Read Akha Dawˬ caˇ 2 Bible Online

Dawˬ caˇ 2 - Akha bible

Dawˬ caˇ 2

¹Ngaˇ-aˬ, Shaˬloˬ meuˬ dzeˇ dehꞈ-eu bawˇ tsahˬ aˇ yehˆ loˆ ni tehꞈ ma. Gʼaˬ lawˬ lawˬ mehˇ-ahˇ dehꞈ-eu ka paꞈ aˇ yehˆ loˆ ni tehꞈ ma.

²Zaˬ miˬ zaˬ heu myaˆ ni gʼeh-eu laꞈ kʼoeˇ, ngaˬ-euˬ zaˬ kʼaˬ-aˬ, aˬ gah baw duˆ gʼahˇ ceh dehꞈ-eu ka paꞈ aˇ yehˆ-ahˇ duˇ-eu meh.

³Ngaˇ gaˬ-eu gʼaˬ hawˇ-eu kʼaˬ dzeˇ zaˬ nui deuˬ shaˇ cehˆ haw ngeh, bawˇ tsahˬ sahˬ kʼaˆ-ahˇ dehꞈ-eu siˬ poeˬ tsaꞈ[2] aˇ bawˇ-ahˇ duˇ-eu meh. Aˇ bawˇ kʼoeˇ bawˇ-euˬ naˇ shmˇ-ahˇ ngaˇ nuiˇ mawꞈ-awˇ, aˇ bawˇ kʼoeˇ-euˬ aˇ siˬ kuiˇ dui dui nya.

⁴Dzaˬ byawˇ lawˇ-eu nymˇ ma laꞈ kʼoeˇ aˬ yawꞈ ngaˬ-ahˇ sheuˬ uˇ gʼeh-awˇ, aˬ yawꞈ-euˬ nui gaˬ paˇ loˬ paˇ lehˇ, ngaˬ-euˬ kʼoeˇ taˆ sheu taw nehˬ laꞈ-euˬ meh.

⁵Ngaˇ gaˬ-eu baˬ da neh, gʼaˬ gaˬ jiˇ-euˬ nya. Gʼaˬ kʼoꞈ laˇ ni aˬ gaꞈ aˇ siˬ yaw koˆ bi dzaˬ laꞈ-awˬ. Siˬ poeˬ tsaꞈ aˇ siˬ bi dzaˬ beuˇ nehˬ laꞈ-awˬ.

⁶Aˬ yawꞈ-euˬ aˇ caˇ laꞈ ngaˬ-euˬ uˬ duˬ uˬ moˆ cawˬ ahˇ taˬ-awˇ, aˇ maˇ laꞈ ngaˬ-ahˇ byaˆ cuꞈ taˬ-euˬ meh.

⁷Yeˬluˇsaˬlehˬ meuˬ-ahˇ jawˇ-eu zaˬ miˬ zaˬ deuˬ-oˇ, ngaˬ-ahˇ saˇ jaˇ dzaˬ-awˬ. Kʼaˬ tsehˆ ciˇ haˬ deuˬ-euˬ tsawˇ myahˇ kuˇ-awˇ, nga nyaꞈ gaˬ taꞈ-eu jeˬ-ahˇ maˬ laˆ gʼawˬ lehˇ saˇ jaˇ dzaˬ-awˬ.

⁸Ngaˇ gaˬ-eu gʼa-euˬ teˇ saˇ-ahˇ naˇ haˬ sheˇ. Gawˬ jawˬ cehˆ kʼaˇ gawˬ duˇ cehˆ lehˆ-awˇ, ngaˇ jawˇ gaˇ oe miˇ-a.

⁹Ngaˇ gaˬ-eu gʼaˬ ciˇ haˬ-ahˇ duˇ-eu meh. Kʼaˬ tsehˆ tsehˆ laˬ-ahˇ aˬ yawꞈ duˇ-eu meh. Kaˇ pyawˇ dawˬ peh aˬ yawꞈ yawꞈ-awˇ, laˇ gʼoˆ zaˬ-ahˇ haw ahˇ leꞈ-awˇ, shmˇ kaˇ maˇ byoe-ahˇ cu hu luꞈ-eu meh.

¹⁰Ngaˇ gaˬ-eu gʼaˬ ngaˬ-ahˇ dawˬ ngehˬ cawˬ laˇ-eu meh. Ngaˇ gaˬ-eu gʼaˬ-oˇ, laˇ-awˬ. Ngaˬ-euˬ zaˬ kʼaˬ-oˇ, ngaˬ nehˬ-ehˇ laˇ-awˬ.

¹¹Yehˇ gʼahˇ dzeuˇ-awˇ tsahˬ gaˆ jiˇ le miˇ-a.

¹²Bawˇ tsahˬ-ahˇ sahˬ lahˬ aˇ yehˆ poˬ dui dui luꞈ-eu nga. Yaˇ dzeˇ kʼaˬ kʼoeˬ duˬ duˇ duˇ luꞈ miˇ-a. Dawˬ caˇ caˇ-eu aˇ yamˬ miˇ-a.

¹³Siˬ guˬ aˇ siˬ awꞈ yamˬ keuˆ laˇ-awˇ, jaˬ lehˇ baw ngeh aˬ gaꞈ aˇ yehˆ saw dui dui nya. Ngaˇ gaˬ-eu gʼaˬ-oˇ, laˇ-awˬ. Ngaˬ-euˬ zaˬ kʼaˬ-oˇ, ngaˬ nehˬ-ehˇ laˇ-awˬ.

¹⁴Nawˇ-aˬ, lo guˇ maˇ byoe-ahˇ dzuˇ zaꞈ luꞈ-eu kʼaˬ kʼoeˬ-ahˇ duˇ nga. Gʼawˬ shaˬ gaˬ dui dui paˬ-ehˇ gʼeh-eu nawˬ-euˬ myaˆ pyawˬ ciˬ mawˇ le-awˇ, naˇ haˬ muiˬ-eu nawˬ-euˬ teˇ saˇ bi gaˬ le sheˇ.

¹⁵Kʼaˬ yehˇ deuˬ-ahˇ nyehꞈ-awˬ. Aˇ yehˆ yehˆ luꞈ-eu aˬ dui-euˬ aˬ gaꞈ yaˇ kmˇ maˬ bi laˆ cawˆ mi naˆ-ehˇ, kʼaˬ yehˇ zaˬ kʼoeˇ deuˬ-ahˇ nyehꞈ-awˬ.

¹⁶Ngaˇ gaˬ-eu gʼaˬ ngaˬ-euˬ pyeuꞈ-awˇ, ngaˇ aˬ yawꞈ-euˬ ma. Ka paꞈ aˇ yehˆ yehˆ yaˇ-ahˇ aˬ yawꞈ yawˇ bo-eu meh.

¹⁷Mˬ bya laˇ-awˇ yaw zahˇ byoˆ-iˇ ngeh keuˆ ni bo-eu meh. Ngaˇ gaˬ-eu gʼaˬ-oˇ, ciˇ haˬ loꞈ-ehˇ cehˆ gʼoꞈ gʼeh-awˬ. Kʼaˬ lo gahˬ-ahˇ cehˆ-eu yaˬ loꞈ-ehˇ gʼoꞈ-iˇ-awˬ.