Read Akha Dawˬ caˇ 8 Bible Online

Dawˬ caˇ 8 - Akha bible

Dawˬ caˇ 8

¹Nawˇ ngaˬ-euˬ aˬ mahˇ pyeuꞈ nmˇ duˇ nya. Tiˬ uˇ pyehˆ-awˇ tiˬ coeˇ dawˇ huiˬ law nmˇ duˇ nya. Ehˇ law nmˇ, nawˬ-ahˇ poˆ ka ya tahˬ puˬ ngeh, mehˬ cuˇ cuˇ kʼawꞈ tiˬ gʼaˬ-iˬ myaˆ maˬ naˆ-aˇ.

²Ngaˬ ma-euˬ nymˇ-ahˇ ngaˇ nawˬ-ahˇ sheuˬ gʼeh-awˇ, gaˬ-eu gaˇ kawˆ nawˇ ngaˬ-ahˇ bi mehˬ ma. Yaw saw keuˬ-eu aˬ gaꞈ dzaˇ uiˇ nawˬ-ahˇ ngaˇ ciˬ nehˬ ma. Ngaˬ-euˬ aˇ ka uˆ dzaˇ uiˇ bi dawˇ ma.

³Nawˬ-euˬ aˇ caˇ laꞈ ngaˬ-ahˇ uˬ gʼmˬ bi gʼmˬ laꞈ-awˇ, nawˬ-euˬ aˇ maˇ laꞈ ngaˬ-ahˇ byaˇ tawꞈ taˬ-euˬ meh.

⁴Yeˬluˇsaˬlehˬ meuˬ-ahˇ jawˇ-eu zaˬ miˬ zaˬ deuˬ-oˇ, ngaˬ-ahˇ saˇ jaˇ dzaˬ-awˬ. Nga nyaꞈ gaˬ taꞈ-eu jeˬ-ahˇ maˬ laˆ gʼawˬ lehˇ saˇ jaˇ dzaˬ-awˬ.

⁵Aˬ yawꞈ-euˬ zaˬ kʼaˬ-ahˇ byaˇ tawꞈ-awˇ, bawˇ tsahˬ bawˇ dahˇ paw neh laˇ luꞈ-eu kʼoeˇ aˬ suˇ gʼaˬ nga. Nawˬ-euˬ caˆ tahˬ tehˬ tsehˆ duˬ siˬ yehˆ aˇ bawˇ uˬ moˆ, nawˬ-ahˇ ngaˇ laˆ noeˬ-euˬ ma.

⁶Ngaˬ-ahˇ maˬ ngeuˇ naˇ nui gʼaˬ-ahˇ taˬ gaˬ. Ngaˬ-ahˇ maˬ ngeuˇ naˇ nui gʼaˬ-ahˇ taˬ byaˇ tawꞈ. Gaˬ-euˬ jeˬ-aˬ, shiˇ-eu jeˬ loꞈ-ehˇ doꞈ kʼaˆ-awˇ, myaˆ naˆ-eu jeˬ lmˬ bymˇ nehˬ-ehˇ tiˬ mehˇ nmˇ meh. Nui gaˬ miˬ dzaˬ doꞈ doˆ laˇ ngeh, yaˇ saˬ miˬ dzaˬ puiˆ gaˇ duˇ tehꞈ-a.

⁷Iˇ cuꞈ neh maˬ shehˬ miˆ nya-ehˇ, iˇ jeuˬ neh maˬ dahˬ pymˬ nya-a. Ehˇ kʼawꞈ, tsawˇ haˬ tiˬ gʼaˬ na, pyuˇ shuiˇ neh gaˬ-eu jeˬ zeuˇ geuꞈ mawꞈ naˇ, yehˬ bawˬ sehˇ lu-ehˇ jahˇ nehˬ gaˇ ya daˬ tehꞈ-a.

⁸Ngaˬ ha mehˇ nmˇ dmˇ ma yaw nyiˇ tiˬ gʼaˬ jawˇ ma. Aˬ yawꞈ-euˬ kʼahˬ nyiˬ pyawˬ yaw nyiˇ aˬ siˬ. Zaˬ guˬ aˬ yawꞈ-ahˇ ngehˬ cawˬ laˇ naˇ, aˬ joˆ-ehˇ jahˇ paˬ nga.

⁹Aˬ yawꞈ meuˬ meuˬ lahˇ law nmˇ-aˬ, pyuˇ nymˇ goˇ tsoˆ tsoeˬ ma. Aˬ yawꞈ meuˬ lahˇ kʼehˬ pyeuꞈ law nmˇ-aˬ, shuˬ liˇ daˇ kawˬ neh kawˬ tsoeˬ ma.

¹⁰Ngaˇ-aˬ, meuˬ meuˬ lahˇ ma. Ngaˬ-euˬ kʼahˬ nyiˬ pyawˬ-aˬ, kʼoeˇ-euˬ nymˇ goˇ ma. Ngaˬ-euˬ zaˬ kʼaˬ nehˬ-ehˇ ngaˇ ya jawˇ naˇ nui saˇ oꞈ-eu, ngaˬ-euˬ zaˬ kʼaˬ siˬ duˬ-eu meh.

¹¹Baˬlaˇhaˬmoˬ lehˇ kuˇ-euˬ jawˇ duˬ-ahˇ, Sawˇlaˬmoˬ aˬ gaꞈ yaˇ kmˇ tiˬ kmˇ jaˆ meh. Yaˇ kmˇ mˇ dzaˬ-eu tsawˇ haˬ deuˬ tiˬ gʼaˬ maˇ byaˆ tiˬ heˇ biꞈ-awˇ, yaˇ kmˇ kʼoeˇ haw paˆ paˆ dzaˬ-eu meh.

¹²Sawˇlaˬmoˬ-ahˇ maˇ byaˆ tiˬ heˇ oꞈ-awˇ, yaˇ kmˇ haw paˆ paˆ-eu gʼaˬ-ahˇ nyiˬ yaˇ oꞈ kʼawꞈ, ngaˬ-euˬ aˬ gaꞈ yaˇ kmˇ ngaˬ-ahˇ taꞈ-eu tehꞈ ma.

¹³Ngaˇ gaˬ-eu gʼaˬ-oˇ, yaˇ kmˇ-ahˇ nawˬ-euˬ teˇ saˇ bi gaˬ le sheˇ. Ngaˬ-euˬ cawˬ deuˬ nawˇ dawˬ ngehˬ gaˇ gaˬ mawꞈ-eu loꞈ luꞈ meh.

¹⁴Ngaˇ gaˬ-eu gʼaˬ-oˇ, kʼaˬ tsehˆ loꞈ-ehˇ ngaˇ jawˇ gaˇ coeˬ gʼeh leꞈ-awˬ. Aˇ bawˇ yaw saw gʼawˬ mya ni dehꞈ-eu gawˬ jawˬ-ahˇ jawˇ-eu kʼaˬ tsehˆ zaˬ loꞈ-ehˇ, yaw kawˇ-ehˇ coeˬ gʼeh leꞈ-awˬ.