Read Akha Dawˬ daˬ 26 Bible Online

Dawˬ daˬ 26 - Akha bible

Dawˬ daˬ 26

¹Aˬ dzawˬ-ahˇ ciˬ poeˬ nehˬ-eu jeˬ-aˬ, jawˇ la-ahˇ ngehˇ ga le-awˇ, cehˇ diˬ ngeh uˬ yehˇ yehˇ le gaˇ duˇ-eu meh.

²Iˬ baˇ maˬ naꞈ gaˇ yaˬ kʼehˇ yaˬ-eu jeˬ-aˬ, maˬ ga dawꞈ le ni yaw dzeuˇ gʼeh-eu aˇ jiˇ-ahˇ duˇ-eu meh.

³Mahˬ-ahˇ aˇ caˆ neh ya juiꞈ-awˇ, mahˬ tahˬ laˆ-ahˇ mehˬ kawꞈ ya dawˆ-eu loꞈ-ehˇ, aˬ dzawˬ-ahˇ ya diˬ paˇ-eu meh.

⁴Aˬ dzawˬ-ahˇ ceh cawˬ cawˬ naˇ, nawˇ kʼawꞈ aˬ dzawˬ meh.

⁵Aˬ jaꞈ jaꞈ laˇ gaˇ cehꞈ lehꞈ ka kʼoꞈ nehˬ naˇ, yawˬ haˇ yawˬ ha bi noeˬ siˬ-eu meh.

⁶Aˬ dzawˬ aˇ gah neh dawˬ mehˬ dawˬ tsoˆ bi tsoˆ naˇ, yawˬ ha-euˬ aˬ kuiˇ yawˬ ha deuˆ tsehˆ-awˇ, yawˬ haˇ yawˬ ha laˆ shaˬ gaˇ duˇ tehꞈ-a.

⁷Aˬ dzawˬ tsawˇ mawˬ dawˬ daˬ zmˬ nya naˇ, kuiˇ shiˇ gaˇ ma cah nya tehꞈ-a.

⁸Aˬ dzawˬ aˇ gah-ahˇ ciˬ poeˬ-eu jeˬ-aˬ, tsaˬ oeˬ-ahˇ kʼaˬ lo paꞈ tawꞈ gaˇ duˇ-eu meh.

⁹Aˬ dzawˬ aˇ gah tsawˇ gahˇ ahˇ-eu dawˬ daˬ ja mehˬ-eu-aˬ, jiˇ baˬ yehꞈ-eu tsawˇ haˬ aˬ gah pehꞈ-eu leh jeh gaˇ duˇ tehꞈ-a.

¹⁰Kʼaˇ puˬ kʼaˇ mawˇ le-eu aˬ dzawˬ aˇ gah-ahˇ myawˬ kʼehˇ kʼehˇ-eu baw leˬ-aˬ, kʼaˇ jawˇ kʼaˇ deuˬ-ahˇ laˆ shaˬ gaˇ duˇ tehꞈ-a.

¹¹Aˬ dzawˬ aˇ gah yaw lehˬ mˇ poˆ poˆ-eu jeˬ-aˬ, aˬ kuiˬ uˬ pehꞈ dzaˬ poˆ gaˇ duˇ-eu meh.

¹²Yawˬ ha maˬ bym gaˇ bym ma lehˇ noeˬ-eu tsawˇ haˬ-aˬ, aˬ dzawˬ aˇ gah naˆ maˬ tseˇ doeˇ-eu meh.

¹³Nymˇ gawˬ gawˬ-eu tsawˇ haˬ aˬ jeˬ miˇ neh iˇ kahˇ laꞈ nyiˇ maˬ doˆ-iˇ ta. Aˬ jeˬ guˆ kʼaˇ za ta. Aˇ laˬ jaˬ shiˇ-ahˇ guˆ ta loˇ.

¹⁴Yaw doeˇ yuꞈ zaˇ poˆ laˆ paˇ paˇ-ehˇ jawˇ-eu meh. Laˇ gʼoˆ -ahˇ gʼoˆ bahˬ neh gʼeu tehˬ taˬ-euˬ loꞈ-ehˇ, aˬ yawꞈ tiˬ gaˇ-iˬ maˬ iˇ maˬ laˇ-a.

¹⁵Tsawˇ haˬ tiˬ paˆ na deuˬ yawˬ ha-euˬ kʼaˬ meh-ahˇ hawˬ maˬ nmꞈ ahˇ nahˇ gaˇ keuˆ ni yaw doeˇ doeˇ-eu meh.

¹⁶Nymˇ gawˬ aˬ da-aˬ, nui noeˬ kuꞈ-eu tsawˇ haˬ shiꞈ gʼaˬ naˆ maˬ tseˇ maˬ gaˇ dzehˬ ma lehˇ noeˬ-eu meh.

¹⁷Yawˬ ha-ahˇ tiˬ jeˬ-iˬ maˬ taꞈ gaˇ, aˬ cawˬ tsawˇ pyehˇ pyehˇ gaˇ uˇ leˇ-eu tsawˇ haˬ-aˬ, meuˬ gʼahˇ lahˇ ceh aˬ kuiˬ naˬ paꞈ-ahˇ tsuˆ tehˬ-iˇ gaˇ duˇ tehꞈ-a.

¹⁸Aˬ cawˬ-ahˇ coeˬ leˇ ni mˇ gʼaˬ miˇ tsa, “Naˬ gʼa haw-eu tehꞈ le” lehˇ ehˇ-eu tsawˇ haˬ-aˬ, tsawˇ haˬ-ahˇ laˆ sehꞈ nya-eu keu ka yuˇ-awˇ aˬ mui mui niˇ gʼa-eu tsawˇ uˬ-ahˇ duˇ-eu meh.

²⁰Miˬ kawˬ maˬ ahˇ naˇ miˬ dzaˬ miˆ-iˇ-eu loꞈ-ehˇ, ja bu-eu gʼaˬ ma jawˇ naˇ, iˬ dehˬ iˬ ceh byoˆ-iˇ-eu meh.

²¹Kʼaˬ gʼeuˬ baˬ da neh miˬ jiˆ neˇ-awˇ, miˬ doꞈ baˬ da neh miˬ lmˇ doˆ-eu loꞈ-ehˇ, dawˬ ja laˆ doˆ-eu deuˬ baˬ da neh iˬ dehˬ iˬ ceh jaˆ-eu meh.

²²Ja bu ja doeˇ-eu dawˬ-aˬ, dzaˇ yaw kuiˇ tiˬ jeˬ-ahˇ duˇ-awˇ, uˬ maˆ laꞈ kʼoeˇ bi myoꞈ ahˇ nya-eu meh.

²³Nui ma laꞈ kʼoeˇ kʼaˇ noeˬ-euˬ loꞈ-ehˇ maˬ ngehˬ-eu tsawˇ gahˇ gahˇ-eu dawˬ-aˬ, jaˆ gʼaˬ lehꞈ guiˇ taˬ-euˬ miˇ tsaˬ oeˬ lahˬ-ahˇ duˇ-eu meh.

²⁴Tsawˇ muiˬ jahˇ geuꞈ-eu deuˬ-aˬ, yawˬ ha-euˬ nui noeˬ yaw doeˇ-ahˇ dawˬ muiˬ neh dehˬ kaˬ-eu meh.

²⁵Aˬ yawꞈ yaw muiˬ-ahˇ duˇ kʼawꞈ, taˬ jah. Aˬ yawꞈ-euˬ nui ma laꞈ kʼoeˇ yaw doeˇ jahˇ mawꞈ-eu jeˬ byah kʼaˇ luꞈ-eu meh.

²⁶Aˬ yawꞈ yaw muiˬ jahˇ geuꞈ kʼawꞈ, aˬ yawꞈ mˇ doˆ laꞈ-eu yaw doeˇ jeˬ-ahˇ yawˬ gʼaˬ na luꞈ ya mawˇ tehꞈ-a.

²⁷Aˬ cawˬ-ahˇ lahˇ ju kʼmˇ-eu tsawˇ haˬ, yawˬ haˇ yawˬ ha kʼmˇ paꞈ tehꞈ-a. Miˇ byaˆ ngawˬ-eu tsawˇ haˬ, yawˬ haˇ yawˬ ha bi byaˆ tehˬ sehꞈ tehꞈ-a.

²⁸Aˬ cawˬ-ahˇ nawˇ mehˇ shuiˇ shuiˇ-awˇ yaw doeˇ jahˇ nehˬ mawꞈ naˇ, nawˬ-euˬ laꞈ kʼoeˇ aˬ yawꞈ-ahˇ bye-eu nui ma jeˬ huˬ ya bi ahˇ-eu meh. Jaˬ myawꞈ myawꞈ-eu jeˬ-aˬ, yaw cawˆ jeˬ tehꞈ-ehˇ bi doˆ laˇ-eu meh.