Read Akha Iˇsaˬyaˇ 29 Bible Online

Iˇsaˬyaˇ 29 - Akha bible

Iˇsaˬyaˇ 29

¹Miˬyehˇ-euˬ lawˇ duˬ Yeˬluˇsaˬlehˬ meuˬ, guiˬ lahˬ doeˇ tehꞈ-a. Daˬbiˇ neh sehˬ gʼawˆ gʼawˆ-euˬ meuˬ, guiˬ lahˬ doeˇ tehꞈ-a. Tiˬ kʼoꞈ nyiˬ kʼoꞈ ehˇ gʼaˬ ni bi jaˆ-awˇ, zahˇ sahˇ kʼoꞈ bawˬ-iˬ bi gʼeh lawˬ siˬ.

²Kʼoeˇ naˇ, Miˬyehˇ-euˬ lawˇ duˬ lehˇ kuˇ-euˬ meuˬ kʼoeˇ-ahˇ, Miˬyehˇ guˆ-eu gaˆ-eu jeˬ bi keuˆ le tehꞈ-a. Guˇ guˇ-ehˇ ngoeˇ-eu teˇ saˇ byah jiˇ-awˇ, meuˬ meuˬ lah-ehˇ shiˬ yoeˇ kʼaˇ-eu lawˇ duˬ-ahˇ duˇ tehꞈ-a.

³Meuˬ kʼoeˇ meuˬ-ahˇ Miˬyehˇ guiˇ deuˆ le-awˇ, tiˬ jawˬ loꞈ tsoeˬ-awˇ bi jaˆ tehꞈ-a.

⁴Yeˬluˇsaˬlehˬ meuˬ-aˬ, miˇ tsaˬ pahˬ-eu tsawˇ shiˇ dawˬ ngehˬ laˇ-eu leh jeh-awˇ, miˇ tsaˬ dawˬ dah dawˬ saˆ saˆ doˆ laꞈ gaˇ duˇ tehꞈ-a.

⁵Yeˬluˇsaˬlehˬ meuˬ-oˇ, nawˬ-ahˇ guiˇ kʼaˇ deuˆ le-eu tsawˇ jeuˬ deuˬ, kʼaˬ lehˇ loꞈ-ehˇ bi baw byoˆ jiˇ-awˇ, guˆ laˇ paˬ-ehˇ gʼeh-eu guiˇ maꞈ kʼoeˇ deuˬ, gʼo yoeˬ loꞈ-ehˇ bi baw dzeh jiˇ tehꞈ-a. Maˬ noeˬ maˬ duˇ-euˬ laꞈ kʼoeˇ ja pyuˬ ni,

⁶mˬ jeˬ jaˬ lehˇ hawˇ-eu miˇ luˆ luˆ-eu laꞈ kʼoeˇ, Baoˬ huiˬ-eu Sahˬpaˬ Miˬyehˇ nawˬ-ahˇ ka kʼoꞈ tehꞈ-a. Jaˬ lehˇ lehˇ ma hawˇ-eu miˬ dzaˬ miˬ lmˇ, aˬ yawꞈ pyehˬ leꞈ tehꞈ-a.

⁷Miˬyehˇ-euˬ lawˇ duˬ jaˆ-eu meuˬ-ahˇ guiˇ deuˆ le-euˬ, miˇ kʼahˬ tsawˇ jeuˬ-euˬ guiˇ maꞈ deuˬ hawˇ-eu, aˬ yawꞈ maꞈ-euˬ guiˇ deuˆ-eu keu ka ahˇ leˇ-ehˇ, uˬ ciꞈ yuꞈ maˆ mawˇ-awˇ myaˆ toˆ toˆ-euˬ loꞈ-ehˇ, yawˬ jeˬ na luꞈ ya cawˆ-iˇ jiˇ tehꞈ-a.

⁸Yeˬluˇsaˬlehˬ meuˬ-ahˇ guiˇ deuˆ-eu lehˇ, kʼaˇ uiˬ laˇ-euˬ tsawˇ jeuˬ dawˬ tawˆ luꞈ, yuꞈ maˆ maˆ ngeh tiˬ dehˆ ya dzaˬ-euˬ kʼawꞈ, hawˬ mehꞈ mehꞈ-eu tsawˇ haˬ-ahˇ duˇ tehꞈ-a. Yuꞈ maˆ maˆ ngeh iˇ cuꞈ tiˬ dehˆ dawˇ-euˬ kʼawꞈ, iˇ cuꞈ mehꞈ-eu tsawˇ haˬ-ahˇ duˇ tehꞈ-a.

⁹Aˬ dzawˬ dzawˬ dzawˬ-ehˇ jawˇ-awˬ. Myaˆ behꞈ behꞈ behꞈ-ehˇ jawˇ-awˬ. Jiˇ baˬ maˬ dawˇ-euˬ gaˇ yehꞈ-awˇ, jiˇ huˬ maˬ shuˆ-euˬ gaˇ coˬ-awˬ.

¹⁰Naw maꞈ yuꞈ kʼaˆ byoˆ ni, Sahˬpaˬ Miˬyehˇ jahˇ-euˬ meh. Miˬyehˇ gʼaˇ duˬ ngehˬ dah-eu deuˬ myaˆ nuiˆ bi dehˬ kaˬ-awˇ, nyiˇ paˬ shaˆ ma deuˬ myaˆ maˬ mawˇ nya-a.

¹¹Miˬyehˇ neh kʼaˇ pah mehˬ nehˬ-euˬ jeˬ naw maꞈ dawˬ tsuiꞈ maˬ siˬ nya ni pyeuꞈ-iˇ-awˇ, jmˬ diˬ gʼoeˬ-awˇ lehˬ yoˆ taˬ-euˬ sahˬ boꞈ paˇ yoˆ-ahˇ duˇ tehꞈ-a. Sahˬ boꞈ siˬ nya-eu tsawˇ haˬ jawˇ gaˇ sahˬ boꞈ paˇ yoˆ kʼoeˇ yuˇ gʼeh-awˇ bi gui haw ngeh, “Jmˬ diˬ gʼoeˬ taˬ-euˬ miˇ neh maˬ gui nya nya” lehˇ ehˇ tehꞈ-a.

¹²Sahˬ boꞈ maˬ gui nya-eu tsawˇ haˬ jawˇ gaˇ yuˇ gʼeh-awˇ paˇ bi gui haw ngeh, “Ngaˇ sahˬ boꞈ maˬ siˬ nya nya” lehˇ ehˇ tehꞈ-a.

¹³Sahˬpaˬ Miˬyehˇ heu loꞈ-ehˇ ehˇ-eu meh. “Tsawˇ haˬ heu deuˬ ngaˬ-ahˇ uˬ duˬ tahˬ maˬ ehˇ kʼawꞈ, mehˬ boeˬ tehꞈ-ehˇ uˬ duˬ tahˬ-awˇ, nui ma tiˬ gaˇ bi jaˆ-euˬ meh. Aˬ yawꞈ maꞈ-euˬ uˬ duˬ tahˬ-eu zahˇ sahˇ kʼoꞈ-aˬ, tiˬ jo tiˇ jo mehˬ ka leꞈ-euˬ, tsawˇ haˬ zaˬ-euˬ zahˇ sahˇ kʼoꞈ tehꞈ meh.

¹⁴Kʼoeˇ miˇ neh, shaˬ zahˬ kʼoeˇ taˆ shaˬ zahˬ lahˬ-awˇ, aˬ yawꞈ maꞈ-ahˇ ngaˇ laˆ zahˬ ma. Tsawˇ gahˇ ahˇ-eu deuˬ tsawˇ uˬ uˬ-iˇ-awˇ, nui gahˇ byah-eu deuˬ aˬ dzawˬ pyeuꞈ-iˇ tehꞈ-a.”

¹⁵Yawˬ ha gaˇ kawˆ Sahˬpaˬ Miˬyehˇ maˬ bi mawˇ-eu gʼaˇ duˬ, yaw naꞈ-ahˇ cehˆ zaꞈ-eu laꞈ kʼoeˇ, yaw zahˇ laꞈ kʼoeˇ yaw cawˆ mˇ-awˇ, “Aˬ suˇ gʼaˬ siˬ nya mawˇ nya ta” lehˇ ehˇ-eu deuˬ, yaw kʼaˆ-ehˇ ya noeˬ shaˬ tehꞈ-a.

¹⁶Yawˬ jeˬ na luꞈ-ahˇ aˬ yawꞈ maꞈ poˆ laˆ laˆ-eu meh. Oeˬ lahˬ tehˆ-eu yaw sahˇ hawˇ-eu oeˬ lahˬ, aˬ geu gʼaˬ huiˬ dzehˬ ta. Tsawˇ haˬ zaˬ neh jahˇ-euˬ keu ka, “Nawˬ neh jahˇ-euˬ maˬ ngeuˇ nya” lehˇ, “Nawˇ aˬ jeˬ siˬ nya te” lehˇ, jahˇ-euˬ gʼaˬ-ahˇ ehˇ nya meh loˇ.

¹⁷Tiˬ kʼehˇ laˇ kʼehˬ aˇ yamˬ laꞈ kʼoeˇ, aˇ bawˇ sahˬ kʼaˆ yaˇ mˇ deˬ-awˇ, yaˇ saˬ kʼehˬ ma jeˬ laˇ tehꞈ-a.

¹⁸Aˇ nah aˇ yamˬ kʼoeˇ keuˆ le ngeh, naˬ bawˬ deuˬ sahˬ boꞈ gui gaˇ gaˬ nya-awˇ, yaw zahˇ laꞈ kʼoeˇ jawˇ-euˬ myaˆ behꞈ deuˬ kʼawꞈ, myaˆ nuiˆ bye-awˇ mawˇ nya tehꞈ-a.

¹⁹Nui ma nahˬ yu ni gʼeh-eu deuˬ tiˬ poˆ, Sahˬpaˬ Miˬyehˇ laꞈ kʼoeˇ laˬ kʼaˬ paˇ ya cehˇ-awˇ, aˬ cawˬ mehˬ shi iˇ shaˬ shaˬ luꞈ-eu deuˬ, Iˇsaˬleˬlaˆ-euˬ muiˬ-eu shawˇ-eu Miˬyehˇ laꞈ kʼoeˇ, laˬ kʼaˬ cehˇ nui saˇ oꞈ tehꞈ-a.

²⁰Aˬ cawˬ-ahˇ kʼehˬ-eu deuˬ aˇ nah jiˇ-awˇ, aˬ cawˬ-ahˇ cehꞈ lehꞈ ka-eu deuˬ byoˆ le-awˇ, yaw haiˬ jeˬ mˇ-eu lehˇ jawˬ luꞈ-eu deuˬ bi coeˇ tsehˆ dzeh tehꞈ-a.

²¹Yaw haiˬ deuˬ buˬ-iˇ ni ja piˇ-awˇ, tsawˇ muiˬ yaw doeˇ oꞈ ni ngehˬ-eu tsawˇ haˬ, Miˬyehˇ laˆ cawˆ nehˬ gaˇ ya daˬ tehꞈ-a.

²²Kʼoeˇ miˇ neh Aˬbyaˬhaˬ-ahˇ ka kʼoꞈ nehˬ-euˬ, Iˇsaˬleˬlaˆ-euˬ Miˬyehˇ pyeuꞈ-eu, Sahˬpaˬ Miˬyehˇ heu loꞈ-ehˇ ehˇ-eu meh. “Ngaˬ-euˬ tsawˇ haˬ deuˬ-oˇ, naw maꞈ tsawˇ daˬ maˬ paˇ ga-ehˇ, shaꞈ dawˇ-eu miˇ neh myaˆ pyawˬ maˬ paˇ ya nyoeˬ meh.

²³Naw maꞈ zaˬ oeˬ sahˇ le ngeh jawˇ, ngaˬ-euˬ guiˬ lahˬ-ahˇ noeˬ mawˇ-awˇ, Iˇsaˬleˬlaˆ-euˬ muiˬ-eu shawˇ-eu Miˬyehˇ meh lehˇ, ngaˬ-ahˇ naw maꞈ siˬ duˬ-eu baˬ da neh, ngaˬ-euˬ mehˬ shi zahˬ leˇ-awˇ yawꞈ-eu laꞈ kʼoeˇ, ngaˬ-ahˇ taˬ huiˬ taˬ mahˇ tehꞈ-a.

²⁴Aˬ dzawˬ aˇ gah deuˬ noeˬ siˬ noeˬ mawˇ nya laˇ-awˇ, naˬ lehˬ deuˬ mehˬ paˇ nya tehꞈ-a.”