Read Akha Dawˬ tsoˆ 6 Bible Online

Dawˬ tsoˆ 6 - Akha bible

Dawˬ tsoˆ 6

¹Tsawˇ haˬ zaˬ gʼaˇ duˬ kʼaˆ behˆ kah-eu maˬ tsaˬ maˬ dawˇ-eu tiˬ jeˬ, nahˇ ma heu siˬ uˬ moˆ jaˆ luꞈ gaˇ ngaˇ paˇ ya mawˇ-euˬ ma.

²Tsawˇ haˬ zaˬ tiˬ gʼaˬ-ahˇ Miˬyehˇ pyuˇ shuiˇ myawˬ gahˬ biꞈ-awˇ, tsawˇ myahˇ bi doˆ-euˬ uˬ taꞈ, kʼaˇ geuꞈ mawꞈ-eu jeˬ dawˬ tawˆ luꞈ ehˇ kʼaˇ maˬ za ni biꞈ byah nehˬ-euˬ meh. Ehˇ kʼawꞈ, kʼoeˇ deuˬ dawˬ tawˆ luꞈ-ahˇ aˬ yawꞈ maˬ ya geuꞈ ni, boeˇ miˬ siˬ kʼaˬ tiˬ gʼaˬ neh bi geuꞈ jiˇ-eu meh. Kʼoeˇ-aˬ, tiˬ pawꞈ-iˬ maˬ tsaˬ maˬ dawˇ-ehˇ, tiˬ jeˬ-iˬ gaˇ dahˇ maˬ tsoeˬ-a.

³Tsawˇ haˬ tiˬ gʼaˬ, zaˬ aˇ yaˇ gʼaˬ ya cu-awˇ, ziˇ baw dui dui kʼawꞈ, yaw dehꞈ dehꞈ ngeh nui saˇ maˬ oꞈ-ehˇ, shiˇ ngeh yaw muiˬ-ehˇ baꞈ pahˬ nehˬ-eu gʼaˬ maˬ jawˇ naˇ, yaw shiˇ-ehˇ yoeˇ dzeh-euˬ zaˬ nahˬ maˬ tawˬ-a.

⁴Zaˬ nahˬ kʼoeˇ gʼaˬ dehꞈ le-euˬ tiˬ jeˬ-iˬ gaˇ dahˇ maˬ tsoeˬ-ehˇ, yaw zahˇ laꞈ kʼoeˇ byoˆ kʼaꞈ-iˇ-awˇ, bi ngehˇ byoˆ-euˬ meh.

⁵Nah gʼahˇ paw bya-eu yaw shehꞈ-ahˇ aˬ yawꞈ maˬ ya mawˇ haw-ehˇ, yaw dehꞈ dehꞈ-eu gaˇ kawˆ aˬ yawꞈ maˬ ya siˬ kʼawꞈ, tsawˇ haˬ kʼoeˇ gʼaˬ naˆ maˬ tseˇ nui saˇ oꞈ dzehˬ-eu meh.

⁶Tsawˇ haˬ kʼoeˇ gʼaˬ aˇ kʼoꞈ nyiˬ heˇ dehꞈ dzehˬ kʼawꞈ, aˬ yawꞈ jaˆ-eu pyuˇ shuiˇ myawˬ gahˬ aˬ yawꞈ-euˬ nui noeˬ maˬ ya zmˬ-a. Aˇ saˬ saˬ laˇ ngeh, nyiˬ gʼaˬ luꞈ aˬ yawꞈ tiˬ tsahˇ-ahˇ uˬ duˬ duˬ leˇ-eu tehꞈ meh.

⁷Tsawˇ haˬ zaˬ kʼaˇ mˇ-eu gaˇ dawˬ tawˆ luꞈ, yawˬ ha uˬ maˆ poˆ dehˆ-eu gʼaˇ duˬ meh. Ehˇ kʼawꞈ, kʼaˬ meh-euˬ nui kʼahˇ maˬ mˇ byah nehˬ nya-a.

⁸Tsawˇ gahˇ ahˇ-eu tsawˇ haˬ hawˇ-eu aˬ dzawˬ aˇ gah aˬ jeˬ beu gaˇ duˬ jaˆ ta. Iˇ shaˬ zaˬ tiˬ gʼaˬ aˬ joˆ-ehˇ ya dehꞈ ya jawˇ ya ngehˬ ya tmˇ-eu gaˇ kawˆ aˬ jeˬ paˇ siˬ nya-eu loˬ ta.

⁹Kʼoeˇ-aˬ, tiˬ jeˬ-iˬ gaˇ dahˇ maˬ tsoeˬ-a. Jaˬ lehˇ mehˬ nah teh-eu loꞈ-ehˇ tehꞈ meh. Aˇ dzehˬ poˆ geuꞈ-eu naˆ maˬ tseˇ, yawˬ ha kʼaˇ jaˆ-eu jeˬ-ahˇ nui kʼahˇ shiˇ-eu zaˬ dzehˬ meh.

¹⁰Kʼaˇ pyeuꞈ laˇ-eu jeˬ dawˬ tawˆ luꞈ, aˇ hu ba neh ehˇ taˬ-awˇ jaˆ-eu gaˇ kawˆ tehꞈ meh. Yawˬ ha naˆ maˬ tseˇ gʼaˬ kʼaˆ-eu tsawˇ haˬ nehˬ-ehˇ tsawˇ pyehˇ maˬ pyehˇ nya-a lehˇ, tsawˇ haˬ yawˬ gʼaˬ na luꞈ siˬ nya meh.

¹¹Tsawˇ pyehˇ ngehˬ-ehˇ pyehˇ naˇ ngehˬ-ehˇ gaˇ dahˇ maˬ tsoeˬ-eu uˬ taꞈ, nawˬ-ahˇ muiˬ laˇ duˬ maˬ jaˆ-a.

¹²Gaˇ dahˇ maˬ tsoeˬ-eu tiˬ kʼehˇ laˇ kʼehˬ yaw dehꞈ ya dehꞈ-eu aˇ yamˬ heu laꞈ kʼoeˇ, tsawˇ haˬ zaˬ gʼaˇ duˬ muiˬ dzehˬ-eu jeˬ-ahˇ, aˬ suˇ gʼaˬ siˬ nya nmˇ. Yaw dehꞈ dehꞈ-eu jeˬ-aˬ, naˇ shmˇ shmˇ le-eu loꞈ-ehˇ tiˬ kʼehˇ laˇ kʼehˬ laꞈ kʼoeˇ iˇ byoˆ gʼeh nya-eu meh. Yawˬ ha shiˇ dzeuˇ ngeh, nahˇ ma heu siˬ uˬ moˆ aˬ joˆ-ehˇ pyeuꞈ laˇ-eu gaˇ kawˆ aˬ suˇ gʼaˬ siˬ nya nmˇ.