Read Akha Dawˬ daˬ 5 Bible Online

Dawˬ daˬ 5 - Akha bible

Dawˬ daˬ 5

¹Ngaˬ li-oˇ, ngaˬ-euˬ zaˬ siˬ tsawˇ gahˇ-ahˇ dzaw geuꞈ-awˇ, ngaˬ-euˬ noeˬ siˬ noeˬ mawˇ nya-eu jeˬ-ahˇ naˬ bawˇ ciˬ kʼmˇ geuꞈ-awˬ.

²Kʼoeˇ loꞈ-ehˇ jahˇ naˇ, nawˇ yaw muiˬ yaw doeˇ tseˇ paˆ nya laˇ-awˇ, nawˬ neh ngehˬ-euˬ dawˬ zaˬ siˬ tsawˇ gahˇ ahˇ tehꞈ-a.

³Aˬ cawˬ aˬ ma-euˬ mehˬ luˬ byaˬ byaˬ uiˇ loꞈ-ehˇ coeˇ-awˇ, aˬ yawꞈ ngehˬ-eu dawˬ tsiˇ lehꞈ taˬ-euˬ loꞈ-ehˇ naˇ haˬ muiˬ tehꞈ-a.

⁴Aˇ saˬ saˬ laˇ ngeh, doꞈ yawˇ loꞈ-ehˇ kʼaˬ-awˇ, mi seuˬ nyiˬ pyawˬ tsoꞈ-eu mi cehˇ loꞈ-ehˇ taˆ-eu meh.

⁵Shiˇ-eu miˇ kʼahˬ paw aˬ yawꞈ kuiˇ toꞈ ciˬ gʼeh-eu meh. Aˬ yawꞈ-euˬ gaˇ ma-aˬ, shiˇ-eu gaˇ ma meh.

⁶Dehꞈ-eu gaˇ ma gaˇ kawˆ aˬ yawꞈ maˬ shaˇ noeˬ-a. Mehˬ shiˬ kʼaˇ pyawˇ-eu paw iˇ-awˇ, yawˬ ha gaˇ ma maˬ siˬ nya-a.

⁷Ngaˬ li deuˬ-oˇ, ngaˬ-euˬ dawˬ-ahˇ nymˬ-mˇ naˇ haˬ-awˇ, ngaˬ-euˬ kʼaˬ meh-ahˇ doˆ le-euˬ dawˬ-ahˇ tiˬ jawˇ-iˬ taˬ gʼawˬ-iˇ.

⁸Kʼoeˇ loꞈ-ehˇ gʼeh-eu zaˬ miˬ zaˬ-ahˇ gaˇ mahˇ kaˬ gaˇ yahˇ pawˇ-awˇ, aˬ yawꞈ-euˬ nymˇ laˇ gʼoˆ dawˬ peh taˬ iˇ.

⁹Nawˇ maˬ yahˇ pawˇ naˇ, nawˬ-euˬ myaˆ pyawˬ naˇ mehˇ aˬ cawˬ laꞈ-ahˇ ahˇ leˇ-awˇ, gʼawˬ shaˬ gaˬ-eu maˬ siˬ nya-euˬ deuˬ-euˬ laꞈ-ahˇ, nawˇ ziˇ ya jiˇ tehꞈ-a.

¹⁰Nawˬ-euˬ pyuˇ shuiˇ myawˬ gahˬ deuˬ, boeˇ miˬ shiˬ kʼaˬ-euˬ laꞈ-ahˇ ahˇ leˇ-awˇ, nawˬ neh kʼaˇ mˇ kʼaˇ shaˇ za-euˬ jeˬ, aˬ cawˬ-ahˇ oꞈ tehꞈ-a.

¹¹Nawˇ shiˇ-eu keuˆ le ngeh mahˇ mahˇ-ehˇ ya ga-awˇ, nawˬ-euˬ shaˬ jiˇ hawˇ-eu shaˬ yoeˬ bi dzaˬ byoˆ jiˇ tehꞈ-a.

¹²Kʼoeˇ ngeh nawˇ heu loꞈ-ehˇ ehˇ tehꞈ-a. “Aˬ jeˬ miˇ neh ngaˇ zahˇ sahˇ kʼoꞈ-ahˇ bye-awˇ, mehˬ nehˬ tsoˆ nehˬ laꞈ-euˬ dawˬ-ahˇ maˬ naˇ haˬ ni dehꞈ-euˬ nga.

¹³Ngaˬ-ahˇ mehˬ-eu tsoˆ-eu deuˬ-euˬ dawˬ-ahˇ ngaˇ maˬ naˇ haˬ-ehˇ, aˬ yawꞈ maꞈ-euˬ dawˬ-ahˇ naˬ bawˇ maˬ ciˬ kʼmˇ-aˬ.

¹⁴Tsawˇ haˬ aˇ maꞈ uiˬ leˇ bymˇ leˇ taˬ-euˬ mehˬ shi, ngaˇ daˬ ya ga sehꞈ-eu keu le-euˬ nya.”

¹⁵Nawˬ-eu miˬ zaˬ-ahˇ saˇ jaˇ ziꞈ-awˇ, nawˬ-euˬ nui gaˬ aˬ yawꞈ-ahˇ tehꞈ-ehˇ biꞈ-awˬ.

¹⁶Aˬ cawˬ aˬ ma o neh dehꞈ le-euˬ aˬ buˇ aˬ li deuˬ, nawˬ-euˬ gʼaˇ duˬ gaˇ dahˇ maˬ tsoeˬ-a.

¹⁷Nawˬ-ahˇ ngehˬ bi gʼeh-eu gʼaˇ duˬ nawˬ-euˬ zaˬ cu huiˬ-awˬ. Boeˇ miˬ siˬ kʼaˬ deuˬ nawˬ-ahˇ ngehˬ maˬ gʼeh nya-a.

¹⁸Nawˬ-euˬ miˬ zaˬ-ahˇ nui kʼahˇ shiˇ-awˇ, nawˬ neh sheuˬ dahˬ dzaˬ-euˬ gʼaˬ nehˬ-ehˇ byawˬ gʼa-awˬ.

¹⁹Kʼaˬ tsehˆ tsehˆ kʼaˇ loꞈ-ehˇ aˇ gʼehˇ muiˬ dui dui-eu, nawˬ-euˬ miˬ zaˬ nawˬ-ahˇ muˇ gaˇ cehˇ gʼa-awˬ, aˬ yawꞈ-euˬ nui gaˬ neh nawˬ-ahˇ bi tsahˇ lahˇ-awˬ.

²⁰Ngaˬ li-oˇ, aˬ jeˬ miˇ neh nawˬ-euˬ nui gaˬ aˬ cawˬ aˬ ma-ahˇ biꞈ nmˇ. Aˬ jeˬ miˇ neh aˬ cawˬ aˬ ma muˇ gaˇ cehˇ gʼa te.

²¹Tsawˇ haˬ zaˬ-euˬ iˇ jeˬ laˇ kawˆ-ahˇ Sahˬ paˬ Miˬ yehˇ mawˇ-awˇ, aˬ yawꞈ-euˬ kuiˇ toꞈ-ahˇ haw luꞈ meh.

²²Haiˬ-euˬ tsawˇ haˬ iˬ baˇ mˇ-eu lahˇ ju kʼmˇ gaˇ duˇ-awˇ, yawˬ ha-euˬ iˬ baˇ lahˇ ju-ahˇ yawˬ ha teuˆ paꞈ-eu meh.

²³Yawˬ ha-euˬ nui ma-ahˇ maˬ gʼaˬ leˇ-eu miˇ neh, shiˇ gaˇ ya keuˆ-awˇ, aˬ dzawˬ aˇ gah-euˬ bahˬ toˆ-aˬ, lmˬ bymˇ-ahˇ iˇ-eu gaˇ ma meh.