Read Akha Iˇsaˬyaˇ 15 Bible Online

Iˇsaˬyaˇ 15 - Akha bible

Iˇsaˬyaˇ 15

¹Heu-aˬ, Mawˇbaˆ miˇ kʼahˬ-ahˇ taꞈ leˇ-eu Miˬyehˇ-euˬ dawˬ meh. Mawˇbaˆ miˇ kʼahˬ laꞈ kʼoeˇ jaˆ-eu, Aˇlaˆ meuˬ hawˇ-eu Kiˇlaˆ meuˬ, tiˬ miˇ tehꞈ-ehˇ bi laˆ cawˆ-awˇ, Mawˇbaˆ miˇ kʼahˬ ciˬ cuˇ ni jaˆ-eu meh.

²Diˇboˬ meuˬ-ahˇ jawˇ-eu tsawˇ haˬ deuˬ, yaw goˇ-ahˇ jaˆ-eu taˆ-ahˇ daˆ leˇ-awˇ, tsawˇ ngoeˇ ngoeˇ leˇ-euˬ meh. Neˬboˬ meuˬ hawˇ-eu Meˬdeˬbaˬ meuˬ gʼaˇ duˬ, Mawˇbaˆ tsawˇ haˬ deuˬ tsawˇ ngoeˇ ngoeˇ-eu meh. Yawˬ gʼaˬ na luꞈ noeˬ shaˬ dui dui-eu miˇ neh, uˬ duˬ hawˇ-eu mehˬ mahˬ jehˆ dzeh-eu meh.

³Meuˬ-euˬ gaˇ ma doe ni cah-eu deuˬ, guˬ daˇ pehˇ zeuˇ mehˬ tsoeˬ dm-awˇ, Nymˇ mˬ-ahˇ daˆ-eu deuˬ hawˇ-eu meuˬ-euˬ pu ka jawˇ-eu deuˬ, myaˆ biˇ ju ni tsawˇ ngoeˇ ngoeˇ luꞈ-eu meh.

⁴Heˬshaˬboˬ meuˬ hawˇ-eu Eˇlaˬleˬ meuˬ-ahˇ ngoeˇ-eu teˇ saˇ, Yaˬhaˇ meuˬ-ahˇ gaˬ keuˆ le-euˬ miˇ neh, Mawˇbaˆ yehˇ deuˬ nui ma baˬ laˇ jiˇ-awˇ, guˇ guˇ-ehˇ ngoeˇ-eu meh.

⁵Mawˇbaˆ miˇ kʼahˬ gʼaˇ duˬ ngaˬ-euˬ nui ma laꞈ kʼoeˇ ngoeˇ luꞈ-eu ma. Aˬ yawꞈ maꞈ Ziˇoˬ meuˬ-ahˇ cehˆ leˇ-awˇ, Eˇgaˬlaˆsheˬliˇshahˬ meuˬ-ahˇ cehˆ keuˆ-euˬ meh. Tiˬ paˆ na deuˬ Luˇhiˆ gaˬ daˆ-ahˇ ngoeˇ ngoeˇ-ehˇ daˆ-awˇ, Hawˇloˬneˬ gaˇ ma caw caw-ehˇ, yaw kʼaˆ-ehˇ ngoeˇ ngoeˇ-ehˇ tiˬ deuˬ cah-eu meh.

⁶Nymˇlmˬ lawˇ baˬ gui-iˇ-awˇ, yaˇ moꞈ dawˬ tawˆ luꞈ koˆ-iˇ jiˇ-awˇ, aˇ paꞈ yaw nyoeˇ tiˬ paꞈ-iˬ maˬ baw-a.

⁷Aˬ yawꞈ maꞈ-euˬ myawˬ gahˬ dawˬ tawˆ yuˇ-awˇ cehˆ dzeuˇ nya ni, Pawˇpaˬlaˬ aˇ bawˇ dehꞈ-eu gʼaˬ law le tsehˆ-euˬ meh.

⁸Mawˇbaˆ miˇ kʼahˬ tiˬ jawˬ tsawˇ ngoeˇ ngoeˇ-eu teˇ saˇ, Eˇgaˬleˬ hawˇ-eu Beˬlaˇeˬlmˬ meuˬ-ahˇ gaˬ keuˆ-eu meh.

⁹Diˇboˬ meuˬ-ahˇ yoeˇ-eu lawˇ baˬ shiˬ tehꞈ-ehˇ jaˆ kʼawꞈ, kʼoeˇ naˆ maˬ tseˇ paˇ jahˇ nehˬ-eu gʼaˇ duˬ, ngaˇ lehˬ hmˬ taˬ-euˬ ma. Cehˆ dzeuˇ-euˬ Mawˇbaˆ tsawˇ haˬ deuˬ kʼoeˇ taˆ maˬ ehˇ, jawˇ yaꞈ-euˬ Mawˇbaˆ tsawˇ haˬ deuˬ kʼoeˇ taˆ maˬ ehˇ, aˇ laˬ jaˬ shiˇ pyehˬ gʼeh leꞈ ma.