Read Akha Dawˬ daˬ 8 Bible Online

Dawˬ daˬ 8 - Akha bible

Dawˬ daˬ 8

¹Naˇ haˬ sheˇ. Zaˬ siˬ tsawˇ gahˇ aˬ dui-ahˇ kuˇ luꞈ meh. Noeˬ siˬ noeˬ mawˇ nya-eu jeˬ-euˬ teˇ saˇ gaˬ le luꞈ meh.

²Gaˇ ma gaˇ dzeˇ gawˬ duˇ uˬ du hawˇ-eu, gaˇ ma gaˇ tsmˇ-ahˇ aˬ yawꞈ yawꞈ luꞈ meh.

³Meuˬ lahˇ laˇ gʼoˆ dawˬ peh hawˇ-eu, meuˬ-euˬ gʼoˆ kʼehˬ gaˇ dzeˇ aˬ yawꞈ heu loꞈ-ehˇ guˇ luꞈ meh.

⁴“Tsawˇ haˬ zaˬ-ahˇ ngaˇ heu loꞈ-ehˇ guˇ gaˬ-eu ma. Miˇ tsaˬ zaˬ dawˬ tawˆ luꞈ-ahˇ heu loꞈ-ehˇ shaˇ-eu ma.

⁵Dawˇ ga deuˬ-oˇ, siˬ laˇ gahˇ laˇ-awˬ. Aˬ dzawˬ aˇ gah deuˬ-oˇ, nui ma-ahˇ noeˬ-awˬ.

⁶Poeˬ dui lawˬ dui dui-eu ngaˬ-euˬ dawˬ-ahˇ naˇ haˬ-awˬ. Ngaˇ kʼaˇ ngehˬ-eu dawˬ tsaˬ ma.

⁷Ngaˬ-euˬ kʼaˬ mehˬ-ahˇ doˆ le-euˬ dawˬ tsaˬ dui maˇ dui dui-awˇ, jaˬ myawꞈ myawꞈ-eu jeˬ-ahˇ ngaˇ bye-eu ma.

⁸Ngaˇ kʼaˇ ehˇ-eu jeˬ tsaˬ dui dawˇ dui dui-awˇ, yaw lehˬ yaw ca maˬ ahˇ-eu miˇ neh,

⁹noeˬ siˬ noeˬ mawˇ nya-eu deuˬ gʼoˆ shaw nya-awˇ, zaˬ siˬ tsawˇ gahˇ ahˇ-eu deuˬ mehˬ shi tsaˬ-eu meh.

¹⁰Pyuˇ-ahˇ nui kʼahˇ jaˆ-eu naˆ maˬ tseˇ, ngaˬ neh mehˬ-euˬ tsoˆ-euˬ jeˬ-ahˇ nui kʼahˇ jaˆ-awˬ. Muiˬ dui dui-eu shuiˇ-ahˇ gaˬ-eu naˆ maˬ tseˇ, zaˬ siˬ tsawˇ gahˇ-ahˇ gaˬ-awˬ.

¹¹Ngaˇ-aˬ, zaˬ siˬ tsawˇ gahˇ ma. Pyuˇ shuiˇ myawˬ gahˬ naˆ maˬ tseˇ ngaˇ poeˬ dzehˬ ma. Naw maꞈ nui kʼahˇ kʼaˇ jaˆ-eu jeˬ dawˬ tawˆ luꞈ, ngaˇ loꞈ-ehˇ tiˬ jeˬ-iˬ maˬ poeˬ-a.

¹²Ngaˇ-aˬ, zaˬ siˬ tsawˇ gahˇ pyeuꞈ-awˇ, ngaˇ maˬ siˬ maˬ mawˇ nya-eu tiˬ jeˬ-iˬ maˬ jaˆ. Ngaˇ tsawˇ gahˇ byah-awˇ, yawˬ jeˬ na luꞈ-ahˇ tseˇ paˆ biˇ paˆ nya ma.

¹³Sahˬpaˬ Miˬyehˇ taˬ huiˬ taˬ mahˇ-eu jeˬ-aˬ, yaw haiˬ jeˬ-ahˇ bye-eu gaˇ kawˆ meh. Nui ma huiˬ-eu mahˇ-eu jeˬ hawˇ-eu jahˇ gʼeh-eu jeˬ-ahˇ ngaˇ muiˇ-awˇ, yaw haiˬ jeˬ hawˇ-eu maˬ tsaˬ maˬ dawˇ-eu dawˬ-ahˇ ngaˇ bye-eu ma.

¹⁴Ngaˬ-euˬ nui ma laꞈ kʼoeˇ yaw muiˬ paˬ-ehˇ sawˇ duˬ-awˇ, mˇ doˆ shaˇ doˆ nya-eu ma. Ngaˇ noeˬ siˬ noeˬ mawˇ nya-awˇ, gʼaˬ tiˬ byah tiˬ loꞈ ahˇ ma.

¹⁵Sahˬ paˬ deuˬ dzoeˬ dzaˬ nya ni ngaˇ caw ba-awˇ, sahˬ ma deuˬ muiˬ-eu zahˇ sahˇ kʼoꞈ taˬ nya ni ngaˇ caw ba nehˬ-eu ma.

¹⁶Miˇ tsaˬ kʼoeˇ taˆ kʼaˇ jawˇ-eu sahˬ paˬ sahˬ ma dawˬ tawˆ luꞈ, miˇ kʼahˬ-ahˇ uˆ lahˇ nya ni ngaˇ ngehˬ gʼeh-eu ma.

¹⁷Ngaˬ-ahˇ gaˬ-eu deuˬ-ahˇ ngaˇ gaˬ-awˇ, ngaˬ-ahˇ leh jeh-awˇ poˆ-eu deuˬ, ngaˬ-ahˇ poˆ mawˇ-eu meh.

¹⁸Pyuˇ shuiˇ myawˬ gahˬ hawˇ-eu tsawˇ myahˇ doˆ-eu jeˬ ngaˇ biꞈ nya-awˇ, tsawˇ ziˇ gmˬ-eu baw le za le-eu jeˬ, ngaˇ jawˇ gaˇ jaˆ-eu ma.

¹⁹Muiˬ dui dui-eu shuiˇ naˆ maˬ tseˇ poeˬ-eu jeˬ hawˇ-eu, shawˇ jehˆ ni gʼeh-eu pyuˇ naˆ maˬ tseˇ poeˬ-eu jeˬ, naw maꞈ-ahˇ ngaˇ biꞈ nya ma.

²⁰Yaw tsaˬ yaw dawˇ gaˇ jawˬ-ahˇ ngaˇ cah-awˇ, yaw sui yaw dawˇ gaˇ ma-ahˇ ngaˇ iˇ-eu laꞈ kʼoeˇ,

²¹ngaˬ-ahˇ gaˬ-eu deuˬ-ahˇ smˇ muiˬ bi muiˬ laˇ-awˇ, aˬ yawꞈ maꞈ-euˬ nymˇ-ahˇ pyuˇ shuiˇ myawˬ gahˬ bi byah laˇ-eu ma.

²²Aˇ hu tiˬ jeˬ-iˬ maˬ beh mi naˆ-ehˇ, Sahˬpaˬ Miˬyehˇ ngaˬ-ahˇ jeˬ huˬ beh-euˬ meh. aˬ yawꞈ neh beh dawꞈ dawꞈ-euˬ gʼaˬ ngaˇ ma.

²³Boeˬ boeˬ luˆ luˆ maˬ beh mi naˆ-ehˇ, mˬ hawˇ-eu miˇ maˬ beh mi naˆ-ehˇ, ngaˬ-ahˇ jeˬ huˬ beh-euˬ meh.

²⁴Iˬ ma laˆ shaˆ maˬ dahˬ laˇ mi naˆ-ehˇ, lawˇ baˬ lawˇ gawˆ maˬ yoeˇ le mi naˆ-ehˇ, ngaˇ jeˬ huˬ dehꞈ le-euˬ ma.

²⁵Gawˬ jawˬ gawˬ duˇ deuˬ maˬ jaˆ le mi naˆ-ehˇ, ngaˇ jeˬ huˬ seu le-euˬ ma.

²⁶Miˇ tsaˬ hawˇ-eu deh ga-ahˇ Miˬ yehˇ maˬ beh mi naˆ-ehˇ, miˇ tsaˬ laꞈ kʼawˆ tiˬ kʼawˆ maˬ jaˆ le mi naˆ-ehˇ, ngaˇ jeˬ huˬ dehꞈ le-euˬ ma.

²⁷Aˬ yawꞈ mˬ ciˬ daˆ ngeh ngaˇ jawˇ-awˇ, iˬ ma laˆ shaˆ kʼoeˇ taˆ mˬ dzeˇ miˇ dzeˇ dehˬ biˇ ngeh ngaˇ jawˇ-euˬ ma.

²⁸Mˬ-ahˇ mˬ dmˇ gʼoˆ ceuˬ-awˇ, iˬ ma laˆ shaˆ iˇ byoe beuˬ pehꞈ ngeh ngaˇ jawˇ-euˬ ma.

²⁹Laˆ shaˆ hawˇ-eu miˇ tsaˬ-euˬ miˇ kaˬ biˇ ngeh ngaˇ jawˇ-awˇ, miˇ tsaˬ tahˬ kʼawˇ-euˬ kʼawˇ zeuˇ kʼahˬ tuˇ ngeh ngaˇ jawˇ-euˬ ma.

³⁰Nymˇ tsoˆ-eu laꞈ saˇ maˇ loꞈ-ehˇ aˬ yawꞈ-euˬ dawˬ peh aˬ myah luꞈ ngaˇ jawˇ-awˇ, aˬ yawꞈ nah yawꞈ aˬ yawꞈ ngaˬ-ahˇ nui kʼahˇ shiˇ-awˇ, aˬ yawꞈ mehˬ shi aˬ myah luꞈ laˬ kʼaˬ cehˇ-euˬ ma.

³¹Aˬ yawꞈ-euˬ miˇ tsaˬ tahˬ kʼawˇ-ahˇ laˬ kʼaˬ cehˇ-awˇ, tsawˇ haˬ zaˬ-ahˇ nui kʼahˇ shiˇ-euˬ ma.

³²Teu miˇ neh zaˬ guˬ deuˬ-oˇ, ngaˬ-euˬ dawˬ-ahˇ naˇ haˬ-awˬ. Ngaˬ neh ehˇ-euˬ loꞈ-ehˇ dehꞈ-awˇ nui saˇ oꞈ-awˬ.

³³Naw maꞈ-ahˇ mehˬ nehˬ tsoˆ nehˬ laꞈ-euˬ jeˬ-ahˇ naˇ haˬ geuꞈ-eu laꞈ kʼoeˇ, maˬ ngehˇ ni yaw gahˇ gahˇ-ehˇ dehꞈ-awˬ.

³⁴Ngaˬ-euˬ ehˇ dawˬ naˇ haˬ geuꞈ-eu tsawˇ haˬ laˬ kʼaˬ ya cehˇ tehꞈ-a. Yawˬ nah na luꞈ ngaˬ-euˬ nymˇ laˇ gʼoˆ-ahˇ jawˇ-awˇ, ngaˬ-euˬ nymˇ gʼoˆ kʼehˬ-ahˇ loꞈ-eu tsawˇ haˬ laˬ kʼaˬ ya cehˇ tehꞈ-a.

³⁵Ngaˬ-ahˇ mawˇ-euˬ tsawˇ haˬ dehꞈ-eu saꞈ laˇ mawˇ-awˇ, aˬ yawꞈ-ahˇ Sahˬpaˬ Miˬyehˇ nui kʼahˇ shiˇ tehꞈ-a.

³⁶Ehˇ kʼawꞈ, ngaˬ-ahˇ maˬ mawˇ-euˬ tsawˇ haˬ-aˬ, yawˬ haˇ yawˬ ha laˆ shaˬ tehꞈ-a. Ngaˬ-ahˇ kʼaˇ bye-eu tsawˇ haˬ shiˇ-eu jeˬ-ahˇ gaˬ-eu meh.”