Read Akha Iˇsaˬyaˇ 16 Bible Online

Iˇsaˬyaˇ 16 - Akha bible

Iˇsaˬyaˇ 16

¹Yeˬluˇsaˬlehˬ meuˬ-ahˇ uˆ lahˇ-eu gʼaˬ jawˇ gaˇ, kʼaˇ shuiꞈ deh yaˇ-ahˇ jaˆ-eu Seˇlaˇ meuˬ-ahˇ neh, Mawˇbaˆ tsawˇ haˬ deuˬ yawˇ zaˬ tiˬ mawˇ laꞈ sawˬ biꞈ gʼeh-euˬ meh.

²Bahˬ-ahˇ uˇ-eu bi teh doˆ-euˬ aˇ jiˇ loꞈ-ehˇ, Mawˇbaˆ tsawˇ haˬ deuˬ Aˬnoˬ lawˇ baˬ lawˇ dzeˇ, gʼoꞈ laˆ gʼoꞈ dmˇ-ehˇ cah-awˇ dawˬ luꞈ meh.

³Aˬ yawꞈ maꞈ Yuˇdaˆ tsawˇ haˬ-ahˇ ehˇ-eu, “Aˬ joˆ-ehˇ jahˇ paˬ nga lehˇ mehˬ nehˬ laꞈ sheˇ. Nahˇ tsaˇ kʼaˆ ngeh aˇ bawˇ naˇ shmˇ awˆ-eu loꞈ-ehˇ, naw maꞈ-euˬ naˇ shmˇ uˬ moˆ gʼaˬ naˬ bi naˬ laꞈ-awˇ, ngehˬ gʼeh dah teˬ laꞈ-awˬ. Uˬ duˬ tahˬ shaˇ duˬ poˆ-eu nga maꞈ-ahˇ, tiˬ poˆ sheuˬ zaꞈ nehˬ laꞈ.

⁴Naw maꞈ miˇ kʼahˬ laꞈ kʼoeˇ nga maꞈ-ahˇ bi jawˇ laꞈ-awˇ, nga maꞈ-ahˇ laˆ cawˆ mawꞈ-eu deuˬ maˬ bi laˇ ni, haw teˬ haw piˇ laꞈ-awˬ.” (Kʼehˬ-eu kʼaˆ-eu jeˬ hawˇ-eu laˆ luˬ laˆ seˇ-eu jeˬ aˇ saˬ saˬ le tehꞈ-a. Miˇ kʼahˬ-ahˇ laˆ cawˆ le-eu deuˬ iˇ byoˆ jiˇ tehꞈ-a.

⁵Kʼoeˇ ngeh, Daˬbiˇ-euˬ zaˬ deuˬ uˆ deuˬ laꞈ kʼoeˇ, dzoeˬ dzaˬ sahˬ paˬ tiˬ gʼaˬ doˆ laˇ-awˇ, saˇ jaˇ ziꞈ-awˇ gʼoeˇ-eu gaˬ-eu laꞈ kʼoeˇ, aˬ yawꞈ-euˬ tsawˇ jeuˬ-ahˇ uˆ lahˇ tehꞈ-a. Yaw tsaˬ yaw dawˇ jeˬ mˇ-eu gʼaˇ duˬ aˬ yawꞈ maˬ nyi naˬ ni, yaw sui yaw dawˇ laꞈ kʼoeˇ yaˇ kʼaˬ daˇ nehˬ tehꞈ-a.)

⁶Yuˇdaˆ tsawˇ haˬ deuˬ ehˇ-eu, “Mawˇbaˆ tsawˇ haˬ deuˬ jahˇ gʼeh-eu gaˇ kawˆ, nga maꞈ ya gaˬ gʼaˬ taˬ-euˬ ma. Aˬ yawꞈ maꞈ kʼahˬ sehˇ huiˬ-awˇ jahˇ gʼeh sehꞈ kʼawꞈ, aˬ yawꞈ maꞈ neh kʼahˬ sehˇ jehˆ-euˬ awˬ kʼawꞈ tehꞈ meh.”

⁷Kʼoeˇ miˇ neh Mawˇbaˆ tsawˇ haˬ deuˬ tsawˇ ngoeˇ ya ngoeˇ tehꞈ-a. Mawˇbaˆ miˇ kʼahˬ gʼaˇ duˬ ga uiˬ-awˇ ngoeˇ tehꞈ-a. Kiˇlaˆheˬyehˆ meuˬ-ahˇ jawˇ ngeh dzaˬ-euˬ, kuiˇ dui dui-eu aˬ gaꞈ kaˬ muˇ-ahˇ noeˬ mawˇ-awˇ, ya ngoeˇ sehꞈ leꞈ tehꞈ-a.

⁸Heˬshaˬboˬ meuˬ-ahˇ jaˆ-eu deh yaˇ deuˬ hawˇ-eu, Siˇbaˬmaˬ meuˬ-ahˇ jaˆ-eu aˬ gaꞈ yaˇ kmˇ deuˬ, bi laˆ cawˆ jiˇ-euˬ meh. Ciˇ ni Yaˬzeuˬ meuˬ-ahˇ cah keuˆ-awˇ, uˬ laꞈ kʼaˇ shuiꞈ deh yaˇ-ahˇ cawˬ keuˆ-awˇ, baw nmˬ iˬ ma laˆ shaˆ iˇ dzeuˇ taˬ-euˬ, mehˇ dui dui-eu aˬ gaꞈ baw duˆ kʼoeˇ deuˬ, miˇ kʼahˬ tsawˇ jeuˬ sahˬ paˬ sahˬ ma deuˬ neh, bi coeˇ tsehˆ jiˇ-eu meh.

⁹Yaˬzeuˬ meuˬ gʼaˇ duˬ ngaˇ tsawˇ ngoeˇ ngoeˇ-euˬ loꞈ-ehˇ, nymˬ-mˇ Siˇbaˬmaˬ meuˬ-euˬ aˬ gaꞈ baw duˆ gʼaˇ duˬ, ngaˇ tsawˇ ngoeˇ ngoeˇ-eu ma. Miˇ kʼahˬ zaˬ noeˬ tmˬ-awˇ laˬ kʼaˬ cehˇ duˬ pyeuꞈ-eu, cehˇ yehˬ cehˇ diˬ-eu maˬ paˇ baw-euˬ miˇ neh, Heˬshaˬboˬ meuˬ hawˇ-eu Eˇlaˬleˬ meuˬ gʼaˇ duˬ, ngaˬ-euˬ myaˆ biˇ yoeˇ le miˇ-a.

¹⁰Miˇ tsaˬ muiˬ dui dui-eu deh yaˇ-ahˇ, laˬ kʼaˬ cehˇ luꞈ-eu tiˬ gʼaˬ-iˬ maˬ paˇ ya mawˇ meh. Aˬ gaꞈ yaˇ kmˇ laꞈ kʼoeˇ dawˬ caˇ caˇ-awˇ guˇ-eu teˇ saˇ, maˬ paˇ ya gaˬ haw meh. Aˬ gaꞈ dzaˇ uiˇ lehˬ-eu tsawˇ haˬ maˬ paˇ ya mawˇ-ehˇ, laˬ kʼaˬ cehˇ-awˇ guˇ-eu teˇ saˇ byoˆ tsehˆ-euˬ meh.

¹¹Mawˇbaˆ miˇ kʼahˬ gʼaˇ duˬ ngaˇ tsawˇ ngoeˇ ngoeˇ-awˇ, Kiˇlaˆheˬyehˆ meuˬ gʼaˇ duˬ ngaˇ shaˬ zahˬ mˇ-eu ma.

¹²Mawˇbaˆ tsawˇ haˬ deuˬ gawˬ jawˬ yaw goˇ-ahˇ le-awˇ, aˬ yawꞈ maꞈ-euˬ taˆ-ahˇ uˬ duˬ tahˬ leˇ kʼawꞈ, aˬ yawꞈ maꞈ-euˬ uˬ duˬ tahˬ nymˇ jaˆ gaˇ le-awˇ, maˬ naˬ leˇ ni guiˬ lahˬ shaˇ kʼawꞈ, tiˬ jeˬ-iˬ gaˇ dahˇ maˬ tsoeˬ-ehˇ, gʼaˬ doeˇ cah doeˇ-eu jeˬ oꞈ-eu tehꞈ meh.

¹³Heu-aˬ, Mawˇbaˆ miˇ kʼahˬ-ahˇ taꞈ leˇ-awˇ, naꞈ ngeh neh, Sahˬpaˬ Miˬyehˇ ehˇ taˬ-euˬ dawˬ meh.

¹⁴Nymˬ-mˇ Sahˬpaˬ Miˬyehˇ heu loꞈ-ehˇ ehˇ-eu meh. “Mawˇbaˆ miˇ kʼahˬ-euˬ pyuˇ shuiˇ myawˬ gahˬ dawˬ tawˆ luꞈ, smˇ kʼoꞈ laꞈ kʼoeˇ byoˆ le tehꞈ-a. Aˬ yawꞈ maꞈ-euˬ tsawˇ haˬ ui cuiˆ tehꞈ-ehˇ uˬ kʼawˇ dzeuˇ-iˇ-awˇ, kʼaˇ dzeuˇ-iˇ-euˬ deuˬ kʼawꞈ gʼaˬ baˬ dui dui tehꞈ-a.”