Read Akha Dawˬ caˇ 3 Bible Online

Dawˬ caˇ 3 - Akha bible

Dawˬ caˇ 3

¹Aˬ yawꞈ miˇ yawꞈ ngaˬ-euˬ yuꞈ zaˇ-ahˇ ngaˇ yuꞈ-awˇ, ngaˇ gaˬ-eu gʼaˬ-ahˇ tehꞈ-ehˇ noeˬ luꞈ ma. Aˬ yawꞈ-ahˇ ngaˇ poˆ kʼawꞈ, maˬ poˆ mawˇ nya nya.

²Meuˬ meuˬ lah-ehˇ ngaˇ cah doe jiˇ-awˇ, gaˇ gʼoꞈ gaˇ liˆ kʼaˇ jaˆ-eu poˆ doe-euˬ ma. Ngaˇ gaˬ-eu gʼaˬ-ahˇ poˆ sehꞈ leꞈ kʼawꞈ, tiˬ gaˇ-iˬ maˬ poˆ mawˇ nya nya.

³Meuˬ-ahˇ loꞈ piˇ-eu deuˬ cah doˆ leꞈ gaˇ ngaˇ tahˬ puˬ-awˇ, “Ngaˬ-euˬ zaˬ kʼaˬ maˬ mawˇ-aˬ loˇ” lehˇ naˇ haˬ-euˬ ma.

⁴Aˬ yawꞈ maꞈ jawˇ-eu iˇ dzeuˇ-eu nehˬ-ehˇ, ngaˇ gaˬ-eu gʼaˬ-ahˇ poˆ mawˇ-euˬ ma. Ngaˬ ma-euˬ nymˇ laꞈ kʼoeˇ ngaˇ dehꞈ le-euˬ kuˆ lawˆ-ahˇ, aˬ yawꞈ-ahˇ maˬ sheuˬ uˇ keuˆ kʼoeˇ keuˆ ni, maˬ pyehˬ nehˬ ni byaˇ cuꞈ taˬ-euˬ ma.

⁵Yeˬluˇsaˬlehˬ meuˬ-ahˇ jawˇ-eu zaˬ miˬ zaˬ deuˬ-oˇ, ngaˬ-ahˇ saˇ jaˇ dzaˬ-awˬ. Kʼaˬ tsehˆ ciˇ haˬ deuˬ-euˬ tsawˇ myahˇ kuˇ-awˇ, nga nyaꞈ gaˬ taꞈ-eu jeˬ-ahˇ maˬ laˆ gʼawˬ lehˇ saˇ jaˇ dzaˬ-awˬ.

⁶Muˇ laˬ yaw saw hawˇ-eu baw gaꞈ deuˬ ahˬ-eu tsiˇ yaw saw gʼawˬ mya jeˬ saw dui dui-eu laꞈ kʼoeˇ, bawˇ tsahˬ bawˇ dahˇ paw neh uˬ kʼoeˬ uꞈ uꞈ-ehˇ laˇ luꞈ-eu aˬ pa jeˬ nga.

⁷Sawˇlaˬmoˬ dzoeˬ dzaˬ nuiˇ mahˬ-ahˇ nuiˇ-awˇ laˇ luꞈ-eu meh. Iˇsaˬleˬlaˆ miˇ kʼahˬ-ahˇ aˬ cawˬ taꞈ-ehˇ nya dzehˬ-eu, yehˇ koꞈ tseˇ gʼaˬ bi loꞈ piˇ-awˇ laˇ luꞈ meh.

⁸Aˬ yawꞈ maꞈ dawˬ tawˆ luꞈ mi cehˇ neh guiˇ deuˆ-eu nya suˇ suˇ-awˇ, guiˇ deuˆ myahˇ laꞈ-euˬ yehˇ tehꞈ meh. Yawˬ gʼaˬ na luꞈ mi cehˇ shaꞈ luꞈ-awˇ, uˬ ciꞈ paw laˆ bahˬ le gaˇ loꞈ piˇ-eu meh.

⁹Muiˬ dui dui-eu daˇ kawˬ neh jahˇ taˬ-euˬ nuiˇ mahˬ kʼoeˇ taˆ sahˬ paˬ Sawˇlaˬmoˬ nuiˇ-awˇ, miˇ kʼahˬ-ahˇ cah haw-eu meh.

¹⁰Nuiˇ mahˬ-euˬ aˬ kuiˇ-ahˇ pyuˇ yaw-awˇ, naˇ kʼah kʼawˬ daˇ duˬ-ahˇ shuiˇ neh aˇ boꞈ boꞈ taˬ-euˬ saˬ paˇ tsahˬ taˬ-euˬ meh. Yeˬluˇsaˬlehˬ meuˬ-ahˇ jawˇ-eu zaˬ miˬ zaˬ deuˬ neh zaꞈ taˬ-euˬ, neˇ tseuˆ ni gʼeh-eu muiˬ dui dui-eu saˬ paˇ nuiˇ daˬ duˬ-ahˇ kʼawˬ taˬ-euˬ meh.

¹¹Ziˇoˬ meuˬ-ahˇ jawˇ-eu zaˬ miˬ zaˬ deuˬ-oˇ, sahˬ paˬ Sawˇlaˬmoˬ-ahˇ haw laˇ sheˇ. Aˬ yawꞈ gʼaˇ duˬ byawˬ dui dui-eu aˇ nah pyeuꞈ-eu, oeˇ mˇ baˇ ngeh nah-ahˇ, aˬ yawꞈ aˬ ma neh nyehꞈ kʼoˆ nehˬ-eu shuiˇ uˬ kʼoˆ kʼoeˇ siˬ aˬ yawꞈ kʼoˆ luꞈ-eu meh.