Read Akha Iˇsaˬyaˇ 22 Bible Online

Iˇsaˬyaˇ 22 - Akha bible

Iˇsaˬyaˇ 22

¹Heu-aˬ, bi siˬ bi mawˇ-eu jeˬ-euˬ deh kʼawꞈ-ahˇ taꞈ leˇ-eu Miˬyehˇ-euˬ dawˬ meh. Naw maꞈ dawˬ tawˆ luꞈ nymˇ mˬ-ahˇ daˆ leˇ paˬ-ehˇ, naw maꞈ kʼoeˇ taˆ aˬ jeˬ keuˆ le taˬ ta.

²Guˇ guˇ-ehˇ lawꞈ gʼa luꞈ-eu meuˬ-oˇ, bahˬ gʼa luiˬ gʼa luꞈ-eu meuˬ-oˇ, naw maꞈ tsawˇ haˬ mi cehˇ kʼehˬ-ahˇ shiˇ-euˬ maˬ ngeuˇ-a. guiˇ deuˆ-awˇ shiˇ-euˬ maˬ ngeuˇ-a.

³Naw maꞈ-euˬ sahˬ paˬ sahˬ ma deuˬ tiˬ kawˆ loꞈ-ehˇ cehˆ-awˇ, kaˆ myaˬ tiˬ myaˬ-iˬ maˬ beuˆ dah ni bi nyehꞈ-euˬ meh. Muiˇ-eu deuˬ maˬ oe keuˆ mi naˆ-ehˇ cehˆ byoˆ-euˬ kʼawꞈ, dawˬ tawˆ luꞈ bi nyehꞈ uiˬ jiˇ-awˇ, tiˬ kawˆ loꞈ-ehˇ bi tsahˇ byoˆ gʼeh-euˬ meh.

⁴Kʼoeˇ miˇ neh ngaˬ-ahˇ maˬ haw cawˬ laˇ ni, tiˬ gʼaˬ tehꞈ-ehˇ bi ngoeˇ nehˬ laꞈ. Shiˇ dzeuˇ-euˬ ngaˬ-euˬ tsawˇ haˬ deuˬ gʼaˇ duˬ, ngaˇ shaˬ zahˬ mˇ-awˇ ngoeˇ luꞈ ngeh, ngaˬ-ahˇ muˇ taˬ-eu lehˇ taˬ gʼeh.

⁵Dawˬ tawˆ kʼoeˇ taˆ uˆ lahˇ-eu Baoˬ huiˬ-eu Sahˬpaˬ Miˬyehˇ, bi siˬ bi mawˇ-eu jeˬ-euˬ deh kʼawꞈ-ahˇ, shaˬ zahˬ guˆ gaˆ-eu jeˬ bi keuˆ le-eu aˇ yamˬ meh. Meuˬ meuˬ lahˇ bi laˆ byaˆ jiˇ-awˇ, ngoeˇ-eu teˇ saˇ gawˬ jawˬ-ahˇ tahˬ leˇ luꞈ meh.

⁶Eˇlamˬ yehˇ deuˬ kaˆ lehˬ hmˬ-awˇ, mahˬ dziˬ-awˇ oe luꞈ meh. Kiˇlaˆ yehˇ deuˬ dehˬ daˬ duˬ tuˆ tehˬ-awˇ, lehˬ hmˬ dah taˬ-euˬ meh.

⁷Miˇ tsaˬ miˇ muiˬ muiˬ-eu Yuˇdaˆ miˇ kʼahˬ deh kʼawꞈ deuˬ-ahˇ, mahˬ laˆ lawˬ byah jiˇ-awˇ, Yeˬluˇsaˬlehˬ meuˬ lahˇ mehˬ shi, mahˬ dziˬ-eu yehˇ deuˬ yawꞈ luꞈ meh.

⁸Yeˬluˇsaˬlehˬ meuˬ aˬ cawˬ laꞈ-ahˇ maˬ ahˇ leˇ ni, maˬ paˇ laˆ tsoeˬ nya meh. Aˇ nah aˇ yamˬ kʼoeˇ keuˆ le ngeh, Sahˬ paˬ-euˬ nymˇ laꞈ kʼoeˇ guiˇ deuˆ-eu keu ka bi jaˆ-euˬ, bawˇ tsahˬ bawˇ dahˇ aˇ lawˆ lehˇ myahˇ-euˬ lawˆ-ahˇ, nawˇ pyehˆ tseˇ haw tehꞈ-a.

⁹Yeˬluˇsaˬlehˬ meuˬ lahˇ maˇ pehꞈ myaˬ gaˇ, nawˇ ya haw mawˇ tehꞈ-a. Laꞈ oˆ lah lehˇ kuˇ-eu lah kʼoeˇ lah-ahˇ, nawˇ iˇ cuꞈ tsahˇ dahˬ tehꞈ-a.

¹⁰Yeˬluˇsaˬlehˬ meuˬ laꞈ kʼoeˇ jaˆ-eu nymˇ deuˬ nawˇ gui haw-awˇ, nymˇ deh pyaˆ-awˇ meuˬ lahˇ gawˬ muiˬ gaˇ dawˆ tehꞈ-a.

¹¹Lah yaw oeˇ lah-ahˇ neh yoeˇ doˆ-eu iˇ cuꞈ jeˬ hmˬ-eu lehˇ, meuˬ laꞈ kʼoeˇ nawˇ lah gawˬ tehꞈ-a. Ehˇ kʼawꞈ, aˇ hu ba neh heu deuˬ dawˬ tawˆ luꞈ mˇ-euˬ gʼaˬ pyeuꞈ-eu Miˬyehˇ-ahˇ nawˇ maˬ haw cawˬ-a.

¹²Kʼoeˇ naˇ, nawˇ noeˬ shaˬ-awˇ ngoeˇ-eu laꞈ kʼoeˇ, uˬ jehˆ jehˆ-awˇ guˬ daˇ pehˇ zeuˇ mehˬ tsoeˬ dm-eu gʼaˇ duˬ, Dawˬ tawˆ kʼoeˇ taˆ uˆ lahˇ-eu Baoˬ huiˬ-eu Sahˬpaˬ Miˬyehˇ, nawˬ-ahˇ kuˇ le tehꞈ-a.

¹³Ehˇ kʼawꞈ, nawˇ uiˇ-awˇ bawˬ-iˬ gʼeh-eu laꞈ kʼoeˇ, yawˇ hawˇ-eu mawˇ neˇ sehꞈ-awˇ, aˬ gaꞈ dzaˇ uiˇ lehˬ hmˬ taˬ-awˇ, dzaˬ byawˬ dawˇ byawˬ byawˬ gʼa tehꞈ-a. “Ni shawˬ shiˇ-eu keuˆ le-euˬ-aˬ, iˬ nah dzaˬ byawˬ dawˇ byawˬ byawˬ ma” lehˇ nawˇ ehˇ tehꞈ-a.

¹⁴Baoˬ huiˬ-eu Sahˬpaˬ Miˬyehˇ ngaˬ-ahˇ ehˇ-eu, “Aˬ yawꞈ maꞈ ziˇ jiˇ ngeh keuˆ ni, iˬ baˇ heu ngaˇ maˬ pyehˬ nehˬ lehˇ, Dawˬ tawˆ kʼoeˇ taˆ uˆ lahˇ-eu Baoˬ huiˬ-eu ngaˇ Sahˬpaˬ Miˬyehˇ ehˇ-eu ma.”

¹⁵Sahˬ paˬ-euˬ nymˇ-ahˇ haw-eu pyaˆ-eu paw aˬ yuiꞈ geuꞈ luꞈ-eu gʼaˬ pyeuꞈ-eu Sheˬbaˬnaˬ jawˇ gaˇ le-awˇ heu loꞈ-ehˇ ehˇ nehˬ leˇ-eu gʼaˇ duˬ, Dawˬ tawˆ kʼoeˇ taˆ uˆ lahˇ-eu Baoˬ huiˬ-eu Sahˬpaˬ Miˬyehˇ ngaˬ-ehˇ kʼehˇ-eu meh.

¹⁶“Gawˬ duˇ baˬ gʼa lo guˇ-ahˇ, yawˬ ha-euˬ lmˬ bymˇ yawˬ ha byoe taˬ paˬ-ehˇ, nawˇ aˇ naˆ ni huiˬ-eu tsawˇ haˬ te.

¹⁷Nawˇ yawˬ haˇ yawˬ ha maˬ gaˇ ma lehˇ noeˬ kʼawꞈ, Sahˬpaˬ Miˬyehˇ nawˬ-ahˇ gʼoˆ biˬ gʼeh nya meh lehˇ maˬ siˬ nya te loˇ.

¹⁸Baw duiˇ gʼoˆ-eu loꞈ-ehˇ aˬ yawꞈ nawˬ-ahˇ gʼoˆ-awˇ, huiˬ-eu miˇ kʼahˬ laꞈ kʼoeˇ biˬ ahˇ nehˬ tehꞈ-a. Miˇ kʼahˬ kʼoeˇ kʼahˬ laꞈ kʼoeˇ, nawˇ kʼahˬ sehˇ jehˆ-eu nawˬ-euˬ mahˬ laˆ lawˬ dawˬ peh, nawˇ ya shiˇ tehꞈ-a. Nawˇ-aˬ, nawˬ-euˬ sahˬ paˬ-euˬ nymˇ jiˇ-ahˇ daˬ laˆ ga-euˬ tsawˇ haˬ meh.

¹⁹Nawˇ mˇ luꞈ-eu huiˬ-eu gaˇ heu hmˬ maˬ ya mˇ ni, Sahˬpaˬ Miˬyehˇ nawˬ-ahˇ gʼeu ka tehꞈ-a.”

²⁰Sheˬbaˬnaˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. “Kʼoeˇ loꞈ-ehˇ pyeuꞈ laˇ ngeh jawˇ, Hiˇlaˬkiˇ-euˬ aˬ li pyeuꞈ-eu ngaˬ-euˬ zaˬ kʼaˆ Eˇliˇkmˬ-ahˇ ngaˇ bi sheuˬ laˬ-iˇ ma.

²¹Nawˇ dm luꞈ-eu yaw huiˬ yaw mahˇ-euˬ pehˇ kʼahˬ hawˇ-eu nawˇ paꞈ luꞈ-eu joꞈ paꞈ-ahˇ aˬ yawꞈ-ahˇ ngaˇ bi dm bi paꞈ-awˇ, nawˬ-euˬ baoˬ dawˬ tawˆ luꞈ aˬ yawꞈ-ahˇ biꞈ ma. Aˬ yawꞈ-aˬ, Yeˬluˇsaˬlehˬ meuˬ hawˇ-eu Yuˇdaˆ miˇ kʼahˬ laꞈ kʼoeˇ jawˇ-eu tsawˇ haˬ deuˬ-euˬ aˬ da loꞈ-ehˇ pyeuꞈ tehꞈ-a.

²²Aˬ yawꞈ-ahˇ Daˬbiˇ-euˬ zaˬ pyeuꞈ-eu sahˬ paˬ-euˬ laꞈ oˆ teˬ ni gʼeh-eu gʼaˬ bi pyeuꞈ laˇ ma. Daˬbiˇ-euˬ nymˇ-ahˇ pah-eu mawˬ tawꞈ aˬ yawꞈ-euˬ laꞈ-ahˇ jaˆ-awˇ, aˬ yawꞈ neh pah taˬ-euˬ gaˇ tiˬ gʼaˬ-iˬ maˬ piˬ tehˬ nya-ehˇ, aˬ yawꞈ neh piˬ tehˬ taˬ-euˬ gaˇ tiˬ gʼaˬ-iˬ maˬ pah nya-a.

²³Taꞈ cmˬ diˬ-euˬ loꞈ-ehˇ aˬ yawꞈ-ahˇ ngaˇ ziꞈ dah ni bi jaˆ-awˇ, aˬ yawꞈ baˬ da neh aˬ yawꞈ-euˬ aˬ yuiꞈ aˬ nyiˇ dawˬ tawˆ luꞈ myaˆ pyawˬ naˇ mehˇ jaˆ tehꞈ-a.

²⁴“Ehˇ kʼawꞈ, aˬ yawꞈ-euˬ aˇ jeuˬ aˇ ca deuˬ hawˇ-eu aˬ yawꞈ-ahˇ gʼoe-eu tsawˇ haˬ deuˬ, aˬ yawꞈ gʼaˇ duˬ kʼaˆ behˆ pyeuꞈ tehꞈ-a. Taꞈ cmˬ-ahˇ iˇ puˬ hawˇ-eu ni ceuˆ deuˬ ciˬ ceuˬ taˬ-euˬ loꞈ-ehˇ, aˬ yawꞈ maꞈ aˬ yawꞈ-ahˇ byaˇ gʼeu tehꞈ-a.

²⁵Kʼoeˇ loꞈ-ehˇ pyeuꞈ laˇ ngeh, ziꞈ dah ni diˬ taˬ-euˬ taꞈ cmˬ yaˇ laˇ-awˇ lehˆ-iˇ tehꞈ-a. Kʼoeˇ ngeh, kʼoeˇ gaˇ kʼaˇ ciˬ ceuˬ taˬ-euˬ jeˬ dawˬ tawˆ luꞈ ga ka jiˇ tehꞈ-a.”