Read Akha Iˇsaˬyaˇ 10 Bible Online

Iˇsaˬyaˇ 10 - Akha bible

Iˇsaˬyaˇ 10

¹Maˬ tsaˬ maˬ dawˇ-eu zahˇ sahˇ kʼoꞈ taˬ-awˇ, aˬ cawˬ-ahˇ nawˬ dzaˬ kʼaˆ dzaˬ-eu zahˇ boꞈ doˆ-eu deuˬ, ya noeˬ shaˬ dui dui tehꞈ-a.

²Zaˬ coeˬ zaˬ-euˬ yaw tsaˬ yaw dawˇ-ahˇ sheu kaˬ-awˇ, iˇ shaˬ zaˬ-ahˇ yaw lehˬ ciˬ pi-eu meh. Miˬ coeˬ miˬ ma-ahˇ yehˬ bawˬ sehˇ lu-ehˇ gʼeh-awˇ, muˇ coe aˬ nmˇ-ahˇ tahˇ joe joe-eu meh.

³Kʼehˬ-eu kʼaˆ-eu jeˬ keuˆ le ngeh nah, guˆ-eu gaˆ-eu jeˬ gaˇ mahˇ kaˬ gaˇ neh oe keuˆ ngeh, nawˇ aˬ joˆ-ehˇ jahˇ nmˇ. Aˬ suˇ gʼaˬ-ahˇ laꞈ jeuˬ shaˇ-awˇ, nawˬ-euˬ pyuˇ shuiˇ myawˬ gahˬ aˬ gaˇ bi jaˆ yaꞈ nmˇ.

⁴Aˬ cawˬ neh bi deuˆ sehꞈ-eu jeˬ hawˇ-eu, aˬ cawˬ miˇ kʼahˬ-ahˇ bi nyehꞈ gʼeh-eu nyiˬ jeˬ uˬ taꞈ, gaˇ ma yawˬ kahˇ yawˬ maˬ dahˇ-a. Kʼoeˇ naˆ ni jahˇ nehˬ gʼaˬ-euˬ kʼawꞈ, Sahˬpaˬ Miˬyehˇ nui pehˇ maˬ taˬ leˇ-ehˇ, Iˇsaˬleˬlaˆ-ahˇ kʼehˬ-eu gʼaˇ duˬ cawˬ ja taˬ-euˬ aˬ laꞈ, maˬ baꞈ ka ni bi jaˆ tehꞈ-a.

⁵Aˬshuˇliˆ miˇ kʼahˬ-aˬ, ngaˬ-euˬ daˇ cuiˇ ma. Ngaˇ nui ma pehˇ ngeh diˬ-eu diˬ duˇ ma.

⁶Miˬyehˇ maˬ baw-eu tsawˇ jeuˬ hawˇ-eu, ngaˇ nui ma pehˇ-eu tsawˇ haˬ deuˬ jawˇ gaˇ, aˬ yawꞈ-ahˇ ngaˇ pyehˬ gʼeh-awˇ, aˬ yawꞈ maꞈ-euˬ pyuˇ shuiˇ myawˬ gahˬ bi ceh geuꞈ-awˇ, gaˇ ma-ahˇ jaˆ-eu shaˬ jehˆ nawˬ pahˬ-eu loꞈ-ehˇ, aˬ yawꞈ maꞈ-ahˇ bi nawˬ pahˬ ma.

⁷Ehˇ kʼawꞈ, Aˬshuˇliˆ sahˬ paˬ-aˬ, kʼoeˇ loꞈ-ehˇ maˬ noeˬ ni, tsawˇ jeuˬ gʼawˬ mya jeuˬ-ahˇ laˆ luˬ laˆ seˇ-eu lehˇ, aˬ yawꞈ noeˬ duˬ-euˬ meh.

⁸Aˬ yawꞈ heu loꞈ-ehˇ ngehˬ-eu meh. “Ngaˬ-euˬ guiˇ maꞈ-ahˇ kʼaˇ uˆ lahˇ-eu yawˬ gʼaˬ na luꞈ, dzoeˬ dzaˬ oꞈ-eu sahˬ paˬ tehꞈ maˬ ngeuˇ-a loˇ.

⁹Kaˬsheˬmiˇ meuˬ-ahˇ deuˆ gʼaˬ nehˬ-euˬ loꞈ-ehˇ, Kaˬlaˬnoˬ meuˬ-ahˇ deuˆ gʼaˬ nehˬ-euˬ maˬ ngeuˇ-a loˇ. Haˬmaˆ meuˬ hawˇ-eu Aˬpaˆ meuˬ-ahˇ, tiˬ gaˇ duˇ ni jahˇ nehˬ-awˇ, Saˬmaˬliˆ meuˬ hawˇ-eu Daˬmaˬsehˇ meuˬ-ahˇ, aˬ yawꞈ tiˬ jeˬ bi keuˆ le-euˬ maˬ ngeuˇ-a loˇ.

¹⁰Yeˬluˇsaˬlehˬ meuˬ hawˇ-eu Saˬmaˬliˆ meuˬ naˆ maˬ tseˇ, tahˬ pahˬ aˬ ma mawˇ kawˇ myaˬ dui dui-awˇ, kʼoeˇ gaˇ uˬ duˬ tahˬ-eu miˇ kʼahˬ deuˬ-ahˇ, ngaˇ aˬ laꞈ cawˬ ja-awˇ kʼehˬ ma.

¹¹Saˬmaˬliˆ meuˬ hawˇ-eu kʼoeˇ gaˇ jaˆ-eu tahˬ pahˬ aˬ ma mawˇ kawˇ deuˬ-ahˇ, ngaˇ laˆ cawˆ-euˬ loꞈ-ehˇ, Yeˬluˇsaˬlehˬ meuˬ hawˇ-eu kʼoeˇ gaˇ jaˆ-eu tahˬ pahˬ aˬ ma mawˇ kawˇ deuˬ-ahˇ kʼawꞈ, ngaˇ paˇ laˆ cawˆ nehˬ ma.”

¹²Ziˇoˬ gawˬ jawˬ hawˇ-eu Yeˬluˇsaˬlehˬ meuˬ kʼoeˇ taˆ, mˇ paˬ-ehˇ gʼeh-eu gaˇ deuˬ-ahˇ Sahˬpaˬ Miˬyehˇ mˇ gʼaˬ ngeh, nui ma huiˬ-eu mahˇ-eu laꞈ kʼoeˇ kʼahˬ sehˇ jehˆ luꞈ-eu Aˬshuˇliˆ sahˬ paˬ-ahˇ, aˬ yawꞈ kʼehˬ nehˬ kʼaˆ nehˬ tehꞈ-a.

¹³Aˬshuˇliˆ sahˬ paˬ kʼahˬ sehˇ jehˆ-awˇ ehˇ-eu, “Ngaˬ-euˬ gʼaˬ-ahˇ gʼoe-eu laꞈ kʼoeˇ, ngaˇ kʼoeˇ loꞈ-ehˇ mˇ doˆ-euˬ ma. Ngaˇ zaˬ siˬ tsawˇ gahˇ byah-eu miˇ neh, kʼoeˇ loꞈ-ehˇ mˇ pyeuꞈ-euˬ ma. Aˬ cawˬ-euˬ miˇ kaˬ-ahˇ ngaˇ tahˬ paˆ-awˇ, pyuˇ shuiˇ myawˬ gahˬ yuˇ geuꞈ-euˬ ma. Gʼaˬ kʼaˆ-eu mawˇ neˇ mawˇ gaw loꞈ-ehˇ, dzoeˬ dzaˬ-eu sahˬ paˬ deuˬ-ahˇ ngaˇ tahˬ coˬ-euˬ ma.

¹⁴Miˇ kʼahˬ tsawˇ jeuˬ dawˬ tawˆ luꞈ aˇ jiˇ bahˬ-ahˇ duˇ-awˇ, aˇ jiˇ ya uˆ gʼoˆ uiˬ-eu loꞈ-ehˇ, aˬ yawꞈ maꞈ-euˬ pyuˇ shuiˇ myawˬ gahˬ ngaˇ yuˇ geuꞈ ngeh, dahˇ diˬ diˬ-awˇ ceh laˇ-eu aˇ jiˇ maˬ ya mawˇ-ehˇ, mehˬ toˆ neh soeˬ laˇ-eu aˇ jiˇ maˬ jawˇ-eu loꞈ-ehˇ, ngaˬ-ahˇ laˆ tsoeˬ-eu gʼaˬ maˬ jawˇ miˇ nya.”

¹⁵Sahˬpaˬ Miˬyehˇ ehˇ-eu, “Daˇ kawˬ deuˆ-eu deuˆ haˬ tiˬ kahˇ, deuˆ sahˇ taꞈ-ehˇ huiˬ dzehˬ ta loˇ. Teˇ byaꞈ yehˬ-eu yehˬ ma tiˬ kahˇ, yehˬ sahˇ taꞈ-ehˇ huiˬ dzehˬ ta loˇ. Daˇ cuiˇ-ahˇ tsawˇ haˬ sheu diˇ-eu maˬ ngeuˇ naˇ, tsawˇ haˬ-ahˇ daˇ cuiˇ maˬ sheu diˇ nya-a.”

¹⁶Kʼoeˇ miˇ neh, Baoˬ huiˬ-eu Sahˬpaˬ Miˬyehˇ-aˬ, naˇ gawˇ yaw kʼaˆ pyehˬ gʼeh leꞈ-awˇ, deuˇ dui dui-eu yehˇ deuˬ-ahˇ kʼehˬ nehˬ kʼaˆ nehˬ tehꞈ-a. Aˬ yawꞈ-euˬ yaw shehꞈ kʼahˬ sehˇ uˬ moˆ miˬ dzaˬ doꞈ laˇ-awˇ, miˬ lmˇ doˆ le tehꞈ-a.

¹⁷Iˇsaˬleˬlaˆ tsawˇ jeuˬ-euˬ yaw shehꞈ pyeuꞈ-eu Miˬyehˇ miˬ dzaˬ pyeuꞈ-iˇ tehꞈ-a. Iˇsaˬleˬlaˆ tsawˇ jeuˬ-euˬ muiˬ-eu shawˇ-eu Miˬyehˇ miˬ dzaˬ miˬ lmˇ pyeuꞈ-iˇ-awˇ, aˬ gah baw duˆ hawˇ-eu baw duˆ dawˬ tawˆ luꞈ-ahˇ, tiˬ nah laꞈ kʼoeˇ puiˆ dzaˬ jiˇ tehꞈ-a.

¹⁸Naˇ gawˇ yaw kʼaˆ tsawˇ haˬ zaˬ-ahˇ kʼehˬ-eu loꞈ-ehˇ, aˇ bawˇ sahˬ kʼaˆ hawˇ-eu deh ga deh yaˇ dawˬ tawˆ luꞈ, ya cawˆ-iˇ jiˇ tehꞈ-a.

¹⁹Sahˬ kʼaˆ kʼoeˇ naˆ ni gʼeh-eu bi puiˆ byoˆ-awˇ, dzeˇ-eu aˇ bawˇ deuˬ-ahˇ, zaˬ yaw nyiˇ tiˬ gʼaˬ gui jiˇ nya tehꞈ-a.

²⁰Buˬ-iˇ-euˬ Iˇsaˬleˬlaˆ tsawˇ haˬ deuˬ, aˬ yawꞈ maꞈ-ahˇ laˆ cawˆ le-euˬ miˇ kʼahˬ-ahˇ maˬ paˇ gʼoe-ehˇ, Iˇsaˬleˬlaˆ-euˬ muiˬ-eu shawˇ-eu Miˬyehˇ pyeuꞈ-eu Sahˬpaˬ Miˬyehˇ-ahˇ gʼoe-eu aˇ nah keuˆ le tehꞈ-a.

²¹Iˇsaˬleˬlaˆ tsawˇ haˬ ui cuiˆ tehꞈ-ehˇ dzeuˇ-iˇ-awˇ, baoˬ huiˬ-eu aˬ yawꞈ maꞈ-euˬ Miˬyehˇ jawˇ gaˇ gʼoꞈ laˇ tehꞈ-a.

²²Nymˬ-mˇ Iˇsaˬleˬlaˆ tsawˇ haˬ deuˬ iˬ ma laˆ shaˆ lawˇ deh-ahˇ jaˆ-eu kʼaˇ shuiꞈ loꞈ-ehˇ myaˬ dui dui kʼawꞈ, ui cuiˆ tehꞈ-ehˇ gʼoꞈ doˆ laˇ tehꞈ-a. Luˬ-iˇ seˇ-iˇ-eu jeˬ kʼaˬ dahˇ tiˬ byah ni lehˬ hmˬ taˬ-euˬ loꞈ-ehˇ, nui kʼahˇ tiˬ shiˇ bi keuˆ le-euˬ meh.

²³Dawˬ tawˆ kʼoeˇ taˆ uˆ lahˇ-eu Baoˬ huiˬ-eu Sahˬpaˬ Miˬyehˇ neh ehˇ taˬ-euˬ loꞈ-ehˇ, aˬ yawꞈ maꞈ-euˬ miˇ kʼahˬ doe ni luˬ-iˇ seˇ-iˇ-eu jeˬ bi keuˆ le-euˬ meh.

²⁴Dawˬ tawˆ kʼoeˇ taˆ uˆ lahˇ-eu Baoˬ huiˬ-eu Sahˬpaˬ Miˬyehˇ neh, Ziˇoˬ meuˬ-ahˇ jawˇ-eu aˬ yawꞈ-euˬ tsawˇ haˬ deuˬ-ahˇ heu loꞈ-ehˇ ehˇ nehˬ-euˬ meh. “Aˬshuˇliˆ tsawˇ haˬ deuˬ-ahˇ taˬ guˆ. Iˇjiˇtuˆ tsawˇ haˬ deuˬ neh naw maꞈ-ahˇ kʼehˬ nehˬ laꞈ haw-euˬ loꞈ-ehˇ, aˬ yawꞈ maꞈ naw maꞈ-ahˇ kʼehˬ nehˬ laꞈ kʼawꞈ, naw maꞈ taˬ guˆ.

²⁵Aˬ yawꞈ maꞈ naw maꞈ-ahˇ kʼehˬ-eu kʼaˆ-eu jeˬ, tiˬ kʼehˇ laˇ kʼehˬ laꞈ kʼoeˇ aˇ saˬ bi saˬ-awˇ, aˬ yawꞈ maꞈ-ahˇ ngaˇ laˆ luˬ laˆ seˇ nehˬ ma.

²⁶Awˇleˇbaˆ lo guˇ dawˬ peh Miˇdiˬyaˬ tsawˇ haˬ deuˬ-ahˇ ngaˇ yahˬ caˆ neh juiꞈ-euˬ loꞈ-ehˇ, Baoˬ huiˬ-eu Sahˬpaˬ Miˬyehˇ pyeuꞈ-eu ngaˇ aˬ yawꞈ maꞈ-ahˇ juiꞈ ma. Iˇjiˇtuˆ tsawˇ haˬ deuˬ-ahˇ ngaˬ neh kʼehˬ nehˬ-euˬ loꞈ-ehˇ, Aˬshuˇliˆ tsawˇ haˬ deuˬ-ahˇ ngaˇ kʼehˬ nehˬ ma.

²⁷Aˇ nah aˇ yamˬ kʼoeˇ yamˬ keuˆ le ngeh, Aˬshuˇliˆ tsawˇ haˬ deuˬ-euˬ laꞈ-ahˇ neh naw maꞈ-ahˇ ngaˇ bi dzeuˇ-iˇ-awˇ, aˬ yawꞈ maꞈ-euˬ kʼaˆ baꞈ kawˬ naw maꞈ-euˬ baꞈ pu-ahˇ maˬ paˇ bi daˇ ma.”

²⁸Aˬ yawꞈ maꞈ Aˬiˇ meuˬ-ahˇ uˇ le-euˬ meh. Aˬ yawꞈ maꞈ Miˇgaˬloˬ meuˬ oe dzeuˇ-awˇ, Miˇkaˬmaˆ meuˬ-ahˇ kʼaˆ behˆ taˬ yaꞈ-euˬ meh.

²⁹Aˬ yawꞈ maꞈ gʼaˬ lahˇ oe tsehˆ-awˇ, Geˬbaˬ meuˬ-ahˇ uˬ ciꞈ oe yaꞈ-euˬ meh. Laˬmahˇ meuˬ-ahˇ jawˇ-eu tsawˇ haˬ deuˬ guˆ dui dui-awˇ, Sawˇluˆ-euˬ meuˬ pyeuꞈ-eu Giˇbyaˬ meuˬ-ahˇ jawˇ-eu deuˬ cehˆ byaˆ jiˇ-euˬ meh.

³⁰Gaˬlmˬ meuˬ zaˬ deuˬ-oˇ, guˇ-awˬ. Laˬiˇshahˆ meuˬ zaˬ deuˬ-oˇ, naˇ haˬ-awˬ. Aˬnaˬtawˇ meuˬ zaˬ deuˬ-oˇ, guˇ cawˬ nehˬ-awˬ.

³¹Maˬdaˬmeˬnahˬ meuˬ-ahˇ jawˇ-eu deuˬ nui ma ga ka-awˇ, Geˬbymˬ meuˬ-ahˇ jawˇ-eu deuˬ, uˬ kʼawˇ cehˆ piˇ luꞈ meh.

³²Iˬ nah muiˇ-eu deuˬ Noˇbaˆ meuˬ-ahˇ oe keuˆ-awˇ, Ziˇoˬ gawˬ jawˬ hawˇ-eu Yeˬluˇsaˬlehˬ meuˬ-ahˇ, laꞈ du cawˬ doˆ-awˇ lmˬ tehꞈ-a.

³³Aˇ bawˇ-ahˇ tsoꞈ-eu uˬ laꞈ juˆ dzeh nehˬ-eu loꞈ-ehˇ, Baoˬ huiˬ-eu Sahˬpaˬ Miˬyehˇ aˬ yawꞈ maꞈ-ahˇ jahˇ nehˬ tehꞈ-a. Aˇ bawˇ bawˇ ma deuˬ bi tuˇ coˬ jiˇ-awˇ, yaw goˇ deuˬ bi deuˆ awˆ-eu loꞈ-ehˇ, Sahˬpaˬ Miˬyehˇ aˬ yawꞈ maꞈ-ahˇ jahˇ nehˬ tehꞈ-a.

³⁴Sahˬ kʼaˆ ma-ahˇ deuˆ haˬ neh tuˇ byoˆ-awˇ, Leˬbaˬnoˬ gawˬ jawˬ-ahˇ dehꞈ-eu muiˬ dui dui-eu aˇ bawˇ bawˇ ma deuˬ coˬ le-eu loꞈ-ehˇ, Sahˬpaˬ Miˬyehˇ aˬ yawꞈ maꞈ-ahˇ jahˇ nehˬ tehꞈ-a.