Read Akha Iˇsaˬyaˇ 33 Bible Online

Iˇsaˬyaˇ 33 - Akha bible

Iˇsaˬyaˇ 33

¹Laˆ luˬ laˆ seˇ-eu gʼaˬ-oˇ, nawˇ ya noeˬ shaˬ dui dui tehꞈ-a. Nawˇ ya luˬ ya seˇ-iˇ-eu aˇ nah maˬ keuˆ le dah-aˬ siˬ. Saˇ jaˇ puiˬ-eu gʼaˬ-oˇ, nawˇ ya noeˬ shaˬ dui dui tehꞈ-a. Aˬ cawˬ nawˬ-ahˇ saˇ jaˇ puiˬ-eu aˇ nah maˬ keuˆ le dah-aˬ siˬ. Nawˇ aˬ cawˬ-ahˇ laˆ luˬ laˆ seˇ-eu naˬ leˇ ngeh, aˬ cawˬ nawˬ-ahˇ laˆ luˬ laˆ seˇ nehˬ laꞈ tehꞈ-a. Nawˇ saˇ jaˇ puiˬ-eu naˬ leˇ ngeh, aˬ cawˬ nawˬ-ahˇ saˇ jaˇ puiˬ tehꞈ-a.

²Sahˬpaˬ Miˬyehˇ-oˇ, nga maꞈ-ahˇ gʼawˬ shaˬ gaˬ nehˬ laꞈ-awˬ. Nga maꞈ nawˬ-ahˇ noeˬ tmˬ luꞈ-eu ma. Yawˬ nah na luꞈ nga maꞈ-ahˇ haw piˇ-awˇ, guˆ-eu gaˆ-eu jeˬ laꞈ kʼoeˇ ka kʼoꞈ nehˬ laꞈ-awˬ.

³Mˬ jeˬ tsawˬ tehˆ tehˆ gaˇ duˇ-eu nawˬ-euˬ teˇ saˇ gaˬ ngeh, tsawˇ haˬ zaˬ cehˆ byoˆ-awˇ, nawˇ tsawˬ tuˇ laˇ gaˇ ya mawˇ ngeh, aˬ cawˬ tsawˇ jeuˬ deuˬ cehˆ byoˆ jiˇ-eu meh.

⁴Miˇ kʼahˬ tsawˇ jeuˬ deuˬ-oˇ, naw maꞈ-euˬ myawˬ gahˬ bi yaˆ uiˬ jiˇ-awˇ, nyehˇ bahˇ teuˆ-eu loꞈ-ehˇ tsawˬ nawˬ bi nawˬ tehꞈ-a.

⁵Yaw goˇ-ahˇ jawˇ-eu Sahˬpaˬ Miˬyehˇ-ahˇ, ciˬ huiˬ ciˬ mahˇ tehꞈ-a. Yeˬluˇsaˬlehˬ meuˬ laꞈ kʼoeˇ yaw tsaˬ yaw dawˇ jeˬ, aˬ yawꞈ bi byah laˇ tehꞈ-a.

⁶Naw maꞈ-euˬ aˇ nah aˇ yamˬ gʼaˇ duˬ, ziꞈ dah ni gʼeh-eu dawˬ pehˬ aˬ yawꞈ meh. Aˬ yawꞈ-euˬ tsawˇ haˬ-ahˇ ka kʼoꞈ nehˬ-awˇ, zaˬ siˬ nui gahˇ biꞈ nehˬ tehꞈ-a. Sahˬpaˬ Miˬyehˇ-ahˇ yaw zeu baw-eu jeˬ-aˬ, huiˬ dzehˬ-eu smˇ muiˬ muiˬ-eu jeˬ meh.

⁷Haw yawˬ, kʼaˬ dui dui-eu tsawˇ haˬ kʼoeˇ deuˬ, guˇ guˇ-ehˇ ngoeˇ luꞈ meh. Laˆ tsaˬ laˆ tsahˇ-eu miˇ kʼahˬ tsawˇ kaˬ geuꞈ-euˬ deuˬ, yaw kʼaˆ-ehˇ guˇ-awˇ ngoeˇ luꞈ meh.

⁸Gaˇ jawˬ deuˬ gaˇ tsoeˬ tsoeˬ-iˇ-awˇ, iˇ tawꞈ laˇ tawꞈ-eu tsawˇ haˬ maˬ jawˇ-a. Saˇ jaˇ dzaˬ taꞈ-euˬ dawˬ pyaˆ-iˇ jiˇ-awˇ, tsawˇ kaˬ geuꞈ-euˬ deuˬ-euˬ myaˆ pyawˬ-ahˇ maˬ haw-ehˇ, tiˬ gʼaˬ-ahˇ-iˬ yaw zeu maˬ baw nehˬ-a.

⁹Miˇ kʼahˬ ngoeˇ doˆ laˇ-awˇ gʼaˬ baˬ-iˇ luꞈ meh. Leˬbaˬnoˬ sahˬ kʼaˆ nyoeˬ-iˇ-awˇ, miˇ muiˬ muiˬ-eu Shaˬloˬ deh kʼawꞈ, kʼaˇ shuiꞈ deh yaˇ pyeuꞈ-iˇ-euˬ meh. Baˬshaˬ miˇ tsaˬ hawˇ-eu Gaˬlaˬmeˬlaˇ gawˬ jawˬ, aˇ bawˇ aˇ paꞈ ga jiˇ-euˬ meh.

¹⁰Sahˬpaˬ Miˬyehˇ ehˇ-eu, “Nymˬ-mˇ ngaˇ tuˇ laˇ-awˇ, Ngaˇ aˇ naˆ ni baoˬ huiˬ-eu bi mawˇ ma.

¹¹Naw maꞈ bahˬ toˆ yawꞈ ngehꞈ pyeuꞈ-awˇ, kʼaˇ mˇ-euˬ jeˬ tiˬ pawꞈ-iˬ gaˇ dahˇ maˬ tsoeˬ-ehˇ, yawˬ haˇ yawˬ ha laˆ cawˆ luꞈ-eu tehꞈ meh.

¹²Lu boeˬ geuꞈ-eu kʼaˬ lo puiˆ meuˇ-eu loꞈ-ehˇ, aˬ gah baw duˆ bi puiˆ byoˆ-eu loꞈ-ehˇ, naw maꞈ bi puiˆ dzaˬ jiˇ tehꞈ-a.

¹³Naw maꞈ gaˇ mahˇ jawˇ luꞈ-eu deuˬ, ngaˬ neh mˇ-euˬ jeˬ-ahˇ naˬ bawˇ gaˬ-awˇ, naw maꞈ dawˬ peh jawˇ luꞈ-eu deuˬ, ngaˬ-euˬ baoˬ gaˇ kawˆ siˬ nya-awˬ.”

¹⁴Ziˇoˬ meuˬ-ahˇ iˬ baˇ mˇ luꞈ-eu deuˬ, guˆ-eu yaw dzuˬ dzuˬ-awˇ ehˇ-eu, “Miˬyehˇ-euˬ kʼehˬ-eu kʼaˆ-eu jeˬ, maˬ miˆ-iˇ-eu miˬ dzaˬ loꞈ-ehˇ duˇ-eu miˇ neh, aˬ dui tiˬ gʼaˬ-iˬ maˬ dzeuˇ-iˇ luꞈ-a.”

¹⁵Yaw sui yaw dawˇ dawˇ-ehˇ dehꞈ-awˇ, yaw tsaˬ yaw dawˇ jeˬ-ahˇ ngehˬ-eu tmˇ-eu laꞈ kʼoeˇ, aˬ cawˬ kʼoeˇ taˆ maˬ myawꞈ maˬ shuiˇ dzaˬ ni, laꞈ nmꞈ nmꞈ gaˇ maˬ ha geuꞈ-eu uˬ taꞈ, tsawˇ haˬ-ahˇ sehꞈ-eu deuˬ-ahˇ naˬ bawˇ maˬ ciˬ kʼmˇ ni, yaw haiˬ jeˬ toˆ gaˇ myaˆ maˬ haw cawˬ-eu tsawˇ haˬ, buˬ-iˇ law-iˇ tehꞈ-a.

¹⁶Kʼoeˇ loꞈ-ehˇ dehꞈ-eu gʼaˬ nui saˇ oꞈ-awˇ, ziꞈ dah ni gʼeh-eu taˆ laꞈ kʼoeˇ jawˇ-eu loꞈ-ehˇ, guˆ-eu gaˆ-eu jeˬ-ahˇ dzeuˇ-eu uˬ taꞈ, dzaˬ-eu dzaˇ hawˇ-eu dawˇ-eu iˇ cuꞈ gʼaˇ duˬ, kʼahˬ maˬ lahˇ ni ya dehꞈ tehꞈ-a.

¹⁷Huiˬ dui dui-eu miˇ kʼahˬ-ahˇ uˆ lahˇ-eu, kʼahˬ sehˇ jaˆ-eu sahˬ paˬ-ahˇ nawˇ ya mawˇ tehꞈ-a.

¹⁸Yaw beh naw maꞈ-ahˇ taꞈ dzaˬ-awˇ, naw maꞈ kʼoeˇ taˆ maˬ tsehˆ leˇ ni nawˬ tehˬ taˬ-euˬ, boeˇ miˬ siˬ kʼaˬ sahˬ paˬ sahˬ ma kʼoeˇ deuˬ-ahˇ guˆ-eu jeˬ, yuꞈ maˆ maˆ-eu loꞈ-ehˇ dzeuˇ-iˇ tehꞈ-a.

¹⁹Naw maꞈ maˬ gʼoˆ shaw nya-eu dawˬ ngehˬ-eu, nui ma gʼahˇ-eu boeˇ miˬ siˬ kʼaˬ kʼoeˇ deuˬ-ahˇ, naw maꞈ maˬ paˇ ya mawˇ haw meh.

²⁰Aˬ dui uˬ duˬ tahˬ-eu zahˇ sahˇ kʼoꞈ bawˬ-iˬ gʼeh-euˬ, Ziˇoˬ meuˬ-ahˇ haw sheˇ. Yeˬluˇsaˬlehˬ meuˬ-ahˇ haw gʼeh-iˬ sheˇ. Aˇ naˆ ni nui saˇ oꞈ-eu jawˇ duˬ pyeuꞈ-eu nga. Daˇtaꞈ tiˬ jawˇ-iˬ maˬ gʼeu lehˆ doˆ-ehˇ, aˇ caˆ tsehˆ-iˇ-euˬ maˬ baw-eu, jawˇ zaˇ maˬ paˇ-eu sehˬ gʼawˆ-ahˇ duˇ leˇ-eu meh.

²¹Sahˬpaˬ Miˬyehˇ-euˬ yaw shehꞈ kʼahˬ sehˇ, aˬ dui-ahˇ bi mawˇ nehˬ laꞈ tehꞈ-a. Muiˇ-eu deuˬ-euˬ saˇ baoˬ maˬ laˇ nya-eu, jeˇ lo ni gʼeh-eu lawˇ baˬ deuˬ dawˬ peh, aˬ dui jawˇ duˬ ya dah tehꞈ-a.

²²Sahˬpaˬ Miˬyehˇ aˬ dui kʼoeˇ taˆ uˆ lahˇ-eu meh. Sahˬpaˬ Miˬyehˇ aˬ dui-ahˇ zahˇ dawˬ kʼoꞈ dawˬ biꞈ laꞈ-awˇ, Sahˬpaˬ Miˬyehˇ aˬ dui-euˬ sahˬ paˬ meh. Aˬ dui-ahˇ aˬ yawꞈ ka kʼoꞈ laꞈ-eu meh.

²³Muiˇ-eu deuˬ-euˬ saˇ baoˬ aˇ caˆ tsehˆ-iˇ jiˇ-awˇ, lehˇ baw saˬ paˇ maˬ gʼeu taw nya-a. Muiˇ-eu deuˬ-euˬ pyuˇ shuiˇ myawˬ gahˬ dawˬ tawˆ, nga maꞈ ceh geuꞈ jiˇ ma. Aˬ yawꞈ maꞈ-euˬ pyuˇ shuiˇ myawˬ gahˬ myaˬ dui dui-awˇ, kuiˇ shiˇ laꞈ shiˇ deuˬ-ahˇ kʼawꞈ oꞈ tehꞈ-a.

²⁴Ziˇoˬ meuˬ laꞈ kʼoeˇ jawˇ-eu tsawˇ haˬ deuˬ, tiˬ gʼaˬ-iˬ naˇ-eu gawˇ-eu maˬ baw-ehˇ, kʼoeˇ gaˇ jawˇ-eu tsawˇ haˬ deuˬ-euˬ iˬ baˇ, dawˬ tawˆ luꞈ pyehˬ nehˬ jiˇ tehꞈ-a.