Read Akha Iˇsaˬyaˇ 54 Bible Online

Iˇsaˬyaˇ 54 - Akha bible

Iˇsaˬyaˇ 54

¹Yeˬluˇsaˬlehˬ meuˬ-oˇ, nawˇ maˬ baw aˬ ma-ahˇ duˇ kʼawꞈ, nymˬ-mˇ laˬ kʼaˬ cehˇ-eu caˇ dawˬ caˇ-awˇ guˇ nya-eu meh. Aˬ jeˬ miˇ neh ehˇ naˇ, kʼaˬ dzeˇ zaˬ-ahˇ maˬ gʼawˬ-iˇ-eu aˬ ma gʼaˬ naˆ maˬ tseˇ, kʼaˬ dzeˇ zaˬ maˬ baw-eu aˬ ma zaˬ myaˬ dzehˬ le tehꞈ-a lehˇ, Sahˬpaˬ Miˬyehˇ ehˇ taˬ-euˬ meh.

²Nawˇ jawˇ-eu sehˬ gʼawˆ tsoˆ jeˇ-awˬ. Sehˬ gʼawˆ aˇ caˆ paˇ laˆ mahˇ-awˇ, sehˬ gʼawˆ daˇ taꞈ paˇ taꞈ ziꞈ-awˬ.

³Nawˬ-euˬ miˇ kaˬ yawˬ pyawˬ na luꞈ teh jiˆ taˬ-awˬ. Aˬ cawˬ tsawˇ jeuˬ neh ceh geuꞈ taˬ-euˬ miˇ tsaˬ deuˬ, nawˬ-euˬ tsawˇ haˬ deuˬ paˇ za kʼoꞈ tehꞈ-a. Meuˬ tsoeˬ tsoeˬ-iˇ-euˬ meuˬ kʼoeˇ deuˬ, tsawˇ haˬ paˇ jawˇ byah jiˇ tehꞈ-a.

⁴Maˬ guˆ ni jawˇ-awˬ. Nawˇ ya shaꞈ dawˇ-eu jeˬ maˬ paˇ jaˆ meh. Maˬ noeˬ shaˬ ni dehꞈ-awˬ. Nawˇ daˬ maˬ paˇ ga meh. Miˬ daꞈ daꞈ ngeh nawˇ ya shaꞈ dawˇ-euˬ jeˬ hawˇ-eu, miˬ coeˬ miˬ ma pyeuꞈ ngeh daˬ ga-euˬ jeˬ dawˬ tawˆ, ya ngehˇ byoˆ jiˇ tehꞈ-a.

⁵Nawˬ-ahˇ beh-euˬ gʼaˬ nawˬ-euˬ kʼaˬ dzeˇ zaˬ-ahˇ duˇ tehꞈ-a. Aˬ yawꞈ tsawˇ myahˇ Baoˬ huiˬ-eu Sahˬpaˬ Miˬyehˇ meh. Iˇsaˬleˬlaˆ-euˬ muiˬ-eu shawˇ-eu Miˬyehˇ nawˬ-ahˇ ka kʼoꞈ nehˬ laꞈ tehꞈ-a. Miˇ tsaˬ dawˬ tawˆ luꞈ-ahˇ aˬ yawꞈ uˆ lahˇ-eu meh.

⁶Iˇsaˬleˬlaˆ-oˇ, kʼaˬ dzeˇ zaˬ neh bi kʼoꞈ-awˇ noeˬ shaˬ-eu, aˇ kʼoꞈ nahˬ-eu zaˬ miˬ zaˬ-ahˇ nawˇ duˇ-eu meh. Ehˇ kʼawꞈ, Sahˬpaˬ Miˬyehˇ nawˬ-ahˇ paˇ kuˇ kʼoꞈ-awˇ, heu loꞈ-ehˇ ehˇ-eu meh.

⁷“Nawˬ-ahˇ ngaˇ tiˬ kʼehˇ laˇ kʼehˬ byehˇ dzeh-euˬ tehꞈ ma. Gaˬ dui dui-eu laꞈ kʼoeˇ nawˬ-ahˇ ngaˇ paˇ sheuˬ kʼoꞈ geuꞈ ma.

⁸Nui ma pehˇ dui dui-eu miˇ neh, ngaˬ-euˬ myaˆ pyawˬ tiˬ kʼehˇ laˇ kʼehˬ ciˬ zaꞈ-euˬ ma. Ngaˬ-euˬ nui gaˬ mˬ maˬ maˬ byaˆ zaˇ ziˇ, nawˬ-ahˇ bi mawˇ ma” lehˇ, nawˬ-ahˇ ka kʼoꞈ-euˬ Sahˬpaˬ Miˬyehˇ ehˇ-eu meh.

⁹“Miˇ tsaˬ kʼoeˇ taˆ iˇ cuꞈ maˬ paˇ bi dahˬ pymˬ-eu gʼaˇ duˬ, Noˇaˬ-euˬ ziˇ-ahˇ ngaˇ saˇ jaˇ biꞈ-euˬ loꞈ-ehˇ, nawˬ-ahˇ nui ma maˬ paˇ pehˇ-eu gʼaˇ duˬ nymˬ-mˇ ngaˇ saˇ jaˇ biꞈ-eu ma. Nawˬ-ahˇ ngaˇ maˬ paˇ byehˇ dzeh ma.

¹⁰Gawˬ jawˬ gawˬ duˇ deuˬ byaˆ-iˇ kʼawꞈ, nawˬ-ahˇ ngaˇ gaˬ-eu jeˬ maˬ bi byoˆ-iˇ. Tsaˬ leˇ dzoeˇ leˇ-eu ngaˬ-euˬ saˇ jaˇ dawˬ, mˬ maˬ maˬ byaˆ zaˇ ziˇ bi ziꞈ-eu ma” lehˇ, nawˬ-ahˇ gaˬ-euˬ Sahˬpaˬ Miˬyehˇ ehˇ-eu meh.

¹¹Sahˬpaˬ Miˬyehˇ ehˇ-eu, “Shaˬ zahˬ naꞈ-awˇ ngehˬ gʼeh nehˬ-eu gʼaˬ maˬ jawˇ-eu, nui saˇ maˬ oꞈ-eu Yeˬluˇsaˬlehˬ-oˇ, aˇ poeˬ kʼaˆ-eu kʼaˬ lo sehˇ deuˬ yuˇ-awˇ, nawˬ-euˬ dawˬ pehˬ ngaˇ gawˬ ziꞈ ma.

¹²Nawˬ-ahˇ loꞈ piˇ-eu nymˇ nymˇ goˇ deuˬ-ahˇ, kʼaˬ lo sehˇ yaw neˇ neh gawˬ ma. Miˬ dzaˬ loꞈ-ehˇ bya-eu kʼaˬ lo sehˇ deuˬ yuˇ-awˇ, nawˬ-euˬ meuˬ lahˇ ngaˇ gawˬ ziꞈ ma. Nawˬ-euˬ meuˬ lahˇ tiˬ jawˬ kʼaˬ lo sehˇ neh gawˬ ma.

¹³“Nawˬ-euˬ tsawˇ haˬ deuˬ-ahˇ ngaˇ mehˬ nehˬ tsoˆ nehˬ-awˇ, nui saˇ oꞈ-awˇ bi baw bi za le ma.

¹⁴Yaw tsaˬ yaw dawˇ jeˬ nawˬ-ahˇ gʼaˬ bi kʼaˆ laˇ-awˇ, guˆ-eu gaˆ-eu kʼehˬ-eu kʼaˆ-eu jeˬ-ahˇ, nawˇ ya buˬ-iˇ tehꞈ-a.

¹⁵Tsawˇ haˬ tiˬ gʼaˬ na nawˬ-ahˇ guiˇ deuˆ laˇ naˇ, ngaˇ nui ma maˬ tsaˬ gaˇ ceh le-eu meh. Nawˬ-ahˇ kʼaˇ ceh laˇ-eu deuˬ ya coˬ-iˇ tehꞈ-a.

¹⁶“Baw baw-awˇ guiˇ deuˆ-eu keu ka tehˆ luꞈ-eu, ba jiˬ deuˬ-ahˇ ngaˬ neh beh taˬ-euˬ ma. Keu ka baꞈ-awˇ aˬ cawˬ-ahˇ sehꞈ-eu yehˇ deuˬ kʼawꞈ, ngaˬ neh beh taˬ-euˬ ma.

¹⁷Ehˇ kʼawꞈ, nawˬ-ahˇ laˆ tahˬ laˆ naˇ nya-eu, guiˇ deuˆ-eu keu ka maˬ jaˆ-a. Nawˬ-ahˇ yaˇ kʼaˬ kʼaˇ ja laˇ-eu tsawˇ haˬ deuˬ-ahˇ, nawˇ ja gʼaˬ nya tehꞈ-a. Ngaˬ-euˬ zaˬ kʼaˆ deuˬ-ahˇ ngaˇ haw piˇ-awˇ, gʼaˬ leˇ-eu tsawˇ haˬ bi pyeuꞈ ma” lehˇ Sahˬpaˬ Miˬyehˇ ehˇ-eu meh.