Read Akha Dawˬ daˬ 6 Bible Online

Dawˬ daˬ 6 - Akha bible

Dawˬ daˬ 6

¹Ngaˬ li-oˇ, maˬ siˬ maˬ suˇ-eu tsawˇ haˬ gʼaˇ duˬ nawˇ kamˬ-awˇ, aˬ cawˬ-euˬ dziˇ dzoˆ pi paˬ-ehˇ pyeuꞈ laˇ naˇ,

²nawˬ neh ngehˬ-euˬ dawˬ-ahˇ nawˇ teuˆ lahˇ-awˇ, nawˬ neh kʼmˇ-euˬ lahˇ ju-ahˇ nawˇ paꞈ le naˇ,

³heu loꞈ-ehˇ jahˇ-awˇ yawˬ haˇ yawˬ ha ka kʼoꞈ-awˬ. Aˬ cawˬ-euˬ baoˬ nawˬ-ahˇ laˆ lahˇ-euˬ miˇ neh, yaw kawˇ-ehˇ le-awˇ shaˇ ju leˇ-awˬ.

⁴Yuꞈ yuꞈ-ehˇ taˬ paˇ jawˇ. Jawˇ naˬ taˬ paˇ mˇ.

⁵Saˬ loꞈ loꞈ-eu gʼaˬ-euˬ laꞈ-ahˇ, ciˇ haˬ cehˆ dzeuˇ-eu leh jeh-eu loꞈ-ehˇ, sehˬ toˆ kʼmˇ-eu gʼaˬ-eu mehˬ shi, aˇ jiˇ behˇ lehˆ-eu leh jeh-eu loꞈ-ehˇ, ya buˬ ya law-iˇ ni teuˆ-awˬ.

⁶Yaw doeˇ doeˇ-eu tsawˇ haˬ deuˬ-oˇ, aˇ ho jawˇ gaˇ iˇ-awˬ. Aˇ ho kʼoeˇ deuˬ mˇ gaˇ dzaw geuꞈ-awˬ.

⁷Dzoeˬ ma piˇ ma maˬ baw-ehˇ, aˬ yuiꞈ aˬ tsu geuꞈ-awˇ uˆ lahˇ-eu gʼaˬ maˬ jawˇ kʼawꞈ,

⁸tsahˬ gaˆ yamˬ-ahˇ dzaˬ-eu gʼaˇ duˬ, jawˇ la yamˬ-ahˇ dzaˇ sha ahˇ-eu siˬ nya meh.

⁹Yaw doeˇ doeˇ-eu tsawˇ haˬ-oˇ, aˇ myah keuˆ ni yuꞈ-eu gʼeh te. Yuꞈ zaˇ-ahˇ neh aˬ myah tuˇ laˇ-eu gʼeh te.

¹⁰“Tiˬ kʼehˇ kʼehˬ yuꞈ kʼaˆ la siˬ. Tiˬ kʼehˇ kʼehˬ yuꞈ niˇ gʼa la siˬ. Laꞈ pyehꞈ pyehꞈ-awˇ tiˬ kʼehˇ kʼehˬ naˬ la siˬ” lehˇ la.

¹¹Iˇ shaˬ shaˬ-eu jeˬ nawˇ jawˇ gaˇ ga keuˆ le-awˇ, hawˬ mehꞈ shaˬ-eu jeˬ nawˬ-ahˇ tahˇ joe joe le tehꞈ-a.

¹²Gaˇ dahˇ maˬ tsoeˬ-eu maˬ muiˬ-eu tsawˇ haˬ, maˬ dawˇ-eu dawˬ ngehˬ ngehˬ-ehˇ cah-eu meh.

¹³Myaˆ nuiˆ kʼoˆ tehˆ myawˆ myawˆ-ehˇ, kuiˇ mehˆ liˆ liˆ-ehˇ, laꞈ noeˇ toeˬ ceh toeˬ ceh-ehˇ,

¹⁴nui ma laꞈ gʼoꞈ-ahˇ yaw haiˬ jeˬ shaˇ sawˇ luꞈ-awˇ, iˬ dehˬ iˬ ceh poˆ-eu maˬ naˬ leˇ-a.

¹⁵Kʼoeˇ miˇ neh, aˬ yawꞈ kʼoeˇ taˆ, guˆ-eu gaˆ-eu jeˬ ja pyuˬ ni keuˆ le-awˇ, tiˬ jawˇ-iˬ maˬ laˆ saˆ taˬ nya ni kʼehꞈ-iˇ kʼoeˆ-iˇ tehꞈ-a.

¹⁶Sahˬpaˬ Miˬyehˇ bye-eu koꞈ jeˬ jaˆ-awˇ, aˬ yawꞈ nui daˆ daˆ-eu shiꞈ jeˬ jaˆ meh.

¹⁷Jahˇ gʼeh-eu myaˆ nuiˆ tiˬ jeˬ, jaˬ myawꞈ myawꞈ-eu mehˬ laˇ tiˬ jeˬ, maˬ bahˬ-eu tsawˇ haˬ-ahˇ sehꞈ-eu aˬ laꞈ tiˬ jeˬ,

¹⁸maˬ muiˬ-eu jeˬ shaˇ sawˇ-eu nui ma tiˬ jeˬ, yaw haiˬ mˇ-eu kawˇ-eu aˬ kuiˇ tiˬ jeˬ,

¹⁹jaˬ myawꞈ myawꞈ-eu tsawˇ haˬ tiˬ jeˬ, iˬ dehˬ iˬ ceh poˆ-eu tsawˇ haˬ tiˬ jeˬ.

²⁰Ngaˬ li-oˇ, nawˬ da neh mehˬ-euˬ dawˬ-ahˇ taˬ ngehˇ, nawˬ ma neh tsoˆ-euˬ dawˬ-ahˇ taˬ byehˇ.

²¹Dawˬ kʼoeˇ deuˬ nawˬ-euˬ nui ma-ahˇ paꞈ tawꞈ-awˇ, nawˬ-euˬ kawˬ lahˇ-ahˇ dah-awˬ.

²²Nawˇ gaˇ ma cah ngeh, dawˬ kʼoeˇ deuˬ nawˬ-ahˇ mehˬ nehˬ-awˇ, nawˇ yuꞈ kʼaˆ ngeh nawˬ-ahˇ loꞈ piˇ-awˇ, nawˇ noeˬ laˇ ngeh, nawˬ-ahˇ dawˬ ja ja cawˬ tehꞈ-a.

²³Dawˬ mehˬ dawˬ tsoˆ tsoˆ-eu jeˬ-aˬ, tsiˇ kʼmˬ yaw shehꞈ loꞈ-ehˇ duˇ-awˇ, nawˬ-ahˇ dehꞈ jeˬ dehꞈ kawˆ gaˇ ma mehˬ-eu meh.

²⁴Maˬ muiˬ-eu zaˬ miˬ zaˬ nehˬ-ehˇ maˬ bahˬ-ehˇ, aˬ cawˬ aˬ ma muˇ juˇ juˇ gaˇ maˬ naˇ haˬ ni, nawˬ-ahˇ mehˬ laꞈ tsoˆ laꞈ-eu meh.

²⁵Aˇ gʼehˇ muiˬ gaˇ mehˇ juiˇ taˬ juiˇ. Aˬ yawꞈ-euˬ myaˆ nuiˆ neh taˬ bi ju lahˇ.

²⁶Meh maˬ laˇ-ahˇ kaˬ muˇ tiˬ siˬ biꞈ-awˇ ja juˬ nya kʼawꞈ, aˬ cawˬ aˬ ma nawˬ-euˬ uˬ kʼawˇ poeˬ gaˇ taˬ ngehˇ.

²⁷Bawˇ kʼahˇ-ahˇ miˬ dzaˬ tsi ahˇ-awˇ, mehˬ tsoeˬ maˬ bi puiˆ dzaˬ ni cah nya meh loˇ.

²⁸Neˇ hoˬ ni gʼeh-eu miˬ dzaˬ miˬ jiˆ kʼoeˇ taˆ cah-awˇ, aˬ kuiˇ byahˇ oˬ maˬ oˬ laˇ ni jawˇ nya meh loˇ.

²⁹Kʼoeˇ loꞈ-ehˇ duˇ ni aˬ cawˬ aˬ ma-ahˇ bahˬ-euˬ tsawˇ haˬ, kʼehˬ-eu kʼaˆ-eu jeˬ-ahˇ maˬ law-iˇ nya-a.

³⁰Smˇ kʼoeˬ tiˬ gʼaˬ hawˬ mehꞈ mehꞈ-awˇ cehˇ pyuˇ kʼoeˬ gaˇ, tsawˇ haˬ zaˬ maˬ noeˬ doeˇ-a loˇ.

³¹Smˇ kʼoeˬ kʼoeˇ gʼaˬ bi nyehꞈ mi naˇ, shiꞈ bymˇ paˇ bi tsoeˬ-eu miˇ neh, aˬ yawꞈ kʼaˇ jaˆ-eu jeˬ ya biꞈ jiˇ gaˇ keuˆ tehꞈ-a.

³²Aˬ cawˬ aˬ ma-ahˇ bahˬ-eu tsawˇ haˬ, tiˬ gʼaˬ-iˬ gaˇ dahˇ maˬ tsoeˬ-ehˇ, Yawˬ haˇ yawˬ ha laˆ cawˆ-eu meh.

³³Dawˬ doeˇ daˬ-awˇ ya naˇ-eu uˬ taꞈ, aˬ yawꞈ tiˬ ziˇ daˬ ga tehꞈ-a.

³⁴Myaˆ naˆ-eu kʼaˬ dzeˇ zaˬ gʼaˬ-euˬ nui naꞈ, laꞈ poˆ poˆ gʼaˬ-eu maˬ baw-a.

³⁵Pyuˇ shuiˇ doˆ gaˇ maˬ geuꞈ mawꞈ-ehˇ, nui ma pehˇ gaˇ maˬ tsoeˬ kʼoꞈ jiˇ coeˇ-a.