Read Akha Iˇsaˬyaˇ 3 Bible Online

Iˇsaˬyaˇ 3 - Akha bible

Iˇsaˬyaˇ 3

¹Haw yawˬ. Nymˬ-mˇ Sahˬpaˬ Miˬyehˇ, Baoˬ huiˬ-eu Sahˬpaˬ Miˬyehˇ, Yeˬluˇsaˬlehˬ meuˬ hawˇ-eu Yuˇdaˆ miˇ kʼahˬ laꞈ kʼoeˇ, miˇ kʼahˬ zaˬ gʼoe luꞈ-eu tsawˇ haˬ deuˬ hawˇ-eu, maˬ jaˆ-ehˇ maˬ dehꞈ nya-eu jeˬ dawˬ tawˆ luꞈ, yuˇ dzeh jiˇ-eu lehˇ gʼeh-eu meh. Dzaˬ-eu dzaˇ maˬ jaˆ-ehˇ, dawˇ-eu iˇ cuꞈ maˬ dahˬ-ehˇ pyeuꞈ-iˇ ni, dawˬ tawˆ luꞈ yuˇ dzeh jiˇ tehꞈ-a.

²Baoˬ huiˬ-eu aˬ yuiꞈ aˬ tsu hawˇ-eu yehˇ deuˬ maˬ ehˇ, yaˇ kʼaˬ daˇ-eu deuˬ hawˇ-eu Miˬyehˇ gʼaˇ duˬ ngehˬ dah-eu deuˬ maˬ ehˇ, shaˆ ma deuˬ hawˇ-eu sahˬ paˬ sahˬ ma geuꞈ-eu deuˬ maˬ ehˇ,

³Guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ deuˬ hawˇ-eu, miˇ kʼahˬ-ahˇ uˆ lahˇ-eu yaw huiˬ yaw mahˇ deuˬ maˬ ehˇ, zaˬ siˬ tsawˇ gahˇ byah-eu deuˬ hawˇ-eu mah loˬ nya-eu deuˬ maˬ ehˇ, jaˬ nehꞈ pyehˬ nya-eu deuˬ maˬ ehˇ, (dawˬ tawˆ luꞈ bi yuˇ dzeh jiˇ tehꞈ-a.)

⁴Aˬ li li zaˬ deuˬ-ahˇ aˬ yawꞈ maꞈ-euˬ sahˬ paˬ ka nehˬ-awˇ, zaˬ yaw nyiˇ deuˬ aˬ yawꞈ maꞈ kʼoeˇ taˆ bi uˆ lahˇ ma.

⁵Miˇ kʼahˬ zaˬ tiˬ gʼaˬ tiˇ gʼaˬ kʼehˬ tehꞈ-a. Yawˬ ha-euˬ cawˬ-ahˇ yawˬ ha nawˬ dzaˬ-awˇ, yawˬ ha nehˬ-ehˇ jawˇ-eu deuˬ-ahˇ yawˬ ha kʼaˆ dzaˬ tehꞈ-a. Zaˬ guˬ deuˬ tsawˇ mawˬ tsawˇ kʼaˆ-ahˇ yaw zeu maˬ baw-ehˇ, zaˬ coeˬ zaˬ, yaw huiˬ yaw mahˇ-ahˇ yehˬ bawˬ-ehˇ gʼeh tehꞈ-a.

⁶Tsawˇ haˬ tiˬ gʼaˬ aˬ yawꞈ aˬ da-euˬ nymˇ-ahˇ, aˬ yawꞈ-euˬ mehˇ nmˇ-ahˇ tsuˆ tehˬ-awˇ, “Nawˇ pehˇ kʼahˬ dm gʼoeˬ-eu ahˇ nga siˬ. Teu miˇ neh nga maꞈ kʼoeˇ taˆ aˬ yuiꞈ geuꞈ-awˇ, yaw cawˆ heu deuˬ dawˬ tawˆ luꞈ-ahˇ, haw nehˬ pyaˆ nehˬ laꞈ-awˬ” lehˇ, ehˇ-eu aˇ nah keuˆ le tehꞈ-a.

⁷Kʼoeˇ ngeh aˬ yawꞈ heu loꞈ-ehˇ ehˇ kʼoꞈ nehˬ tehꞈ-a. “Ngaˇ naˇ gawˇ laˆ saˆ-eu tsawˇ haˬ maˬ geuꞈ. Ngaˬ-euˬ nymˇ-ahˇ dzaˬ-eu hawˬ maˬ jaˆ-ehˇ, dm-eu mehˬ tsoeˬ kʼawꞈ maˬ jaˆ. Aˬ cawˬ kʼoeˇ taˆ uˆ lahˇ-eu aˬ yuiꞈ aˬ tsu, ngaˬ-ahˇ taˬ kʼehˇ doˇ laꞈ.”

⁸Yeˬluˇsaˬlehˬ meuˬ sahˬ tiꞈ tiꞈ-awˇ, Yuˇdaˆ miˇ kʼahˬ coˬ le-euˬ meh. Aˬ yawꞈ maꞈ ngehˬ-eu tmˇ-eu mˇ-eu shaˇ-eu, Sahˬpaˬ Miˬyehˇ-ahˇ bahˬ leˇ-awˇ, Miˬyehˇ myaˆ pyawˬ-ahˇ kʼaˬ naˆ sawˆ-euˬ meh.

⁹Aˬ yawꞈ maꞈ myaˆ pyawˬ huiˬ nyiˇ tseˇ-euˬ saˇ kiˇ jaˆ-awˇ, aˬ yawꞈ maꞈ-euˬ iˬ baˇ maˬ zaꞈ taˬ ni, Sawˇdoˬ meuˬ-euˬ iˬ baˇ loꞈ-ehˇ bya cehˆ ni jaˆ-eu meh.

¹⁰Yaw tsaˬ yaw dawˇ tsawˇ haˬ deuˬ-aˬ, aˬ yawꞈ maꞈ dehꞈ dzeuˇ mˇ dzeuˇ-euˬ yaw muiˬ jeˬ, guiˬ lahˬ gʼoꞈ kʼoꞈ le-awˇ, laˬ kʼaˬ ya cehˇ tehꞈ-a lehˇ ehˇ nehˬ-awˬ.

¹¹Ehˇ kʼawꞈ, haiˬ-eu tsawˇ haˬ deuˬ kʼoeˇ taˆ, dawˇ keuˆ le tehꞈ-a. Aˬ cawˬ-ahˇ aˬ yawꞈ maꞈ jahˇ doeˇ nehˬ-euˬ loꞈ-ehˇ, aˬ yawꞈ maꞈ nymˬ-mˇ ya daˬ poˆ tehꞈ-a.

¹²Zaˬ guˬ deuˬ ngaˬ-euˬ tsawˇ haˬ deuˬ-ahˇ nawˬ tehˬ-awˇ, zaˬ miˬ zaˬ deuˬ aˬ yawꞈ maꞈ kʼoeˇ taˆ uˆ lahˇ-eu meh. Ngaˬ-euˬ tsawˇ haˬ deuˬ-oˇ, naw maꞈ-ahˇ sheuˬ gʼeh-eu deuˬ gaˇ ma sheuˬ bahˬ-awˇ, naw maꞈ miˇ bahˬ bahˬ luꞈ meh.

¹³Sahˬpaˬ Miˬyehˇ yaˇ kʼaˬ daˇ duˬ-ahˇ zaꞈ le-awˇ, aˬ yawꞈ-euˬ tsawˇ haˬ-ahˇ yaˇ kʼaˬ daˇ-eu lehˇ tuˇ laˇ luꞈ meh.

¹⁴Aˬ yawꞈ-euˬ tsawˇ jeuˬ kʼoeˇ taˆ aˬ yuiꞈ aˬ tsu geuꞈ-eu deuˬ hawˇ-eu, sahˬ paˬ sahˬ ma geuꞈ-eu deuˬ-ahˇ, aˬ yawꞈ heu loꞈ-ehˇ yaˇ kʼaˬ daˇ-eu meh. “Naw maꞈ aˬ gaꞈ yaˇ kmˇ laˆ cawˆ-euˬ deuˬ pyeuꞈ-awˇ, yaw shaˬ zaˬ deuˬ-ahˇ kʼaˆ dzaˬ-euˬ jeˬ, naw maꞈ iˇ kahˇ tiˬ byah jaˆ meh.

¹⁵Ngaˬ-euˬ tsawˇ haˬ deuˬ-ahˇ naw maꞈ nawˬ pahˬ-awˇ, iˇ shaˬ zaˬ deuˬ-euˬ baˬ ba miˇ tsa ciˬ jeˬ nehˬ-eu teu, aˬ jeˬ dawˬ tsuiꞈ jahˇ te lehˇ, Dawˬ tawˆ kʼoeˇ taˆ uˆ lahˇ-eu gʼaˬ pyeuꞈ-eu, Baoˬ huiˬ-eu Sahˬpaˬ Miˬyehˇ ehˇ-eu ma.”

¹⁶Sahˬpaˬ Miˬyehˇ ehˇ-eu, “Yeˬluˇsaˬlehˬ meuˬ-ahˇ jawˇ-eu zaˬ miˬ zaˬ deuˬ jahˇ huiˬ gaˇ haw sheˇ. Aˬ yawꞈ maꞈ gaˇ ma cah ngeh kawˬ lahˇ mˇ leuˇ-awˇ, myaˆ nuiˆ haw-eu jahˇ gʼeh-eu jeˬ ahˇ-eu meh. Aˬ yawꞈ maꞈ kuiˇ toꞈ ciˬ-eu mˇ yeuꞈ-awˇ, kuiˇ du-ahˇ duꞈ taˬ-euˬ kuiˇ duꞈ shoe loe shuiˇ luiˇ-ehˇ mahˇ-eu meh.

¹⁷Aˬ yawꞈ maꞈ-euˬ uˬ duˬ-ahˇ maˇ naˇ bi naˇ-awˇ, aˬ yawꞈ maꞈ-ahˇ uˬ jehˆ jehˆ nehˬ ma.”

¹⁸Yeˬluˇsaˬlehˬ meuˬ-ahˇ jawˇ-eu zaˬ miˬ zaˬ deuˬ jahˇ gʼeh-eu jeˬ dawˬ tawˆ luꞈ-ahˇ, Sahˬpaˬ Miˬyehˇ yuˇ dzeh nehˬ-eu aˇ nah keuˆ le tehꞈ-a. Aˬ kuiˇ-ahˇ kʼaˇ duꞈ luꞈ-eu jeˬ maˬ ehˇ, uˬ duˬ-ahˇ kʼaˇ geuꞈ luꞈ-eu jeˬ maˬ ehˇ, kawˬ lahˇ-ahˇ kʼaˇ dah luꞈ-eu jeˬ maˬ ehˇ,

¹⁹laꞈ du-ahˇ kʼaˇ duꞈ luꞈ-eu jeˬ maˬ ehˇ, myaˆ pyawˬ-ahˇ tsahˇ kaˬ-eu jeˬ maˬ ehˇ,

²⁰uˬ duˬ-ahˇ tsahˇ lahˇ-eu jeˬ maˬ ehˇ, laꞈ du-ahˇ duꞈ luꞈ-eu baˬ ya laꞈ duꞈ hawˇ-eu joꞈ-ahˇ dzahˬ luꞈ-eu baˬ ya joꞈ dzahˬ maˬ ehˇ,

²¹laꞈ noeˇ-ahˇ behˬ luꞈ-eu laꞈ behˬ hawˇ-eu, naˇ mehˇ-ahˇ geuꞈ luꞈ-eu naˇ mehˇ naˇ yoˆ maˬ ehˇ,

²²muiˬ-eu pehˇ kʼahˬ pehˇ mahˇ, pi di di mahˇ, pehˇ kʼahˬ pehˇ lmˇ hawˇ-eu laꞈ sheu pehˇ tahˇ maˬ ehˇ,

²³shaˬ jiˇ mawˇ laˇ-eu pehˇ kʼahˬ maˬ ehˇ, paˇ jeh maˬ ehˇ, uˬ boeˬ maˬ ehˇ, myaˆ pyawˬ-ahˇ tsahˇ kaˬ-eu paˇ dzeh dzeh mahˇ maˬ ehˇ, bi yuˇ dzeh jiˇ tehꞈ-a.

²⁴Tsiˇ yaw saw jeˬ maˬ paˇ ya lehꞈ ni, uˬ nyawˬ behꞈ laꞈ tehꞈ-a. Joꞈ dzahˬ maˬ paˇ ya dzahˬ ni, aˇ caˆ caˆ pyehꞈ ya dzahˬ tehꞈ-a. Haw muiˬ dui dui-eu uˬ duˬ tsehˇ kahˇ maˬ paˇ tsoꞈ ni, uˬ duˬ buˇ coeˆ ni jaˆ tehꞈ-a. Muiˬ dui dui-eu pehˇ kʼahˬ pehˇ mahˇ maˬ paˇ ya dm ni, guˬ daˇ pehˇ zeuˇ ya tsahˇ lahˇ tehꞈ-a. Yaw beh aˇ gʼehˇ muiˬ-euˬ kʼawꞈ, shaꞈ dawˇ dui dui paˬ-ehˇ pyeuꞈ-iˇ tehꞈ-a.

²⁵Nawˬ-euˬ tsawˇ haˬ deuˬ mi cehˇ laꞈ-ahˇ shiˇ-awˇ, guiˇ deuˆ nya dui dui-eu nawˬ-euˬ tsawˇ haˬ deuˬ guiˇ bi deuˆ sehꞈ jiˇ tehꞈ-a.

²⁶Meuˬ meuˬ lahˇ tsawˇ ngoeˇ ngoeˇ-awˇ, meuˬ-euˬ jawˬ gʼehˇ dzawˇ ngeh, neˇ myawˆ ni miˇ tsa nuiˇ-eu zaˬ miˬ zaˬ-ahˇ duˇ tehꞈ-a.