Read Akha Iˇsaˬyaˇ 24 Bible Online

Iˇsaˬyaˇ 24 - Akha bible

Iˇsaˬyaˇ 24

¹Haw yawˬ. Miˇ tsaˬ tahˬ kʼawˇ-ahˇ Sahˬpaˬ Miˬyehˇ laˆ cawˆ-awˇ, ciˬ cuˇ ni byehˇ dzeh nehˬ tehꞈ-a. Miˇ tsaˬ tahˬ kʼawˇ-ahˇ poˆ laˆ sheu pyawˇ nehˬ-awˇ, miˇ tsaˬ zaˬ deuˬ bi jawˇ byaˆ jiˇ tehꞈ-a.

²Miˇ kʼahˬ zaˬ hawˇ-eu piˇ ma deuˬ maˬ ehˇ, zaˬ kʼaˆ hawˇ-eu baw leˬ maˬ ehˇ, zaˬ miˬ zaˬ zaˬ kʼaˆ hawˇ-eu meh leˬ maˬ ehˇ, zeuˇ-eu deuˬ hawˇ-eu ahˬ-eu deuˬ maˬ ehˇ, pyuˇ paˇ nehˬ-eu deuˬ hawˇ-eu shaˇ paˇ-eu deuˬ maˬ ehˇ, dziˇ dzoˆ daˆ-eu deuˬ hawˇ-eu dziˇ dzoˆ yaw sahˇ deuˬ maˬ ehˇ, dawˬ tawˆ luꞈ tiˬ kawˆ loꞈ-ehˇ ya shaˬ tehꞈ-a.

³Miˇ tsaˬ tahˬ kʼawˇ luˬ-iˇ seˇ-iˇ jiˇ-awˇ, geuꞈ-eu jeˬ maˬ ahˇ ni pyeuꞈ-iˇ tehꞈ-a. Sahˬpaˬ Miˬyehˇ neh kʼaˇ ehˇ taˬ-euˬ jeˬ, dawˬ tawˆ luꞈ byah laˇ jiˇ tehꞈ-a.

⁴Miˇ tsaˬ gui-iˇ nyoeˬ-iˇ-awˇ, miˇ tsaˬ tahˬ kʼawˇ liˬ-iˇ koˆ-iˇ-eu meh. Mˬ hawˇ-eu miˇ, tiˬ kawˆ loꞈ-ehˇ nyoeˬ-iˇ tehꞈ-a.

⁵Miˇ tsaˬ zaˬ deuˬ zahˇ dawˬ kʼoꞈ dawˬ-ahˇ byehˇ dzeh-awˇ, zahˇ sahˇ kʼoꞈ-ahˇ maˬ caw teh-ehˇ, mˬ maˬ maˬ byaˆ zaˇ ziˇ ziꞈ-eu dawˬ ma saˇ jaˇ-ahˇ puiˬ-euˬ miˇ neh, miˇ tsaˬ tahˬ kʼawˇ-ahˇ laˆ jawꞈ dui dui-euˬ meh.

⁶Miˇ tsaˬ tahˬ kʼawˇ-ahˇ Miˬyehˇ yaˬ kehˇ yaˬ-eu miˇ neh, iˬ baˇ naꞈ-eu miˇ tsaˬ zaˬ teˬ le byoˆ le-awˇ, ui cuiˆ tehꞈ-ehˇ dzeuˇ-iˇ-eu meh.

⁷Aˬ gaꞈ baw duˆ deuˬ nyoeˬ-iˇ-awˇ, aˬ gaꞈ dzaˇ uiˇ shaˬ le-euˬ miˇ neh, yaw beh laˬ kʼaˬ cehˇ-euˬ tsawˇ haˬ deuˬ, nymˬ-mˇ zahˬ leˇ luꞈ meh.

⁸Cehˇ lehˇ ciˆ-awˇ byawˬ gʼa-eu maˬ paˇ baw-ehˇ, bawˬ law baw-eu teˇ saˇ byoˆ le-awˇ, deuˇ-mˬ diˬ-eu teˇ saˇ maˬ paˇ ya gaˬ haw meh.

⁹Aˬ gaꞈ dzaˇ uiˇ dawˇ-awˇ caˇ dawˬ caˇ-eu maˬ paˇ baw-ehˇ, aˬ gaꞈ dzaˇ uiˇ maˬ paˇ dawˇ kuiˇ nya meh.

¹⁰Meuˬ laꞈ kʼoeˇ suˬ saˬ dui dui-eu miˇ neh, yawˬ gʼaˬ na luꞈ laˇ gʼoˆ kaꞈ deuˇ-awˇ jawˇ-eu meh.

¹¹Aˬ gaꞈ dzaˇ uiˇ maˬ jaˆ ni byoˆ le-euˬ miˇ neh, poˆ ka doe ni guˇ guˇ-ehˇ cah-eu meh. Laˬ kʼaˬ cehˇ-eu jeˬ byoˆ tsehˆ-awˇ, byawˬ gʼa-eu jeˬ miˇ tsaˬ kʼoeˇ taˆ maˬ paˇ jaˆ meh.

¹²Meuˬ pyaˆ-iˇ shaˆ-iˇ-awˇ, meuˬ lahˇ laˇ gʼoˆ kʼehꞈ-iˇ kʼoeˆ-iˇ-euˬ meh.

¹³Miˇ tsaˬ kʼoeˇ taˆ jaˆ-eu miˇ kʼahˬ dawˬ tawˆ kʼoeˇ taˆ, kʼoeˇ loꞈ-ehˇ keuˆ le tehꞈ-a. Uˬ pyaˬ uˬ laꞈ bi diˬ juˆ-euˬ saˬ loˬ aˇ bawˇ hawˇ-eu, aˇ siˬ bi pyaˆ cuˆ jiˇ-euˬ aˬ gaꞈ baw duˆ loꞈ-ehˇ jaˆ tehꞈ-a.

¹⁴Buˬ-iˇ-euˬ tsawˇ haˬ deuˬ, laˬ kʼaˬ cehˇ-eu caˇ dawˬ caˇ tehꞈ-a. Nahˇ ma ga kʼehˬ paw jawˇ-eu deuˬ Sahˬpaˬ Miˬyehˇ huiˬ-eu mahˇ-eu gaˇ kawˆ ja tehꞈ-a.

¹⁵Nahˇ ma doˆ kʼehˬ paw jawˇ-eu deuˬ, aˬ yawꞈ-ahˇ ja ceuˬ tehꞈ-a. Iˬ ma laˆ shaˆ dawˬ peh jawˇ-eu tsawˇ haˬ deuˬ, Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ, ciˬ huiˬ ciˬ mahˇ tehꞈ-a.

¹⁶Yaw tsaˬ yaw dawˇ gʼaˬ-ahˇ ja ceuˬ-eu caˇ dawˬ, mˬ dzeˇ miˇ dzeˇ miˇ kʼahˬ-ahˇ neh gaˬ le tehꞈ-a. Ehˇ kʼawꞈ, ngaˇ noeˬ tmˬ kʼaˇ maˬ za-ehˇ, teˬ le byoˆ le miˇ-a. Saˇ jaˇ puiˬ-eu deuˬ gʼaˬ kʼaˆ laˇ-awˇ, yaw haiˬ jeˬ myaˬ laˇ luꞈ meh.

¹⁷Miˇ tsaˬ kʼoeˇ taˆ jawˇ-eu tsawˇ haˬ zaˬ-oˇ, guˆ-eu gaˆ-eu jeˬ hawˇ-eu duˬ kʼahˬ, lahˇ ju, nawˬ-euˬ mehˬ shi loꞈ luꞈ meh.

¹⁸Guˆ-eu gaˆ-eu jeˬ-ahˇ cehˆ dzeuˇ-eu deuˬ, duˬ kʼahˬ-ahˇ ga ahˇ-awˇ, duˬ kʼahˬ-ahˇ cehˆ buˬ-euˬ deuˬ lahˇ ju-ahˇ paꞈ leˇ tehꞈ-a. Mˬ kʼoeˇ taˆ iˇ cuꞈ laˇ gʼoˆ pah-awˇ, miˇ tsaˬ tahˬ kʼawˇ dawˬ pehˬ luˆ laˇ tehꞈ-a.

¹⁹Miˇ tsaˬ tahˬ kʼawˇ tsawˬ paˆ-iˇ-awˇ, ga kʼawˬ-iˇ gaˇ keuˆ ni, yaw kʼaˆ-ehˇ bi gʼeu nyeh tehꞈ-a.

²⁰Jiˇ baˬ yehꞈ-eu tsawˇ haˬ gaˇ ma cah-eu loꞈ-ehˇ, miˇ tsaˬ tahˬ kʼawˇ maˬ ziꞈ-ehˇ pyeuꞈ-iˇ-awˇ, jaˬ lehˇ lehˇ ma zaw leˇ-euˬ yaˇ cmˇ loꞈ-ehˇ, yawꞈ lawꞈ gʼaˇ laˇ-ehˇ jaˆ tehꞈ-a. Miˇ tsaˬ tahˬ kʼawˇ iˬ baˇ maˬ pi coeˇ-eu miˇ neh, coˬ dzeh-awˇ maˬ paˇ tuˇ laˇ nya ni pyeuꞈ-iˇ tehꞈ-a.

²¹Mˬ kʼoeˇ taˆ baoˬ huiˬ-eu deuˬ hawˇ-eu, miˇ tsaˬ kʼoeˇ taˆ dzoeˬ dzaˬ-eu deuˬ-ahˇ, Sahˬpaˬ Miˬyehˇ kʼehˬ-eu aˇ nah peh laˇ luꞈ meh.

²²Guiˇ deuˆ gaˇ nyehꞈ mi-euˬ tsawˇ haˬ deuˬ, duˬ kʼahˬ tiˬ teuˇ bi nyehꞈ ahˇ-euˬ loꞈ-ehˇ, aˬ yawꞈ maꞈ-ahˇ Miˬyehˇ nyehꞈ ahˇ tehꞈ-a. Aˬ yawꞈ maꞈ-ahˇ kʼehˬ-eu aˇ nah maˬ keuˆ siˬ kʼoeˇ, bi nyehꞈ lahˇ taˬ tehꞈ-a.

²³Baoˬ huiˬ-eu Sahˬpaˬ Miˬyehˇ uˆ lahˇ-eu miˇ neh, ba la yaw zahˇ zahˇ iˇ-awˇ, nahˇ ma yaw shehꞈ maˬ bya-ehˇ pyeuꞈ-iˇ tehꞈ-a. Ziˇoˬ gawˬ jawˬ-ahˇ aˬ yawꞈ maꞈ nuiˇ-awˇ, Yeˬluˇsaˬlehˬ meuˬ-ahˇ uˆ lahˇ ngeh jawˇ, miˇ kʼahˬ zaˬ-euˬ aˬ yuiꞈ aˬ tsu deuˬ, aˬ yawꞈ-euˬ yaw shehꞈ kʼahˬ sehˇ ya mawˇ tehꞈ-a.