Read Akha Dawˬ daˬ 27 Bible Online

Dawˬ daˬ 27 - Akha bible

Dawˬ daˬ 27

¹Ni shawˬ gʼaˇ duˬ kʼahˬ sehˇ taˬ jehˆ. Heu yaw kaˬ-ahˇ aˬ jeˬ pyeuꞈ laˇ-eu nawˇ maˬ ehˇ tsehˆ nya-a.

²Yawˬ haˇ yawˬ ha taˬ ja ceuˬ. Aˬ cawˬ neh bi ja ceuˬ-awˬ. Boeˇ miˬ siˬ kʼaˬ deuˬ neh bi ja ceuˬ-awˬ.

³Kʼaˬ lo hawˇ-eu kʼaˇ shuiꞈ yaw kah meh. Ehˇ kʼawꞈ, aˬ dzawˬ aˇ gah kʼoeˇ naˆ maˬ tseˇ kah-eu meh.

⁴Nui ma pehˇ-eu jeˬ-aˬ, gʼawˬ shaˬ gaˬ-eu maˬ siˬ nya-ehˇ, yaw cawˆ jeˬ tehꞈ-ehˇ mˇ doˆ laꞈ-eu meh. Ehˇ kʼawꞈ, myaˆ naˆ-eu jeˬ nehˬ-ehˇ shaˇ cehˆ haw ngeh, ehˇ nyaꞈ maˬ nyeuˆ-a.

⁵Tsawˇ haˬ tiˬ gʼaˬ-ahˇ nawˇ maˬ haw nahˇ-eu gaˇ kawˆ siˬ leˇ ni maˬ haw cawˬ-ehˇ jawˇ-eu naˆ maˬ tseˇ, bya tsehˆ ni mehˬ paˇ nehˬ-eu jeˬ muiˬ dzehˬ-eu meh.

⁶Cawˬ yaw muiˬ-aˬ, nawˬ-ahˇ jahˇ coeˬ nehˬ laꞈ kʼawꞈ yaw muiˬ meh. Ehˇ kʼawꞈ, muiˇ-eu tsawˇ haˬ nawˬ-euˬ baꞈ pu-ahˇ byaˇ tawꞈ laˇ ngeh, yaw kʼaˆ kʼaˆ-ehˇ yahˇ-awˬ.

⁷Uˬ maˆ dehˆ ngeh byaˬ byaˬ uiˇ-ahˇ maˬ haw nahˇ kʼawꞈ, mehꞈ le shuꞈ le-euˬ mehˬ hu, gʼawˬ kʼaˬ yaw coeˇ coeˇ-eu meh.

⁸Iˇ kahˇ byehˇ-awˇ cah byoˆ-euˬ tsawˇ haˬ-aˬ, bahˬ-ahˇ gaˇ mahˇ zaw kaˬ-euˬ aˇ jiˇ zaˬ-ahˇ duˇ-eu meh.

⁹Naˬ maˬ hawˇ hawˇ-eu tsiˇ yaw saw jeˬ nawˬ-ahˇ laˬ kʼaˬ bi cehˇ-awˇ, guˆ-eu gaˆ-eu jeˬ nawˬ-euˬ nui ma-ahˇ shaˬ zahˬ bi naꞈ-eu meh.

¹⁰Nawˬ-euˬ cawˬ deuˬ hawˇ-eu nawˬ da-euˬ cawˬ deuˬ-ahˇ taˬ ngehˇ. Shaˬ-eu zahˬ-eu jeˬ keuˆ le ngeh, nawˬ-euˬ mehˇ nmˇ-ahˇ laꞈ jeuˬ taˬ shaˇ. Gaˇ mahˇ kaˬ gaˇ jawˇ-eu nawˬ-euˬ mehˇ nmˇ naˆ maˬ tseˇ, nawˬ-euˬ dawˬ peh jawˇ-eu cawˬ deuˬ nawˬ-ahˇ caw ba nehˬ nya-eu meh.

¹¹Ngaˬ li-oˇ, zaˬ siˬ tsawˇ gahˇ ahˇ-eu tsawˇ haˬ bi pyeuꞈ laˇ-awˬ. Ngaˇ laˬ kʼaˬ cehˇ ma. Ngaˬ-ahˇ ja doeˇ mawꞈ-eu tsawˇ haˬ deuˬ-ahˇ ngaˇ ngehˬ kʼoꞈ tmˇ kʼoꞈ nehˬ nya tehꞈ-a.

¹²Nui ma-ahˇ noeˬ-eu tsawˇ haˬ-aˬ, guˆ-eu gaˆ-eu jeˬ keuˆ le gaˇ haw mawˇ-awˇ, yahˇ dzeuˇ nya tehꞈ-a. Ehˇ kʼawꞈ, nui ma-ahˇ maˬ noeˬ-eu tsawˇ haˬ-aˬ, nyiˬ paˆ-ehˇ iˇ gʼeh-awˇ, gʼawˬ shaˇ shaˬ-ehˇ gʼeh tehꞈ-a.

¹³Boeˇ miˬ siˬ kʼaˬ-euˬ dziˇ dzoˆ tsoeˬ ma lehˇ kʼamˬ peuˬ gaˇ keuˆ ni dzawˬ-eu tsawˇ haˬ-aˬ, yawˬ ha-euˬ myawˬ gahˬ ya biꞈ daˇ gaˇ keuˆ tehꞈ-a.

¹⁴Uˬ shawˬ yaw naꞈ-ehˇ tuˇ-awˇ, yaw kʼaˆ-ehˇ guˇ guˇ-ehˇ, yawˬ ha-euˬ cawˬ-ahˇ dawˬ ngehˬ gʼeh nehˬ-eu jeˬ-aˬ, yaˬ kʼehˇ yaˬ nehˬ gaˇ duˇ tehꞈ-a.

¹⁵Mehˬ boeˬ taˆ-eu miˬ zaˬ-aˬ, uˬ yehˇ maˬ tsiˇ leˇ nya gaˇ duˇ-eu meh.

¹⁶Aˬ yawꞈ ciˬ cuˇ ni jawˇ ni, tiˬ gʼaˬ-iˬ maˬ jahˇ nya-a. Jaˬ lehˇ-ahˇ maˬ diˬ naˬ nya-ehˇ, tsiˇ maˬ bi kʼaˇ-iˇ ni laꞈ kʼawˆ tiˬ byah ni maˬ bi shehˆ ahˇ nya gaˇ haw-awˬ.

¹⁷Shmˇ-ahˇ shmˇ neh ya siˬ taˆ-eu loꞈ-ehˇ, tsawˇ haˬ zaˬ tiˬ gʼaˬ tiˇ gʼaˬ ya dzaw geuꞈ-eu meh.

¹⁸Siˬ guˬ aˇ bawˇ-ahˇ haw piˇ naˇ, siˬ guˬ aˇ siˬ ya dzaˬ-eu loꞈ-ehˇ, baw leˬ-ahˇ mˇ cu nya-eu zaˬ kʼaˆ-ahˇ taˬ huiˬ taˬ mahˇ nehˬ tehꞈ-a.

¹⁹Iˇ cuꞈ-ahˇ cu hu naˇ yawˬ ha-euˬ myaˆ pyawˬ ya mawˇ-awˇ, yawˬ ha-euˬ nui ma-ahˇ cu hu naˇ, yawˬ haˇ yawˬ ha ya mawˇ tehꞈ-a.

²⁰Tsawˇ haˬ zaˬ-euˬ nui kʼahˇ-aˬ, shiˇ-eu miˇ kʼahˬ-ahˇ duˇ-awˇ,

²¹Pyuˇ hawˇ-eu shuiˇ-ahˇ miˬ dzaˬ neh lawˬ haw nya-eu loꞈ-ehˇ, tsawˇ haˬ zaˬ-euˬ myaˆ pyawˬ naˇ mehˇ-ahˇ ja ceuˬ-eu jeˬ neh lawˬ haw nya-eu meh.

²²Aˬ dzawˬ aˇ gah-ahˇ shiˇ taw tehˬ ni diˬ kʼawꞈ, aˬ dzawˬ aˇ gah gah-eu jeˬ maˬ diˬ byoˆ nya-a.

²³Yawˬ ha-euˬ yawˇ hawˇ-eu mawˇ neˇ-ahˇ yaw muiˬ paˬ-ehˇ bo saˆ-awˬ.

²⁴Aˬ jeˬ miˇ neh ehˇ naˇ, pyuˇ shuiˇ myawˬ gahˬ aˬ myah luꞈ maˬ gmˬ-ehˇ, miˇ kʼahˬ kʼawꞈ aˬ myah luꞈ maˬ ziꞈ-a.

²⁵Nyoeˇ saˬ yehˬ gʼaˬ-awˇ, nyoeˇ saˬ maˬ nmˬ laˇ dah mi naˆ-ehˇ gawˬ jawˬ baˬ gʼa-ahˇ uˬ tsuiꞈ yehˬ nya meh.

²⁶Nawˬ-euˬ yawˇ caꞈ hm neh mehˬ tsoeˬ zaꞈ nya-awˇ, ciꞈ myehꞈ ahˬ-euˬ pyuˇ neh miˇ tsaˬ zeuˇ za nya-eu meh.

²⁷Dzeˇ-eu ciꞈ myehꞈ deuˬ-ahˇ aˬ coeˇ nyehꞈ doˆ-awˇ, nawˇ hawˇ-eu nawˬ-euˬ miˬ sawˇ zaˬ deuˬ maˬ ehˇ, nawˬ-euˬ zaˬ miˬ zaˬ zaˬ kʼaˆ deuˬ maˬ ehˇ, dawˇ dehˆ nya-eu meh.