Read Akha Iˇsaˬyaˇ 28 Bible Online

Iˇsaˬyaˇ 28 - Akha bible

Iˇsaˬyaˇ 28

¹Iˇsaˬleˬlaˆ miˇ kʼahˬ kʼoeˇ taˆ, shaˬ zahˬ keuˆ le tehꞈ-a. Jiˇ baˬ yehꞈ-eu aˬ yuiꞈ deuˬ-euˬ uˬ duˬ-ahˇ kʼoˆ luꞈ-eu aˇ yehˆ uˬ kʼoˆ nyoeˬ-iˇ-eu loꞈ-ehˇ, miˇ kʼahˬ-euˬ yaw shehꞈ kʼahˬ sehˇ byoˆ le tehꞈ-a. Kʼahˬ sehˇ huiˬ-eu aˬ yawꞈ maꞈ uˬ duˬ-ahˇ, tsiˇ yaw saw jeˬ lehꞈ taˬ-euˬ kʼawꞈ, jiˇ baˬ yehꞈ-awˇ maˬ noeˬ ni ga-eu meh.

²Aˬ yawꞈ maꞈ-ahˇ guiˇ bi deuˆ le-eu lehˇ, baoˬ huiˬ-awˇ gʼaˬ kʼaˆ-eu tsawˇ haˬ-ahˇ, Sahˬpaˬ Miˬyehˇ bi lehˬ hmˬ taˬ-euˬ meh. Uˬ yehˇ aˇ siˬ ga le-eu loꞈ-ehˇ, uˬ yehˇ yehˇ ma ma le-eu loꞈ-ehˇ, iˇ jeuˬ jeuˬ le-eu loꞈ-ehˇ aˬ yawꞈ oe-awˇ, miˇ kʼahˬ kʼoeˇ kʼahˬ-ahˇ laˆ cawˆ le tehꞈ-a.

³Jiˇ baˬ yehꞈ-eu aˬ yuiꞈ aˬ tsu deuˬ-euˬ yaw shehꞈ kʼahˬ sehˇ, aˬ kuiˇ pehˬ zaˬ neh bi nawˬ tehˬ tehꞈ-a.

⁴Awꞈ beh beh laˇ-euˬ siˬ guˬ maˇ sheuˇ aˇ siˬ, awꞈ laˇ-eu maˬ dah ni bi pyaˆ dzaˬ byoˆ jiˇ-eu loꞈ-ehˇ, nui ma huiˬ-eu aˬ yuiꞈ aˬ tsu deuˬ-euˬ yaw shehꞈ kʼahˬ sehˇ, ya byoˆ-iˇ jiˇ tehꞈ-a.

⁵Aˇ nah kʼoeˇ nah keuˆ le ngeh jawˇ, Baoˬ huiˬ-eu Sahˬpaˬ Miˬyehˇ-aˬ, dzeuˇ-iˇ-euˬ aˬ yawꞈ-euˬ tsawˇ haˬ deuˬ gʼaˇ duˬ, kʼahˬ sehˇ jaˆ-eu aˇ yehˆ uˬ kʼoˆ loꞈ-ehˇ pyeuꞈ tehꞈ-a.

⁶Yaˇ kʼaˬ daˇ-eu tsawˇ haˬ deuˬ-ahˇ, yaw tsaˬ yaw dawˇ jeˬ aˬ yawꞈ biꞈ-awˇ, meuˬ lahˇ kʼehˬ-ahˇ guiˇ deuˆ piˇ-eu tsawˇ haˬ deuˬ-ahˇ, gʼaˬ biꞈ lahˬ nehˬ tehꞈ-a.

⁷Miˬyehˇ gʼaˇ duˬ ngehˬ dah-eu deuˬ hawˇ-eu piˇ ma deuˬ, jiˇ baˬ yehꞈ-awˇ yawꞈ lawꞈ gʼaˇ laˇ-ehˇ cah-eu meh. Aˬ yawꞈ maꞈ jiˇ baˬ yehꞈ dui dui-eu miˇ neh, tiˬ jeˬ-iˬ maˬ duˬ maˬ ciˇ-a. Miˬyehˇ gʼaˇ duˬ ngehˬ dah-eu deuˬ jiˇ baˬ yehꞈ-eu miˇ neh, Miˬyehˇ pah mehˬ-eu jeˬ-ahˇ maˬ mawˇ duˬ nya-a. Piˇ ma deuˬ jiˇ baˬ yehꞈ-eu baˬ da neh, yaw tsaˬ yaw dawˇ dawˇ-ehˇ yaˇ kʼaˬ maˬ daˇ nya-a.

⁸Aˬ yawꞈ maꞈ jawˬ luꞈ-eu hawˬ jeh uˬ pehꞈ tehꞈ-ehˇ jaˆ-awˇ, maˬ jawꞈ-eu tiˬ tsahˇ-iˬ maˬ baw-a.

⁹Aˬ yawꞈ maꞈ ngaˬ-ahˇ bye-awˇ ehˇ-eu, “Tsawˇ haˬ teu gʼaˬ aˬ suˇ gʼaˬ-ahˇ mehˬ-eu tsoˆ-eu gʼeh ta. Aˬ yawꞈ mehˬ gaˇ aˬ suˇ gʼaˬ naˇ haˬ mawꞈ nga jeˇ. Aˬ coeˇ byehˇ-euˬ zaˬ nahˬ-ahˇ mehˬ luꞈ-uˇ.

¹⁰Heu jeˬ mˇ, kʼoeˇ jeˬ mˇ lehˇ, zahˇ sahˇ kʼoꞈ heu, zahˇ sahˇ kʼoꞈ kʼoeˇ lehˇ, tiˬ tiˆ saˇ-iˬ tiˬ tiˆ aˬ dui-ahˇ mehˬ daˆ-eu gʼeh-eu nga.”

¹¹Naw maꞈ ngaˬ neh mehˬ gaˇ maˬ naˇ haˬ naˇ, dawˬ maˬ duˇ leˇ-eu tsawˇ jeuˬ-ahˇ Miˬyehˇ kʼehˇ-awˇ, naw maꞈ-ahˇ bi mehˬ bi tsoˆ tehꞈ-a.

¹²Gʼaˬ doeˇ dah-eu jeˬ hawˇ-eu nui saˇ oꞈ-eu jeˬ, naw maꞈ-ahˇ aˬ yawꞈ mehˬ kʼawꞈ, aˬ yawꞈ ehˇ gaˇ naw maꞈ maˬ naˇ haˬ-a.

¹³Kʼoeˇ miˇ neh naw maꞈ-ahˇ Sahˬpaˬ Miˬyehˇ, heu jeˬ mˇ, kʼoeˇ jeˬ mˇ lehˇ, zahˇ sahˇ kʼoꞈ heu, zahˇ sahˇ kʼoꞈ kʼoeˇ lehˇ, tiˬ tiˆ saˇ-i tiˬ tiˆ mehˬ-eu lehˇ gʼeh-eu meh. Naw maꞈ kuiˇ toꞈ aˬ yawꞈ toꞈ yawꞈ sahˬ tiꞈ tiꞈ-awˇ, laˆ tahˬ laˆ naˇ gʼaˬ-awˇ lahˇ ju-ahˇ paꞈ leˇ-eu uˬ taꞈ, aˬ cawˬ neh bi nyehꞈ gʼeh tehꞈ-a.

¹⁴Yeˬluˇsaˬlehˬ meuˬ zaˬ deuˬ-ahˇ uˆ lahˇ luꞈ-eu, nui ma huiˬ-eu tsawˇ haˬ deuˬ-oˇ, Sahˬpaˬ Miˬyehˇ-euˬ dawˬ-ahˇ naˇ haˬ sheˇ.

¹⁵Shiˇ-eu jeˬ nehˬ-ehˇ naw maꞈ saˇ jaˇ dzaˬ-awˇ, shiˇ-eu miˇ kʼahˬ nehˬ-ehˇ ja tsaˬ taˬ-eu jaˆ ma lehˇ, naw maꞈ kʼahˬ sehˇ jehˆ luꞈ-eu meh. Jaˬ myawꞈ myawꞈ-awˇ mehˇ shuiˇ shuiˇ dzeuˇ nya-eu miˇ neh, guˆ-eu gaˆ-eu jeˬ keuˆ le ngeh uˬ kʼawˇ buˬ ma lehˇ, naw maꞈ noeˬ duˬ taˬ-euˬ jaˆ meh.

¹⁶Ehˇ kʼawꞈ, Sahˬpaˬ Miˬyehˇ heu loꞈ-ehˇ ehˇ-eu meh. “Ziˇoˬ meuˬ-euˬ dawˬ pehˬ ziꞈ dah ni ngaˇ gawˬ-euˬ ma. ‘Jah-eu ziꞈ-eu jeˬ-aˬ kamˬ coeˇ-eu jeˬ meh’ lehˇ boꞈ taˬ-euˬ, ziꞈ dah ni gʼeh-eu kʼaˬ lo neh, laꞈ coeˇ gawˬ tehˬ-euˬ ma.

¹⁷Yaw tsaˬ yaw dawˇ jeˬ-ahˇ biˇ tsehˆ-ehˇ gawˬ tehˬ-awˇ, yaw sui yaw dawˇ jeˬ-ahˇ tsawˬ tuˇ-ehˇ gawˬ daˆ ma. Naw maꞈ-euˬ jaˬ myawꞈ mehˇ shuiˇ-ahˇ uˬ yehˇ aˇ siˬ deh cawˆ-awˇ, naw maꞈ cehˆ zaꞈ duˬ-ahˇ iˇ jeuˬ dehˬ dzaˬ tehꞈ-a.”

¹⁸Shiˇ-eu jeˬ nehˬ-ehˇ naw maꞈ saˇ jaˇ dzaˬ-euˬ cawˆ-iˇ-awˇ, shiˇ-eu miˇ kʼahˬ nehˬ-ehˇ ja tsaˬ taˬ-eu jeˬ pyaˆ-iˇ-eu miˇ neh, guˆ-eu gaˆ-eu jeˬ keuˆ le ngeh, naw maꞈ shaˬ zahˬ naꞈ tehꞈ-a.

¹⁹Naw maꞈ kʼoeˇ taˆ guˆ-eu gaˆ-eu jeˬ tiˬ kʼehˬ maˬ taˬ ni keuˆ le-awˇ, yawˬ shawˬ na luꞈ shaˬ zahˬ ya mˇ-awˇ, uˬ ciꞈ nah gʼahˇ maˬ ehˇ ya daˬ tehꞈ-a. Miˬyehˇ-euˬ dawˬ kawˬ kʼaˇ gaˬ keuˆ le ngeh, naw maꞈ ya tsawˬ guˆ-iˇ tehꞈ-a.

²⁰Maˬ gʼmˇ-eu kʼawˬ daˬ kʼoeˇ taˆ maˬ gʼoeˬ-eu aˇ bui dm-awˇ yuꞈ-eu tsawˇ haˬ loꞈ-ehˇ, naw maꞈ ya shaˬ tehꞈ-a.

²¹Sahˬpaˬ Miˬyehˇ aˬ yawꞈ-euˬ nui kʼahˇ byah laˇ ni, Peˬlaˬzmˬ gawˬ jawˬ hawˇ-eu Giˇbyoˬ deh kʼawꞈ-ahˇ deuˆ-euˬ loꞈ-ehˇ, aˬ yawꞈ guiˇ paˇ deuˆ-awˇ, maˬ noeˬ miˇ coeˇ gaˇ keuˆ ni mˇ keuˆ-awˇ, maˬ noeˬ doˆ coeˇ-eu jeˬ mˇ byah tehꞈ-a.

²²Ngaˇ ehˇ gaˇ cehꞈ lehꞈ taˬ ka. Naw maꞈ maˬ dzeuˇ-iˇ nya ni ya shaˬ nmˬ-mˇ. Miˇ kʼahˬ kʼahˬ lah ni laˆ cawˆ-eu gʼaˇ duˬ, Baoˬ huiˬ-eu Sahˬpaˬ Miˬyehˇ noeˬ tsehˆ taˬ-euˬ gaˇ kawˆ, ngaˇ ya gaˬ gʼaˬ-euˬ ma.

²³Ngaˇ ngehˬ-eu dawˬ-ahˇ naˇ haˬ-awˇ, ngaˇ ehˇ gaˇ naˬ bawˇ ciˬ kʼmˇ-awˬ.

²⁴Deh ma mˇ-eu tsawˇ haˬ, tsehˬ gʼaˬ-euˬ maˬ baw ni tsehˬ-awˇ, kaˆ gʼaˬ-euˬ maˬ baw ni kaˆ kaˆ-ehˇ jawˇ nmˇ loˇ.

²⁵Miˇ tsaˬ kaˆ di gʼaˬ ngeh, siˬ yoeˬ nuiˆ yoeˬ sehˬ-awˇ, deh ma tsoˆ-eu maˬ ngeuˇ-a loˇ. Aˬ yawꞈ jeˬ yawꞈ aˇ tsahˇ baw-ehˇ ka-eu maˬ ngeuˇ-a loˇ.

²⁶Miˬyehˇ neh mehˬ taˬ-euˬ loꞈ-ehˇ, aˬ yawꞈ-euˬ gaˇ aˬ yawꞈ siˬ nya luꞈ meh.

²⁷Gʼawˬ paꞈ aˇ nuiˆ hawˇ-eu nmˬ siˬ kʼaˇ ngeh, diˬ ma neh ma ya diˬ-eu siˬ nya-awˇ, daˇ cuiˇ cuiˇ zaˬ neh juiꞈ-eu meh.

²⁸Cehˇ diˬ-eu deuˬ gʼaˬ shaˇ-eu laꞈ dza tsaˬ leˇ-awˇ, cehˇ dzahˬ baꞈ ahˇ paˇ yamˬ siˬ nya meh. Cehˇ siˬ maˬ nawˬ paˆ ni nawˬ-eu gaˇ kawˆ, cehˇ nawˬ-eu deuˬ siˬ nya-eu meh.

²⁹Zaˬ siˬ nui gahˇ heu deuˬ dawˬ tawˆ, Baoˬ huiˬ-eu Sahˬpaˬ Miˬyehˇ neh biꞈ-euˬ tehꞈ meh. Miˬyehˇ nui ma tsawˇ gahˇ byah-awˇ, maˬ mˇ pyeuꞈ nya-eu jeˬ maˬ jaˆ-a.