ ni jaˆ tehꞈ-a. -15-

¹⁹Ngaˬ li-oˇ, naˇ haˬ-awˬ. Yaw muiˬ paˬ-ehˇ dehꞈ-awˇ yaw gahˇ gahˇ-ehˇ shaˇ noeˬ-awˬ.

²⁰Jiˇ baˬ dawˇ yehꞈ-eu deuˬ hawˇ-eu dzaˬ boˆ dawˇ boˆ boˆ-eu deuˬ nehˬ-ehˇ mehˬ bawˬ taˬ mˇ.

²¹Dzaˬ yehꞈ dawˇ yehꞈ-eu jeˬ shaˬ le zahˬ le-eu gaˇ ma pyeuꞈ-eu meh. Dzaˬ-eu hawˇ-eu yuꞈ-eu tehꞈ-ehˇ nawˇ siˬ nya naˇ, mehˬ tsoeˬ pehˇ cehˇ ya dm gaˇ keuˆ tehꞈ-a. -16-

²²Nawˬ da baˬ da neh nawˇ ya dehꞈ le-euˬ loꞈ-ehˇ, nawˬ da-euˬ ehˇ dawˬ naˇ haˬ-awˬ. Nawˬ ma tsawˇ mawˬ mawˬ laˇ ngeh, yaw zeu baw nehˬ-awˬ.

²³Yaw tsaˬ yaw dawˇ jeˬ zaˬ siˬ nui gahˇ, tsawˇ gahˇ dzaw geuꞈ-eu jeˬ hawˇ-eu nui ma-ahˇ noeˬ-eu heu deuˬ-aˬ, aˇ poeˬ aˇ naˆ ni kʼaˆ kʼawꞈ poˆ geuꞈ-eu tsaˬ meh. Ehˇ kʼawꞈ, aˇ poeˬ kʼaˆ dui dui-eu miˇ neh ahˬ dzeh-eu maˬ tsaˬ-a.

²⁴Yaw tsaˬ yaw dawˇ tsawˇ haˬ-euˬ aˬ da-aˬ, laˬ kʼaˬ cehˇ duˬ jaˆ meh. Tsawˇ gahˇ ahˇ-eu aˬ li jawˇ-eu tsawˇ haˬ kʼahˬ sehˇ jehˆ-eu tsaˬ meh.

²⁵Nawˬ da nawˬ ma nawˬ-ahˇ nui ma huiˬ kʼaˇ bi za-awˬ. Nawˬ-ahˇ baw-euˬ aˬ ma laˬ kʼaˬ cehˇ duˬ bi za-awˬ. -17-

²⁶Ngaˬ li-oˇ, nui ma laꞈ kʼoeˇ ngaˬ-ahˇ haw tsoˆ taˬ-awˇ, ngaˬ-euˬ dehꞈ jeˬ dehꞈ kawˆ-ahˇ dzaw geuꞈ-awˬ.

²⁷Meh maˬ laˇ deuˬ hawˇ-eu kʼaˇ gʼeh mawꞈ-eu gʼeh-eu zaˬ miˬ zaˬ deuˬ-aˬ, shiˇ-eu lahˇ ju-ahˇ duˇ-eu meh.

²⁸Tahˇ joe loꞈ-ehˇ aˬ yawꞈ maꞈ nawˬ-ahˇ loꞈ-awˇ, kʼaˬ dzeˇ zaˬ gʼawˬ mya gʼaˬ-ahˇ laˆ cawˆ-eu meh. -18-

²⁹Yawˬ haˇ yawˬ ha nui ma cawˆ-eu tsawˇ haˬ, nui saˇ maˬ oꞈ-eu tsawˇ haˬ, aˬ cawˬ-ahˇ ceh cawˬ cawˬ-eu tsawˇ haˬ, aˬ cawˬ-ahˇ nui kʼahˇ maˬ shiˇ-eu dawˬ ngehˬ-eu tsawˇ haˬ, myaˆ nuiˆ neˇ kah ni gʼeh-eu tsawˇ haˬ, gaˇ dahˇ maˬ tsoeˬ gaˇ laˆ tahˬ laˆ naˇ-eu tsawˇ haˬ aˬ suˇ gʼaˬ-a.

³⁰Jiˇ baˬ yaw kʼaˆ-ehˇ dawˇ-eu tsawˇ haˬ hawˇ-eu, yehꞈ laˇ nya-eu dzaˇ poˆ dzaˬ-eu tsawˇ haˬ meh.

³¹Neˇ la la-eu dzaˇ uiˇ pyeuꞈ-awˇ, kʼmˬ maˬ-ahˇ kʼaˇ ahˇ ngeh naˇ guiˇ guiˇ laˇ guiˇ laˇ-ehˇ haw muiˬ-eu uˬ taꞈ, myoꞈ ahˇ muiˬ dui dui-eu jiˇ baˬ kʼoeˇ neh nawˬ-ahˇ muˇ juˇ taˬ bi juˇ gʼaˬ.

³²Yawˬ shawˬ yawˬ noeˬ laˇ ngeh, doꞈ kʼaˆ-eu aˇ lawˇ neh toˆ-euˬ loꞈ-ehˇ jiˇ baˬ kʼoeˇ nawˬ-ahˇ kʼehˬ tehꞈ-a.

³³Nawˬ-euˬ myaˆ nuiˆ maˬ haw duˬ nya-eu uˬ taꞈ, nui ma maˬ noeˬ gahˇ nya-ehˇ, dawˬ yaw muiˬ maˬ ngehˬ nya ni pyeuꞈ-iˇ tehꞈ-a.

³⁴Iˬ ma laˆ shaˆ iˇ luˆ dzeh gaˇ gʼa luꞈ-eu saˇ baoˬ kʼoeˇ taˆ dziˬ luꞈ-eu loꞈ-ehˇ, nawˬ-euˬ uˬ duˬ buˬ juˬ buˇ juˇ zeuˆ tehꞈ-a.

³⁵“Yaw kʼaˆ-ehˇ bi laˆ tahˬ-euˬ nya. Ngaˬ-ahˇ ga uiˬ-awˇ diˬ nehˬ laꞈ-euˬ nya. Aˬ geuˬ gaˇ bi diˬ-euˬ maˬ noeˬ doˆ coeˇ nya. Aˬ jeˬ miˇ neh ngaˬ-ahˇ maˬ noeˬ gahˇ laˇ-eu nya heu. Tiˬ poˆ ya dawˇ nya siˬ” lehˇ nawˇ ehˇ tehꞈ-a.