Read Akha Dawˬ daˬ 4 Bible Online

Dawˬ daˬ 4 - Akha bible

Dawˬ daˬ 4

¹Zaˬ deuˬ-oˇ, aˬ da-euˬ dawˬ mehˬ dawˬ tsoˆ naˇ haˬ geuꞈ-awˬ. Nawˇ noeˬ siˬ noeˬ mawˇ nya laˇ ni, yaw muiˬ paˬ-ehˇ naˇ haˬ geuꞈ-awˬ.

²Ngaˇ nawˬ-ahˇ mehˬ-eu jeˬ muiˬ dui dui-eu miˇ neh, maˬ ngehˇ ni juiˇ uiˬ taˬ-awˬ.

³Ngaˇ ngaˬ da-euˬ aˬ li pyeuꞈ luꞈ ngeh, ngaˬ ma-euˬ aˬ li zaˬ nahˬ pyeuꞈ luꞈ ngeh,

⁴ngaˬ da ngaˬ-ahˇ heu loꞈ-ehˇ mehˬ nehˬ laꞈ-euˬ meh. Ngaˬ-euˬ dawˬ-ahˇ nui ma laꞈ kʼoeˇ maˬ ngehˇ ni juiˇ taˬ-awˇ, ngaˇ mehˬ-eu jeˬ-ahˇ ziꞈ dah ni tuˆ tehˬ-awˇ dehꞈ-awˬ.

⁵Ngaˬ-euˬ kʼaˬ meh-ahˇ doˆ le-euˬ dawˬ-ahˇ taˬ ngehˇ, taˬ byehˇ dzeh. Zaˬ siˬ tsawˇ gahˇ poˆ-awˬ. Noeˬ siˬ noeˬ mawˇ nya laˇ ni leh jeh-awˬ.

⁶Zaˬ siˬ tsawˇ gahˇ-ahˇ nawˇ maˬ byehˇ dzeh naˇ, aˬ yawꞈ nawˬ-ahˇ bo saˆ tehꞈ-a. Aˬ yawꞈ-ahˇ nawˇ gaˬ naˇ, aˬ yawꞈ nawˬ-ahˇ haw piˇ tehꞈ-a.

⁷Dawˬ tawˆ luꞈ naˆ maˬ tseˇ nawˇ poˆ paˬ-ehˇ gʼeh-eu jeˬ-aˬ, zaˬ siˬ tsawˇ gahˇ meh. Nawˇ aˬ geu jeˬ za-eu maˬ kaˬ, noeˬ siˬ noeˬ mawˇ nya-eu jeˬ za ni leh jeh-awˬ.

⁸Zaˬ siˬ tsawˇ gahˇ-ahˇ taˬ huiˬ naˇ, aˬ yawꞈ nawˬ-ahˇ ciˬ huiˬ ciˬ mahˇ tehꞈ-a. Aˬ yawꞈ-ahˇ nawˇ byaˇ cuꞈ naˇ, aˬ yawꞈ nawˬ-ahˇ taˬ huiˬ taˬ mahˇ tehꞈ-a.

⁹Aˬ yawꞈ nawˬ-ahˇ aˇ yehˆ uˬ kʼoˆ bi kʼoˆ nehˬ laꞈ-awˇ, muiˬ dui dui-eu shuiˇ uˬ kʼoˆ biꞈ laꞈ tehꞈ-a.

¹⁰Ngaˬ li-oˇ, nawˇ ziˇ baw ziˇ za ni, ngaˬ neh ehˇ-euˬ dawˬ-ahˇ yaw muiˬ paˬ-ehˇ naˇ haˬ geuꞈ-awˬ.

¹¹Ngaˇ nawˬ-ahˇ zaˬ siˬ tsawˇ gahˇ gaˇ ma mehˬ nehˬ-awˇ, dehꞈ-eu gaˇ ma yaw dawˇ kahˇ sheuˬ mehˬ-euˬ ma.

¹²Nawˇ gaˇ ma cah ngeh pehˆ toˆ kʼaˇ maˬ za-ehˇ, nawˇ cehˆ coeˬ coeˬ ngeh sahˬ tiꞈ maˬ tiꞈ-aˇ.

¹³Mehˬ gʼaˬ tsoˆ gʼaˬ-euˬ jeˬ maˬ bi byoˆ-iˇ ni, ziꞈ dah bi tuˆ tehˬ taˬ-awˬ. Zaˬ siˬ tsawˇ gahˇ-ahˇ yaw muiˬ paˬ-ehˇ haw lahˇ taˬ-awˬ. Aˬ yawꞈ-aˬ, nawˬ-euˬ dehꞈ-eu saꞈ laˇ meh.

¹⁴Haiˬ-eu tsawˇ haˬ deuˬ-euˬ gaˇ ma-ahˇ taˬ cah. Maˬ muiˬ maˬ jaˬ-eu tsawˇ haˬ-ahˇ taˬ dzaw geuꞈ.

¹⁵Aˬ yawꞈ maꞈ-ahˇ gaˇ jaw jaw-awˬ. Aˬ yawꞈ maꞈ mˇ-eu jeˬ taˬ mˇ. Yawˬ paw yawˬ ciˬ pyawˇ-awˇ cah dzeuˇ-awˬ.

¹⁶Yaw lehˬ jeˬ maˬ ya mˇ naˇ, aˬ yawꞈ maꞈ maˬ yuꞈ kʼaˆ leˇ-a. Aˬ cawˬ-ahˇ maˬ ya laˆ coeˬ laˆ ciˆ kʼoeˇ keuˆ ni maˬ yuꞈ kʼaˆ leˇ-a.

¹⁷Haiˬ-eu jeˬ mˇ-awˇ tsawˇ haˬ-ahˇ sehꞈ-eu-aˬ, aˬ yawꞈ maꞈ gʼaˇ duˬ hawˬ dzaˬ-awˇ iˇ cuꞈ dawˇ-eu naˆ ni tehꞈ meh.

¹⁸Yaw tsaˬ yaw dawˇ tsawˇ haˬ-euˬ gaˇ ma-aˬ, uˬ shawˬ paw bya-eu nahˇ ma yaw shehꞈ-ahˇ duˇ-awˇ, nah loˆ ceh laˇ ngeh keuˆ ni, ngehˬ jawˇ ngehˬ bya-eu meh.

¹⁹Haiˬ-eu tsawˇ haˬ-euˬ gaˇ ma-aˬ, la tsehˆ ngeh miˇ loꞈ-ehˇ zahˇ-awˇ, pehˆ toˆ laˇ-eu jeˬ-ahˇ maˬ mawˇ nya-a.

²⁰Ngaˬ li-oˇ, ngaˬ-euˬ dawˬ-ahˇ naˇ haˬ geuꞈ-awˇ, ngaˬ neh ehˇ-euˬ jeˬ-ahˇ naˬ bawˇ ciˬ kʼmˇ geuꞈ-awˬ.

²¹Dawˬ kʼoeˇ deuˬ maˬ bi iˇ byoˆ ni, nawˬ-euˬ nui ma laꞈ kʼoeˇ juiˇ taˬ-awˬ.

²²Dawˬ kʼoeˇ deuˬ-ahˇ za-euˬ tsawˇ haˬ, dehꞈ-eu saꞈ laˇ za gaˇ duˇ-awˇ, yaw muiˬ jawˇ saˇ bi doˆ-eu meh.

²³Dehꞈ jeˬ dehꞈ kawˆ nui ma-ahˇ doˆ le-euˬ miˇ neh, nui ma-ahˇ noeˬ-awˇ yaw dehꞈ dehꞈ-awˬ.

²⁴Maˬ tsaˬ-eu dawˬ taˬ tmˇ. Maˬ dawˇ-eu dawˬ taˬ ngehˬ.

²⁵Nawˬ-euˬ myaˆ nuiˆ mehˬ hu paw dawˇ coe ni haw-awˇ, shaꞈ dawˇ-eu jeˬ-ahˇ uˬ duˬ taˬ ciˬ ceuˬ.

²⁶Nawˇ kʼaˇ mˇ-eu jeˬ gaˇ kawˆ yaw muiˇ kawˆ duˬ taˬ-awˬ. Nawˬ neh kʼaˇ mˇ-euˬ jeˬ guiˬ lahˬ baw tehꞈ-a.

²⁷Gaˇ oˆ gaˇ taˆ kuiˇ toꞈ maˬ ciˬ ahˇ ni, yaw haiˬ jeˬ-ahˇ yahˇ-awˇ cah-awˬ.