Read Akha Iˇsaˬyaˇ 21 Bible Online

Iˇsaˬyaˇ 21 - Akha bible

Iˇsaˬyaˇ 21

¹Heu-aˬ, Baˬbuˇloˬ meuˬ-ahˇ taꞈ-eu Miˬyehˇ-euˬ dawˬ meh. Kʼaˇ shuiꞈ deh ga nyiˬ tsehˆ-ehˇ baw gʼeh leꞈ-eu, guˆ laˇ paˬ-ehˇ gʼeh-eu jaˬ lehˇ lehˇ zeuˆ loꞈ-ehˇ, guˆ laˇ paˬ-ehˇ gʼeh-eu miˇ kʼahˬ paw neh, guˆ-eu gaˆ-eu jeˬ keuˆ le tehꞈ-a.

²Kʼehˬ-eu kʼaˆ-eu jeˬ hawˇ-eu ceh geuꞈ lu geuꞈ-eu jeˬ maˬ ehˇ, saˇ jaˇ puiˬ-eu jeˬ hawˇ-eu laˆ luˬ laˆ seˇ-eu jeˬ maˬ ehˇ, yaw sahˇ laꞈ kʼoeˇ ngaˇ ya mawˇ-euˬ ma. Eˇlamˬ guiˇ maꞈ deuˬ-oˇ, guiˇ deuˆ-awˬ. Meˬdiˇ guiˇ maꞈ deuˬ-oˇ, meuˬ deuˬ-ahˇ loꞈ jawˬ-awˬ. Baˬbuˇloˬ meuˬ baˬ da neh myaˆ biˇ ya yoeˇ-eu jeˬ, Miˬyehˇ aˇ saˬ bi saˬ tehꞈ-a.

³Kʼoeˇ baˬ da neh ngaˬ-euˬ gʼawˇ mawˇ laꞈ kʼoeˇ, zaˬ baw doˆ-eu shaˬ-eu loꞈ-ehˇ, naˇ dui gawˇ dui dui nya.

⁴Ngaˬ-euˬ nui ma cehˇ tahˬ tahˬ-awˇ, yaw dzuˬ dzuˬ dui dui nya. Uˬ ciꞈ ciꞈ le gaˇ noeˬ tmˬ kʼawꞈ, ciꞈ le ngeh guˆ dzehˬ laˇ-eu nya.

⁵Hawˬ jeh shaˇ dahˇ taˬ-awˇ, saˬ paˇ gawˬ pu kʼawˬ-awˇ, aˬ yawꞈ maꞈ dzaˬ luꞈ dawˇ luꞈ ngeh, heu loꞈ-ehˇ gaˬ keuˆ le-eu meh. “Yaw huiˬ yaw mahˇ deuˬ-oˇ, guiˇ deuˆ-eu gʼaˇ duˬ dehˬ daˬ duˬ lehˬ hmˬ-awˬ.”

⁶Sahˬpaˬ Miˬyehˇ ngaˬ-ahˇ ehˇ-eu, “Loꞈ-eu tsawˇ haˬ-ahˇ pyehˬ gʼeh-awˇ, kʼaˇ ya mawˇ-eu jeˬ bi tsaꞈ gaˬ laˇ-awˬ.

⁷Mahˬ dziˬ-eu deuˬ aˇ gu baw-ehˇ cah-awˇ, mahˬ tahˬ laˆ hawˇ-eu law taw dziˬ-eu deuˬ mawˇ naˇ, yaw muiˬ muiˬ-ehˇ bi haw-awˬ.”

⁸Loꞈ-eu tsawˇ haˬ kʼoeˇ gʼaˬ guˇ-eu, “Sahˬ paˬ-oˇ, uˬ ciꞈ nah gʼahˇ maˬ ehˇ, maˬ byehˇ ni ngaˇ loꞈ-eu ma.”

⁹Haw yawˬ. Mahˬ dziˬ-eu deuˬ aˇ gu baw baw-ehˇ laˇ luꞈ meh. Loꞈ luꞈ-eu tsawˇ haˬ kʼoeˇ gʼaˬ ehˇ-eu, “Baˬbuˇloˬ meuˬ cawˆ-iˇ gʼaˬ-euˬ meh. Aˬ yawꞈ maꞈ uˬ duˬ tahˬ-euˬ tahˬ pahˬ aˬ ma mawˇ kawˇ deuˬ, yaw kʼehꞈ yaw kʼoeˆ-ehˇ miˇ tsaˬ ga meh.”

¹⁰Ngaˬ-euˬ tsawˇ jeuˬ Iˇsaˬleˬlaˆ tsawˇ haˬ deuˬ-oˇ, naw maꞈ cehˇ diˬ-eu loꞈ-ehˇ bi diˬ-euˬ meh. Ehˇ kʼawꞈ, Iˇsaˬleˬlaˆ-euˬ Miˬyehˇ pyeuꞈ-eu, Baoˬ huiˬ-eu Sahˬpaˬ Miˬyehˇ jawˇ gaˇ neh oe-euˬ, laˬ kʼaˬ cehˇ paˬ-ehˇ gʼeh-eu dawˬ, naw maꞈ-ahˇ ngaˇ tsaꞈ gaˬ-eu ma.

¹¹Heu-aˬ, Eˬdoˬ miˇ kʼahˬ-ahˇ taꞈ leˇ-eu Miˬyehˇ-euˬ dawˬ meh. Eˬdoˬ miˇ kʼahˬ-ahˇ neh tsawˇ haˬ tiˬ gʼaˬ ngaˬ-ahˇ guˇ-awˇ ehˇ-eu, “Meuˬ-ahˇ loꞈ-eu gʼaˬ-oˇ, uˬ bya aˬ myah bya laˇ ta. Uˬ bya aˬ myah bya laˇ-eu gʼeh ta leˇ.”

¹²Ngaˇ heu loꞈ-ehˇ ehˇ kʼoꞈ nehˬ-euˬ ma. “Uˬ bya bya laˇ-eu dawˬ peh peh laˇ luꞈ meh. Ehˇ kʼawꞈ, uˬ ciꞈ tiˬ poˆ paˇ ciꞈ le tehꞈ-a. Nawˇ tiˬ poˆ paˇ naˇ haˬ mawꞈ naˇ, Laˇ-awˇ naˇ haˬ laˇ-awˬ.”

¹³Heu-aˬ, Aˬleˬbyaˇ miˇ kʼahˬ-ahˇ taꞈ leˇ-eu Miˬyehˇ-euˬ dawˬ meh. Aˬleˬbyaˇ bawˇ tsahˬ-ahˇ sehˬ gʼawˆ gʼawˆ-awˇ yaꞈ-eu, Deˬdaˬ tsawˇ haˬ baw gaꞈ deuˬ-oˇ,

¹⁴Naw maꞈ jawˇ gaˇ laˇ-eu iˇ cuꞈ mehꞈ-eu deuˬ-ahˇ, iˇ cuꞈ bi dawˇ dehˆ-awˬ. Teˬmaˇ meuˬ-ahˇ jawˇ-eu tsawˇ haˬ deuˬ-oˇ, miˇ kʼahˬ byehˇ-awˇ cehˆ byaˆ luꞈ-eu deuˬ-ahˇ, dzaˬ dzaˬ dawˇ dawˇ biꞈ nehˬ-awˬ.

¹⁵Mi cehˇ gʼawˇ doˆ, kaˆ ngoꞈ daˆ-awˇ, guiˇ mˇ gaˇ guˆ-eu baˬ da neh, uˬ kʼawˇ buˬ ni aˬ yawꞈ maꞈ cehˆ byaˆ luꞈ-eu meh.

¹⁶Kʼoeˇ naˇ, Sahˬpaˬ Miˬyehˇ ngaˬ-ahˇ ehˇ-eu, “Tiˬ kʼoꞈ daw law ni byah laˇ ngeh, Geˬdaˬ tsawˇ jeuˬ-euˬ huiˬ-eu yaw shehꞈ kʼahˬ sehˇ, piˬ le byoˆ le tehꞈ-a.

¹⁷Geˬdaˬ tsawˇ jeuˬ kaˆ baꞈ-eu yehˇ deuˬ-aˬ, nui ma kʼaˬ dui dui kʼawꞈ, gʼawˬ mya gʼaˬ maˬ dzeuˇ-iˇ-aˇ lehˇ, Iˇsaˬleˬlaˆ-euˬ Miˬyehˇ pyeuꞈ-eu ngaˇ Sahˬpaˬ Miˬyehˇ, ehˇ-eu ma.”