Read Akha Iˇsaˬyaˇ 38 Bible Online

Iˇsaˬyaˇ 38 - Akha bible

Iˇsaˬyaˇ 38

¹Aˇ yamˬ kʼoeˇ yamˬ-ahˇ, sahˬ paˬ Heˬsaˬgiˇ shiˇ taw tehˬ ni naˇ luꞈ-eu meh. Aˬmoˆ-eu aˬ li Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Iˇsaˬyaˇ aˬ yawꞈ-ahˇ haw leˇ-awˇ ehˇ-eu, “Yawˬ jeˬ na luꞈ lehˬ hmˬ laˆ dah yaꞈ jiˇ-awˬ. Aˬ jeˬ miˇ neh ehˇ naˇ, nawˇ naˇ-eu maˬ paˇ taˬ leˇ nya meh. Shiˇ-eu gʼaˇ duˬ lehˬ hmˬ-awˬ lehˇ Sahˬpaˬ Miˬyehˇ ehˇ-eu meh.”

²Heˬsaˬgiˇ-aˬ, kaˇ pyawˇ-ahˇ myaˆ pyawˬ ciˬ daˬ-awˇ heu loꞈ-ehˇ guiˬ lahˬ shaˇ-euˬ meh.

³“Sahˬpaˬ Miˬyehˇ-oˇ, nawˬ-euˬ gaˇ-ahˇ, ngaˇ saˇ jaˇ ziꞈ-eu laꞈ kʼoeˇ mˇ-awˇ, nawˇ bi mˇ mawꞈ-eu jeˬ-ahˇ ngaˇ aˬ myah luꞈ leh jeh-awˇ mˇ-euˬ gaˇ taˬ ngehˇ nehˬ laꞈ.” Kʼoeˇ naˇ, aˬ yawꞈ yaw kʼaˆ-ehˇ ngoeˇ-euˬ meh.

⁴Kʼoeˇ naˇ, Iˇsaˬyaˇ-ahˇ Sahˬpaˬ Miˬyehˇ heu loꞈ-ehˇ dawˬ biꞈ-euˬ meh.

⁵“Heˬsaˬgiˇ jawˇ gaˇ paˇ le-awˇ, heu loꞈ-ehˇ ehˇ nehˬ leˇ-awˬ. Nawˬ-euˬ aˬ poeˬ Daˬbiˇ-euˬ Miˬyehˇ pyeuꞈ-eu ngaˇ Sahˬpaˬ Miˬyehˇ nawˬ-euˬ shaˇ dawˬ gaˬ-awˇ, nawˬ-euˬ myaˆ biˇ-ahˇ ya mawˇ-euˬ ma. Ngaˇ nawˬ-ahˇ tseˇ ngaˬ kʼoꞈ paˇ bi dehꞈ ma.

⁶Nawˇ hawˇ-eu Yeˬluˇsaˬlehˬ meuˬ heu meuˬ-ahˇ, Aˬshuˇliˆ sahˬ paˬ-euˬ aˬ laꞈ laꞈ kʼoeˇ ngaˇ ka kʼoꞈ-awˇ, meuˬ heu meuˬ-ahˇ ngaˇ bo saˆ haw piˇ daˆ leꞈ ma.”

⁷Iˇsaˬyaˇ ehˇ-eu, “Sahˬpaˬ Miˬyehˇ-aˬ, aˬ yawꞈ neh nawˬ-ahˇ saˇ jaˇ biꞈ taˬ-euˬ dawˬ-ahˇ ziꞈ-eu gaˇ kawˆ, heu loꞈ-ehˇ bi siˬ bi mawˇ nehˬ laꞈ tehꞈ-a.

⁸Sahˬ paˬ Aˬkaˆ neh jahˇ taˬ-euˬ dawˬ dzm dawˬ tehꞈ kʼoeˇ taˆ, dawˬ dzm dawˬ tehꞈ tseˇ tehꞈ-ahˇ keuˆ ni, naˇ kʼah paw jeˬ-ehˇ naˇ shmˇ shmˇ kʼoꞈ le ni Sahˬpaˬ Miˬyehˇ jahˇ tehꞈ-a.” Kʼoeˇ ngeh, dawˬ dzm dawˬ tehꞈ tseˇ tehꞈ-ahˇ keuˆ ni naˇ shmˇ shmˇ kʼoꞈ le-euˬ meh.

⁹Heˬsaˬgiˇ naˇ-eu taˬ leˇ gʼaˬ ngeh, caˇ dawˬ heu bymˇ aˬ yawꞈ boꞈ doˆ-euˬ meh.

¹⁰Ngaˬ-euˬ aˇ kʼoꞈ muiˬ ngeh loˆ ngeh, ziˇ maˬ dehꞈ jiˇ nya ni, shiˇ-eu miˇ kʼahˬ-ahˇ iˇ miˇ-a lehˇ noeˬ-euˬ ma.

¹¹Yaw dehꞈ dehꞈ-eu miˇ tsaˬ heu siˬ kʼoeˇ taˆ, Sahˬpaˬ Miˬyehˇ-ahˇ maˬ paˇ ya mawˇ-ehˇ, dehꞈ luꞈ-eu tsawˇ haˬ maˬ paˇ ya mawˇ haw miˇ-a lehˇ noeˬ-euˬ ma.

¹²Ngaˬ-euˬ ziˇ bi deuˆ tsehˆ dzeh-awˇ, bi gʼeu coˬ-euˬ yaˇ cmˇ hawˇ-eu, saˬ nmˇ-ahˇ bi tehˬ tsehˆ doˆ-euˬ saˬ paˇ loꞈ-ehˇ, Miˬyehˇ ngaˬ-ahˇ ziˇ bi jiˇ le miˇ-a lehˇ noeˬ-euˬ ma.

¹³Aˇ laˬ jaˬ shiˇ neh shaˬ yoeˬ bi kawꞈ nmˆ-euˬ loꞈ-ehˇ, uˬ ciꞈ miˇ lah-ehˇ gawˇ-awˇ ngoeˇ-euˬ ma. Miˬyehˇ ngaˬ-ahˇ ziˇ bi jiˇ le miˇ-a lehˇ noeˬ-euˬ ma.

¹⁴Ngaˇ dawˬ maˬ ngehˬ doˆ coeˇ ni pyeuꞈ-iˇ-awˇ, kʼaˬ kʼoeˬ duˇ-eu naˆ ni mahˇ-euˬ tehꞈ ma. Mˬ-ahˇ gʼawˇ leuˇ haw-euˬ miˇ neh, ngaˬ-euˬ myaˆ nuiˆ gʼah dui dui nya. Sahˬpaˬ Miˬyehˇ-oˇ, shaˬ zahˬ heu laꞈ kʼoeˇ, ngaˬ-ahˇ ka kʼoꞈ laꞈ-awˬ.

¹⁵Sahˬpaˬ Miˬyehˇ neh mˇ-euˬ gaˇ heu-ahˇ, ngaˇ aˬ jeˬ paˇ ehˇ leˇ nya nmˇ. Ngaˬ-euˬ nui ma naˇ-eu miˇ neh, maˬ yuꞈ kʼaˆ leˇ coeˇ nya.

¹⁶Sahˬpaˬ Miˬyehˇ-oˇ, nawˬ-euˬ gʼaˇ duˬ ngaˇ dehꞈ ma. Nawˬ-euˬ gʼaˇ duˬ tehꞈ-ehˇ yaw dehꞈ dehꞈ ma.

¹⁷Ngaˇ nui ma naˇ luꞈ-eu saˇ laˇ miˇ-a. Guˆ-eu gaˆ-eu jeˬ dawˬ tawˆ luꞈ laꞈ kʼoeˇ, ngaˬ-euˬ saꞈ laˇ-ahˇ nawˇ ka kʼoꞈ doˆ nehˬ laꞈ-awˇ, ngaˬ-euˬ iˬ baˇ dawˬ tawˆ pyehˬ dzeh nehˬ laꞈ-euˬ meh.

¹⁸Shiˇ-eu miˇ kʼahˬ-ahˇ jawˇ-eu tsawˇ haˬ tiˬ gʼaˬ-iˬ, nawˬ-ahˇ caˇ-awˇ maˬ ja ceuˬ nehˬ nya-a. Nawˬ-euˬ saˇ jaˇ ziꞈ-eu jeˬ-ahˇ, shiˇ dzeuˇ-euˬ deuˬ noeˬ tmˬ kʼaˇ maˬ za-a.

¹⁹Dehꞈ luꞈ-eu tsawˇ haˬ deuˬ nawˬ-ahˇ ja ceuˬ-euˬ meh. Ngaˇ caˇ luꞈ-eu loꞈ-ehˇ caˇ-awˇ ja ceuˬ-eu meh. Nawˇ saˇ jaˇ ziꞈ-eu gaˇ kawˆ heu, aˬ da deuˬ zaˬ-ahˇ ya ja mehˬ tehꞈ-a.

²⁰Sahˬpaˬ Miˬyehˇ-oˇ, nawˇ ngaˬ-ahˇ laˆ taˬ nehˬ laꞈ-euˬ meh. Nga maꞈ deuˇ-mˬ diˬ-awˇ nawˬ-ahˇ ja ceuˬ-eu ma. Nga maꞈ yaw dehꞈ dehꞈ-eu tiˬ ziˇ, nawˬ-euˬ Uˬ duˬ tahˬ nymˇ nymˇ ma laꞈ kʼoeˇ, ja ceuˬ-eu caˇ dawˬ caˇ-eu ma.

²¹Kʼoeˇ naˇ, “Aˬ yawꞈ-eu maˇ cuˬ maˇ lu-ahˇ siˬ guˬ maˇ sheuˇ aˇ dziˬ lehꞈ nehˬ-awˬ. Aˬ yawꞈ-euˬ naˇ gawˇ taˬ leˇ tehꞈ-a” lehˇ Iˇsaˬyaˇ ehˇ-eu meh.

²²Sahˬ paˬ Heˬsaˬgiˇ gʼeh, “Ngaˇ Uˬ duˬ tahˬ nymˇ nymˇ ma-ahˇ le nya meh lehˇ, saˇ kiˇ aˬ geu jeˬ mehˬ le nmˇ” lehˇ ehˇ-eu meh.