Read Akha Dawˬ daˬ 7 Bible Online

Dawˬ daˬ 7 - Akha bible

Dawˬ daˬ 7

¹Ngaˬ li-oˇ, ngaˬ neh kʼaˇ ehˇ-euˬ jeˬ juiˇ uiˬ taˬ-awˬ. Pyuˇ shuiˇ jeˬ hmˬ taˬ-eu loꞈ-ehˇ, ngaˬ neh mehˬ nehˬ tsoˆ nehˬ-euˬ dawˬ deuˬ jeˬ hmˬ taˬ-awˬ.

²Ngaˬ-euˬ dawˬ mehˬ dawˬ tsoˆ-ahˇ caw teh-awˇ dehꞈ-awˬ. Nawˬ-euˬ myaˆ nuiˆ-ahˇ maˬ bi laˆ tahˬ ni yahˇ-eu loꞈ-ehˇ, ngaˬ neh mehˬ-euˬ dawˬ deuˬ maˬ bi cawˆ-iˇ ni yahˇ-awˬ.

³Dawˬ kʼoeˇ deuˬ nawˬ-euˬ laꞈ noeˇ laꞈ ma-ahˇ paꞈ tawꞈ taˬ-awˇ, nawˬ-euˬ nui ma laꞈ kʼoeˇ boꞈ ahˇ taˬ-awˬ.

⁴Zaˬ siˬ tsawˇ gahˇ-ahˇ nawˬ-euˬ dmˇ ma loꞈ-ehˇ sawˇ-awˇ, noeˬ siˬ noeˬ mawˇ nya-eu jeˬ-ahˇ nawˬ-euˬ cawˬ loꞈ-ehˇ sawˇ-awˬ.

⁵Aˬ cawˬ aˬ ma hawˇ-eu haiˬ-eu zaˬ miˬ zaˬ deuˬ-ahˇ nawˇ buˬ-iˇ law-iˇ ni, zaˬ siˬ tsawˇ gahˇ nawˬ-ahˇ caw ba tehꞈ-a.

⁶Ngaˬ-euˬ nymˇ laˇ gʼoˆ zaˬ-ahˇ, shmˇ kahˬ yaw kaˬ-ahˇ haw doˆ gʼeh ngeh,

⁷maˬ noeˬ siˬ nya laˇ-euˬ zaˬ guˬ deuˬ laꞈ kʼoeˇ, dawˇ ga ga dui dui-eu tiˬ gʼaˬ mawˇ-euˬ ma.

⁸Laꞈ coeˇ-ahˇ tsoˆ taˬ-euˬ zaˬ miˬ zaˬ tiˬ gʼaˬ-euˬ nymˇ dawˬ peh, gaˇ ma caw caw-ehˇ aˬ yawꞈ iˇ luꞈ-eu meh.

⁹Uˬ ciꞈ zahˇ moˬ zahˇ shehˬ shehˬ le-euˬ miˇ neh, mawˇ laˇ maˬ mawˇ laˇ lehˇ jaˆ-eu meh.

¹⁰Meh maˬ laˇ-euˬ mehˬ tsoeˬ dm-awˇ, yaw haiˬ jeˬ mˇ-eu lehˇ shaˇ noeˬ luꞈ-eu zaˬ miˬ zaˬ kʼoeˇ gʼaˬ, aˬ yawꞈ-ahˇ tahˬ puˬ le-euˬ meh.

¹¹Myaˆ pyawˬ pyuˇ dui dui-awˇ, shaꞈ dawˇ-eu maˬ siˬ nya-eu iˇ kahˇ tiˬ jawˇ-iˬ maˬ jawˇ-eu zaˬ miˬ zaˬ meh.

¹²Tiˬ kʼehˬ ngeuˇ naˇ gaˇ ma doe ni cah-eu ya mawˇ, tiˬ kʼehˬ ngeuˇ naˇ lehˆ lehˆ kawˆ-ahˇ cah-eu ya mawˇ-awˇ, gaˇ ma gaˇ tsmˇ kʼaˇ ngeuˇ gaˇ yawꞈ-awˇ loꞈ-eu meh.

¹³Zaˬ guˬ kʼoeˇ gʼaˬ-ahˇ aˬ yawꞈ byaˇ cuꞈ-awˇ mehˬ cuˇ cuˇ-awˇ, myaˆ pyawˬ-ahˇ haw tsoˆ taˬ-awˇ heu loꞈ-ehˇ ehˇ nehˬ-eu meh.

¹⁴“Iˬ nah ngaˇ lawˇ-eu shehˇ-eu jeˬ mˇ-awˇ, lawˇ gaˇ shehˇ gaˇ dzehˬ laˇ-euˬ shaˬ jiˇ jaˆ ma.

¹⁵Kʼoeˇ miˇ neh nawˬ-ahˇ poˆ le-eu lehˇ ngaˇ doˆ le-euˬ ma. Ngaˇ nawˬ-ahˇ mawˇ mawꞈ-eu shaˬ-euˬ-aˬ, nawˇ heu gaˇ jawˇ law hawˇ nga laˬ.

¹⁶Iˇjiˇtuˆ miˇ kʼahˬ-ahˇ jahˇ-euˬ muiˬ dui dui-eu kʼawˬ daˬ, ngaˬ-euˬ yuꞈ zaˇ kʼoeˇ taˆ kʼawˬ daˆ taˬ-euˬ ma.

¹⁷Muˇ laˬ, aˬ loˬ, siˬ naˬ moˬ tsiˇ yaw saw deuˬ, yuꞈ zaˇ kʼoeˇ taˆ byaˆ shehˬ taˬ-euˬ ma.

¹⁸Oe-awˬ, uˬ bya bya laˇ ngeh keuˆ ni, nui kʼahˇ tiˬ shiˇ kʼaˬ miˬ sheu-awˇ, tiˬ dehˆ yuꞈ taꞈ jawˇ taꞈ kaˇ-euˇ.

¹⁹Ngaˬ-euˬ kʼaˬ dzeˇ zaˬ iˇ kahˇ maˬ jawˇ-a. Gaˇ mahˇ kaˬ gaˇ, gaˇ ma doˆ-iˇ-euˬ meh.

²⁰Aˬ yawꞈ pyuˇ pehˇ zeuˇ baꞈ-awˇ doˆ-iˇ-awˇ, la loˆ ngeh nah maˬ ngeuˇ naˇ maˬ gʼoꞈ laˇ-a.”

²¹Dawˬ nahˬ jawˆ ni ngehˬ-awˇ muˇ juˇ juˇ-eu laꞈ kʼoeˇ, aˬ yawꞈ tawˆ leˇ ni mehˇ shuiˇ shuiˇ-euˬ meh.

²²Laˬ peu-ahˇ paꞈ leˇ-euˬ ciˇ haˬ loꞈ-ehˇ, shaˬ jiˇ sehꞈ duˬ-ahˇ bi tsahˇ gʼeh-euˬ mawˇ neˇ loꞈ-ehˇ, maˬ nyi naˬ ni aˬ yawꞈ caw teh gʼeh-euˬ meh.

²³Aˬ yawꞈ-euˬ nui ma-ahˇ kaˆ myaˬ beuˆ byoe laˇ gaˇ iˇ-eu meh. Baw gʼaꞈ-ahˇ coeˬ uˇ gʼeh-eu aˇ jiˇ loꞈ-ehˇ, aˬ yawꞈ-euˬ uˬ kʼawˇ deuˬ laˇ gaˇ maˬ siˬ nya-a.

²⁴Kʼoeˇ miˇ neh ngaˬ li deuˬ-oˇ, ngaˇ ehˇ gaˇ naˇ haˬ-awˬ. Ngaˬ-euˬ kʼaˬ meh-ahˇ doˆ le-euˬ dawˬ-ahˇ naˬ bawˇ ciˬ kʼmˇ-awˬ.

²⁵Kʼoeˇ loꞈ-ehˇ gʼeh-eu zaˬ miˬ zaˬ neh muˇ juˇ taˬ bi juˇ gʼaˬ. Aˬ yawꞈ-euˬ mehˬ nah taˬ caw teh.

²⁶Kʼaˬ dzeˇ zaˬ gʼawˬ mya gʼaˬ-ahˇ aˬ yawꞈ laˆ cawˆ-awˇ, aˬ yawꞈ baˬ da neh shiˇ-euˬ tsawˇ haˬ maˬ gui jiˇ coeˇ-a.

²⁷Aˬ yawꞈ-euˬ nymˇ-aˬ, shiˇ-eu miˇ kʼahˬ gaˇ ma pyeuꞈ-awˇ, shiˇ-eu gaˇ ma gaˇ dawˇ kahˇ meh.