Read Akha Iˇsaˬyaˇ 56 Bible Online

Iˇsaˬyaˇ 56 - Akha bible

Iˇsaˬyaˇ 56

¹“Yaw tsaˬ yaw dawˇ jeˬ-ahˇ tuˆ tehˬ taˬ-awˇ, yaw tsaˬ yaw dawˇ jeˬ-ahˇ mˇ-awˬ. Ngaˇ ka kʼoꞈ-eu aˇ yamˬ peh le luꞈ-awˇ, ngaˬ-euˬ yaw tsaˬ yaw dawˇ jeˬ pah mehˬ-eu aˇ yamˬ tsaˬ laˇ-euˬ meh.

²Jawˇ nah-ahˇ maˬ laˆ jawꞈ ni lah daw-eu laꞈ kʼoeˇ, yaw haiˬ jeˬ maˬ mˇ-eu tsawˇ haˬ deuˬ guiˬ lahˬ huiˬ tehꞈ-a.”

³Sahˬpaˬ Miˬyehˇ-euˬ tsawˇ haˬ deuˬ jawˇ gaˇ, jawˇ ahˇ laˇ-euˬ boeˇ miˬ siˬ kʼaˬ deuˬ-euˬ kʼaˬ meh, “Sahˬpaˬ Miˬyehˇ-euˬ aˇ maꞈ aˇ muˇ laꞈ kʼoeˇ, ngaˬ-ahˇ aˬ diˇ teh dzeh nehˬ laꞈ tehꞈ-a” lehˇ taˬ bi ehˇ. Aˇ caˆ pyehˆ gʼaˬ-euˬ kʼaˬ dzeˇ zaˬ deuˬ kʼawꞈ, “Zaˬ maˬ jawˇ le nya-eu miˇ neh, aˇ bawˇ baw guˇ-ahˇ duˇ leˇ-awˇ, Sahˬpaˬ Miˬyehˇ-euˬ tsawˇ haˬ deuˬ-ahˇ maˬ taꞈ nya-a” lehˇ taˬ bi ngehˬ.

⁴Sahˬpaˬ Miˬyehˇ heu loꞈ-ehˇ ehˇ-eu meh. “Aˇ caˆ pyehˆ-euˬ tsawˇ haˬ pyeuꞈ kʼawꞈ, ngaˬ-euˬ nui kʼahˇ poˆ-awˇ, ngaˬ-euˬ dawˬ ma saˇ jaˇ-ahˇ ziꞈ luꞈ-eu, jawˇ nah tawˬ-eu tsawˇ haˬ deuˬ-ahˇ,

⁵Zaˬ jawˇ-eu naˆ maˬ tseˇ muiˬ-eu tsawˇ myahˇ biꞈ-awˇ, ngaˬ-euˬ Uˬ duˬ tahˬ nymˇ nymˇ ma laꞈ kʼoeˇ, mˬ maˬ maˬ byaˆ zaˇ ziˇ maˬ ngehˇ ni bi jaˆ ma.

⁶Boeˇ miˬ siˬ kʼaˬ deuˬ Sahˬpaˬ Miˬyehˇ-euˬ gaˇ mˇ-awˇ, aˬ yawꞈ-euˬ tsawˇ myahˇ-ahˇ gaˬ-eu laꞈ kʼoeˇ, aˬ yawꞈ-ahˇ uˬ duˬ tahˬ luꞈ-eu uˬ taꞈ, jawˇ nah-ahˇ maˬ laˆ jawꞈ ni lah daw-awˇ, Sahˬpaˬ Miˬyehˇ-euˬ dawˬ ma saˇ jaˇ-ahˇ ziꞈ-eu, Sahˬpaˬ Miˬyehˇ jawˇ paw pyawˬ-eu tsawˇ haˬ deuˬ-ahˇ,

⁷ngaˬ-euˬ muiˬ-eu shawˇ-eu gawˬ jawˬ-ahˇ sheuˬ daˆ-awˇ, ngaˬ-euˬ guiˬ lahˬ shaˇ nymˇ laꞈ kʼoeˇ, aˬ yawꞈ maꞈ-ahˇ ngaˇ laˬ kʼaˬ bi cehˇ ma. Aˬ yawꞈ maꞈ neh lawˇ-euˬ shehˇ-euˬ jeˬ-ahˇ, ngaˬ-euˬ lawˇ duˬ kʼoeˇ taˆ ngaˇ ha geuꞈ ma. Ngaˬ-euˬ Uˬ duˬ tahˬ nymˇ nymˇ ma heu-ahˇ, tsawˇ jeuˬ dawˬ tawˆ luꞈ-euˬ uˬ duˬ tahˬ nymˇ lehˇ myahˇ tehꞈ-a.”

⁸Aˬ cawˬ-euˬ miˇ kʼahˬ-ahˇ bi nyehꞈ byoˆ-euˬ, aˬ yawꞈ-euˬ tsawˇ jeuˬ-ahˇ sheuˬ doˆ-euˬ gʼaˬ pyeuꞈ-eu, Dawˬ tawˆ kʼoeˇ taˆ uˆ lahˇ luꞈ-eu Sahˬpaˬ Miˬyehˇ, heu loꞈ-ehˇ ehˇ-eu meh. “Ngaˬ neh sheuˬ kʼoꞈ doˆ-euˬ tsawˇ jeuˬ uˬ taꞈ, tsawˇ jeuˬ nui deuˬ-ahˇ ngaˇ paˇ sheuˬ uiˬ ma.”

⁹Aˬ cawˬ tsawˇ jeuˬ-ahˇ Sahˬpaˬ Miˬyehˇ ehˇ nehˬ-eu, “Haiˬ-eu kʼaˬ zuiˬ kʼaˬ laˬ loꞈ-ehˇ oe-awˇ, ngaˬ-euˬ tsawˇ jeuˬ-ahˇ kawꞈ sehꞈ dzaˬ le-awˬ.

¹⁰Ngaˬ-euˬ tsawˇ haˬ deuˬ-ahˇ mehˬ-eu tsoˆ-eu gʼaˇ duˬ, aˬ yuiꞈ aˬ tsu bi geuꞈ taˬ-euˬ kʼoeˇ deuˬ, dawˬ tawˆ luꞈ myaˆ behꞈ tahˬ sawˇ meh. Aˬ yawꞈ maꞈ tiˬ jeˬ-iˬ maˬ siˬ nya-ehˇ, maˬ tsehꞈ-eu nymˇ loꞈ aˬ kuiˬ-ahˇ duˇ-awˇ, yuꞈ ja taˬ-awˇ yuꞈ maˆ maˆ-eu, yuꞈ gaˇ gaˬ-eu aˬ kuiˬ-ahˇ duˇ-eu meh.

¹¹Biꞈ dehˆ-euˬ maˬ baw-eu aˬ kuiˬ loꞈ-ehˇ, aˬ yuiꞈ aˬ tsu kʼoeˇ deuˬ noeˬ siˬ nya-eu jeˬ maˬ ahˇ-ehˇ, yawˬ gʼaˬ na luꞈ yawˬ ha nui kʼahˇ poˆ-awˇ, yawˬ ha-ahˇ muiˬ laˇ ni leh jeh-eu meh.

¹²Aˬ yawꞈ maꞈ heu loꞈ-ehˇ ehˇ-eu meh. ‘Aˬ dui jiˇ baˬ kʼaˇ uiˬ taˬ-awˇ, kʼaˇ dawˇ coeˇ-eu dawˇ haw kaˇ-euˇ. Iˬ nah maˬ tseˇ ni shawˬ dehꞈ byawˬ dzehˬ ma’ ”