Read Akha Iˇsaˬyaˇ 43 Bible Online

Iˇsaˬyaˇ 43 - Akha bible

Iˇsaˬyaˇ 43

¹Iˇsaˬleˬlaˆ-oˇ, nawˬ-ahˇ beh-euˬ Miˬyehˇ heu loꞈ-ehˇ ehˇ-eu meh. “Taˬ guˆ. Nawˬ-ahˇ ngaˇ ka kʼoꞈ ma. Nawˬ-ahˇ ngaˇ tsawˇ myahˇ kuˇ-awˇ tseˇ-euˬ ma. Nawˇ ngaˬ-euˬ tsawˇ haˬ ma.

²Iˇ cuꞈ naꞈ gaˇ nawˇ tsehˆ doˆ ngeh, nawˬ nehˬ-ehˇ ngaˇ jawˇ ma. Guˆ-eu gaˆ-eu jeˬ-ahˇ nawˇ tahˬ puˬ kʼawꞈ, nawˇ maˬ ya cawˆ-iˇ-a. Miˬ dzaˬ laꞈ kʼoeˇ nawˇ cah tsehˆ kʼawꞈ, nawˬ-ahˇ maˬ puiˆ dzaˬ-a. Shaˬ zahˬ nawˬ-ahˇ lawˬ haw le kʼawꞈ, nawˬ-ahˇ coeˬ ni maˬ jahˇ nya-a.

³Ngaˇ-aˬ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ ma. Iˇsaˬleˬlaˆ-euˬ muiˬ-eu shawˇ-eu Miˬyehˇ pyeuꞈ-eu, nawˬ-ahˇ ka kʼoꞈ nehˬ le-euˬ gʼaˬ ngaˇ ma. Nawˬ-euˬ dah zaˇ Iˇjiˇtuˆ-ahˇ ngaˇ bi shaˬ ma. Suˬdaˬ hawˇ-eu Seˬbaˇ miˇ kʼahˬ neh nawˬ-ahˇ paˇ kʼoꞈ ma.

⁴Ngaˬ-euˬ mehˬ shi nawˇ aˇ poeˬ kʼaˆ-eu miˇ neh, nawˬ-euˬ saꞈ laˇ ka kʼoꞈ geuꞈ-eu gʼaˇ duˬ, tsawˇ jeuˬ dawˬ tawˆ luꞈ biꞈ dah coeˇ ma.

⁵Taˬ guˆ. Ngaˇ nawˬ nehˬ-ehˇ jawˇ ma. “Nahˇ ma doˆ kʼehˬ ga kʼehˬ jawˇ byoˆ taˬ-euˬ, nawˬ-euˬ tsawˇ haˬ-ahˇ ngaˇ sheuˬ kʼoꞈ laꞈ ma.

⁶Laꞈ taˆ pyawˬ aˬ yawꞈ maꞈ-ahˇ bi pyehˬ-awˇ, laˬ oˆ pyawˬ maˬ bi gʼeu tehˬ ni ngaˇ dawˬ ngehˬ ma. Miˇ ma oeˬ coeˇ oeˬ pyawˬ jawˇ byaˆ taˬ-euˬ, ngaˬ-euˬ tsawˇ haˬ gʼoꞈ uiˬ laˇ nya ni ngaˇ ja ma.

⁷Aˬ yawꞈ maꞈ ngaˬ-euˬ tsawˇ haˬ ma. Ngaˬ-euˬ yaw shehꞈ kʼahˬ sehˇ bi doˆ laˇ ni, aˬ yawꞈ maꞈ-ahˇ ngaˇ beh-euˬ ma.”

⁸Miˬyehˇ heu loꞈ-ehˇ ehˇ-eu meh. “Ngaˬ-euˬ tsawˇ jeuˬ-ahˇ yaˇ kʼaˬ daˇ gaˇ kuˇ daˆ-awˬ. Aˬ yawꞈ maꞈ myaˆ nuiˆ tsoꞈ luꞈ kʼawꞈ maˬ mawˇ nya-ehˇ, naˬ bawˇ tsoꞈ kʼawꞈ maˬ gaˬ nya-a.

⁹Tsawˇ jeuˬ dawˬ tawˆ luꞈ-ahˇ kuˇ-awˇ caw tseˇ duˬ-awˬ. Aˬ kaˇ mehˬ hu paw pyeuꞈ laˇ-eu gaˇ kawˆ deuˬ-ahˇ, aˬ yawꞈ maꞈ-euˬ miˬ yehˇ aˬ geu gʼaˬ ehˇ nya ta. Nymˬ-mˇ pyeuꞈ luꞈ-eu gaˇ kawˆ deuˬ, aˬ geu gʼaˬ neh ehˇ dzeuˇ taˬ-euˬ jaˆ ta. Miˬyehˇ kʼoeˇ deuˬ aˬ yawꞈ maꞈ neh ehˇ-euˬ tsaˬ-eu gaˇ kawˆ, aˬ yawꞈ maꞈ-euˬ dawˬ maˬ lehˬ-eu gaˇ kawˆ, saˇ kiˇ bi toeˬ mehˬ-awˬ.

¹⁰“Iˇsaˬleˬlaˆ tsawˇ haˬ deuˬ-oˇ, naw maꞈ-aˬ, ngaˬ-euˬ saˇ kiˇ ma. Naw maꞈ ngaˬ-ahˇ siˬ nya-awˇ jah laˇ ni, ngaˇ tiˬ gʼaˬ tehꞈ-ehˇ Miˬyehˇ pyeuꞈ-eu meh lehˇ siˬ nya ni, ngaˬ-euˬ zaˬ kʼaˆ bi geuꞈ-eu lehˇ, naw maꞈ-ahˇ ngaˇ tseˇ doˆ-euˬ ma. Ngaˇ uˬ taꞈ miˬ yehˇ nui gʼaˬ maˬ jawˇ. Aˇ dahˬ beh ngeh neh maˬ jawˇ-euˬ loꞈ-ehˇ, aˇ saˬ saˬ ngeh kʼawꞈ maˬ jawˇ-aˇ.

¹¹“Sahˬpaˬ Miˬyehˇ pyeuꞈ-eu ngaˇ tiˬ gʼaˬ tehꞈ ma. Naw maꞈ-ahˇ ka kʼoꞈ nya-eu ngaˇ tiˬ gʼaˬ tehꞈ ma.

¹²Mehˬ hu paw pyeuꞈ laˇ-eu gaˇ kawˆ ngaˇ ja mehˬ-awˇ, naw maꞈ-ahˇ caw ba nehˬ-euˬ ma. Kʼoeˇ loꞈ-ehˇ mˇ taˬ-eu boeˇ miˬ siˬ kʼaˬ-euˬ miˬ yehˇ maˬ jawˇ-a. Naw maꞈ ngaˬ-euˬ saˇ kiˇ pyeuꞈ luꞈ-eu meh.

¹³Nymˬ-mˇ ngaˇ Miˬyehˇ pyeuꞈ-eu loꞈ-ehˇ, mˬ maˬ maˬ byaˆ zaˇ ziˇ ngaˇ Miˬyehˇ ma. Ngaˬ-euˬ baoˬ-ahˇ cehˆ dzeuˇ nya-eu gʼaˬ maˬ jawˇ-ehˇ, ngaˬ neh mˇ-euˬ jeˬ-ahˇ laˆ paˇ nya-eu gʼaˬ maˬ jawˇ-a.”

¹⁴Iˇsaˬleˬlaˆ-euˬ muiˬ-eu shawˇ-eu Miˬyehˇ pyeuꞈ-eu, naw maꞈ-ahˇ ka kʼoꞈ-euˬ Sahˬpaˬ Miˬyehˇ heu loꞈ-ehˇ ehˇ-eu meh. “Naw maꞈ-ahˇ ka kʼoꞈ-eu gʼaˇ duˬ, Baˬbuˇloˬ miˇ kʼahˬ-ahˇ guiˇ deuˆ le-eu, guiˇ maꞈ tiˬ maꞈ ngaˇ pyehˬ leꞈ ma. Meuˬ lahˇ laˇ gʼoˆ deuˬ-ahˇ ngaˇ ngawˬ pyaˆ-awˇ, Baˬbuˇloˬ tsawˇ haˬ deuˬ guˇ-eu teˇ saˇ, tsawˇ ngoeˇ ngoeˇ-eu teˇ saˇ pyeuꞈ-iˇ tehꞈ-a.

¹⁵Ngaˇ-aˬ, muiˬ-eu shawˇ-eu Miˬyehˇ pyeuꞈ-eu, naw maꞈ-euˬ Sahˬpaˬ Miˬyehˇ ma. Naw maꞈ Iˇsaˬleˬlaˆ tsawˇ haˬ deuˬ-ahˇ ngaˬ neh beh-awˇ, ngaˇ naw maꞈ-euˬ sahˬ paˬ ma.”

¹⁶Aˇ hu iˬ ma laˆ shaˆ laꞈ kʼoeˇ, Sahˬpaˬ Miˬyehˇ gaˇ ma jahˇ-awˇ, iˇ kʼawˇ gʼahˇ ceh gaˇ jawˬ bi dahˇ-euˬ meh.

¹⁷Mahˬ laˆ lawˬ hawˇ-eu mahˬ deuˬ myaˬ dui dui-eu baoˬ huiˬ-eu guiˇ maꞈ-ahˇ aˬ yawꞈ laˆ cawˆ-euˬ meh. Tsiˇ kʼmˬ bi baw miˆ-euˬ loꞈ-ehˇ, aˬ yawꞈ maꞈ coˬ-iˇ-awˇ maˬ paˇ tuˇ laˇ nya meh.

¹⁸Ehˇ kʼawꞈ, Sahˬpaˬ Miˬyehˇ ehˇ-eu, “Aˇ hu-euˬ gaˇ kawˆ deuˬ-ahˇ taˬ noeˬ muiˬ, Pyeuꞈ dzeuˇ yaꞈ-euˬ gaˇ kawˆ-ahˇ taˬ shaˇ noeˬ,

¹⁹Haw yawˬ, nymˬ-mˇ ngaˇ yaw shuiꞈ tiˬ jeˬ paˇ mˇ luꞈ-eu ma. Nymˬ-mˇ pyeuꞈ laˇ luꞈ gaˇ naw maꞈ ya mawˇ tehꞈ-a. Bawˇ tsahˬ bawˇ dahˇ-ahˇ ngaˇ gaˇ ma paˇ shaˇ dahˇ-awˇ, naw maꞈ gʼaˇ duˬ lawˇ gawˆ bi yoeˇ le ma.

²⁰Ngaˬ neh tseˆ doˆ-euˬ tsawˇ jeuˬ-ahˇ iˇ cuꞈ biꞈ-eu gʼaˇ duˬ, kʼaˇ shuiꞈ deh ga-ahˇ ngaˇ iˇ cuꞈ bi yoeˇ le ngeh, bawˇ tsahˬ jeˬ zaˬ deuˬ ngaˬ-ahˇ taˬ huiˬ-awˇ, bawˇ tsahˬ aˬ kuiˬ hawˇ-eu law taw aˇ jiˇ kʼoeˇ deuˬ, ngaˬ-ahˇ ja ceuˬ tehꞈ-a.

²¹Aˬ yawꞈ maꞈ-aˬ ngaˬ-euˬ gʼaˇ duˬ, ngaˬ neh beh-euˬ tsawˇ jeuˬ pyeuꞈ-awˇ, ngaˬ-ahˇ ja ceuˬ-euˬ caˇ dawˬ-ahˇ, aˬ yawꞈ maꞈ caˇ tehꞈ-a.”

²²Sahˬpaˬ Miˬyehˇ heu loꞈ-ehˇ ehˇ-eu meh. “Ehˇ kʼawꞈ, Iˇsaˬleˬlaˆ-oˇ, nawˇ ngaˬ-ahˇ byuˇ laˇ-awˇ uˬ duˬ maˬ tahˬ mawꞈ-a.

²³Yawˇ dzah puiˆ-awˇ ya lawˇ-eu jeˬ, nawˇ ngaˬ-ahˇ maˬ lawˇ nehˬ laꞈ-a. Nawˇ lawˇ-eu shehˇ-eu jeˬ mˇ-awˇ, ngaˬ-ahˇ maˬ taˬ huiˬ nehˬ laꞈ-a. Lawˇ-eu shehˇ-eu jeˬ biꞈ nehˬ laꞈ lehˇ ngaˇ ehˇ-awˇ, nawˬ-ahˇ laˆ shaˬ nehˬ-euˬ maˬ jaˆ. Tsiˇ yaw saw damˬ nehˬ laꞈ lehˇ ngaˇ shaˇ-awˇ, nawˬ-ahˇ laˆ zahˬ nehˬ-eu maˬ jaˆ.

²⁴Naw maꞈ ngaˬ-euˬ gʼaˇ duˬ tsiˇ yaw saw maˬ zeuˇ-a. Jeˬ zaˬ-euˬ tsiˇ naw maꞈ yuˇ-awˇ, ngaˇ nui kʼahˇ shiˇ ni damˬ nehˬ laꞈ-euˬ maˬ jaˆ-a. Ehˇ kʼawꞈ, naw maꞈ neh mˇ-euˬ iˬ baˇ baˬ da neh, ngaˇ noeˬ shaˬ ni naw maꞈ jahˇ-awˇ, naw maꞈ neh mˇ-euˬ yaw lehˬ yaw ca jeˬ, ngaˬ-ahˇ shaˬ zahˬ laˆ naꞈ-euˬ meh.

²⁵Ehˇ kʼawꞈ, ngaˬ-euˬ gʼaˇ duˬ naw maꞈ-euˬ yaw lehˬ-ahˇ ngehˇ-awˇ, naw maꞈ-ahˇ iˬ baˇ pyehˬ nehˬ-euˬ Miˬyehˇ ngaˇ ma.

²⁶Dzeuˇ yaꞈ-euˬ gaˇ kawˆ deuˬ ehˇ doˆ haw sheˇ. Naw maꞈ tsaˬ-euˬ gaˇ kawˆ ja dahˇ haw sheˇ. Gaˇ kawˆ heu-ahˇ tiˬ kawˆ loꞈ-ehˇ ja duˬ kaˇ-euˇ.

²⁷Aˇ hu naw maꞈ-euˬ aˬ piˬ aˬ bawˇ deuˬ iˬ baˇ mˇ-awˇ, naw maꞈ-euˬ aˬ yuiꞈ aˬ tsu deuˬ ngaˬ-ahˇ mˇ lehˬ-euˬ meh.

²⁸Ngaˬ-euˬ muiˬ-eu shawˇ-eu jawˇ duˬ kʼoeˇ tsahˇ, naw maꞈ-euˬ sahˬ paˬ sahˬ ma neh laˆ jawꞈ-euˬ meh. Kʼoeˇ baˬ da neh Iˇsaˬleˬlaˆ-ahˇ ngaˇ, luˬ-iˇ seˇ-iˇ-eu jeˬ bi keuˆ le-awˇ, aˬ cawˬ yehˬ bawˬ sehˇ lu-ehˇ gʼeh-eu jeˬ, ngaˬ-euˬ tsawˇ jeuˬ kʼoeˇ taˆ ngaˇ bi keuˆ le-euˬ ma.”