Read Akha Dawˬ caˇ 1 Bible Online

Dawˬ caˇ 1 - Akha bible

Dawˬ caˇ 1

¹Sawˇlaˬmoˬ-euˬ caˇ dawˬ deuˬ laꞈ kʼoeˇ, muiˬ dui dui-eu caˇ dawˬ deuˬ.

²Nawˬ-euˬ mehˬ luˬ neh mehˬ cuˇ tiˬ gʼoeˬ bi cuˇ mawꞈ nya. Nawˬ-euˬ nui gaˬ aˬ gaꞈ dzaˇ uiˇ naˆ maˬ tseˇ coeˇ nya.

³Nawˬ-euˬ gʼawˇ mawˇ tiˬ jawˬ saw dui dui-awˇ, nawˬ-euˬ tsawˇ myahˇ tsiˇ yaw saw shehˆ kʼaˇ gaˇ duˇ nya. Nawˬ-ahˇ maˬ mawꞈ-eu zaˬ miˬ zaˬ maˬ jawˇ-a.

⁴Ngaˬ-ahˇ sheuˬ-awˬ. Nawˬ nehˬ-ehˇ ngaˇ cehˆ kʼoeˬ ma. Ngaˬ-euˬ sahˬ paˬ geuꞈ-awˇ, nawˬ-euˬ kuˆ lawˆ-ahˇ sheuˬ ahˇ nehˬ laꞈ-awˬ. Nawˬ nehˬ-ehˇ nga maꞈ laˬ kʼaˬ cehˇ-awˇ, aˬ gaꞈ dzaˇ uiˇ naˆ maˬ tseˇ nawˬ-euˬ nui gaˬ-ahˇ ja ceuˬ-eu ma. Zaˬ miˬ zaˬ dawˬ tawˆ luꞈ nawˬ-ahˇ gaˬ-eu zahˬ leˇ duˬ maˬ jaˆ-a.

⁵Yeˬluˇsaˬlehˬ meuˬ-euˬ zaˬ miˬ deuˬ-oˇ, ngaˇ shiˬ shaˬ yaw naˆ kʼawꞈ aˇ gʼehˇ muiˬ ma. Geˬdaˬ tsawˇ jeuˬ-euˬ sehˬ gʼawˆ loꞈ-ehˇ naˆ kʼawꞈ,[1] Sawˇlaˬmoˬ-euˬ hawˇ nymˇ-ahˇ lawˆ kaˬ taw-euˬ saˬ paˇ loꞈ-ehˇ aˇ gʼehˇ muiˬ-eu ma.

⁶Shiˬ shaˬ yaw naˆ nga lehˇ ngaˬ-ahˇ taˬ haw teˬ, nahˇ tsaˇ lawꞈ-awˇ lawꞈ naˆ-euˬ ma. Ngaˬ-euˬ aˬ mahˇ aˬ da deuˬ ngaˬ-ahˇ nui ma pehˇ-awˇ, aˬ gaꞈ yaˇ kmˇ-ahˇ gaˇ bi mˇ laꞈ-euˬ baˬ da neh, gʼawˇ mawˇ laˆ muiˬ-eu maˬ dah nya.

⁷Ngaˇ gaˬ-eu gʼaˬ-oˇ, nawˇ yawˇ aˬ geu paw bo te lehˇ ehˇ nehˬ laꞈ sheˇ. Nah gʼahˇ paw aˬ geu tsahˇ-ahˇ naˇ shmˇ bi awˆ te lehˇ ehˇ nehˬ laꞈ sheˇ. Yawˇ bo-eu tsawˇ haˬ deuˬ teu myaˆ ni jawˇ-eu, nawˬ-ahˇ ngaˇ poˆ mawˇ nya nmˇ loˇ.

⁸Miˬ daꞈ dawˬ tawˆ kʼoeˇ taˆ muiˬ dzehˬ-eu gʼaˬ-oˇ, ngaˇ aˬ gaˇ jawˇ-eu maˬ siˬ nya te loˇ. Yawˇ yawˇ maꞈ-euˬ mehˬ nah caw teh-awˇ, yawˇ bo-eu deuˬ-euˬ sehˬ gʼawˆ dawˬ peh, nawˬ-euˬ ciꞈ myehꞈ bo le-awˬ.

⁹Paˬlawˇ sahˬ paˬ-euˬ laˆ lawˬ gʼeu-eu mahˬ paˬ deuˬ, mahˬ mahˬ ma tiˬ ma mawˇ-awˇ teuˆ laˇ-eu loꞈ-ehˇ, ngaˇ gaˬ-eu gʼaˬ-oˇ, kʼaˬ dzeˇ zaˬ deuˬ-ahˇ nui ma cehˇ tahˬ laˆ tahˬ nehˬ-awˬ.

¹⁰Nawˬ-euˬ baˬ ba kʼoeˇ taˆ jaˆ-eu uˬ duˬ tsehˇ kahˇ muiˬ dui dui-awˇ, shuiˇ caˆ sehˇ caˆ loꞈ-ehˇ kawˬ lahˇ kʼoeˇ taˆ ga gʼeu-eu meh.

¹¹Pyuˇ toeˬ taˬ-euˬ shuiˇ nawˬ-ahˇ ngaˇ maꞈ bi geuꞈ ma.

¹²Ngaˬ-euˬ sahˬ paˬ ja ciˬ-ahˇ yuꞈ luꞈ ngeh, ngaˬ-euˬ saw dui dui-eu tsiˇ jaˬ lehˇ-ahˇ byah luꞈ meh.

¹³Ngaˇ gaˬ-eu gʼaˬ ngaˬ-euˬ kʼahˬ-ahˇ kʼawˬ daˇ-awˇ yuꞈ ngeh, muˇ laˬ tsiˇ loꞈ-ehˇ saw dui dui nya.

¹⁴Ngaˇ gaˬ dui dui-eu gʼaˬ-aˬ, Eˬgeˬdiˇ meuˬ-euˬ aˬ gaꞈ yaˇ kmˇ-ahˇ yehˆ-eu, bawˇ tsahˬ aˇ yehˆ-ahˇ duˇ nya.

¹⁵Ngaˇ gaˬ-eu gʼaˬ-oˇ, nawˇ aˇ gʼehˇ aˇ naˆ ni muiˬ-eu nga. Nawˬ-euˬ myaˆ nuiˆ laꞈ kʼoeˇ, gaˬ-eu yaw shehꞈ bya luꞈ meh.

¹⁶Ngaˇ gaˬ-eu gʼaˬ-oˇ, nawˇ aˇ gʼehˇ aˇ naˆ ni muiˬ-eu nga. Nawˇ-aˬ, aˬ diˇ gaˬ dui dui paˬ-ehˇ gʼeh-eu meh. Nyoeˇ jawꞈ ni gʼeh-awˇ di dehˬ ni dehꞈ-eu daˬ yawˬ-aˬ, aˇ nyaꞈ-euˬ yuꞈ zaˇ ma.

¹⁷Aˇ nyaꞈ-euˬ nymˇ shuˬ liˇ pyaꞈ dmˬ dawˆ-awˇ, gui ma-ahˇ guˇ baˬ luˇ teˇ byaꞈ taw ma.