Read Akha Dawˬ tsoˆ 9 Bible Online

Dawˬ tsoˆ 9 - Akha bible

Dawˬ tsoˆ 9

¹Gaˇ kawˆ dawˬ tawˆ luꞈ-ahˇ ngaˇ yaw muiˬ paˬ-ehˇ shaˇ noeˬ duˬ leꞈ ngeh, tsawˇ gahˇ ahˇ-eu tsawˇ haˬ deuˬ hawˇ-eu yaw tsaˬ yaw dawˇ tsawˇ haˬ deuˬ kʼawꞈ, Miˬyehˇ-euˬ aˬ laꞈ laꞈ kʼoeˇ jaˆ-eu tehꞈ meh. Gaˬ-eu gaˇ kawˆ hawˇ-eu bye-eu gaˇ kawˆ kʼawꞈ, tsawˇ haˬ zaˬ-euˬ laꞈ-ahˇ jaˆ-eu maˬ ngeuˇ-a. Mehˬ hu paw kʼaˇ pyeuꞈ laˇ-eu gaˇ kawˆ deuˬ-ahˇ tiˬ gʼaˬ-iˬ maˬ siˬ duˬ nya-a.

²Dawˬ tawˆ luꞈ aˬ yawꞈ tiˬ gaˇ shiˇ leˇ-eu tehꞈ meh. Tsawˇ muiˬ tsawˇ doeˇ maˬ ehˇ, yaw sui yaw dawˇ hawˇ-eu yaw haiˬ maˬ ehˇ, yaw muiˬ yaw shawˇ hawˇ-eu maˬ muiˬ maˬ shawˇ-eu tsawˇ haˬ maˬ ehˇ, Miˬyehˇ-ahˇ lawˇ-eu shehˇ-eu tsawˇ haˬ hawˇ-eu maˬ lawˇ maˬ shehˇ-eu tsawˇ haˬ maˬ ehˇ, dawˬ tawˆ luꞈ aˇ saˬ saˬ leˇ duˬ tiˬ tsahˇ tehꞈ meh. Tsawˇ muiˬ kʼawꞈ iˬ baˇ zaˬ taꞈ-ehˇ maˬ dzehˬ-a. Miˬyehˇ-ahˇ saˇ jaˇ dzaˬ-eu tsawˇ haˬ hawˇ-eu saˇ jaˇ maˬ dzaˬ-eu tsawˇ haˬ beu gaˇ duˬ maˬ jaˆ-a.

³Tsawˇ muiˬ tsawˇ doeˇ maˬ baw ni, tsawˇ haˬ dawˬ tawˆ luꞈ aˬ yawꞈ tiˬ tsahˇ-ahˇ tehꞈ-ehˇ uˬ duˬ ya duˬ leˇ-eu meh. Nahˇ ma heu siˬ uˬ moˆ kʼaˇ pyeuꞈ luꞈ-eu jeˬ dawˬ tawˆ luꞈ, kʼoeˇ naˆ ni doeˇ-eu meh. Tsawˇ haˬ zaˬ yaw dehꞈ kʼaˇ dehꞈ kʼoeˇ keuˆ ni, nui ma laꞈ kʼoeˇ yaw haiˬ jeˬ hawˇ-eu aˬ dzawˬ aˇ gah gah-eu jeˬ tehꞈ-ehˇ byah luꞈ-awˇ, ja pyuˬ ni ya shiˇ jiˇ-eu meh.

⁴Ehˇ kʼawꞈ, shiˇ taˬ-euˬ aˇ laˬ jaˬ shiˇ tiˬ mawˇ naˆ maˬ tseˇ, aˬ kuiˬ yaw dehꞈ tiˬ mawˇ maˬ gaˇ dzehˬ-eu loꞈ-ehˇ, dehꞈ luꞈ-eu tsawˇ haˬ deuˬ nehˬ-ehˇ kʼaˇ ya dehꞈ caw kʼoeˇ keuˆ ni, noeˬ tmˬ duˬ jaˆ-eu meh.

⁵Dehꞈ luꞈ-eu deuˬ yawˬ ha ya shiˇ-eu gaˇ kawˆ siˬ nya kʼawꞈ, shiˇ dzeuˇ-euˬ deuˬ siˬ nya-eu aˬ jeˬ paˇ jaˆ ta. Aˬ yawꞈ maꞈ tiˬ jeˬ-iˬ aˇ poeˬ maˬ paˇ baw-ehˇ, tiˬ gʼaˬ-iˬ maˬ noeˬ mawˇ ni bi ngehˇ byoˆ jiˇ-eu meh.

⁶Aˬ yawꞈ maꞈ-euˬ nui gaˬ, nui bye, nui kʼahˇ, dawˬ tawˆ luꞈ aˬ yawꞈ maꞈ shiˇ ngeh shiˇ caw-awˇ, nahˇ ma heu siˬ uˬ moˆ kʼaˇ pyeuꞈ yaꞈ-euˬ jeˬ-ahˇ tiˬ pawꞈ-iˬ maˬ paˇ taꞈ meh.

⁷Tsawˬ tuˇ-awˇ, nawˬ-euˬ dzaˇ nui kʼahˇ tiˬ shiˇ dzaˬ-awˇ, nawˬ-euˬ aˬ gaꞈ dzaˇ uiˇ tiˬ dehˆ dawˇ-eu laꞈ kʼoeˇ, laˬ kʼaˬ cehˇ taˆ ni dehꞈ-awˬ. Miˬyehˇ-ahˇ tiˬ jeˬ-iˬ maˬ bahˬ-aˇ.

⁸Aˬ myah luꞈ laˬ kʼaˬ tiˬ cehˇ dehꞈ-awˬ jawˇ-awˬ.

⁹Nahˇ ma heu siˬ uˬ moˆ Miˬyehˇ neh nawˬ-ahˇ bi dehꞈ bi jawˇ laꞈ-euˬ tiˬ jeˬ-iˬ gaˇ dahˇ maˬ tsoeˬ-eu aˇ nah aˇ yamˬ heu laꞈ kʼoeˇ, nawˇ gaˬ-eu nawˬ-euˬ miˬ zaˬ nehˬ-ehˇ byawˬ gʼa-awˬ. Shaˬ zahˬ naꞈ-awˇ gaˇ dahˇ maˬ tsoeˬ-eu aˇ nah yawˬ nah na luꞈ laꞈ kʼoeˇ, nawˬ-ahˇ oꞈ-eu jiˇ jeuˬ kʼoeˇ tehꞈ meh.

¹⁰Nawˇ kʼaˇ mˇ kʼaˇ shaˇ-eu jeˬ laꞈ kʼoeˇ, leh jeh dui dui-awˬ. Aˬ jeˬ miˇ neh ehˇ naˇ, nawˇ le luꞈ-eu shiˇ-eu miˇ kʼahˬ-ahˇ, mˇ myawˬ mˇ-eu, nui noeˬ noeˬ-eu hawˇ-eu, zaˬ siˬ tsawˇ gahˇ heu deuˬ maˬ jaˆ-a.

¹¹Nahˇ ma heu siˬ uˬ moˆ ngaˇ heu loꞈ-ehˇ tiˬ jeˬ paˇ ya mawˇ-euˬ ma. Kawˇ dui dui-eu deuˬ aˬ myah luꞈ cehˆ ceh ceh-eu gʼaˬ leˇ-eu maˬ ngeuˇ-ehˇ, nui ma yaw kʼaˬ deuˬ aˬ myah luꞈ guiˇ deuˆ-eu gʼaˬ leˇ-eu maˬ ngeuˇ-a. Tsawˇ gahˇ ahˇ-eu deuˬ aˬ myah luꞈ ya dzaˬ ya dawˇ-eu maˬ ngeuˇ-ehˇ, nui noeˬ kuꞈ-eu deuˬ aˬ myah luꞈ smˇ muiˬ muiˬ laˇ-eu maˬ ngeuˇ-a. Bym dui nya dui dui-eu deuˬ kʼawꞈ, aˬ myah luꞈ myaˆ pyawˬ naˇ mehˇ jaˆ-eu maˬ ngeuˇ-a. Tsawˇ haˬ yawˬ gʼaˬ na luꞈ guiˬ lahˬ doeˇ-eu aˇ yamˬ aˇ law baw-eu meh.

¹²Tsawˇ haˬ tiˬ gʼaˬ-iˬ yawˬ ha-euˬ aˇ yamˬ aˇ law maˬ siˬ nya-a. Lahˇ ju-ahˇ paꞈ leˇ-euˬ aˇ jiˇ hawˇ-eu ngaˬ myahˬ-ahˇ paꞈ leˇ-euˬ ngaˬ shaˬ loꞈ-ehˇ, maˬ noeˬ miˇ-ahˇ aˬ dui kʼoeˇ taˆ yaw doeˇ jeˬ keuˆ le nya-eu meh.

¹³Nahˇ ma heu siˬ uˬ moˆ zaˬ siˬ tsawˇ gahˇ-ahˇ taꞈ leˇ-eu gaˇ kawˆ tiˬ hmˬ ngaˇ paˇ haw mawˇ-awˇ, nui ma-ahˇ zaw dui dui laˇ nya.

¹⁴Tsawˇ haˬ yaw kʼaˆ-ehˇ maˬ myaˬ-eu meuˬ meuˬ zaˬ tiˬ meuˬ jaˆ-eu meh. Baoˬ huiˬ-eu sahˬ paˬ tiˬ gʼaˬ meuˬ kʼoeˇ meuˬ-ahˇ deuˆ geuꞈ-eu gʼaˇ duˬ loꞈ jawˬ taˬ-awˇ, meuˬ meuˬ lahˇ duˬ byaˆ dzeh-eu lehˇ lehˬ hmˬ luꞈ-eu meh.

¹⁵Meuˬ kʼoeˇ meuˬ laꞈ kʼoeˇ iˇ shaˬ shaˬ dui dui-eu tsawˇ gahˇ ahˇ-eu tsawˇ haˬ tiˬ gʼaˬ jawˇ-awˇ, aˬ yawꞈ-euˬ zaˬ siˬ tsawˇ gahˇ-ahˇ gʼoe-awˇ meuˬ kʼoeˇ meuˬ-ahˇ ka kʼoꞈ-euˬ meh. Ehˇ kʼawꞈ, tsawˇ haˬ kʼoeˇ gʼaˬ-euˬ guiˬ lahˬ-ahˇ tiˬ gʼaˬ-iˬ maˬ noeˬ keuˆ-a.

¹⁶Zaˬ siˬ tsawˇ gahˇ-aˬ, baoˬ naˆ maˬ tseˇ aˇ poeˬ kʼaˆ dzehˬ meh lehˇ ngaˇ aˬ myah luꞈ ehˇ-eu ma. Ehˇ kʼawꞈ, iˇ shaˬ zaˬ-euˬ zaˬ siˬ tsawˇ gahˇ-ahˇ aˬ cawˬ yaw zeu maˬ baw-ehˇ, aˬ yawꞈ neh ngehˬ-euˬ dawˬ-ahˇ maˬ naˇ haˬ mawꞈ-a.

¹⁷Sahˬpaˬ sahˬ ma tiˬ gʼaˬ aˬ dzawˬ aˇ gah baˬ maꞈ-ahˇ guˇ guˇ-ehˇ mehˬ-eu naˆ maˬ tseˇ, tsawˇ gahˇ ahˇ-eu tsawˇ haˬ tiˬ gʼaˬ ciˬ cuˇ ni ngehˬ-eu dawˬ naˬ bawˇ-ahˇ ahˇ leˇ dzehˬ meh.

¹⁸Zaˬ siˬ tsawˇ gahˇ-aˬ, guiˇ deuˆ-eu keu ka naˆ maˬ tseˇ gaˇ dahˇ tsoeˬ-eu meh. Ehˇ kʼawꞈ, iˬ baˇ zaˬ tiˬ gʼaˬ yaw muiˬ gʼawˬ mya jeˬ-ahˇ laˆ cawˆ nya-eu meh.