Read Akha Iˇsaˬyaˇ 23 Bible Online

Iˇsaˬyaˇ 23 - Akha bible

Iˇsaˬyaˇ 23

¹Heu-aˬ, Duˇlu meuˬ-ahˇ taꞈ leˇ-eu Miˬyehˇ-euˬ dawˬ meh. Taˬshiˆ meuˬ-ahˇ jawˇ-eu saˇ baoˬ deuˬ-oˇ, noeˬ shaˬ-awˇ ngoeˇ-awˬ. Duˇlu meuˬ luˬ-iˇ seˇ-iˇ jiˇ-awˇ, nymˇ hawˇ-eu saˇ baoˬ naˬ duˬ maˬ paˇ jaˆ meh. Guˇbaˬluˇ miˇ kʼahˬ-ahˇ neh, gaˇ kawˆ heu gaˬ keuˆ laˇ-euˬ meh.

²Iˬ ma laˆ shaˆ-ahˇ cah-eu deuˬ-ahˇ gʼoe-awˇ, pyuˇ shuiˇ jaˆ laˇ-euˬ, Iˇjaw lahˇ miˇ kʼahˬ-ahˇ jawˇ-eu deuˬ hawˇ-eu,

³Siˇdoˬ meuˬ-ahˇ jawˇ-eu baw gaꞈ deuˬ-oˇ, noeˬ shaˬ-awˇ ngoeˇ-awˬ. Naw maꞈ iˬ ma laˆ shaˆ-ahˇ tsawˇ haˬ pyehˬ gʼeh-awˇ, Iˇjiˇtuˆ miˇ kʼahˬ-ahˇ cehˇ tawˬ laˬ-iˇ-awˇ, miˇ kʼahˬ doe ni ahˬ nehˬ-euˬ meh.

⁴Siˇdoˬ meuˬ-oˇ, shaꞈ dawˇ dui dui-awˬ. Ziꞈ dah ni gʼeh-awˇ naꞈ dui dui-eu iˬ ma laˆ shaˆ nawˬ-ahˇ maˬ haw nahˇ-eu miˇ neh, “Ngaˇ zaˬ ciˬ zaˬ cu maˬ mˇ haw-ehˇ, aˬ buˇ aˬ li maˬ cu huiˬ haw-aˬ” lehˇ ehˇ-eu meh.

⁵Duˇlu meuˬ cawˆ-iˇ-euˬ gaˇ kawˆ ya gaˬ ngeh, Iˇjiˇtuˆ miˇ kʼahˬ tsawˬ guˆ-iˇ-awˇ noeˬ shaˬ tehꞈ-a.

⁶Piˇniˇshaˆ tsawˇ haˬ deuˬ-oˇ, noeˬ shaˬ dui dui-awˇ ngoeˇ-eu laꞈ kʼoeˇ, Saˬbeˬ meuˬ-ahˇ cehˆ jawˇ-iˇawˬ.

⁷Mawˬ dui oeˇ dui dui-eu Duˇlu meuˬ heu, laˬ kʼaˬ cehˇ-eu meuˬ pyeuꞈ nya meh loˇ. Laˆ shaˆ nui baˬ-ahˇ bi jawˇ-iˇ-eu lehˇ, tsawˇ haˬ pyehˬ gʼeh-euˬ meuˬ heu meuˬ meh loˇ.

⁸Dzoeˬ dzaˬ oꞈ-eu meuˬ ma pyeuꞈ-awˇ, miˇ tsaˬ kʼoeˇ taˆ myaˆ pyawˬ naˇ mehˇ jaˆ-eu, smˇ muiˬ aˬ da baw gaꞈ deuˬ jawˇ-eu Duˇlu meuˬ kʼoeˇ taˆ, yaw doeˇ dawˬ tawˆ aˬ suˇ gʼaˬ neh bi keuˆ le taˬ.

⁹Aˬ yawꞈ maꞈ-euˬ kʼahˬ sehˇ dawˬ tawˆ byoˆ le jiˇ-awˇ, myaˆ pyawˬ naˇ mehˇ jaˆ-eu deuˬ ya shaꞈ dawˇ ni, Baoˬ huiˬ-eu Sahˬpaˬ Miˬyehˇ neh jahˇ nehˬ-euˬ meh.

¹⁰Saˬbeˬ miˇ kʼahˬ-ahˇ jawˇ duˬ yaw shuiꞈ nawˬ-iˇ-awˇ, mˇ dzaˬ kʼawꞈ dawˇ-iˇ-awˬ. Naw maꞈ-ahˇ laˆ tsoeˬ-eu tsawˇ haˬ, kʼoeˇ gaˇ tiˬ gʼaˬ-iˬ maˬ jawˇ-a.

¹¹Sahˬpaˬ Miˬyehˇ aˬ laꞈ iˬ ma laˆ shaˆ cawˬ tsehˆ taˬ-awˇ, miˇ kʼahˬ deuˬ-ahˇ laˆ byaˆ-euˬ meh. Piˇniˇshaˆ tsawˇ jeuˬ jeˬ gaꞈ jeˬ ka mˇ taꞈ-eu yaw tsuiꞈ-ahˇ, laˆ pyaˆ-awˬ lehˇ aˬ yawꞈ dawˬ biꞈ-euˬ meh.

¹²Siˇdoˬ meuˬ-oˇ, nawˇ laˬ kʼaˬ cehˇ-eu aˇ yamˬ jiˇ le-awˇ, nawˬ-euˬ tsawˇ haˬ deuˬ-ahˇ aˬ cawˬ kʼehˬ tehꞈ-a. Guˇbaˬluˇ iˇ jaw lahˇ-ahˇ cehˆ-iˇ kʼawꞈ, cehˆ dzeuˇ kʼaˇ maˬ za-a.

¹³Duˇlu meuˬ-ahˇ bawˇ tsahˬ jeˬ zaˬ byah ni jahˇ-euˬ-aˬ, Aˬshuˇliˆ tsawˇ haˬ deuˬ maˬ ngeuˇ-a. Baˬbuˇloˬ tsawˇ haˬ deuˬ meh. Baˬbuˇloˬ tsawˇ haˬ deuˬ meuˬ-ahˇ deuˆ-eu nymˇ goˇ tsoˆ-awˇ, ziꞈ dah ni gʼeh-eu meuˬ deh pyaˆ jiˇ-awˇ, yaw cawˆ-ehˇ byehˇ dzeh yaꞈ-euˬ meh.

¹⁴Taˬshiˆ meuˬ-ahˇ jawˇ-eu saˇ baoˬ deuˬ-oˇ, noeˬ shaˬ-awˇ ngoeˇ dui dui-awˬ. Naw maꞈ gʼoe-eu meuˬ bi laˆ cawˆ-euˬ meh.

¹⁵Sahˬ paˬ tiˬ gʼaˬ dehꞈ-eu tiˬ ziˇ, shiꞈ tseˇ kʼoꞈ byah ni Duˇlu meuˬ-ahˇ ya ngehˇ byoˆ-eu aˇ yamˬ keuˆ le tehꞈ-a. Aˇ kʼoꞈ aˇ la kʼoeˇ dzeuˇ-iˇ ngeh, Duˇlu meuˬ-euˬ jawˬ gʼehˇ, caˇ dawˬ laꞈ kʼoeˇ ahˇ-eu meh maˬ laˇ-ahˇ duˇ tehꞈ-a.

¹⁶“Aˬ cawˬ neh bi ngehˇ byoˆ-euˬ meh maˬ laˇ-oˇ, deuˇ-mˬ baꞈ-awˇ meuˬ cah doe-awˬ. Kʼaˬ dzeˇ zaˬ deuˬ paˇ gʼoꞈ uiˬ laˇ ni, deuˇ-mˬ diˬ-awˇ caˇ dawˬ paˇ caˇ mehˬ-awˬ.”

¹⁷Aˇ kʼoꞈ kʼoeˇ shiꞈ tseˇ kʼoꞈ dzeuˇ-iˇ ngeh, Sahˬpaˬ Miˬyehˇ Siˇdoˬ meuˬ-ahˇ dzeuˇ laˇ ngeh loꞈ-ehˇ jeˬ gaꞈ jeˬ ka bi mˇ poˆ-awˇ, miˇ kʼahˬ dawˬ tawˆ luꞈ nehˬ-ehˇ jeˬ ya gaꞈ taꞈ tehꞈ-a.

¹⁸Aˬ yawꞈ neh gaꞈ za-euˬ pyuˇ deuˬ Sahˬpaˬ Miˬyehˇ-ahˇ damˬ nehˬ tehꞈ-a. Pyuˇ kʼoeˇ deuˬ-ahˇ nui gaˇ maˬ paˇ jeˬ hmˬ-ehˇ, Sahˬpaˬ Miˬyehˇ-ahˇ uˬ duˬ tahˬ-eu tsawˇ haˬ deuˬ gʼaˇ duˬ, dzaˬ dzaˬ dawˇ dawˇ hawˇ-eu dm gʼaˬ dm lmˇ zeuˇ gaˇ zmˬ tehꞈ-a.