Read Akha Iˇsaˬyaˇ 52 Bible Online

Iˇsaˬyaˇ 52 - Akha bible

Iˇsaˬyaˇ 52

¹Yeˬluˇsaˬlehˬ meuˬ-oˇ, noeˬ laˇ-awˬ. Beuˇ laˇ-awˬ. Gʼaˬ ziꞈ dah ni paˇ ahˇ laˇ-awˬ. Miˬyehˇ-euˬ muiˬ-eu shawˇ-eu meuˬ-oˇ, yaw shehꞈ kʼahˬ sehˇ dm-awˬ. Lawˇ ciꞈ zaˬ deuˬ meuˬ lahˇ laꞈ kʼoeˇ maˬ paˇ ya uˇ laˇ meh.

²Yeˬluˇsaˬlehˬ meuˬ-oˇ, kʼaˬ lehˇ byuˬ kʼaˇ dzeh-awˬ. Kʼaˬ lehˇ tsahˬ-ahˇ neh tuˇ laˇ-awˇ, dzoeˬ dzaˬ nuiˇ mahˬ kʼoeˇ taˆ nuiˇ-awˬ. Paꞈ tawꞈ taˬ-euˬ Ziˇoˬ meuˬ zaˬ deuˬ-oˇ, shmˇ caˆ tseuˆ puiˇ dzeh-awˬ.

³Aˬ yawꞈ-euˬ tsawˇ haˬ deuˬ-ahˇ Sahˬpaˬ Miˬyehˇ heu loꞈ-ehˇ ehˇ-eu meh. “Naw maꞈ-ahˇ zaˬ kʼaˆ bi geuꞈ ngeh, aˇ poeˬ biꞈ-awˇ zeuˇ-euˬ maˬ ngeuˇ-a. Kʼoeˇ loꞈ-ehˇ duˇ ni, naw maꞈ-ahˇ pyehˬ nehˬ-euˬ gʼaˇ duˬ kʼawꞈ, aˇ poeˬ maˬ biꞈ ni bi pyehˬ ma.

⁴Iˇjiˇtuˆ miˇ kʼahˬ-ahˇ naw maꞈ boeˇ miˬ siˬ kʼaˬ geuꞈ-awˇ jawˇ-iˇ ngeh, naw maꞈ nui kʼahˇ shiˇ-awˇ jawˇ-iˇ-euˬ meh. Ehˇ kʼawꞈ, Aˬshuˇliˆ miˇ kʼahˬ-aˬ, naw maꞈ maˬ le mawꞈ gaˇ nyehꞈ geuꞈ gʼeh-awˇ, naw maꞈ gʼaˇ duˬ aˇ poeˬ maˬ biꞈ-aˬ.

⁵Nymˬ-mˇ Baˬbuˇloˬ miˇ kʼahˬ kʼawꞈ, naw maꞈ-ahˇ kʼoeˇ loꞈ-ehˇ jahˇ nehˬ-euˬ meh. Naw maꞈ-ahˇ nyehꞈ geuꞈ gʼeh-awˇ, aˇ poeˬ maˬ biꞈ nehˬ-a. Naw maꞈ-ahˇ uˆ lahˇ-eu tsawˇ haˬ kʼoeˇ deuˬ kʼahˬ sehˇ jehˆ-awˇ, ngaˬ-ahˇ yaw zeu maˬ baw ni dehꞈ haw-eu maˬ naˬ leˇ-a.

⁶Mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, ngaˇ Miˬyehˇ pyeuꞈ-eu gaˇ kawˆ hawˇ-eu, ngaˬ neh naw maꞈ-ahˇ ehˇ nehˬ-euˬ dawˬ deuˬ gaˇ kawˆ, naw maꞈ ya siˬ duˬ tehꞈ-a.”

⁷Laˬ kʼaˬ cehˇ-eu guiˬ lahˬ dawˬ deuˬ hawˇ-eu, nui saˇ oꞈ-eu dawˬ deuˬ biꞈ le-eu lehˇ, gawˬ jawˬ nyiˬ tsehˆ-ehˇ oe luꞈ-eu, Miˬyehˇ neh kʼehˇ leꞈ-euˬ gʼaˬ-euˬ kuiˇ toꞈ, aˇ naˆ ni muiˬ-eu nga. Gʼaˬ leˇ-eu gaˇ kawˆ aˬ yawꞈ dawˬ dzawˇ mˇ le-awˇ, “Nawˬ-euˬ Miˬyehˇ sahˬ paˬ meh” lehˇ, Ziˇoˬ meuˬ-ahˇ tsaꞈ le-euˬ meh.

⁸Sahˬpaˬ Miˬyehˇ Ziˇoˬ meuˬ-ahˇ gʼoꞈ le luꞈ gaˇ, myaˆ nuiˆ ya mawˇ duˬ-eu miˇ neh, meuˬ-ahˇ loꞈ piˇ-eu deuˬ laˬ kʼaˬ tiˬ cehˇ, tiˬ kawˆ loꞈ-ehˇ guˇ dui dui meh.

⁹Yeˬluˇsaˬlehˬ laꞈ kʼoeˇ cawˆ-iˇ taˬ-euˬ jawˇ duˬ dawˬ tawˆ, laˬ kʼaˬ tiˬ cehˇ guˇ kʼaˆ leꞈ-awˬ. Sahˬpaˬ Miˬyehˇ aˬ yawꞈ-euˬ meuˬ-ahˇ ka kʼoꞈ-awˇ, aˬ yawꞈ-euˬ tsawˇ haˬ-ahˇ nui saˇ bi oꞈ tehꞈ-a.

¹⁰Sahˬpaˬ Miˬyehˇ muiˬ-eu shawˇ-eu baoˬ-ahˇ gʼoe-awˇ, aˬ yawꞈ-euˬ tsawˇ haˬ-ahˇ ka kʼoꞈ nehˬ gaˇ, miˇ tsaˬ dawˬ tawˆ ya mawˇ tehꞈ-a.

¹¹Uˬ duˬ tahˬ nymˇ nymˇ ma-ahˇ taꞈ-eu keu ka baꞈ-eu tsawˇ haˬ deuˬ, Baˬbuˇloˬ meuˬ-ahˇ neh maˬ oe doˆ ni taˬ byehˇ. Maˬ toeˬ ciˆ kʼmˬ-eu mˇ myawˬ-ahˇ taˬ toeˬ. Yawˬ ha-euˬ gʼawˇ mawˇ shawˇ-awˇ doˆ-iˇ-awˬ.

¹²Nymˬ-mˇ poˆ jawˇ naw maꞈ uˬ kʼawˇ teuˆ buˬ-eu maˬ loˬ-a. Guˆ guˆ ci ci-ehˇ cehˆ-eu maˬ loˬ-a. Naw maꞈ-eu Miˬyehˇ pyeuꞈ-eu Sahˬpaˬ Miˬyehˇ-aˬ, yawˬ pyawˬ na luꞈ naw maꞈ-ahˇ haw piˇ luꞈ-eu meh.

¹³Sahˬpaˬ Miˬyehˇ ehˇ-eu, “Ngaˬ-euˬ zaˬ kʼaˆ aˬ yawꞈ-ahˇ doˇ-eu gaˇ mˇ jiˇ tehꞈ-a. Ciˬ huiˬ ciˬ mahˇ nehˬ-eu guiˬ lahˬ-ahˇ aˬ yawꞈ za tehꞈ-a.

¹⁴Tsawˇ haˬ gʼawˬ mya ni aˬ yawꞈ-ahˇ ya tsawˬ guˆ-iˇ tehꞈ-a. Aˬ yawꞈ-euˬ shiˬ shaˬ cawˆ dui dui-iˇ-awˇ, tsawˇ haˬ-ahˇ tiˬ pawꞈ-iˬ maˬ duˇ leˇ-a.

¹⁵Ehˇ kʼawꞈ, nymˬ-mˇ miˇ kʼahˬ tsawˇ jeuˬ dawˬ tawˆ, aˬ yawꞈ-ahˇ zahˬ leˇ-awˇ, sahˬ paˬ deuˬ dawˬ maˬ ngehˬ nya ni tsoˆ leˇ tehꞈ-a. Aˇ hu ba neh maˬ siˬ maˬ mawˇ haw-euˬ jeˬ-ahˇ, aˬ yawꞈ maꞈ ya siˬ ya mawˇ duˬ tehꞈ-a.”