Read Akha Iˇsaˬyaˇ 14 Bible Online

Iˇsaˬyaˇ 14 - Akha bible

Iˇsaˬyaˇ 14

¹Iˇsaˬleˬlaˆ tsawˇ haˬ deuˬ-ahˇ Sahˬpaˬ Miˬyehˇ gʼawˬ shaˬ paˇ gaˬ nehˬ-awˇ, aˬ yawꞈ-euˬ tsawˇ jeuˬ bi pyeuꞈ laˇ-eu gʼaˇ duˬ, tiˬ poˆ paˇ tseˇ doˆ nehˬ tehꞈ-a. Aˬ yawꞈ maꞈ-euˬ miˇ kʼahˬ laꞈ kʼoeˇ aˬ yawꞈ maꞈ-ahˇ paˇ bi jawˇ gʼoꞈ leˇ-awˇ, aˬ cawˬ tsawˇ jeuˬ deuˬ kʼawꞈ aˬ yawꞈ maꞈ nehˬ-ehˇ jawˇ leˇ tehꞈ-a.

²Iˇsaˬleˬlaˆ tsawˇ haˬ deuˬ aˬ yawꞈ maꞈ-euˬ miˇ kʼahˬ laꞈ kʼoeˇ gʼoꞈ jawˇ leˇ nya ni, tsawˇ jeuˬ gʼawˬ mya jeuˬ aˬ yawꞈ maꞈ-ahˇ caw ba nehˬ-awˇ, tsawˇ jeuˬ kʼoeˇ deuˬ Iˇsaˬleˬlaˆ miˇ kʼahˬ laꞈ kʼoeˇ aˬ yawꞈ maꞈ-euˬ zaˬ kʼaˆ geuꞈ laˇ tehꞈ-a. Yaw beh aˬ yawꞈ maꞈ-ahˇ deuˆ gʼaˬ-euˬ tsawˇ haˬ deuˬ-ahˇ aˬ yawꞈ maꞈ paˇ deuˆ gʼaˬ-awˇ, aˬ yawꞈ maꞈ-ahˇ kʼehˬ-euˬ tsawˇ haˬ deuˬ kʼoeˇ taˆ, aˬ yawꞈ maꞈ paˇ uˆ lahˇ tehꞈ-a.

³Iˇsaˬleˬlaˆ tsawˇ haˬ deuˬ shaˬ zahˬ naꞈ dui dui-awˇ, myawˬ kʼaˆ bi ciˬ pi-euˬ uˬ moˆ, Sahˬpaˬ Miˬyehˇ aˬ yawꞈ maꞈ-ahˇ bi buˬ bi law-iˇ tehꞈ-a.

⁴Aˬ yawꞈ kʼoeˇ loꞈ-ehˇ ka kʼoꞈ nehˬ ngeh, aˬ yawꞈ maꞈ Baˬbuˇloˬ sahˬ paˬ-ahˇ cehꞈ lehꞈ ka-eu laꞈ kʼoeˇ heu loꞈ-ehˇ ehˇ tehꞈ-a. “Aˬ cawˬ-ahˇ kʼehˬ-eu sahˬ paˬ-euˬ aˇ yamˬ jiˇ-euˬ meh. Aˬ yawꞈ aˬ cawˬ-ahˇ maˬ paˇ kʼehˬ nya meh.

⁵Yaw haiˬ-euˬ daˇ cuiˇ dzoeˬ dzaˬ gawˬ yoeˬ, Sahˬpaˬ Miˬyehˇ neh bi ngawˬ kʼehꞈ-euˬ meh.

⁶Miˇ kʼahˬ zaˬ-ahˇ maˬ naˬ leˇ ni diˬ-awˇ, miˇ kʼahˬ tsawˇ jeuˬ-ahˇ maˬ tsehˆ leˇ ni zuiˆ-euˬ, gʼawˬ shaˬ gaˬ-eu maˬ siˬ nya-eu dzoeˬ dzaˬ gawˬ yoeˬ kʼoeˇ meh.

⁷Ehˇ kʼawꞈ nymˬ-mˇ aˇ saˬ saˬ laˇ ngeh-aˬ, tsawˇ jeuˬ dawˬ tawˆ nui saˇ za-awˇ, laˬ kʼaˬ cehˇ-eu dawˬ caˇ luꞈ meh.

⁸‘Nymˬ-mˇ nawˇ ga awˆ-iˇ-euˬ-aˬ, nga maꞈ-ahˇ tuˇ dzeh laˇ-eu gʼaˬ maˬ paˇ jawˇ ngaˇ’ lehˇ, guˇ baˬ luˇ aˇ bawˇ hawˇ-eu shuˬ liˇ aˇ bawˇ, sahˬ paˬ kʼoeˇ gʼaˬ-ahˇ ehˇ luꞈ meh.

⁹“Nawˬ-ahˇ ha laˬ laˇ-eu gʼaˇ duˬ, shiˇ-eu miˇ kʼahˬ lawꞈ gʼa luꞈ meh. Nawˬ-ahˇ bi ha geuꞈ-eu gʼaˇ duˬ, shiˇ dzeuˇ-euˬ yaw huiˬ yaw mahˇ deuˬ-eu saꞈ laˇ-ahˇ aˬ yawꞈ maꞈ laˆ noeˬ luꞈ-awˇ, miˇ kʼahˬ sahˬ paˬ deuˬ-euˬ saꞈ laˇ deuˬ-ahˇ, nuiˇ mahˬ-ahˇ nuiˇ luꞈ-eu laˆ tuˇ luꞈ meh.

¹⁰Aˬ yawꞈ maꞈ dawˬ tawˆ luꞈ nawˬ-ahˇ heu loꞈ-ehˇ ehˇ laˇ tehꞈ-a. ‘Nymˬ-mˇ nawˇ nga maꞈ loꞈ-ehˇ ga juˬ le-awˇ, nga maꞈ-ahˇ maˬ paˇ beu gaˇ ngaˇ.

¹¹Nawˬ-euˬ yaw shehꞈ kʼahˬ sehˇ dawˬ tawˆ luꞈ, nawˬ-ahˇ taˬ huiˬ-eu deuˇ-mˬ teˇ saˇ nehˬ-ehˇ, lmˬ bymˇ-ahˇ hehˇ ahˇ leꞈ jiˇ-euˬ nga. Luˆ tahˬ kʼawˬ daˬ kʼoeˇ taˆ yuꞈ-awˇ, buˬ joe aˇ bui dm-awˬ’ lehˇ ehˇ laˇ tehꞈ-a.”

¹²Shawˬ ga shawˬ muiˇ-ahˇ duˇ-eu Baˬbuˇloˬ sahˬ paˬ-oˇ, mˬ kʼoeˇ taˆ neh aˬ joˆ-ehˇ ga ka le teˬ. Dzeuˇ laˇ ngeh tsawˇ jeuˬ dawˬ tawˆ luꞈ kʼoeˇ taˆ nawˬ tehˬ-euˬ tsawˇ haˬ, aˬ joˆ-ehˇ miˇ tsaˬ kʼoeˇ taˆ bi biˬ ka teˬ.

¹³Nawˬ-euˬ nui ma laꞈ kʼoeˇ ehˇ-eu, “Mˬ kʼoeˇ taˆ ngaˇ daˆ leˇ-awˇ, Miˬyehˇ-euˬ aˬ guiˇ deuˬ kʼoeˇ taˆ, ngaˬ-euˬ nuiˇ mahˬ ciˬ taˬ leˇ ma. Laꞈ taˆ pyawˬ-ahˇ jaˆ-eu miˬ yehˇ deuˬ uiˬ leˇ duˬ gawˬ jawˬ-ahˇ, ngaˇ sahˬ paˬ geuꞈ-awˇ nuiˇ leˇ ma.

¹⁴Mˬ dmˇ uˬ du ngaˇ daˆ keuˆ leˇ-awˇ, Huiˬ dui mahˇ dui dui-eu gʼaˬ-ahˇ dehꞈ duˇ ma.”

¹⁵Ehˇ kʼawꞈ, shiˇ-eu miˇ kʼahˬ duˬ kʼawꞈ naꞈ dui dui-eu tsahˇ-ahˇ, nawˇ ga ahˇ le-euˬ meh.

¹⁶Nawˬ-ahˇ kʼaˇ ya mawˇ-eu deuˬ zahˬ leˇ-awˇ, nawˬ-euˬ gaˇ kawˆ heu loꞈ-ehˇ shaˇ noeˬ tehꞈ-a. Miˇ tsaˬ tahˬ kʼawˇ-ahˇ gʼeu nyeh-awˇ, miˇ kʼahˬ tsawˇ jeuˬ deuˬ yaw dzuˬ bi dzuˬ-euˬ kʼoeˇ, tsawˇ haˬ heu gʼaˬ maˬ ngeuˇ-a loˇ.

¹⁷Miˇ tsaˬ tahˬ kʼawˇ-ahˇ kʼaˇ shuiꞈ shuiꞈ yaˇ laˆ pyeuꞈ-awˇ, meuˬ deuˬ deh byaˆ jiˇ-awˇ, kʼaˇ nyehꞈ mi-euˬ tsawˇ haˬ-ahˇ maˬ pyehˬ nehˬ-eu kʼoeˇ gʼaˬ, aˬ yawꞈ maˬ ngeuˇ-a loˇ.

¹⁸Miˇ kʼahˬ tsawˇ jeuˬ kʼoeˇ taˆ sahˬ paˬ kʼaˇ geuꞈ-euˬ deuˬ, kʼahˬ sehˇ jaˆ-eu lmˬ bymˇ baw meh.

¹⁹Ehˇ kʼawꞈ, nawˇ lmˬ bymˇ maˬ baw-ehˇ, aˇ yamˬ maˬ keuˆ miˇ-ahˇ yoeˇ dzeh-euˬ zaˬ loꞈ-ehˇ, baꞈ dzeh-awˇ bi buꞈ-iˇ-euˬ meh. Nawˬ-euˬ kʼoeˇ taˆ shiˇ daˆ taˬ-euˬ, mi cehˇ kʼehˬ-ahˇ shiˇ-euˬ yehˇ deuˬ nehˬ-ehˇ, lo gahˬ lo guˇ duˬ kʼahˬ laꞈ kʼoeˇ bi baꞈ ahˇ-awˇ, aˬ cawˬ neh bi nawˬ pahˬ-euˬ meh.

²⁰Nawˬ-euˬ miˇ kʼahˬ nawˇ laˆ cawˆ-awˇ, nawˬ-euˬ tsawˇ jeuˬ nawˇ sehꞈ-euˬ baˬ da neh, sahˬ paˬ nui deuˬ-ahˇ baꞈ pahˬ-euˬ loꞈ-ehˇ, aˬ cawˬ nawˬ-ahˇ maˬ baꞈ pahˬ-a. Haiˬ-eu tsawˇ haˬ deuˬ-euˬ zaˬ deuˬ uˆ deuˬ, tsawˇ myahˇ byoˆ-awˇ tsuiꞈ dahˬ dahˬ-iˇ tehꞈ-a.

²¹Aˬ poeˬ aˬ bawˇ deuˬ neh mˇ-euˬ iˬ baˇ aˇ poeˬ, aˬ yawꞈ-euˬ aˬ li deuˬ-ahˇ sehꞈ-eu gʼaˇ duˬ, lehˬ hmˬ laˆ dah taˬ-awˬ. Aˬ yawꞈ maꞈ miˇ tsaˬ kʼoeˇ taˆ dzoeˬ dzaˬ maˬ paˇ oꞈ-ehˇ, meuˬ maˬ paˇ daˬ byah nya meh.

²²Baoˬ huiˬ-eu Sahˬpaˬ Miˬyehˇ ehˇ-eu, “Baˬbuˇloˬ meuˬ-ahˇ ngaˇ guiˇ deuˆ-awˇ, laˆ luˬ laˆ seˇ nehˬ ma. Zaˬ yaw nyiˇ tiˬ gʼaˬ-ahˇ keuˆ ni maˬ taˬ nehˬ-ehˇ, tiˬ gʼaˬ-iˬ maˬ bi dzeuˇ-iˇ-eu uˬ taꞈ, mˇ myawˬ tiˬ hmˬ-iˬ maˬ bi dzeˇ yaꞈ ni laˆ cawˆ nehˬ-awˇ, tsawˇ myahˇ bi byoˆ-iˇ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.

²³Baˬbuˇloˬ meuˬ-ahˇ lah yaˬ bi yaˬ-iˇ-awˇ, kuiˬ siˆ zaˬ siˆ deuˬ kʼoeˇ gaˇ jawˇ tehꞈ-a. Baˬbuˇloˬ meuˬ laꞈ kʼoeˇ tiˬ jeˬ-iˬ maˬ bi dzeˇ yaꞈ ni, yaˆ pyawˇ yaˆ juiˇ-eu loꞈ-ehˇ laˆ cawˆ ma lehˇ, Baoˬ huiˬ-eu Sahˬpaˬ Miˬyehˇ pyeuꞈ-eu ngaˇ ehˇ tsehˆ-eu ma.”

²⁴Baoˬ huiˬ-eu Sahˬpaˬ Miˬyehˇ ehˇ-eu, “Ngaˬ neh kʼaˇ lehˬ hmˬ taˬ-euˬ jeˬ keuˆ le-awˇ, ngaˇ kʼaˇ noeˬ tsehˆ taˬ-euˬ jeˬ pyeuꞈ laˇ tehꞈ-a.

²⁵Ngaˬ-euˬ miˇ tsaˬ Iˇsaˬleˬlaˆ miˇ kʼahˬ laꞈ kʼoeˇ, Aˬshuˇliˆ tsawˇ haˬ deuˬ-ahˇ ngaˇ laˆ cawˆ ma. Ngaˬ-euˬ gawˬ jawˬ deuˬ kʼoeˇ taˆ, aˬ yawꞈ maꞈ-ahˇ ngaˇ nawˬ pyehˆ ma. Ngaˬ-euˬ tsawˇ haˬ deuˬ-ahˇ aˬ yawꞈ maꞈ neh ciˬ baꞈ ciˬ pi nehˬ-euˬ, kʼaˆ baꞈ kʼaˆ behˆ dawˬ tawˆ luꞈ-ahˇ, ngaˇ yuˇ dzeh nehˬ jiˇ ma.

²⁶Miˇ tsaˬ dawˬ tawˆ luꞈ kʼoeˇ taˆ heu loꞈ-ehˇ keuˆ le ni, ngaˇ noeˬ tsehˆ taˬ-euˬ ma. Tsawˇ jeuˬ dawˬ tawˆ luꞈ-ahˇ kʼehˬ-eu gʼaˇ duˬ, ngaˇ aˬ laꞈ cawˬ ja taˬ-euˬ ma.”

²⁷Baoˬ huiˬ-eu Sahˬpaˬ Miˬyehˇ neh lehˬ hmˬ taˬ-euˬ jeˬ-ahˇ, kawˆ pyaˆ nya-eu aˬ suˇ gʼaˬ jawˇ ta. Cawˬ ja taˬ-eu aˬ yawꞈ-eu aˬ laꞈ-ahˇ, dehˬ kʼoꞈ nya-eu aˬ suˇ gʼaˬ jawˇ ta.

²⁸Heu-aˬ, sahˬ paˬ Aˬkaˆ shiˇ ngeh kʼoꞈ keuˆ le-euˬ Sahˬpaˬ Miˬyehˇ-euˬ dawˬ neh.

²⁹“Piˇliˇtiˆ tsawˇ haˬ kʼaˇ jawˇ kʼaˇ deuˬ-oˇ, naw maꞈ-ahˇ diˬ-eu daˇ cuiˇ kʼehꞈ-iˇ-euˬ miˇ neh, naw maꞈ laˬ kʼaˬ taˬ cehˇ. Shiˇ dzeuˇ-euˬ aˇ lawˇ kʼoeˇ mawˇ-euˬ duˬ ciˇ-ahˇ, doꞈ kʼaˆ dzehˬ-eu aˇ lawˇ yaw shuiꞈ doˆ laˇ tehꞈ-a. Aˇ lawˇ ya uˆ ceuꞈ deˇ laˇ ngeh, zaw nya-eu aˇ lawˇ ceuꞈ doˆ leꞈ tehꞈ-a.

³⁰Shaˬ dui dui-eu ngaˬ-euˬ tsawˇ haˬ ya dzaˬ ya dawˇ dehˆ-awˇ, zahˬ dui dui-eu ngaˬ-euˬ tsawˇ haˬ nui saˇ oꞈ tehꞈ-a. Ehˇ kʼawꞈ, naw maꞈ tsawˇ haˬ tiˬ gʼaˬ-iˬ maˬ dehꞈ dzeuˇ nya ni, mehꞈ-eu shuꞈ-eu jeˬ ngaˇ bi keuˆ le ma.”

³¹Meuˬ lahˇ kʼehˬ-oˇ, guˇ-awˬ. Meuˬ-oˇ, ngoeˇ-awˬ. Piˇliˇtiˆ tsawˇ haˬ deuˬ-oˇ, guˆ dui dui-awˬ. Laꞈ taˆ paw pyawˬ-ahˇ uˬ kʼoeˬ du doˆ laˇ luꞈ-eu kʼoeˇ, guiˇ maꞈ maꞈ ma pyeuꞈ-awˇ, guˆ-eu nui ma ahˇ-eu tiˬ gʼaˬ-iˬ maˬ keuˬ-a.

³²Piˇliˇtiˆ tsawˇ haˬ dawˬ dzawˇ mˇ-eu tsawˇ haˬ deuˬ-ahˇ, aˬ joˆ-ehˇ ehˇ nehˬ nmˇ. Ziˇoˬ meuˬ-ahˇ Sahˬpaˬ Miˬyehˇ laˆ ziꞈ-awˇ, shaˬ zahˬ mˇ-euˬ aˬ yawꞈ-euˬ tsawˇ jeuˬ-ahˇ, nui saˇ bi oꞈ-eu meh lehˇ ehˇ nehˬ ma.”