Read Akha Dawˬ daˬ 24 Bible Online

Dawˬ daˬ 24 - Akha bible

Dawˬ daˬ 24

¹-19- Haiˬ-eu tsawˇ haˬ deuˬ-ahˇ myaˆ taˬ naˆ. Aˬ yawꞈ maꞈ-ahˇ cawˬ taˬ cawˬ.

²Aˬ cawˬ-ahˇ laˆ shaˬ-eu gaˇ kawˆ tehꞈ-ehˇ aˬ yawꞈ maꞈ shaˇ noeˬ luꞈ meh. Aˬ yawꞈ maꞈ dawˬ kʼaˇ ngehˬ doˆ laˇ ngeh, tiˬ gʼaˬ-ahˇ coeˬ leˇ-eu yaw duˬ baw meh. -20-

³Nymˇ tsoˆ-eu jeˬ-aˬ, zaˬ siˬ nui gahˇ kʼoeˇ taˆ zeuˇ dahˇ ya ka-eu meh.

⁴Zaˬ siˬ nui gahˇ ahˇ naˇ, aˇ poeˬ kʼaˆ-awˇ haw muiˬ-eu myawˬ gahˬ deuˬ, nymˇ ma bawˆ lawˆ byah laˇ-eu meh. -21-

⁵Zaˬ siˬ tsawˇ gahˇ ahˇ-eu jeˬ-aˬ, gʼaˬ kʼaˆ-eu jeˬ naˆ maˬ tseˇ poeˬ-eu meh. Tsawˇ gahˇ-aˬ, gʼaˬ naˆ maˬ tseˇ poeˬ-eu meh.

⁶Nawˇ guiˇ maˬ deuˆ mi naˆ-ehˇ, guiˇ aˬ joˆ-ehˇ deuˆ nmˇ lehˇ jeˬ huˬ ya sawˇ duˬ-eu meh. Muiˬ-eu byah-eu dawˬ mehˬ dawˬ tsoˆ za myaˬ naˇ, guiˇ deuˆ gʼaˬ-eu yaw duˬ baw meh. -22-

⁷Dawˬ tsuiꞈ naꞈ-eu dawˬ daˬ-ahˇ aˬ dzawˬ aˇ gah deuˬ maˬ gʼoˆ shaw nya-a. Gaˇ kawˆ yaw huiˬ ja uˇ ngeh, aˬ yawꞈ dawˬ ngehˬ tsaˬ maˬ siˬ-a. -23-

⁸Nawˇ aˬ myah luꞈ yaw haiˬ jeˬ tehꞈ-ehˇ toˆ naˇ, miˇ kʼahˬ-ahˇ coeˬ-eu tsawˇ haˬ lehˇ aˬ cawˬ nawˬ-ahˇ myahˇ tehꞈ-a.

⁹Tsawˇ uˬ-euˬ bawˬ toˆ iˬ baˇ gaˇ kawˆ meh. Aˬ cawˬ-ahˇ maˬ coeˬ maˬ ciˆ ni maˬ dehꞈ nya-eu tsawˇ haˬ-ahˇ tiˬ gʼaˬ-iˬ maˬ haw nahˇ-a. -24-

¹⁰Shaˬ zahˬ puˬ le ngeh nui ma nyiˇ naˇ, nawˇ nui ma baˬ-eu tsawˇ haˬ meh. -25-

¹¹Maˬ tsaˬ maˬ dawˇ-eu laꞈ kʼoeˇ aˬ cawˬ neh bi sehꞈ-eu lehˇ gʼeh luꞈ-eu tsawˇ haˬ-ahˇ maˬ nyi naˬ ni ka kʼoꞈ nehˬ-awˬ.

¹²Yawˬ ha-ahˇ tiˬ jeˬ-iˬ maˬ taꞈ-aˇ lehˇ nawˇ ehˇ mawꞈ tehꞈ-a. Ehˇ kʼawꞈ, siˬ luꞈ mawˇ luꞈ-eu Miˬyehˇ nawˬ-eu nui ma-ahˇ yaˇ kʼaˬ daˇ tehꞈ-a. Aˬ yawꞈ nawˬ-ahˇ haw luꞈ-awˇ, yawˬ jeˬ na luꞈ siˬ nya luꞈ meh. Nawˬ neh mˇ-euˬ gaˇ-ahˇ haw-awˇ, aˬ yawꞈ nawˬ-ahˇ guiˬ lahˬ biꞈ tehꞈ-a. -26-

¹³Ngaˬ li-oˇ, byaˬ byaˬ uiˇ dzaˬ-awˬ. Yaw kuiˇ meh. Byaˬ byaˬ yaˆ-ahˇ dahˬ-eu byaˬ uiˇ nawˬ-eu mehˬ laˇ-ahˇ coeˇ dui dui meh.

¹⁴Kʼoeˇ loꞈ-ehˇ duˇ ni, zaˬ siˬ tsawˇ gahˇ-aˬ, nawˬ-euˬ nui ma-ahˇ coeˇ dui dui-awˇ, zaˬ siˬ tsawˇ gahˇ za naˇ, nawˇ mehˬ hu paw yaw dehꞈ dehꞈ daˆ-eu guiˬ lahˬ baw tehꞈ-a. -27-

¹⁵Yaw sui yaw dawˇ tsawˇ haˬ-ahˇ tahˇ joe joe-awˇ, nymˇ nymˇ lah-ehˇ ceh geuꞈ-eu lehˇ gʼeh-eu nui ma maˬ dawˇ-eu tsawˇ haˬ loꞈ-ehˇ taˬ gʼeh.

¹⁶Yaw sui yaw dawˇ tsawˇ haˬ aˇ myaˆ poˆ coˬ-iˇ kʼawꞈ paˇ tuˇ laˇ nya meh. Ehˇ kʼawꞈ, guˆ-eu gaˆ-eu jeˬ keuˆ le ngeh nui ma maˬ dawˇ-eu tsawˇ haˬ luˬ-iˇ seˇ-iˇ-eu meh. -28-

¹⁷Nawˬ-ahˇ muiˇ-eu deuˬ kʼoeˇ taˆ guˆ-eu gaˆ-eu jeˬ keuˆ le ngeh laˬ kʼaˬ taˬ cehˇ. Aˬ yawꞈ sahˬ tiꞈ tiꞈ gaˇ laꞈ kʼawˆ taˬ tehˆ caw.

¹⁸Nawˬ-ahˇ tmˬ leˇ gaˇ Sahˬpaˬ Miˬyehˇ haw siˬ-awˇ, nui ma maˬ tsaˬ-eu miˇ neh, aˬ yawꞈ-ahˇ maˬ kʼehˬ nehˬ ni byehˇ tehꞈ-a. -29-

¹⁹Maˬ tsaˬ maˬ dawˇ-eu tsawˇ haˬ deuˬ dehꞈ gaˇ haw-awˇ nawˇ nui ma taˬ nyiˇ. Aˬ yawꞈ maꞈ-ahˇ myaˆ taˬ naˆ.

²⁰Maˬ tsaˬ maˬ dawˇ-eu tsawˇ haˬ yaw dehꞈ dehꞈ-eu uˬ duˬ duˬ leˇ kʼaˇ maˬ za-a. Noeˬ tmˬ duˬ tiˬ jeˬ-iˬ maˬ jaˆ-a. -30-

²¹Ngaˬ li-oˇ, Sahˬpaˬ Miˬyehˇ-ahˇ guˆ-awˇ, nawˬ-euˬ sahˬ paˬ-ahˇ taˬ huiˬ taˬ mahˇ-awˬ. Aˬ yawꞈ nyaꞈ-ahˇ puiˬ-eu tsawˇ haˬ deuˬ nehˬ-ehˇ cawˬ taˬ cawˬ.

²²Kʼoeˇ loꞈ-ehˇ gʼeh-eu tsawˇ haˬ deuˬ tiˬ kʼehˇ laˇ kʼehˬ laꞈ kʼoeˇ luˬ-iˇ seˇ-iˇ nya meh. Miˬyehˇ hawˇ-eu sahˬ paˬ neh bi keuˆ le nya-eu guˆ-eu gaˆ-eu jeˬ-ahˇ aˬ suˇ gʼaˬ ehˇ tsehˆ nya ta.

²³Zaˬ siˬ tsawˇ gahˇ ahˇ-eu tsawˇ haˬ deuˬ neh heu loꞈ-ehˇ daˬ taˬ yaꞈ-euˬ dawˬ daˬ deuˬ kʼawꞈ jaˆ-eu meh. Yaˇ kʼaˬ daˇ-eu tsawˇ haˬ myaˆ pyawˬ huiˬ nyiˇ tseˇ-eu maˬ tsaˬ-a.

²⁴Mˇ bahˬ taˬ-euˬ jeˬ jaˆ-eu tsawˇ haˬ-ahˇ maˬ bahˬ-a lehˇ daˇ tsehˆ naˇ, tsawˇ haˬ dawˬ tawˆ luꞈ yaˇ kʼaˬ daˇ-eu gʼaˬ-ahˇ bye-awˇ yaˬ kʼehˇ yaˬ tehꞈ-a.

²⁵Ehˇ kʼawꞈ, mˇ bahˬ-euˬ tsawˇ haˬ-ahˇ oꞈ-eu geuˇ-eu loꞈ-ehˇ kʼehˬ nehˬ-eu yaˇ kʼaˬ daˇ-eu gʼaˬ guiˬ lahˬ huiˬ-awˇ, aˬ cawˬ yaw zeu baw tehꞈ-a.

²⁶Dawˇ coe ni ngehˬ-eu tmˇ-eu jeˬ-aˬ, cawˬ yaw muiˬ pyeuꞈ-eu saˇ kiˇ meh.

²⁷Deh ma baw laˇ-awˇ, dzaˬ duˬ dawˇ duˬ maˬ dah laˇ kʼoeˇ keuˆ ni, nymˇ tsoˆ-awˇ nymˇ dahˬ taˬ dahˬ dzaˬ.

²⁸Yaw duˬ yaw ciˇ maˬ jaˆ gaˇ aˬ cawˬ gaˇ kawˆ tsawˇ kaˬ taˬ geuꞈ. Maˬ tsaˬ maˬ dawˇ-eu laꞈ kʼoeˇ aˬ cawˬ-ahˇ bi naˇ leˇ-eu dawˬ taˬ ngehˬ.

²⁹“Ngaˬ-ahˇ jahˇ nehˬ laꞈ-euˬ loꞈ-ehˇ aˬ yawꞈ-ahˇ jahˇ kʼoꞈ nehˬ ma. Aˬ yawꞈ-ahˇ kʼaˇ geuˇ-eu loꞈ-ehˇ jahˇ coeˬ nehˬ ma” lehˇ taˬ ehˇ.

³⁰Nymˇ gawˬ dawˇ ga tiˬ gʼaˬ-euˬ deh yaˇ hawˇ-eu aˬ gaꞈ yaˇ kmˇ-ahˇ ngaˇ cah haw-euˬ ma.

³¹Aˬ gah baw duˆ dehꞈ dehꞈ-ehˇ, yaˇ moꞈ uˆ tehˬ taˬ gaˇ ya mawˇ-euˬ ma. Yaˇ kmˇ gawˬ lahˇ taˬ-euˬ kʼaˬ lo deuˬ kʼawꞈ ga byaˆ jiˇ taˬ-euˬ meh.

³²Kʼoeˇ gaˇ haw-awˇ shaˇ noeˬ ngeh, dzaw geuꞈ duˬ heu loꞈ-ehˇ mawˇ-euˬ ma.

³³Yuꞈ mawꞈ-eu nui ma ahˇ naˇ, coˬ lah-awˇ yuꞈ kʼaˆ-awˬ. Laꞈ pyehꞈ pyehꞈ deuˇ-awˇ, tiˬ kʼehˬ naˬ-awˬ.

³⁴Ehˇ kʼawꞈ nawˇ yuꞈ kʼaˆ luꞈ ngeh, miˬ beuˆ baꞈ-awˇ tahˇ joe deh le-eu loꞈ-ehˇ, iˇ shaˬ shaˬ-eu jeˬ nawˬ-ahˇ deh le tehꞈ-a.