Read Akha Dawˬ daˬ 30 Bible Online

Dawˬ daˬ 30 - Akha bible

Dawˬ daˬ 30

¹Dawˬ heu deuˬ-aˬ, Yaˬkʼeh-euˬ aˬ li Aˬguˇlaˆ neh ehˇ taˬ-euˬ maˇ jawˆ ni gʼeh-eu dawˬ pyeuꞈ-eu meh. Miˬyehˇ ngaˬ nehˬ-ehˇ maˬ jawˇ-a. Miˬyehˇ ngaˬ nehˬ-ehˇ maˬ jawˇ-a. Ngaˇ tiˬ jeˬ-iˬ gaˇ dahˇ maˬ paˇ tsoeˬ miˇ-a.

²Ngaˇ tsawˇ haˬ-ahˇ maˬ duˇ ni, jeˬ zaˬ-ahˇ duˇ miˇ-a. Tsawˇ haˬ zaˬ-euˬ nui ma maˬ paˇ ahˇ miˇ-a.

³Ngaˇ zaˬ siˬ tsawˇ gahˇ tiˬ pawꞈ-iˬ maˬ ahˇ-ehˇ, Miˬyehˇ gaˇ kawˆ tiˬ jeˬ-iˬ maˬ siˬ nya nya.

⁴Mˬ taˆ tsawˇ gahˇ dawˬ tawˆ luꞈ tuˆ tehˬ taˬ-euˬ aˬ suˇ gʼaˬ-a. Jaˬ lehˇ-ahˇ nyehꞈ tehˬ taˬ-euˬ aˬ suˇ gʼaˬ-a. Iˇ cuꞈ-ahˇ saˬ paˇ neh paꞈ cu cu taˬ-euˬ aˬ suˇ gʼaˬ-a. Miˇ tsaˬ tahˬ kʼawˇ-euˬ miˇ kaˬ dehˬ biˇ-euˬ aˬ suˇ gʼaˬ-a. Nawˇ siˬ nya-eu jeˬ maˇ-iˬ, aˬ yawꞈ aˬ suˇ gʼaˬ-a. Aˬ yawꞈ-euˬ aˬ li aˬ suˇ gʼaˬ-a.

⁵Miˬyehˇ neh saˇ jaˇ kʼaˇ dzaˬ taˬ-euˬ yawˬ jeˬ na luꞈ ziꞈ-eu meh. Aˬ yawꞈ-ahˇ kʼaˇ gʼoe-eu tsawˇ haˬ deuˬ-ahˇ aˬ yawꞈ yaw muiˬ paˬ-ehˇ haw piˇ-eu meh.

⁶Aˬ yawꞈ neh maˬ ehˇ-euˬ dawˬ-ahˇ aˬ yawꞈ neh ehˇ-euˬ meh lehˇ nawˇ dawˬ aˇ dzehˬ ngehˬ naˇ, aˬ yawꞈ nawˬ-ahˇ bye-awˇ, nawˬ neh jaˬ myawꞈ myawꞈ-euˬ gaˇ kawˆ doˆ laˇ ni aˬ yawꞈ jahˇ tehꞈ-a.

⁷Miˬyehˇ-oˇ, ngaˇ maˬ shiˇ mi naˆ-ehˇ ngaˬ-ahˇ guiˬ lahˬ nyiˬ jeˬ biꞈ laꞈ lehˇ shaˇ-eu ma.

⁸Jaˬ myawꞈ myawꞈ-eu tsawˇ haˬ taˬ bi pyeuꞈ laꞈ. Smˇ muiˬ muiˬ-eu tsawˇ haˬ maˬ ehˇ, iˇ shaˬ shaˬ-eu tsawˇ haˬ maˬ ehˇ, taˬ bi pyeuꞈ laꞈ. Aˬ yawꞈ nah yawꞈ dzaˬ loꞈ dawˇ loꞈ-eu guiˬ lahˬ biꞈ laꞈ.

⁹Ngaˇ aˇ dzehˬ jaˆ laˇ naˇ, nawˬ-ahˇ maˬ loˬ lehˇ ngaˇ ehˇ tehꞈ-a. Ehˇ kʼawꞈ, ngaˇ iˇ shaˬ shaˬ naˇ, smˇ kʼoeˬ kʼoeˬ-awˇ ngaˬ-euˬ Miˬ yehˇ nui ma maˬ saˇ-eu jeˬ mˇ gaˇ guˆ nya.

¹⁰Zaˬ kʼaˆ-euˬ yaw doeˇ aˬ yawꞈ-euˬ baw leˬ-ahˇ taˬ ja mehˬ. Yaˬ kʼehˇ yaˬ-eu jeˬ-ahˇ nawˇ ya daˬ tehꞈ-a.

¹¹Aˬ da-ahˇ yaˬ kʼehˇ yaˬ-awˇ, aˬ ma-ahˇ maˬ taˬ huiˬ-eu tsawˇ haˬ jawˇ-eu meh.

¹²Yawˬ haˇ yawˬ ha yaw shawˇ ma lehˇ noeˬ-eu jawꞈ dui dui-eu tsawˇ haˬ jawˇ-eu meh.

¹³Yawˬ haˇ yawˬ ha maˬ gaˇ dui dui miˇ-a lehˇ noeˬ-eu tsawˇ haˬ jawˇ-eu meh.

¹⁴Shaˬ zaˬ zahˬ zaˬ-ahˇ gʼawˬ shaˬ maˬ gaˬ ni, smˇ kʼaˆ kʼaˆ-awˇ dehꞈ dzaˬ-eu tsawˇ haˬ jawˇ-eu meh.

¹⁵Yehꞈ toˆ aˬ ma aˬ buˇ nyiˬ buˇ jawˇ-awˇ, nyiˬ buˇ luꞈ “Biꞈ laꞈ-awˬ” lehˇ myahˇ-euˬ meh. Tiˬ jawˇ-iˬ nui kʼahˇ maˬ byah-eu oeˬ jeˬ jaˆ-eu meh.

¹⁶Shiˇ-eu miˇ kʼahˬ, zaˬ maˬ jawˇ-eu aˬ ma, uˬ yehˇ-ahˇ dawˬ luꞈ-eu gui coˇ ni gʼeh-eu miˇ tsaˬ, maˬ laˆ miˆ nya-eu miˬ dzaˬ, heu oeˬ jeˬ meh.

¹⁷Yawˬ ha aˬ da-ahˇ cehꞈ lehꞈ ka niˇ gʼa-awˇ, aˬ ma ma mawˬ-ahˇ maˬ haw nahˇ-eu tsawˇ haˬ-aˬ, jeˬ shiˇ kʼaˬ dzeˇ neh bi dzaˬ-awˇ, dzeˇ ngawˇ neh myaˆ nuiˆ bi keuꞈ doˆ-eu tsaˬ meh.

¹⁸Ngaˇ maˬ noeˬ doˆ coeˇ-ehˇ zahˬ dui dui leˇ-eu oeˬ jeˬ-aˬ,

¹⁹mˬ kʼoeˇ taˆ zaw-eu kʼaˬ dzeˇ, lo guˇ-ahˇ cah-eu aˇ lawˇ, iˬ ma laˆ shaˆ gʼahˇ ceh gaˇ daˬ mawˇ nya-eu saˇ baoˬ, kʼaˬ dzeˇ zaˬ hawˇ-eu zaˬ miˬ zaˬ gaˬ-eu, heu oeˬ jeˬ meh.

²⁰Saˇ jaˇ maˬ jawˇ-eu miˬ zaˬ tiˬ gʼaˬ-euˬ bawˬ toˆ-aˬ, aˬ cawˬ aˬ da nehˬ-ehˇ joe-awˇ, iˇ cuꞈ dzuiꞈ shawˇ gʼaˬ-awˇ neh, “Ngaˇ tiˬ jeˬ-iˬ maˬ bahˬ” lehˇ ehˇ nya-eu meh.

²¹Miˇ tsaˬ tahˬ kʼawˇ-ahˇ coeˬ-eu oeˬ jeˬ jaˆ-eu meh.

²²zaˬ kʼaˆ sahˬ paˬ pyeuꞈ laˇ-eu, aˬ dzawˬ aˇ gah maˬ dzaˬ maˬ dawˇ jiˇ coeˇ-eu,

²³kʼaˇ jawˇ kʼaˇ deuˬ bye-eu zaˬ miˬ smˇ miˇ iˇ kʼaˇ za-eu, zaˬ miˬ zaˬ zaˬ kʼaˆ meh leˬ-euˬ jawˇ zaˇ-ahˇ jawˇ leˇ-eu, heu oeˬ jeˬ meh.

²⁴Gʼawˇ mawˇ nyiˇ dui dui kʼawꞈ, bym dui nya dui dui-eu aˇ mawˇ oeˬ jeˬ miˇ tsaˬ kʼoeˇ taˆ jawˇ-eu meh.

²⁵Gʼawˇ mawˇ nyiˇ dui dui-awˇ gʼaˬ teˬ kʼawꞈ, jawˇ la yamˬ-ahˇ dzaˬ dzaˬ dawˇ dawˇ poˆ uiˬ taˬ nya-eu aˇ ho tiˬ jeˬ,

²⁶Nahˬ jawˆ ni gʼeh kʼawꞈ lo guˇ doe ni bahˬ bahˬ-awˇ jawˇ-eu sahˬ paˬ pyaˬ iˬ[1] tiˬ jeˬ,

²⁷Sahˬ paˬ maˬ baw kʼawꞈ, aˇ maꞈ maꞈ-ehˇ cah nya-eu nyehˇ bahˇ tiˬ jeˬ hawˇ-eu,

²⁸Laꞈ kʼawˆ-ahˇ tuˆ zaꞈ nya ni nyiˇ kʼawꞈ, sahˬ paˬ-euˬ hawˇ nymˇ doe ni jawˇ kʼaˇ za-eu gʼaˇ gʼawˬ gʼawˬ zaˬ[2] tiˬ jeˬ meh.

²⁹Gaˇ ma cah ngeh haw muiˬ dui dui-eu oeˬ jeˬ-aˬ,

³⁰Jeˬ zaˬ dawˬ tawˆ luꞈ laꞈ kʼoeˇ aˬ cawˬ naˆ maˬ tseˇ gʼaˬ kʼaˆ dzehˬ-awˇ, guˆ-eu nui ma maˬ ahˇ-eu aˇ laˬ jaˬ shiˇ tiˬ jeˬ,

³¹ciꞈ myehꞈ tiˬ jeˬ, mˇ yeuꞈ mˇ yeuꞈ-ehˇ cah-eu ya ciˆ ya poeˇ tiˬ jeˬ hawˇ-eu, miˇ kʼahˬ zaˬ mehˬ shi nuiˇ-eu sahˬ paˬ tiˬ jeˬ meh.

³²Nawˇ aˬ dzawˬ aˇ gah gah-awˇ nui ma huiˬ-eu laꞈ kʼoeˇ yaw haiˬ jeˬ mˇ luꞈ naˇ, gʼaˬ naˬ naˬ-awˇ shaˇ noeˬ-awˬ.

³³Mawˇ neˇ aˬ coeˇ-ahˇ kawˆ naˇ, tawˇ baˆ[3] doˆ le-eu meh. Aˬ cawˬ-euˬ naˇ mehˇ-ahˇ kʼoˆ naˇ, naˇ mehˇ shiˬ yoeˇ le-eu meh. Aˬ cawˬ-ahˇ nui ma laˆ pehˇ naˇ, yawˬ ha shaˬ laˇ-eu meh.