Read Akha Iˇsaˬyaˇ 42 Bible Online

Iˇsaˬyaˇ 42 - Akha bible

Iˇsaˬyaˇ 42

¹Sahˬpaˬ Miˬyehˇ ehˇ-eu, “Heu-aˬ, ngaˬ-euˬ zaˬ kʼaˆ ma. Ngaˇ hehˇ tehˇ nehˬ luꞈ-eu gʼaˬ ma. Aˬ yawꞈ-ahˇ ngaˇ tseˇ doˆ-awˇ, nui kʼahˇ shiˇ luꞈ-eu gʼaˬ ma. Aˬ yawꞈ kʼoeˇ taˆ ngaˬ-euˬ Yaw sahˇ jawˇ-awˇ, tsawˇ jeuˬ yawˬ jeuˬ na luꞈ kʼoeˇ taˆ, yaw tsaˬ yaw dawˇ jeˬ aˬ yawꞈ bi keuˆ le tehꞈ-a.

²Aˬ yawꞈ teˇ saˇ yaw kʼaˆ-ehˇ maˬ guˇ ni, gaˇ ma kʼoeˇ taˆ aˬ yawꞈ-euˬ dawˬ maˬ ya gaˬ-a.

³Daˇ gʼahˬ taˬ-euˬ aˇ toꞈ aˇ kahˬ aˬ yawꞈ maꞈ ngawˬ kʼehꞈ-ehˇ, miˆ-iˇ luꞈ-eu tsiˇ kʼmˬ aˬ yawꞈ maˬ baw miˆ ni, dawˬ tawˆ kʼoeˇ taˆ yaw tsaˬ yaw dawˇ jeˬ bi keuˆ le-eu meh.

⁴Noeˬ tmˬ-eu jeˬ hawˇ-eu nui ma kʼaˬ duˬ ni taˬ-euˬ jeˬ, byoˆ-iˇ ni aˬ yawꞈ maˬ mˇ-ehˇ, miˇ tsaˬ kʼoeˇ taˆ yaw tsaˬ yaw dawˇ jeˬ-ahˇ aˬ yawꞈ laˆ ziꞈ tehꞈ-a. Gaˇ mahˇ kaˬ gaˇ jawˇ-eu miˇ kʼahˬ tsawˇ jeuˬ, aˬ yawꞈ-euˬ zahˇ dawˬ kʼoꞈ dawˬ-ahˇ noeˬ tmˬ tehꞈ-a.”

⁵Mˬ-ahˇ Miˬyehˇ beh-awˇ sheu taw-euˬ meh. Miˇ tsaˬ hawˇ-eu miˇ kʼoeˇ taˆ kʼaˇ jawˇ-eu jeˬ, Beh kuꞈ nehˬ-awˇ pyehˬ byah-euˬ meh. Miˇ kʼoeˇ taˆ jawˇ-eu tsawˇ haˬ dehꞈ-eu saꞈ laˇ za-awˇ, saꞈ gʼawˇ nya ni aˬ yawꞈ beh taˬ-euˬ meh. Nymˬ-mˇ, Sahˬpaˬ Miˬyehˇ pyeuꞈ-eu Miˬyehˇ, aˬ yawꞈ-euˬ zaˬ kʼaˆ-ahˇ heu loꞈ-ehˇ ehˇ-eu meh.

⁶“Sahˬpaˬ Miˬyehˇ pyeuꞈ-eu ngaˇ nawˬ-ahˇ kuˇ-awˇ, miˇ tsaˬ kʼoeˇ taˆ yaw tsaˬ yaw dawˇ jeˬ jaˆ laˇ ni, nawˬ-ahˇ baoˬ biꞈ taˬ gʼaˬ-euˬ ma. Nawˬ-ahˇ gʼoe-eu laꞈ kʼoeˇ tsawˇ jeuˬ dawˬ tawˆ luꞈ-ahˇ, ngaˇ saˇ jaˇ dzaˬ taꞈ ma. Nawˬ-ahˇ gʼoe-awˇ tsawˇ jeuˬ dawˬ tawˆ luꞈ-euˬ kʼoeˇ taˆ, ngaˇ yaw shehꞈ bi bya ma.

⁷Myaˆ behꞈ-ahˇ nawˇ myaˆ nuiˆ bi dahˇ laˇ-awˇ, yaw zahˇ laꞈ kʼoeˇ paꞈ kuˆ-ahˇ uˇ-eu tsawˇ haˬ deuˬ-ahˇ, nawˇ puiˇ pyehˬ nehˬ tehꞈ-a.

⁸“Sahˬpaˬ Miˬyehˇ pyeuꞈ-eu ngaˇ tiˬ gʼaˬ tehꞈ-ehˇ, nawˬ-euˬ Miˬyehˇ pyeuꞈ-eu ma. Ngaˬ-euˬ yaw shehꞈ kʼahˬ sehˇ miˬ yehˇ nui deuˬ-ahˇ ngaˇ maˬ biꞈ. Ngaˬ-ahˇ ja ceuˬ-eu jeˬ tahˬ pahˬ aˬ ma mawˇ kawˇ deuˬ-ahˇ maˬ oꞈ.

⁹Ngaˬ neh ngehˬ taˬ ehˇ taˬ-euˬ jeˬ iˬ nah byah laˇ luꞈ-awˇ, aˬ kaˇ pyeuꞈ laˇ-eu jeˬ nymˬ-mˇ, maˬ pyeuꞈ laˇ mi naˆ-ehˇ nawˬ-ahˇ ngaˇ ehˇ nehˬ ma.”

¹⁰Sahˬpaˬ Miˬyehˇ-ahˇ caˇ dawˬ yaw shuiꞈ caˇ-awˇ ja ceuˬ-awˬ. Miˇ tsaˬ dawˬ tawˆ aˬ yawꞈ-ahˇ caˇ-awˇ ja ceuˬ-awˬ. Iˬ ma laˆ shaˆ kʼoeˇ taˆ cah-eu tsawˇ haˬ dawˬ tawˆ, laˆ shaˆ laꞈ kʼoeˇ kʼaˇ uˇ-eu jeˬ dawˬ tawˆ, aˬ yawꞈ-ahˇ ja ceuˬ-awˬ. Gaˇ mahˇ-ahˇ jaˆ-eu miˇ kʼahˬ deuˬ hawˇ-eu, kʼoeˇ gaˇ kʼaˇ jawˇ kʼaˇ deuˬ aˬ yawꞈ-ahˇ ja ceuˬ-awˬ.

¹¹Kʼaˇ shuiꞈ deh ga hawˇ-eu kʼoeˇ gaˇ jaˆ-eu meuˬ deuˬ, Miˬyehˇ-ahˇ ja ceuˬ-awˬ. Geˬdaˬ tsawˇ haˬ aˬ yawꞈ-ahˇ ja ceuˬ-awˬ. Seˇlaˇ meuˬ-ahˇ jawˇ-eu tsawˇ haˬ deuˬ kʼawꞈ, gawˬ jawˬ uˬ du laˬ kʼaˬ cehˇ-awˇ guˇ-awˬ.

¹²Yawˬ kʼahˬ yawˬ miˇ yawˬ-ahˇ jawˇ-eu tsawˇ haˬ, Sahˬpaˬ Miˬyehˇ-ahˇ ciˬ huiˬ ciˬ mahˇ-awˬ.

¹³Guiˇ deuˆ-eu tsawˇ haˬ loꞈ-ehˇ Sahˬpaˬ Miˬyehˇ doˆ le-awˇ, guiˇ deuˆ-eu lehˇ aˬ yawꞈ lehˬ hmˬ dah taˬ-euˬ meh. Guiˇ deuˆ-eu teˇ saˇ aˬ yawꞈ guˇ kʼaˆ leꞈ-awˇ, muiˇ-eu deuˬ-ahˇ aˬ yawꞈ-euˬ baoˬ bi mawˇ-eu meh.

¹⁴Miˬyehˇ heu loꞈ-ehˇ ehˇ-eu meh. “Ngaˇ ciˬ cuˇ ni jawˇ luꞈ-eu aˇ yamˬ myahˇ laˇ-euˬ ma. Ngaˬ-euˬ tsawˇ jeuˬ-ahˇ dawˬ maˬ ngehˬ cawˬ-euˬ myahˇ laˇ-euˬ ma. Ehˇ kʼawꞈ, nymˬ-mˇ aˇ yamˬ tsaˬ laˇ taˬ-euˬ miˇ neh, zaˬ baw luꞈ-eu aˬ ma loꞈ-ehˇ ngaˇ guˇ-eu ma.

¹⁵Gawˬ jawˬ gawˬ duˇ deuˬ-ahˇ ngaˇ laˆ cawˆ-awˇ, sahˬ lahˬ aˇ bawˇ deuˬ bi koˆ-iˇ jiˇ ma. Lawˇ baˬ deh ga deuˬ-ahˇ kʼaˇ shuiꞈ shuiꞈ yaˇ bi pyeuꞈ-iˇ-awˇ, iˇ cuꞈ lah deuˬ bi gui-iˇ ma.

¹⁶“Myaˆ behꞈ tahˬ sawˇ pyeuꞈ-eu ngaˬ-euˬ tsawˇ haˬ deuˬ-ahˇ, maˬ iˇ haw-euˬ gaˇ ma tiˬ kahˇ ngaˇ sheuˬ gʼeh ma. Aˬ yawꞈ maꞈ-euˬ yaw zahˇ-ahˇ ngaˇ yaw shehꞈ bi bya laˇ-awˇ, duˬ kʼahˬ duˬ kʼawꞈ myaˬ-eu miˇ kʼahˬ, aˬ yawꞈ maꞈ-euˬ mehˬ shi bi dzm laˇ ma. Heu-aˬ, ngaˬ-euˬ saˇ jaˇ dawˬ deuˬ pyeuꞈ-awˇ, maˬ byehˇ ni ngaˇ mˇ byah nehˬ ma.

¹⁷Tahˬ pahˬ aˬ ma mawˇ kawˇ deuˬ-ahˇ gʼoe-awˇ, mawˇ kawˇ ahˇ miˬyehˇ shaˇ kuˇ luꞈ-eu tsawˇ haˬ deuˬ, shaꞈ dawˇ-awˇ daˬ ya ga tehꞈ-a.”

¹⁸Sahˬpaˬ Miˬyehˇ heu loꞈ-ehˇ ehˇ-eu meh. “Naˬ bawˬ bawˬ-eu tsawˇ jeuˬ ngaˇ ehˇ gaˇ naˇ haˬ sheˇ. Myaˆ behꞈ deuˬ-oˇ, yaw duˬ duˬ-ehˇ haw sheˇ.

¹⁹Ngaˬ-euˬ zaˬ kʼaˆ maˬ tseˇ myaˆ behꞈ behꞈ-eu gʼaˬ jawˇ ta loˇ. Ngaˬ neh pyehˬ gʼeh leꞈ-euˬ gʼaˬ naˆ maˬ tseˇ naˬ bawˬ bawˬ-eu gʼaˬ jawˇ ta loˇ.

²⁰Iˇsaˬleˬlaˆ-oˇ, nawˬ neh mawˇ-euˬ jeˬ maˬ gui jiˇ coeˇ-a. Ehˇ kʼawꞈ, dawˬ tsuiꞈ gʼoˆ nya ma loˇ. Naw maꞈ gaˬ-eu naˬ bawˇ tsoꞈ kʼawꞈ, gaˬ duˬ taˬ-euˬ aˬ jeˬ jaˆ te.”

²¹Sahˬpaˬ Miˬyehˇ ka kʼoꞈ-eu nui ma keuˆ-eu miˇ neh, aˬ yawꞈ-euˬ zahˇ dawˬ kʼoꞈ dawˬ deuˬ-ahˇ bi goˇ-awˇ, aˬ yawꞈ-euˬ tsawˇ haˬ deuˬ zahˇ dawˬ kʼoꞈ dawˬ-ahˇ taˬ huiˬ gaˇ, aˬ yawꞈ haw mawꞈ mawˇ mawꞈ-eu meh.

²²Ehˇ kʼawꞈ, nymˬ-mˇ aˬ yawꞈ-euˬ tsawˇ haˬ deuˬ, pyuˇ shuiˇ myawˬ gahˬ bi yuˇ jiˇ-awˇ, lo kʼahˬ doe ni bi nyehꞈ lahˇ-awˇ, paꞈ kuˆ doe ni bi nyehꞈ uˇ byoˆ-euˬ meh. Aˬ yawꞈ maꞈ-ahˇ ngehˬ gʼeh nehˬ-eu gʼaˬ maˬ jawˇ ni, tahˇ joe bi joe dzaˬ jiˇ-euˬ meh.

²³Dawˬ heu-ahˇ naw maꞈ aˬ suˇ gʼaˬ naˇ haˬ te. Nymˬ-mˇ neh dahˬ beh-awˇ yaw muiˬ paˬ-ehˇ naˇ haˬ ma loˇ.

²⁴Iˇsaˬleˬlaˆ-ahˇ tahˇ joe bi joe byoˆ leꞈ ni, tahˇ joe laꞈ-ahˇ dehˬ ahˇ nehˬ-euˬ aˬ suˇ gʼaˬ-a. Aˬ dui mˇ bahˬ-euˬ Sahˬpaˬ Miˬyehˇ neh, tahˇ joe laꞈ-ahˇ dehˬ ahˇ nehˬ laꞈ-euˬ meh. Aˬ yawꞈ nui kʼahˇ aˬ dui maˬ dehꞈ byah-ehˇ, aˬ yawꞈ mehˬ gaˇ aˬ dui maˬ naˇ haˬ geuꞈ nehˬ-aˬ.

²⁵Kʼoeˇ miˇ neh aˬ dui-ahˇ aˬ yawꞈ-euˬ nui ma bi mawˇ-awˇ, guiˇ deuˆ-eu jeˬ bi keuˆ le laꞈ-euˬ meh. Aˬ yawꞈ nui pehˇ miˬ dzaˬ doꞈ-eu loꞈ-ehˇ, Iˇsaˬleˬlaˆ miˇ kʼahˬ doꞈ doe-euˬ meh. Kʼoeˇ naˆ ni keuˆ le taˬ-euˬ kʼawꞈ, aˬ dui noeˬ paˇ-eu maˬ baw-a.