Read Akha Iˇsaˬyaˇ 32 Bible Online

Iˇsaˬyaˇ 32 - Akha bible

Iˇsaˬyaˇ 32

¹Haw yawˬ. Yaw tsaˬ yaw dawˇ laꞈ kʼoeˇ uˆ lahˇ-eu sahˬ paˬ tiˬ gʼaˬ doˆ le tehꞈ-a. miˇ kʼahˬ-ahˇ haw-eu pyaˆ-eu aˬ yuiꞈ aˬ tsu deuˬ kʼawꞈ, yaw sui yaw dawˇ laꞈ kʼoeˇ haw pyaˆ tehꞈ-a.

²Aˬ yawꞈ maꞈ aˬ yawꞈ gʼaˬ yawꞈ, jaˬ lehˇ baw ngeh naˬ duˬ loꞈ-ehˇ pyeuꞈ-awˇ, mˬ jeˬ jaˬ lehˇ huiˬ ngeh awˆ duˬ-ahˇ duˇ tehꞈ-a. Gui coˇ ni gʼeh-eu kʼaˇ shuiꞈ deh yaˇ-ahˇ, yoeˇ doˆ le-euˬ lawˇ gawˆ hawˇ-eu, shiˬ deuˬ ni gʼeh-eu lo guˇ-ahˇ duˇ tehꞈ-a.

³Miˇ kʼahˬ zaˬ deuˬ loˬ-eu jeˬ-ahˇ, myaˆ nuiˆ haw-awˇ naˬ bawˇ ciˬ kʼmˇ tehꞈ-a.

⁴Aˬ yawꞈ maꞈ nui ma yaw nymˇ byehˇ dzeh-awˇ, aˬ cawˬ gʼaˇ duˬ shaˇ noeˬ nya-eu laꞈ kʼoeˇ, dawˇ coe ni ngehˬ tehꞈ tmˇ tehꞈ-a.

⁵Aˬ dzawˬ-ahˇ taˬ huiˬ taˬ mahˇ-eu jeˬ byoˆ-iˇ-awˇ, biˇ siˇ deuˬ-ahˇ tsawˇ muiˬ no-eu aˇ yamˬ dzeuˇ-iˇ tehꞈ-a.

⁶Aˬ dzawˬ dawˬ doeˇ ngehˬ-awˇ, aˇ gah nui noeˬ yaw cawˆ tehꞈ meh. Aˬ dzawˬ aˇ gah mˇ-eu ngehˬ-eu, Sahˬpaˬ Miˬyehˇ-ahˇ yehˬ bawˬ sehˇ lu-ehˇ gʼeh-awˇ, mehꞈ-eu shuꞈ-eu deuˬ-ahˇ bi dzaˬ bi dawˇ-eu maˬ baw-a.

⁷Aˬ dzawˬ aˇ gah yaw haiˬ jeˬ shaˇ sawˇ-awˇ, yaw cawˆ jeˬ mˇ doˆ laꞈ-eu meh. Iˇ shaˬ zaˬ-ahˇ jaˬ myawꞈ mehˇ shuiˇ neh laˆ cawˆ-awˇ, maˬ mˇ bahˬ gaˇ lehˬ-eu shaˬ bymˇ bi tawˆ-eu meh.

⁸Ehˇ kʼawꞈ, nui nahˬ nui yu ahˇ-eu tsawˇ haˬ, yaw sui yaw dawˇ jeˬ mˇ doˆ shaˇ doˆ-awˇ, yaw tsaˬ yaw dawˇ gaˇ ma kʼoeˇ taˆ, ziꞈ dah ni yawꞈ-eu meh.

⁹Saˇ lehˆ ni dehꞈ-eu zaˬ miˬ zaˬ deuˬ-oˇ, ngaˇ ehˇ gaˇ tuˇ-awˇ naˇ haˬ sheˇ. Kʼahˬ lahˇ kʼaˇ maˬ za-eu aˬ buˇ deuˬ-oˇ, ngaˇ ngehˬ gaˇ naˬ bawˇ ciˬ kʼmˇ sheˇ.

¹⁰Tiˬ kʼoꞈ ui cuiˆ dzehˬ-iˇ ngeh jawˇ, kʼahˬ lahˇ kʼaˇ maˬ za ni dehꞈ-eu naw maꞈ, yaw dzuˬ ya dzuˬ tehꞈ-a. Aˬ gaꞈ aˇ siˬ maˬ za le-ehˇ, aˇ siˬ aˇ lu nym le tehꞈ-a.

¹¹Saˇ lehˆ ni dehꞈ-eu zaˬ miˬ zaˬ deuˬ-oˇ, yaw dzuˬ dzuˬ dui dui-awˬ. Kʼahˬ lahˇ kʼaˇ maˬ za-eu aˬ buˇ deuˬ-oˇ, yaw dzuˬ dzuˬ gah gah-awˬ. Naw maꞈ mehˬ tsoeˬ lehˆ dzeh jiˇ-awˇ, guˬ daˇ pehˇ zeuˇ joꞈ-ahˇ lahˇ-awˇ jawˇ-awˬ.

¹²Muiˬ dui dui-eu myawˬ kmˇ yaˇ kmˇ cawˆ-iˇ jiˇ-euˬ miˇ neh, nui ma cawˆ-awˇ kʼahˬ-ahˇ teˇ-awˬ.

¹³Ngaˬ-euˬ tsawˇ haˬ deuˬ-euˬ yaˇ kʼahˬ yaˇ lahˬ aˬ gah baw duˆ hawˇ-eu yaˇ moꞈ dehꞈ byah-euˬ meh. Laˬ kʼaˬ cehˇ-eu jeˬ byah-eu nymˇ kʼoeˇ deuˬ hawˇ-eu, dehꞈ bym dui dui-eu meuˬ gʼaˇ duˬ, noeˬ shaˬ-awˇ tsawˇ ngoeˇ ngoeˇ nehˬ-awˬ.

¹⁴Sahˬ paˬ-euˬ nymˇ ya byehˇ dzeh gaˇ keuˆ-awˇ, meuˬ meuˬ ma kʼoeˇ ciˬ cuˇ ni jaˆ tehꞈ-a. Meuˬ laꞈ kʼoeˇ jaˆ-eu nymˇ hawˇ-eu, meuˬ-ahˇ loꞈ piˇ-euˬ taˆ kʼoeˇ deuˬ, mˬ maˬ maˬ byaˆ zaˇ ziˇ cawˆ jiˇ tehꞈ-a. Bawˇ tsahˬ mahˬ tahˬ laˆ deuˬ kʼoeˇ gaˇ jawˇ-awˇ, yawˇ deuˬ kʼoeˇ gaˇ gaˆ dzaˬ tehꞈ-a.

¹⁵Ehˇ kʼawꞈ, Miˬyehˇ Yaw sahˇ aˬ dui kʼoeˇ taˆ paˇ keuˆ le-awˇ, miˇ tsaˬ yaw cawˆ miˇ muiˬ paˇ muiˬ laˇ-awˇ, dzaˬ la gʼo cehˇ za dui dui le tehꞈ-a.

¹⁶Miˇ kʼahˬ heu yawˬ coeˇ yawˬ na luꞈ, yaw tsaˬ yaw dawˇ jeˬ byah tehꞈ-a.

¹⁷Tsawˇ haˬ yawˬ gʼaˬ na luꞈ yaw tsaˬ yaw dawˇ jeˬ-ahˇ poˆ-eu miˇ neh, nui saˇ oꞈ-awˇ coꞈ ngehˇ ni gʼeh-eu jeˬ, mˬ maˬ maˬ byaˆ zaˇ ziˇ keuˆ le tehꞈ-a.

¹⁸Miˬyehˇ-euˬ tsawˇ haˬ deuˬ kʼahˬ lahˇ kʼaˇ maˬ za-ehˇ, nui saˇ oꞈ-eu nymˇ jiˇ laꞈ kʼoeˇ ya jawˇ tehꞈ-a.

¹⁹Bawˇ tsahˬ-ahˇ uˬ yehˇ aˇ siˬ ga le-awˇ, meuˬ bi deh meuˇ leꞈ kʼawꞈ,

²⁰lawˇ gawˆ dawˬ peh ya ka dzaˬ ya ka dawˇ-awˇ, mawˇ neˇ hawˇ-eu mahˬ tahˬ laˆ pyehˬ taˬ-euˬ naw maꞈ, laˬ kʼaˬ cehˇ duˬ aˇ naˆ ni huiˬ-eu nga.