Read Akha Dawˬ caˇ 6 Bible Online

Dawˬ caˇ 6 - Akha bible

Dawˬ caˇ 6

¹Zaˬ miˬ dawˬ tawˆ kʼoeˇ taˆ aˇ gʼehˇ muiˬ-eu gʼaˬ-oˇ, nawˬ-euˬ zaˬ kʼaˬ aˬ gaˇ iˇ taˬ. Aˬ geu paw iˇ taˬ lehˇ ehˇ nehˬ laꞈ-awˬ. Nga maꞈ nawˬ-ahˇ caw poˆ nehˬ nyaˇ.

²Ngaˬ-euˬ zaˬ kʼaˬ-aˬ, yaw saw jeˬ jaˆ kuꞈ-eu yaˇ kmˇ-ahˇ iˇ-euˬ meh. Yaˇ kmˇ-ahˇ yawˇ bo-awˇ, ka paꞈ aˇ yehˆ tseuˆ uiˬ-eu lehˇ iˇ-euˬ meh.

³Ngaˇ ngaˬ-euˬ zaˬ kʼaˬ-euˬ pyeuꞈ-awˇ, aˬ yawꞈ kʼawꞈ ngaˬ-euˬ ma. Ka paꞈ aˇ yehˆ yehˆ yaˇ-ahˇ aˬ yawꞈ-euˬ yawˇ aˬ yawꞈ bo-eu meh.

⁴Ngaˬ-euˬ zaˬ kʼaˬ-oˇ, nawˇ-aˬ Yeˬluˇsaˬlehˬ meuˬ loꞈ-ehˇ aˇ gʼehˇ muiˬ-awˇ, Teuˇzaˬ meuˬ loꞈ-ehˇ mawꞈ leˇ paˬ-ehˇ gʼeh-eu uˬ taꞈ, paˇ loˬ paˇ lehˇ baꞈ-awˇ cah-eu guiˇ guiˇ maꞈ loꞈ-ehˇ, maˬ haw dehˆ coeˇ ni gʼeh-eu meh.

⁵Nawˬ-euˬ myaˆ nuiˆ ngaˬ-ahˇ taˬ haw cawˬ nehˬ laꞈ. Ngaˬ-ahˇ paꞈ tawꞈ taˬ gaˇ duˇ nya. Nawˬ-euˬ uˬ duˬ tsehˇ kahˇ-aˬ, Giˇlaˆ gawˬ jawˬ-ahˇ tsawˬ ka leꞈ luꞈ-eu, ciꞈ myehꞈ ciꞈ maꞈ-ahˇ duˇ-eu meh.

⁶Nawˬ-euˬ seuˬ-aˬ, iˇ cuꞈ dzuiꞈ shawˇ gʼaˬ-euˬ yawˇ loꞈ-ehˇ ba-awˇ, tiˬ seuˬ-iˬ maˬ teˬ ni gm-eu meh.

⁷Uˬ boeˬ tsahˇ kaˬ taˬ-euˬ naˇ kʼah, nawˬ-euˬ baˬ ba yaw shehꞈ bya-eu meh.

⁸Sahˬ paˬ miˬ zaˬ koꞈ tseˇ gʼaˬ baw-awˇ, ma nyiˇ yehꞈ tseˇ gʼaˬ jawˇ-eu uˬ taꞈ, zaˬ miˬ aˬ buˇ maˬ gui jiˇ coeˇ ni cu taˬ luꞈ-uˇ.

⁹Ehˇ kʼawꞈ, ngaˇ gaˬ-eu tiˬ gʼaˬ jawˇ-eu tehꞈ ma. Aˬ yawꞈ-aˬ, kʼaˬ kʼoeˬ loꞈ-ehˇ aˇ gʼehˇ muiˬ dui dui-eu meh. Aˬ yawꞈ aˬ ma o neh aˬ yawꞈ tiˬ gʼaˬ tehꞈ-ehˇ jawˇ-awˇ, aˬ ma gaˬ dui dui-eu aˬ buˇ meh. Zaˬ miˬ zaˬ kʼaˇ ngeuˇ-eu aˬ yawꞈ-ahˇ maˬ ja ceuˬ-ehˇ maˬ jawˇ coeˇ-a. Sahˬ paˬ-euˬ miˬ zaˬ deuˬ hawˇ-eu ma nyiˇ deuˬ, aˬ yawꞈ-ahˇ caˇ-awˇ ja ceuˬ-eu meh.

¹⁰Uˬ bya bya laˇ-eu loꞈ-ehˇ bya cehˆ ni gʼeh-eu teu gʼaˬ aˬ suˇ gʼaˬ-a. Aˬ yawꞈ ba la loꞈ-ehˇ muiˬ-awˇ, nahˇ ma loꞈ-ehˇ yaw shehꞈ bya-eu meh. Paˇ loˬ paˇ lehˇ baꞈ-awˇ cah-eu guiˇ guiˇ maꞈ loꞈ-ehˇ haw muiˬ-eu meh.

¹¹Aˬ laˬ moˬ aˇ bawˇ yaw kaˬ-ahˇ ngaˇ oe ka-euˬ ma. Deh kʼawꞈ-ahˇ dehꞈ laˇ-euˬ bawˇ byeꞈ deuˬ-ahˇ haw le-euˬ ma. Aˬ gaꞈ baw nmˬ nmˬ laˇ gaˇ haw le-euˬ ma. Aˇ ka uˆ aˇ bawˬ aˇ yehˆ yehˆ gaˇ haw le-euˬ ma.

¹²Ngaˬ-euˬ nui ma cehˇ tahˬ tahˬ nya. Guiˇ deuˆ gaˇ iˇ luꞈ-eu mahˬ laˆ lawˬ teh-eu tsawˇ haˬ loꞈ-ehˇ, nawˬ-ahˇ noeˬ-eu baˬ da neh nui ma aˬ huˬ huˬ nya.

¹³Shuˇlamˬ meuˬ-ahˇ jawˇ-eu zaˬ miˬ aˬ buˇ-oˇ, gʼoꞈ laˇ-awˬ. Gʼoꞈ laˇ-awˬ. Nawˇ gʼoꞈ laˇ gaˇ nga maꞈ haw mawꞈ nya. Tsawˇ haˬ nyiˬ muˇ yaw kaˬ-ahˇ ngaˇ gaˇ nyeh nyeh gaˇ, aˬ jeˬ miˇ neh naw maꞈ haw mawꞈ-eu nya.