Read Akha Iˇsaˬyaˇ 4 Bible Online

Iˇsaˬyaˇ 4 - Akha bible

Iˇsaˬyaˇ 4

¹Aˇ nah aˇ yamˬ kʼoeˇ keuˆ le ngeh, kʼaˬ dzeˇ zaˬ tiˬ gʼaˬ-ahˇ zaˬ miˬ zaˬ shiꞈ gʼaˬ nyehꞈ cuꞈ-awˇ, heu loꞈ-ehˇ ehˇ tehꞈ-a. “Nga maꞈ ya dzaˬ ya dawˇ, ya dm ya gʼaˬ ni, yawˬ haˇ yawˬ ha mˇ cu nya ma. Ehˇ kʼawꞈ, nga maꞈ kʼaˬ dzeˇ zaˬ maˬ baw-eu miˇ neh, miˬ dzeˇ dzeˇ-iˇ-euˬ nga lehˇ aˬ cawˬ neh bi ehˇ-awˇ daˬ maˬ ya ga ni, nga maꞈ-ahˇ nawˬ-euˬ miˬ zaˬ ma lehˇ myahˇ nehˬ laꞈ-awˬ.”

²Miˇ kʼahˬ heu kʼahˬ laꞈ kʼoeˇ, Sahˬpaˬ Miˬyehˇ sahˬ lahˬ aˇ bawˇ deuˬ paˇ bi jeˬ laˇ-awˇ, haw muiˬ dui dui-eu aˇ nah keuˆ le tehꞈ-a. Kʼaˇ dzeuˇ-iˇ-euˬ Iˇsaˬleˬlaˆ tsawˇ haˬ dawˬ tawˆ luꞈ, dzaˬ la gʼo cehˇ za dui dui le gaˇ kʼahˬ sehˇ ya jehˆ tehꞈ-a.

³Miˬyehˇ neh bi dzeuˇ-iˇ-awˇ, Yeˬluˇsaˬlehˬ meuˬ-ahˇ kʼaˇ jawˇ yaꞈ-euˬ yawˬ gʼaˬ na luꞈ-ahˇ, yaw muiˬ yaw shawˇ tsawˇ haˬ lehˇ aˬ cawˬ kuˇ tehꞈ-a.

⁴Sahˬpaˬ Miˬyehˇ aˬ yawꞈ-euˬ baoˬ-ahˇ gʼoe-awˇ, aˬ yawꞈ-euˬ tsawˇ jeuˬ-ahˇ yaˇ kʼaˬ daˇ-awˇ bi muiˬ bi shawˇ laˇ-eu laꞈ kʼoeˇ, Yeˬluˇsaˬlehˬ meuˬ-euˬ iˬ baˇ hawˇ-eu, kʼoeˇ gaˇ yoeˇ dzeh-euˬ shiˬ deuˬ tsiˬ shawˇ nehˬ tehꞈ-a.

⁵Kʼoeˇ naˇ, Ziˇoˬ gawˬ jawˬ hawˇ-eu kʼoeˇ gaˇ kʼaˇ uiˬ leˇ taˬ-euˬ tsawˇ haˬ deuˬ kʼoeˇ taˆ, nah gʼahˇ paw Sahˬpaˬ Miˬyehˇ mˬ dmˇ pyehˬ gʼeh leꞈ-awˇ, uˬ ciꞈ paw miˬ dzaˬ miˬ lmˇ hawˇ-eu uˬ kʼoeˬ pyehˬ gʼeh leꞈ tehꞈ-a. Meuˬ meuˬ lah ni kʼoeˇ taˆ Miˬyehˇ-euˬ yaw shehꞈ kʼahˬ sehˇ uˆ tehˬ-awˇ, haw piˇ nehˬ tehꞈ-a.

⁶Aˬ yawꞈ-euˬ yaw shehꞈ kʼahˬ sehˇ-aˬ, nah gʼahˇ paw nahˇ tsaˇ kʼaˆ ngeh meuˬ-ahˇ naˇ shmˇ bi shmˇ-awˇ, guˆ-eu gaˆ-eu jeˬ maˬ bi keuˆ le-eu uˬ taꞈ, uˬ jeˬ jaˬ lehˇ maˬ bi keuˆ le ni joe shmˇ nehˬ tehꞈ-a.