Read Akha Dawˬ daˬ 3 Bible Online

Dawˬ daˬ 3 - Akha bible

Dawˬ daˬ 3

¹Ngaˬ li-oˇ, ngaˇ mehˬ-eu tsoˆ-eu dawˬ-ahˇ naˇ haˬ geuꞈ-awˇ, ngaˬ neh mehˬ-euˬ jeˬ maˬ ngehˇ ni mˇ-awˬ.

²Ngaˬ neh mehˬ-euˬ tsoˆ-euˬ dawˬ deuˬ-aˬ, nawˬ-ahˇ bi baw bi za le-awˇ, nawˇ ziˇ baw ziˇ za tehꞈ-a.

³Saˇ jaˇ ziꞈ-eu jeˬ-ahˇ maˬ pyehˬ dzeh-ehˇ nawˬ-euˬ kawˬ lahˇ-ahˇ dah-awˇ, nawˬ-euˬ nui ma-ahˇ boꞈ ahˇ taˬ-awˬ.

⁴Nawˇ kʼoeˇ loꞈ-ehˇ jahˇ naˇ, Miˬyehˇ nawˬ-ahˇ nui kʼahˇ shiˇ-awˇ, tsawˇ haˬ zaˬ nawˬ-ahˇ nui ma tsaˬ tehꞈ-a.

⁵Nawˬ-euˬ nui ma gʼawˇ mawˇ dawˬ tawˆ luꞈ Sahˬpaˬ Miˬyehˇ-ahˇ gʼoe-awˬ. Yawˬ ha bym-eu byehˆ-eu jeˬ-ahˇ taˬ gʼoe.

⁶Nawˇ kʼaˇ mˇ kʼaˇ shaˇ-eu jeˬ laꞈ kʼoeˇ aˬ yawꞈ-ahˇ noeˬ keuˆ-awˬ. Nawˬ-ahˇ yaw tsaˬ yaw dawˇ gaˇ ma mehˬ laꞈ tehꞈ-a.

⁷Yawˬ haˇ yawˬ ha yaw gahˇ ma lehˇ taˬ noeˬ. Sahˬpaˬ Miˬyehˇ-ahˇ guˆ-awˇ, yaw haiˬ jeˬ-ahˇ gaˇ jaw jaw-awˬ.

⁸Kʼoeˇ loꞈ-ehˇ jahˇ-eu jeˬ-aˬ, nawˬ-euˬ shaˬ jiˇ naˇ gawˇ laˆ saˆ-awˇ, shaˬ yoeˬ naˇ gawˇ laˆ taˬ nehˬ laꞈ gaˇ duˇ tehꞈ-a.

⁹Nawˬ-euˬ nui ma gʼawˇ mawˇ hawˇ-eu keuˆ beh beh le-euˬ mˇ kaˇ shaˇ kaˇ damˬ nehˬ-eu laꞈ kʼoeˇ, Sahˬpaˬ Miˬyehˇ-ahˇ taˬ huiˬ taˬ mahˇ-awˬ.

¹⁰Nawˇ kʼoeˇ loꞈ-ehˇ jahˇ naˇ, nawˬ-euˬ cehˇ jiˇ-ahˇ cehˇ byah-awˇ, nawˬ-euˬ iˇ puˬ-ahˇ aˬ gaꞈ dzaˇ uiˇ byah kʼaˇ tehꞈ-a.

¹¹Ngaˬ li-oˇ, Sahˬpaˬ Miˬyehˇ-euˬ zahˇ sahˇ kʼoꞈ-ahˇ yaw zeu baw-awˇ, aˬ yawꞈ mehˬ nehˬ tsoˆ nehˬ laꞈ ngeh nui ma taˬ cawˆ.

¹²Aˬ jeˬ miˇ neh ehˇ naˇ, gaˬ-eu aˬ li-ahˇ aˬ da lawˬ haw-euˬ loꞈ-ehˇ, aˬ yawꞈ gaˬ-eu gʼaˬ-ahˇ Sahˬpaˬ Miˬyehˇ lawˬ haw-eu meh.

¹³Zaˬ siˬ tsawˇ gahˇ-ahˇ poˆ mawˇ-awˇ, noeˬ siˬ noeˬ mawˇ nya-eu jeˬ-ahˇ za-euˬ tsawˇ haˬ, guiˬ lahˬ huiˬ-eu meh.

¹⁴Aˬ jeˬ miˇ neh ehˇ naˇ, pyuˇ naˆ maˬ tseˇ zaˬ siˬ tsawˇ gahˇ gaˇ dahˇ tsoeˬ-awˇ, shuiˇ naˆ maˬ tseˇ aˇ poeˬ baw-eu meh.

¹⁵Poeˬ dui dui-eu sehˇ naˆ maˬ tseˇ zaˬ siˬ tsawˇ gahˇ aˇ poeˬ kʼaˆ dzehˬ-awˇ, tsawˇ haˬ zaˬ mehˇ juiˇ kʼaˇ juiˇ-eu yawˬ jeˬ na luꞈ, zaˬ siˬ tsawˇ gahˇ loꞈ-ehˇ tiˬ jeˬ-iˬ maˬ poeˬ-a.

¹⁶Zaˬ siˬ tsawˇ gahˇ-euˬ aˇ maˇ laꞈ-ahˇ, ziˇ baw ziˇ za-eu jeˬ ahˇ-awˇ, zaˬ siˬ tsawˇ gahˇ-euˬ aˇ caˇ laꞈ-ahˇ, pyuˇ shuiˇ hawˇ-eu myaˆ pyawˬ naˇ mehˇ ahˇ-eu meh.

¹⁷Zaˬ siˬ tsawˇ gahˇ kaˇ iˇ gaˇ laˬ kʼaˬ cehˇ-eu jeˬ byah-awˇ, aˬ yawꞈ-euˬ gaˇ ma-ahˇ nui saˇ oꞈ-eu jeˬ jaˆ-eu meh.

¹⁸Zaˬ siˬ tsawˇ gahˇ-ahˇ kʼaˇ tuˆ tehˬ taˬ-euˬ deuˬ, dehꞈ-eu saꞈ laˇ aˇ bawˇ-ahˇ tuˆ tehˬ taˬ gaˇ duˇ-awˇ, aˬ yawꞈ-ahˇ ziꞈ dah ni kʼaˇ tuˆ tehˬ taˬ-euˬ deuˬ-ahˇ, laˬ kʼaˬ cehˇ-eu jeˬ byah-eu tsawˇ haˬ lehˇ kuˇ-eu meh.

¹⁹Sahˬpaˬ Miˬyehˇ aˬ yawꞈ-euˬ zaˬ siˬ tsawˇ gahˇ-ahˇ gʼoe-awˇ, miˇ tsaˬ tahˬ kʼawˇ-ahˇ beh-euˬ meh. Aˬ yawꞈ-euˬ nui siˬ nui gahˇ-ahˇ gʼoe-awˇ, mˬ-ahˇ ciˬ tsaˬ taˬ-euˬ meh.

²⁰Aˬ yawꞈ-euˬ zaˬ siˬ tsawˇ gahˇ baˬ da neh lawˇ baˬ yoeˇ le-awˇ, mˬ dmˇ laꞈ kʼoeˇ uˬ yehˇ ga doˆ le-eu meh.

²¹Ngaˬ li-oˇ, zaˬ siˬ tsawˇ gahˇ hawˇ-eu noeˬ siˬ noeˬ mawˇ nya-eu jeˬ-ahˇ ziꞈ dah ni tuˆ teh taˬ-awˇ, nawˬ-euˬ laꞈ-ahˇ neh taˬ bi iˇ doˆ.

²²Aˬ yawꞈ-aˬ, nawˬ-euˬ nui ma-ahˇ dehꞈ-eu saꞈ laˇ biꞈ-awˇ, nawˬ-euˬ kawˬ lahˇ aˇ gʼehˇ muiˬ laˇ ni shuiˇ lawˇ dah bi dah laꞈ gaˇ duˇ tehꞈ-a.

²³Nawˬ-euˬ gaˇ ma-ahˇ nawˇ nui saˇ oꞈ-eu laꞈ kʼoeˇ ya cah-awˇ, sahˬ tiꞈ tiꞈ kʼaˇ maˬ za-aˇ.

²⁴Nawˇ nuiˇ luꞈ ngeh, guˆ-eu gaˆ-eu jeˬ maˬ jaˆ-ehˇ, nawˇ yuꞈ ngeh saˇ lehˆ ni ya yuꞈ dehˆ tehꞈ-a.

²⁵Ja pyuˬ ni keuˆ le nya-eu guˆ-eu gaˆ-eu jeˬ-ahˇ taˬ guˆ. Haiˬ-eu tsawˇ haˬ deuˬ kʼoeˇ taˆ keuˆ le-eu luˬ-iˇ seˇ-iˇ-eu jeˬ-ahˇ taˬ guˆ.

²⁶Aˬ jeˬ miˇ neh ehˇ naˇ, Sahˬpaˬ Miˬyehˇ laꞈ kʼoeˇ nawˇ nui kʼaˬ tsmˬ kʼaˇ za-awˇ, nawˬ-euˬ aˬ kuiˇ lahˇ ju-ahˇ maˬ bi paꞈ leˇ ni, aˬ yawꞈ haw piˇ tehꞈ-a.

²⁷Nawˇ yaw muiˬ jeˬ mˇ nehˬ nya-eu yamˬ-ahˇ, yaw muiˬ jeˬ mˇ nehˬ paˬ-ehˇ gʼeh-eu tsawˇ haˬ deuˬ-ahˇ, yaw muiˬ jeˬ maˬ mˇ nehˬ ni taˬ byehˇ.

²⁸Nawˬ-euˬ dawˬ peh jawˇ-eu deuˬ-ahˇ nymˬ-mˇ biꞈ nya-eu jeˬ, ni shawˬ laˬ le-awˬ lehˇ ehˇ nehˬ-awˇ, aˇ nah taˬ teh jiˆ nehˬ.

²⁹Nawˬ-ahˇ jah-awˇ nawˬ-euˬ dawˬ peh jawˇ-eu deuˬ-ahˇ, yaw doeˇ jahˇ-eu gaˇ kawˆ taˬ kawˆ.

³⁰Nawˬ-ahˇ yaw doeˇ maˬ jahˇ-eu tsawˇ haˬ-ahˇ, gaˇ dahˇ maˬ tsoeˬ gaˇ tsawˇ pyehˇ taˬ pyehˇ.

³¹Yaw haiˬ jeˬ mˇ-eu tsawˇ haˬ-ahˇ myaˆ naˆ-awˇ, aˬ yawꞈ loꞈ-ehˇ mˇ ma lehˇ taˬ noeˬ tsehˆ.

³²Yawˬ haiˬ jeˬ mˇ-eu tsawˇ haˬ-ahˇ Sahˬpaˬ Miˬyehˇ nui daˆ daˆ-awˇ, Yaw tsaˬ yaw dawˇ tsawˇ haˬ-ahˇ aˬ yawꞈ jah coeˇ-eu meh.

³³Haiˬ-eu tsawˇ haˬ deuˬ-euˬ nymˇ jiˇ-ahˇ Sahˬpaˬ Miˬyehˇ yaˬ kʼehˇ yaˬ-awˇ, yaw tsaˬ yaw dawˇ tsawˇ haˬ deuˬ-euˬ nymˇ jiˇ-ahˇ aˬ yawꞈ guiˬ lahˬ biꞈ-eu meh.

³⁴Kʼahˬ sehˇ jehˆ-eu tsawˇ haˬ deuˬ-ahˇ aˬ yawꞈ yehˬ bawˬ-ehˇ gʼeh nehˬ-awˇ, nui nahˬ nui yu ahˇ-eu deuˬ-ahˇ aˬ yawꞈ nui ma tsaˬ-eu meh.

³⁵Zaˬ siˬ tsawˇ gahˇ ahˇ-eu tsawˇ haˬ myaˆ pyawˬ naˇ mehˇ za-awˇ, aˬ dzawˬ aˇ gah deuˬ daˬ ya ga tehꞈ-a.