Read Akha Iˇsaˬyaˇ 2 Bible Online

Iˇsaˬyaˇ 2 - Akha bible

Iˇsaˬyaˇ 2

¹Heu-aˬ, Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ taꞈ leˇ-awˇ, Aˬmoˆ-euˬ aˬ li Iˇsaˬyaˇ-ahˇ Miˬyehˇ neh pah mehˬ nehˬ-euˬ gaˇ kawˆ meh.

²Aˬ kaˇ mehˬ hu paw keuˆ le-eu aˇ nah aˇ yamˬ laꞈ kʼoeˇ, Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma jaˆ-eu gawˬ jawˬ kʼoeˇ, gawˬ jawˬ dawˬ tawˆ luꞈ kʼoeˇ taˆ goˇ dzehˬ laˇ-awˇ, gawˬ duˇ dawˬ tawˆ luꞈ kʼoeˇ taˆ jaˆ tehꞈ-a. Tsawˇ jeuˬ dawˬ tawˆ luꞈ kʼoeˇ gaˇ le uiˬ jiˇ-awˇ,

³tsawˇ haˬ gʼawˬ mya ni uiˬ laˇ bymˇ laˇ-awˇ, heu loꞈ-ehˇ ehˇ tehꞈ-a. “Laˇ-awˬ. Sahˬpaˬ Miˬyehˇ-euˬ gawˬ jawˬ-ahˇ daˆ leˇ kaˇ-euˇ. Iˇsaˬleˬlaˆ Miˬyehˇ-euˬ Uˬ duˬ tahˬ nymˇ nymˇ ma-ahˇ le kaˇ-euˇ. Aˬ yawꞈ-euˬ gaˇ ma-ahˇ aˬ dui cah nya ni, aˬ yawꞈ neh bi mehˬ bi tsoˆ leˇ kaˇ-euˇ.” Ziˇoˬ meuˬ-ahˇ neh zahˇ dawˬ kʼoꞈ dawˬ doˆ le-awˇ, Yeˬluˇsaˬlehˬ meuˬ-ahˇ neh Sahˬpaˬ Miˬyehˇ-euˬ dawˬ gaˬ doˆ le-eu meh.”

⁴Miˇ kʼahˬ tsawˇ jeuˬ yaw kaˬ-ahˇ aˬ yawꞈ yaˇ kʼaˬ daˇ-awˇ, miˇ tsaˬ zaˬ-ahˇ aˬ yawꞈ laˆ tsaˬ laˆ tsahˇ nehˬ tehꞈ-a. Guiˇ deuˆ-eu mi cehˇ-ahˇ aˬ yawꞈ maꞈ nyoˬ tsehˬ tehˆ pyeuꞈ-awˇ, guiˇ deuˆ-eu gahˬ-ahˇ yehˬ kʼoꞈ tehˆ pyeuꞈ tehꞈ-a. Tsawˇ jeuˬ tiˬ jeuˬ tiˇ jeuˬ guiˇ maˬ paˇ deuˆ-ehˇ, guiˇ deuˆ-eu gaˇ kawˆ maˬ mehˬ maˬ sawˇ ni byehˇ tehꞈ-a.

⁵Yaˬkoˆ-euˬ zaˬ deuˬ uˆ deuˬ-oˇ, Sahˬpaˬ Miˬyehˇ-euˬ yaw shehꞈ laꞈ kʼoeˇ, aˬ dui cah gʼeh kaˇ-euˇ.

⁶Miˬyehˇ-oˇ, Yaˬkoˆ-euˬ zaˬ deuˬ uˆ deuˬ pyeuꞈ-eu, nawˬ-euˬ tsawˇ haˬ deuˬ-ahˇ nawˇ byehˇ dzeh-euˬ meh. Aˬ jeˬ miˇ neh ehˇ naˇ, nahˇ ma doˆ kʼehˬ miˇ kʼahˬ paw neh oe-euˬ nyiˇ paˬ shiˇ-eu zahˇ hawˇ-eu, Piˇliˇtiˆ tsawˇ haˬ deuˬ ja maw maw-eu zahˇ-ahˇ, aˬ yawꞈ maꞈ mˇ dui dui luꞈ-eu uˬ taꞈ, aˬ cawˬ tsawˇ jeuˬ nehˬ-ehˇ laꞈ tsaꞈ tsaꞈ tehˬ-awˇ dehꞈ-eu meh.

⁷Aˬ yawꞈ maꞈ miˇ kʼahˬ-ahˇ pyuˇ hawˇ-eu shuiˇ byehˬ dui dui-awˇ, maˬ ehˇ jiˇ coeˇ gaˇ keuˆ ni jaˆ-eu meh. Aˬ yawꞈ maꞈ-euˬ miˇ kʼahˬ mahˬ jawˇ myaˬ dui dui-awˇ, mahˬ laˆ lawˬ maˬ gui jiˇ coeˇ-a.

⁸Aˬ yawꞈ maꞈ miˇ kʼahˬ-ahˇ tahˬ pahˬ aˬ ma jaˆ byah-awˇ, aˬ yawꞈ maꞈ-euˬ aˬ laꞈ neh tehˆ-euˬ mˇ myawˬ-ahˇ, aˬ yawꞈ maꞈ-euˬ laꞈ noeˇ neh jahˇ-euˬ mˇ myawˬ-ahˇ aˬ yawꞈ maꞈ uˬ duˬ tahˬ-eu meh.

⁹Kʼoeˇ miˇ neh yawˬ gʼaˬ na luꞈ daˬ ga-awˇ, myaˆ pyawˬ ciˬ zaꞈ kʼaˇ maˬ za ni ya shaˬ tehꞈ-a. Sahˬpaˬ Miˬyehˇ-oˇ, aˬ yawꞈ maꞈ-ahˇ iˬ baˇ taˬ pyehˬ nehˬ.

¹⁰Sahˬpaˬ Miˬyehˇ nui ma pehˇ-eu jeˬ hawˇ-eu, aˬ yawꞈ-euˬ yaw shehꞈ kʼahˬ sehˇ-ahˇ cehˆ dzeuˇ nya ni, lo byoe doe ni cehˆ uˇ-awˇ, kʼaˬ lehˇ dawˬ dah siˇ byoˆ-awˬ.

¹¹Aˬ cawˬ-ahˇ zuiˆ gʼaˬ-euˬ myaˆ nuiˆ ga juˬ-iˇ-awˇ, tsawˇ haˬ zaˬ nui ma huiˬ-eu jeˬ bi nawˬ awˆ tehꞈ-a. Aˇ nah aˇ yamˬ kʼoeˇ keuˆ laˇ ngeh, Sahˬpaˬ Miˬyehˇ tiˬ gʼaˬ tehꞈ-ehˇ, ciˬ huiˬ ciˬ mahˇ nehˬ gaˇ ya daˬ tehꞈ-a.

¹²Nui ma huiˬ-awˇ smˇ kʼaˆ kʼaˆ-eu deuˬ hawˇ-eu, jahˇ huiˬ jahˇ gʼeh-eu deuˬ gʼaˇ duˬ, Baoˬ huiˬ-eu Sahˬpaˬ Miˬyehˇ lehˬ hmˬ taˬ-euˬ aˇ nah jaˆ meh.

¹³Leˬbaˬnoˬ gawˬ jawˬ-ahˇ dehꞈ-eu, goˇ dui dui-awˇ jahˇ gʼeh luꞈ-eu shuˬ liˇ aˇ bawˇ dawˬ tawˆ luꞈ hawˇ-eu, Baˬshaˬ miˇ tsaˬ-ahˇ dehꞈ-eu tsuiꞈ kaˆ aˇ bawˇ dawˬ tawˆ luꞈ coˬ le tehꞈ-a.

¹⁴Goˇ-eu gawˬ jawˬ hawˇ-eu nui ma huiˬ-eu gawˬ duˇ deuˬ, yaw awˆ-ahˇ ya ga taˬ le tehꞈ-a.

¹⁵Nymˇ goˇ kʼaˇ ngeuˇ-eu coˬ pyaˆ-awˇ, meuˬ lahˇ dawˬ tawˆ luꞈ byaˆ le tehꞈ-a.

¹⁶Saˇ baoˬ kʼaˇ huiˬ[2] kʼaˇ muiˬ-eu deuˬ laˆ shaˆ-ahˇ ga nuiꞈ jiˇ tehꞈ-a.

¹⁷Tsawˇ haˬ zaˬ nui ma huiˬ-eu jeˬ bi dehˬ awˆ-awˇ, jahˇ gʼeh haw-eu nui ma bi gʼeu ka tehꞈ-a. Aˇ nah aˇ yamˬ kʼoeˇ keuˆ laˇ ngeh, Sahˬpaˬ Miˬyehˇ tiˬ gʼaˬ tehꞈ-ehˇ, ciˬ huiˬ ciˬ mahˇ nehˬ gaˇ ya daˬ tehꞈ-a.

¹⁸Kʼoeˇ ngeh, tahˬ pahˬ aˬ ma mawˇ kawˇ piˬ-iˇ byoˆ-iˇ tehꞈ-a.

¹⁹Sahˬpaˬ Miˬyehˇ miˇ tsaˬ tahˬ kʼawˇ-ahˇ ngawˬ nyeh le ngeh, aˬ yawꞈ-euˬ nui ma pehˇ-eu jeˬ hawˇ-eu, aˬ yawꞈ-euˬ yaw shehꞈ kʼahˬ sehˇ-ahˇ cehˆ dzeuˇ-eu lehˇ, tsawˇ haˬ zaˬ deuˬ lo byoe doe ni cehˆ uˇ-awˇ, duˬ kʼahˬ doe ni cehˆ zaꞈ tehꞈ-a.

²⁰Aˇ nah kʼoeˇ nah keuˆ laˇ ngeh, yawˬ ha neh tehˆ-euˬ pyuˇ hawˇ-eu shuiˇ tahˬ pahˬ aˬ ma mawˇ kawˇ deuˬ-ahˇ, ho kʼaˬ, boeˇ kʼaˬ jawˇ duˬ-ahˇ baꞈ dzeh yaꞈ jiˇ tehꞈ-a.

²¹Sahˬpaˬ Miˬyehˇ miˇ tsaˬ tahˬ kʼawˇ-ahˇ ngawˬ nyeh le ngeh, aˬ yawꞈ nui ma pehˇ-eu jeˬ hawˇ-eu, aˬ yawꞈ-euˬ yaw shehꞈ kʼahˬ sehˇ-ahˇ cehˆ dzeuˇ nya ni, lo kʼahˬ lo guˇ zaꞈ gʼaˇ doe ni, tsawˇ haˬ zaˬ deuˬ cehˆ zaꞈ tehꞈ-a.

²²Naˇ mehˇ saꞈ gʼawˇ-awˇ gʼawˬ myahˇ ni maˬ gmˬ-eu, tsawˇ haˬ zaˬ-ahˇ nui jah taˬ ahˇ. Tiˬ jeˬ-iˬ gaˇ dahˇ maˬ tsoeˬ-a.