Read Akha Dawˬ tsoˆ 10 Bible Online

Dawˬ tsoˆ 10 - Akha bible

Dawˬ tsoˆ 10

¹Puˬ saˆ yaw shiˇ tiˬ mawˇ baˬ da neh, tsiˇ yaw saw tiˬ tsaꞈ tsaꞈ lah ni buꞈ-iˇ nya-awˇ, aˬ dzawˬ aˇ gah ui cuiˆ tehꞈ-ehˇ gah-euˬ ba da neh, huiˬ dui dui-eu tsawˇ gahˇ deuˬ cawˆ-iˇ nya-eu meh.

²Zaˬ siˬ tsawˇ gahˇ ahˇ-eu nui ma yaw tsaˬ yaw dawˇ jeˬ-ahˇ pyawˬ-awˇ, aˬ dzawˬ aˇ gah nui ma yaw lehˬ jeˬ toˆ-eu meh.

³Aˬ dzawˬ aˇ gah-euˬ jawˬ gʼehˇ-aˬ, gaˇ ma cah gaˇ haw kʼawꞈ siˬ laˇ-eu meh.

⁴Sahˬ paˬ sahˬ ma nawˬ-ahˇ nui ma maˬ saˇ ngeh, nawˬ-ahˇ biꞈ taˬ-euˬ gaˇ maˬ mˇ ni taˬ byehˇ dzeh. Ciˬ cuˇ ni jawˇ-eu jeˬ-aˬ, huiˬ-eu iˬ baˇ bi buˬ-iˇ nya-eu meh.

⁵Nahˇ ma heu siˬ uˬ moˆ sahˬ paˬ sahˬ ma deuˬ mˇ luꞈ-eu yaw lehˬ tiˬ jeˬ ngaˇ heu loꞈ-ehˇ ya mawˇ-euˬ ma.

⁶Aˬ dzawˬ aˇ gah deuˬ-ahˇ yaw huiˬ yaw mahˇ bi geuꞈ-awˇ, smˇ muiˬ smˇ baw deuˬ-ahˇ taˬ nyiˇ nehˬ-eu meh.

⁷Zaˬ kʼaˆ deuˬ mahˬ-ahˇ dziˬ-awˇ, sahˬ paˬ zaˬ yo deuˬ zaˬ kʼaˆ loꞈ-ehˇ kuiˇ zoˬ cah-eu ngaˇ mawˇ haw-euˬ ma.

⁸Duˬ kʼahˬ kʼahˬ-eu tsawˇ haˬ duˬ kʼahˬ-ahˇ ya ga ahˇ-awˇ, kaˇ pyawˇ tahˬ paˆ doˆ-eu tsawˇ haˬ aˇ lawˇ bi toˆ tehꞈ-a.

⁹Kʼaˬ lo deh-eu tsawˇ haˬ kʼaˬ lo neh bi laˆ naˇ-awˇ, miˬ dzaˬ ceuꞈ-eu tsawˇ haˬ, pawˬ jehꞈ bi teuˆ zaw tehꞈ-a.

¹⁰Deuˆ haˬ maˬ siˬ taˆ taˬ-euˬ tsawˇ haˬ kuˬ pyuˇ ya doˆ dzehˬ-awˇ, yaw beh neh noeˬ gahˇ-awˇ lehˬ hmˬ taˬ-euˬ tsawˇ haˬ yaw saˇ oꞈ tehꞈ-a.

¹¹Aˇ lawˇ neh jeˬ huˬ bi toˆ shaw naˇ, aˇ lawˇ-ahˇ laˆ yah nya-eu tsawˇ gahˇ tiˬ jeˬ-iˬ gaˇ dahˇ maˬ paˇ tsoeˬ meh.

¹²Tsawˇ gahˇ ahˇ-eu tsawˇ haˬ-euˬ dawˬ yawˬ ha-euˬ myaˆ pyawˬ naˇ mehˇ laˆ saˆ-awˇ, aˬ dzawˬ aˇ gah-euˬ dawˬ yawˬ ha-ahˇ daˬ laˆ ga-eu meh.

¹³Aˬ dzawˬ-euˬ dawˬ neh aˇ dahˬ beh-awˇ, aˇ gah-euˬ dawˬ neh aˇ saˬ saˬ-eu meh.

¹⁴Aˬ dzawˬ aˇ gah dawˬ saˬ dawˬ li maˬ baw-a. Mehˬ hu paw pyeuꞈ laˇ-eu gaˇ kawˆ tsawˇ haˬ tiˬ gʼaˬ-iˬ maˬ siˬ nya-a. Aˬ dui shiˇ dzeuˇ naˇ kʼah pyeuꞈ laˇ-eu gaˇ kawˆ, ehˇ nehˬ laꞈ nya-eu gʼaˬ maˬ jawˇ-a.

¹⁵Aˬ dzawˬ aˇ gah myawˬ yaˇ mˇ gaˇ kʼahˬ lahˇ-eu miˇ neh, pu-ahˇ gʼoꞈ leˇ-eu gaˇ ma maˬ siˬ nya-a.

¹⁶Dzoeˬ dzaˬ-eu sahˬ paˬ aˇ kʼoꞈ nahˬ-awˇ, uˆ lahˇ-eu aˬ yuiꞈ aˬ tsu deuˬ uˬ ciꞈ miˇ lah-ehˇ dzaˬ byawˬ dawˇ byawˬ-eu miˇ kʼahˬ-aˬ, shaˬ zahˬ naꞈ-eu miˇ kʼahˬ meh.

¹⁷Ehˇ kʼawꞈ, dzoeˬ dzaˬ-eu sahˬ paˬ yawˬ ha-euˬ nui kʼahˇ tiˬ li uˆ lahˇ nya-awˇ, uˇ lahˇ-eu aˬ yuiꞈ aˬ tsu geuꞈ-eu deuˬ dzaˬ yamˬ dawˇ yamˬ tsaˬ-awˇ maˬ dzaˬ maˬ dawˇ yehꞈ ni dehꞈ-eu miˇ kʼahˬ-aˬ, guiˬ lahˬ baw-eu miˇ kʼahˬ meh.

¹⁸Nymˇ mˬ maˬ joe shmˇ nahˇ-eu tsawˇ haˬ-euˬ nymˇ, uˬ yehˇ doˆ peuˬ jiˇ-awˇ, coˬ pyaˆ dzeh tehꞈ-a.

¹⁹Dzaˬ byawˬ dawˇ byawˬ-eu jeˬ tsawˇ haˬ-ahˇ laˬ kʼaˬ bi cehˇ-awˇ, aˬ gaꞈ dzaˇ uiˇ dawˇ-eu jeˬ nui ma-ahˇ laˆ saˆ nya-eu meh. Ehˇ kʼawꞈ, pyuˇ-aˬ, yawˬ jeˬ na luꞈ jahˇ pyeuꞈ nya-eu meh.

²⁰Ciˬ cuˇ ni sahˬ paˬ-ahˇ yaw doeˇ taˬ ehˇ kʼoeˬ. Yuꞈ zaˇ kuˆ lawˆ-ahˇ uˇ-awˇ smˇ muiˬ aˬ da-ahˇ taˬ ja doeˇ. Mˬ taˆ zaw-eu aˇ jiˇ neh bi tsaꞈ gaˬ-iˇ nmˬ-mˇ.