Read Akha Dawˬ caˇ 4 Bible Online

Dawˬ caˇ 4 - Akha bible

Dawˬ caˇ 4

¹Ngaˇ gaˬ-eu gʼaˬ-oˇ, nawˇ aˇ gʼehˇ aˇ naˆ ni muiˬ-eu nga. Uˬ boeˬ tsahˇ kaˬ taˬ-euˬ naˇ kʼah jaˆ-eu, nawˬ-euˬ myaˆ nuiˆ gaˬ-eu yaw shehꞈ aˇ naˆ ni bya-eu nga. Nawˬ-euˬ uˬ duˬ tsehˇ kahˇ-aˬ, Giˇlaˆ gawˬ jawˬ baˬ gʼa-ahˇ cehˆ ka leꞈ-eu, ciꞈ myehꞈ baˬ maꞈ-ahˇ duˇ-eu meh.

²Nawˬ-euˬ seuˬ-aˬ, caꞈ hm tehˬ gʼaˬ-awˇ iˇ cuꞈ bi dzuiꞈ buˇ-euˬ yawˇ loꞈ-ehˇ ba-awˇ, tiˬ seuˬ-iˬ maˬ teˬ ni gm-eu meh.

³Nawˬ-euˬ mehˬ luˬ aˇ caˆ caˆ neˇ-ahˇ duˇ-awˇ, dawˬ ngehˬ ngeh haw muiˬ dui dui meh. Uˬ boeˬ tsahˇ kaˬ taˬ-eu naˇ kʼah, nawˬ-euˬ baˬ ba neˇ jiˆ poˬ ni jaˆ-eu meh.

⁴Nawˬ-euˬ kawˬ lahˇ Daˬbiˇ neh tsoˆ-euˬ loꞈ-eu nymˇ goˇ-ahˇ duˇ-awˇ, lah joˆ ni gʼeh-awˇ juˇ gaꞈ ni jaˆ-eu meh.

⁵Nawˬ-euˬ kʼahˬ nyiˬ pyawˬ-aˬ, boeˬ nmˬ tseuˆ dzaˬ luꞈ-eu kʼaˬ tsehˆ zaˬ nyiˬ mawˇ-ahˇ duˇ-eu meh.

⁶Mˬ bya laˇ-awˇ yaw zahˇ byoˆ-iˇ ngeh keuˆ ni, muˇ laˬ gawˬ jawˬ-ahˇ ngaˇ jawˇ ma. Tsiˇ yaw saw jeˬ-euˬ gawˬ jawˬ-ahˇ jawˇ ma.

⁷Ngaˇ gaˬ-eu gʼaˬ-oˇ, nawˇ aˇ gʼehˇ aˇ naˆ ni muiˬ-eu nga. Ehˇ kʼaˇ za-eu tiˬ tsahˇ-iˬ maˬ baw-a.

⁸Ngaˬ-euˬ zaˬ kʼaˬ-oˇ, Leˬbaˬnoˬ gawˬ jawˬ-ahˇ neh ngaˬ nehˬ-ehˇ oe-awˬ. Leˬbaˬnoˬ gawˬ jawˬ-ahˇ neh caw teh gʼeh leꞈ-awˬ. Aˬmaˬnaˬ gawˬ jawˬ uˬ du neh zaꞈ ka le-awˬ. Aˇ laˬ jaˬ shiˇ hawˇ-eu kʼaˬ zuiˬ kʼaˬ laˬ jawˇ duˬ pyeuꞈ-eu Seˬnyaˬ gawˬ jawˬ hawˇ-eu Heˬlaˬmoˬ gawˬ jawˬ-ahˇ neh zaꞈ ka le-awˬ.

⁹Ngaˇ gaˬ-eu gʼaˬ-oˇ, nawˬ-euˬ myaˆ nuiˆ haw cawˬ laˇ ngeh, ngaˬ-euˬ myaˆ nuiˆ kʼeuꞈ doˆ geuꞈ gaˇ duˇ nya. Nawˬ-euˬ kawˬ lahˇ-ahˇ dah luꞈ-eu lawˇ dah-ahˇ haw ngeh, ngaˬ-euˬ nui ma-ahˇ deuˬ laˇ nya.

¹⁰Ngaˇ gaˬ-eu ngaˬ-euˬ zaˬ kʼaˬ-oˇ, nawˬ-euˬ nui gaˬ-ahˇ ngaˇ nui kʼahˇ shiˇ dui dui nya. Nawˬ-euˬ nui gaˬ aˬ gaꞈ dzaˇ uiˇ naˆ maˬ tseˇ coeˇ-awˇ, nawˬ-euˬ tsiˇ yaw saw jeˬ-aˬ, yaw saw jeˬ dawˬ tawˆ luꞈ naˆ maˬ tseˇ saw nya.

¹¹Ngaˬ-euˬ zaˬ kʼaˬ-oˇ, nawˬ-euˬ mehˬ luˬ byaˬ byaˬ uiˇ loꞈ-ehˇ coeˇ nya. Nawˬ-euˬ mehˬ laˇ-aˬ, mawˇ neˇ aˬ coeˇ hawˇ-eu byaˬ byaˬ uiˇ-ahˇ duˇ nya. Nawˬ-euˬ mehˬ tsoeˬ-aˬ, Leˬbaˬnoˬ gawˬ jawˬ-ahˇ kʼaˇ jaˆ-eu yaw saw jeˬ loꞈ-ehˇ saw dui dui nya.

¹²Ngaˇ gaˬ-eu ngaˬ-euˬ zaˬ kʼaˬ-aˬ, ciˬ cuˇ ni jaˆ-eu yaˇ kmˇ-ahˇ duˇ nya. Yaw muiˬ paˬ-ehˇ mˇ gʼoeˬ taˬ-awˇ iˇ cuꞈ lah jaˆ-eu yaˇ kmˇ-ahˇ duˇ nya.

¹³Aˇ ka uˆ aˇ siˬ aˇ bawˇ yaˇ kmˇ loꞈ-ehˇ, sahˬ lahˬ aˇ bawˇ deuˬ mehˇ dui dui-awˇ, muiˬ dui dui-eu aˇ siˬ siˬ le-eu meh. Heˇnaˬ hawˇ-eu Naˆ lehˇ kuˇ-eu, tsiˇ yaw saw aˇ bawˇ kʼoeˇ gaˇ bawˇ-eu meh.

¹⁴Saˬ poˬ, gaˬ laˬ muˇ, siˬ naˬ moˬ aˇ bawˇ hawˇ-eu tsiˇ yaw saw aˇ bawˇ kʼaˇ ngeuˇ-eu jeˬ kʼoeˇ gaˇ dehꞈ-eu meh. Muˇ laˬ hawˇ-eu Aˇ jawˬ aˇ bawˇ maˬ ehˇ, saw dui dui-eu tsiˇ yaw saw aˇ bawˇ deuˬ kʼoeˇ gaˇ dehꞈ kuꞈ-eu meh.

¹⁵Yaˇ kmˇ-ahˇ lawˇ gawˆ iˇ cuꞈ shehˬ-eu meh. Iˇ cuꞈ lawˇ baˬ deuˬ hawˇ-eu, Leˬbaˬnoˬ gawˬ jawˬ-ahˇ neh yoeˇ ka leꞈ-euˬ lawˇ gawˆ deuˬ, yaˇ kmˇ kʼoeˇ-ahˇ iˇ cuꞈ biꞈ le-eu meh.

¹⁶Laꞈ taˆ paw pyawˬ-ahˇ-euˬ jaˬ lehˇ-oˇ, noeˬ laˇ-awˬ. Laꞈ oˆ paw pyawˬ-ahˇ-euˬ jaˬ lehˇ ngaˬ-euˬ yaˇ kmˇ-ahˇ baw gʼeh laꞈ-awˇ, yaw saw jeˬ jaˬ lehˇ laꞈ kʼoeˇ hehˇ byah gʼeh-awˬ. Ngaˇ gaˬ-eu gʼaˬ aˬ yawꞈ-euˬ yaˇ kmˇ-ahˇ oe-awˇ, kuiˇ dui dui-eu aˇ siˬ deuˬ bi dzaˬ le-awˬ.