Read Akha Iˇsaˬyaˇ 13 Bible Online

Iˇsaˬyaˇ 13 - Akha bible

Iˇsaˬyaˇ 13

¹Heu-aˬ, Miˬyehˇ neh Aˬmoˆ-euˬ aˬ li Iˇsaˬyaˇ-ahˇ pah mehˬ nehˬ-euˬ, Baˬbuˇloˬ meuˬ-ahˇ taꞈ leˇ-eu gaˇ kawˆ deuˬ meh.

²Deˬ ko ni gʼeh-eu gawˬ jawˬ-ahˇ paˇ loˬ paˇ lehˇ baꞈ diˇ-awˇ, yehˇ deuˬ-ahˇ yaw kʼaˆ-ehˇ guˇ gaˬ-awˬ. Nui ma huiˬ-eu deuˬ-euˬ meuˬ meuˬ lahˇ-ahˇ guiˇ deuˆ leˇ-eu gʼaˇ duˬ, laꞈ liˆ liˆ nehˬ-awˬ.

³Sahˬpaˬ Miˬyehˇ nui ma pehˇ-eu deuˬ-ahˇ kʼehˬ-eu gʼaˇ duˬ, aˬ yawꞈ nui kʼaˬ tsmˬ-awˇ jah coeˇ-eu yehˇ deuˬ-ahˇ, muiˬ-eu shawˇ-eu jeˬ gʼaˇ duˬ guiˇ deuˆ leˇ-awˬ lehˇ, aˬ yawꞈ dawˬ biꞈ-euˬ meh.

⁴Tsawˇ haˬ uiˬ leˇ bymˇ leˇ taˬ-euˬ teˇ saˇ loꞈ-ehˇ, gawˬ jawˬ-ahˇ lawꞈ gʼa gaˇ naˇ haˬ sheˇ. Miˇ kʼahˬ tsawˇ jeuˬ yoeˇ uiˬ leꞈ-euˬ loꞈ-ehˇ, miˇ kʼahˬ luiˬ gʼa gaˇ naˇ haˬ sheˇ. Baoˬ huiˬ-eu Sahˬpaˬ Miˬyehˇ guiˇ deuˆ-eu lehˇ, guiˇ maꞈ lehˬ hmˬ-eu teˇ saˇ meh.

⁵Miˇ kʼahˬ kʼahˬ lah ni laˆ cawˆ jiˇ-eu gʼaˇ duˬ, Sahˬpaˬ Miˬyehˇ-euˬ nui kʼahˇ mˇ byah-eu lehˇ, mˬ dzeˇ miˇ dzeˇ miˇ kʼahˬ-ahˇ neh, aˬ yawꞈ maꞈ laˇ-euˬ meh.

⁶Naˇ gawˇ dzahˬ-eu loꞈ-ehˇ mahˇ mahˇ-ehˇ jawˇ-awˬ. Sahˬpaˬ Miˬyehˇ-euˬ aˇ nah peh le luꞈ meh. Baoˬ huiˬ-eu gʼaˬ laˆ luˬ laˆ seˇ le-eu aˇ nah, dawˬ peh peh le luꞈ meh.

⁷Kʼoeˇ miˇ neh tsawˇ haˬ dawˬ tawˆ luꞈ laꞈ shiˇ shiˇ-awˇ, nui ma ga ka jiˇ tehꞈ-a.

⁸Guˆ-eu gaˆ-eu jeˬ aˬ yawꞈ maꞈ-ahˇ tsuˆ tehˬ taˬ-awˇ, shaˬ zahˬ naꞈ dui dui-eu miˇ neh, zaˬ baw luꞈ-eu aˬ ma loꞈ-ehˇ ya tsahˇ tehꞈ-a. Guˆ-eu miˇ neh tiˬ gʼaˬ tiˇ gʼaˬ haw tsoˆ taˬ-awˇ, baˬ ba neˇ tseuˆ ni shaˬ tehꞈ-a.

⁹Haw taˬ lawˬ. Sahˬpaˬ Miˬyehˇ-euˬ aˇ nah keuˆ le luꞈ meh. Nui pehˇ naꞈ-awˇ gʼawˬ shaˬ gaˬ-eu maˬ siˬ nya-eu, aˇ nah kʼoeˇ nah keuˆ le luꞈ meh. Miˇ kʼahˬ kʼahˬ lah bawˇ tsahˬ bawˇ dahˇ ya pyeuꞈ-iˇ-awˇ, iˬ baˇ ahˇ-eu deuˬ ya shiˇ jiˇ tehꞈ-a.

¹⁰Mˬ taˆ aˬ guiˇ dawˬ tawˆ miˆ kʼaꞈ jiˇ-awˇ, nahˇ ma doˆ laˇ ngeh yaw shehꞈ maˬ bya-ehˇ, ba la tsehˬ ngeh zahˇ tsui ni jaˆ tehꞈ-a.

¹¹Sahˬpaˬ Miˬyehˇ heu loꞈ-ehˇ ehˇ-eu meh. “Yaw haiˬ jeˬ byah-eu miˇ tsaˬ tahˬ kʼawˇ-ahˇ ngaˇ kʼehˬ-awˇ, iˬ baˇ mˇ-eu yaw haiˬ deuˬ-ahˇ ngaˇ kʼehˬ nehˬ ma. Jahˇ gʼeh-eu tsawˇ haˬ deuˬ daˬ bi ga-awˇ, smˇ kʼaˆ kʼaˆ-eu deuˬ-ahˇ ngaˇ nawˬ awˆ ma.

¹²Tsawˇ haˬ zaˬ shuiˇ myaˆ-ehˇ maˬ myaˬ ni bi pyeuꞈ-iˇ-awˇ, Awˇpiˇlaˆ miˇ kʼahˬ-ahˇ jaˆ-eu shuiˇ miˇ tsaˬ zaˬ dawˬ tawˆ luꞈ myaˆ maˬ tseˇ myaˬ tehꞈ-a.

¹³Baoˬ huiˬ-eu Sahˬpaˬ Miˬyehˇ pyeuꞈ-eu ngaˇ, ngaˬ-euˬ nui ma bi mawˇ ngeh nah, mˬ-ahˇ sheu nyeh nehˬ-awˇ, miˇ tsaˬ tahˬ kʼawˇ jawˇ duˬ bi cehˆ paˇ ma.

¹⁴“Baˬbuˇloˬ miˇ kʼahˬ-ahˇ jawˇ-eu aˬ cawˬ tsawˇ jeuˬ deuˬ, ciˇ haˬ beuˆ lehˬ-awˇ bi cehˆ-euˬ loꞈ-ehˇ, bo-eu gʼaˬ maˬ jawˇ-ehˇ cehˆ-eu yawˇ maꞈ loꞈ-ehˇ, yawˬ ha miˇ kʼahˬ kʼaˇ jaˆ-eu paw cehˆ gʼoꞈ tehꞈ-a.

¹⁵Kʼaˇ bi teh miˇ-euˬ deuˬ gahˬ neh bi tsawˆ sehꞈ-awˇ, kʼaˇ bi nyehꞈ mi-euˬ deuˬ mi cehˇ neh bi sehꞈ jiˇ tehꞈ-a.

¹⁶Aˬ yawꞈ maꞈ myaˆ mawˇ gaˇ, aˬ yawꞈ maꞈ-euˬ zaˬ bi biˬ pyehˆ jiˇ-awˇ, aˬ yawꞈ maꞈ-euˬ myawˬ gahˬ bi yuˇ geuꞈ-eu uˬ taꞈ, aˬ yawꞈ maꞈ-euˬ miˬ zaˬ deuˬ-ahˇ yehˬ bawˬ-ehˇ, jahˇ nehˬ tehꞈ-a.”

¹⁷Sahˬpaˬ Miˬyehˇ heu loꞈ-ehˇ ehˇ-eu meh. “Baˬbuˇloˬ miˇ kʼahˬ-ahˇ guiˇ bi deuˆ-eu lehˇ, pyuˇ-ahˇ mehˇ juiˇ maˬ juiˇ-eu tsawˇ jeuˬ, shuiˇ-ahˇ nui kʼahˇ maˬ jaˆ-eu Meˬdeˬ[7] tsawˇ haˬ deuˬ-ahˇ ngaˇ laˆ noeˬ luꞈ-eu ma.

¹⁸Zaˬ guˬ deuˬ-ahˇ aˬ yawꞈ maꞈ kaˆ neh beuˆ coˬ-awˇ, zaˬ nahˬ deuˬ-ahˇ gʼawˬ sha-ehˇ maˬ gʼeh-eu uˬ taꞈ, zaˬ yaw nyiˇ deuˬ-ahˇ gʼawˬ shaˬ maˬ haw gaˬ-a.

¹⁹Miˇ kʼahˬ dawˬ tawˆ luꞈ kʼoeˇ taˆ, Baˬbuˇloˬ miˇ kʼahˬ yaw shehꞈ kʼahˬ sehˇ huiˬ-eu miˇ neh, aˬ yawꞈ-euˬ tsawˇ haˬ deuˬ kʼahˬ sehˇ jaˆ kʼawꞈ Sawˇdoˬ meuˬ hawˇ-eu Gawˇmawˇlaˆ meuˬ loꞈ-ehˇ, Sahˬpaˬ Miˬyehˇ pyeuꞈ-eu ngaˇ laˆ luˬ laˆ seˇ nehˬ ma.

²⁰Tsawˇ haˬ tiˬ gʼaˬ-iˬ kʼoeˇ gaˇ maˬ jawˇ-ehˇ pyeuꞈ-iˇ-awˇ, Aˬlaˆ tsawˇ haˬ kʼoeˇ gaˇ sehˬ gʼawˆ gʼawˆ-awˇ maˬ paˇ naˬ-ehˇ, yawˇ bo laˇ-eu tsawˇ haˬ maˬ jawˇ-ehˇ pyeuꞈ-iˇ tehꞈ-a.

²¹Bawˇ tsahˬ jeˬ zaˬ yuꞈ duˬ pyeuꞈ-iˇ-awˇ, bawˇ tsahˬ aˬ kuiˬ bahˬ sheu-awˇ jawˇ tehꞈ-a. Dzeˇ ngawˇ deuˬ kʼoeˇ gaˇ uiˬ leˇ-awˇ, bawˇ tsahˬ ciꞈ myehꞈ deuˬ tsawˬ niˇ gʼa duˬ pyeuꞈ-iˇ tehꞈ-a.

²²Loꞈ-eu nymˇ goˇ hawˇ-eu sahˬ paˬ-euˬ nymˇ laꞈ kʼoeˇ, kʼaˬ yehˇ hawˇ-eu bawˇ tsahˬ aˬ kuiˬ deuˬ lawꞈ gʼa tehꞈ-a. Baˬbuˇloˬ meuˬ-euˬ aˇ nah aˇ yamˬ keuˆ le luꞈ meh. Gʼawˬ myahˇ ni maˬ paˇ ca meh.”