Read Akha Iˇsaˬyaˇ 59 Bible Online

Iˇsaˬyaˇ 59 - Akha bible

Iˇsaˬyaˇ 59

¹Naw maꞈ-ahˇ ka kʼoꞈ-eu gʼaˇ duˬ, Sahˬpaˬ Miˬyehˇ aˬ laꞈ nymˇ-awˇ, naw maꞈ kuˇ gaˇ naˇ haˬ nehˬ-eu gʼaˇ duˬ, aˬ yawꞈ naˬ bawˬ nga lehˇ taˬ noeˬ.

²Naw maꞈ kuˇ ngeh aˬ yawꞈ maˬ gaˬ-eu-aˬ, naw maꞈ iˬ baˇ baˬ da neh meh. Naw maꞈ Miˬyehˇ-ahˇ uˬ duˬ tahˬ-eu leh jeh ngeh, aˬ yawꞈ nehˬ-ehˇ zahˇ doꞈ kaˬ-iˇ-euˬ-aˬ, naw maꞈ iˬ baˇ baˬ da neh meh.

³Naw maꞈ jaˬ myawꞈ mehˇ shuiˇ myaˬ-eu uˬ taꞈ, yaw haiˬ mˇ-awˇ tsawˇ haˬ-ahˇ sehꞈ-euˬ meh.

⁴Naw maꞈ yaˇ kʼaˬ daˇ duˬ-ahˇ le-eu kʼawꞈ, yaw tsaˬ yaw dawˇ jeˬ naw maꞈ jawˇ paw maˬ pyawˬ-ehˇ, jaˬ myawꞈ myawꞈ-awˇ gʼaˬ leˇ ni leh jeh-eu laꞈ kʼoeˇ, aˬ cawˬ-ahˇ coeˬ leˇ-eu jeˬ toˆ-eu meh.

⁵Doꞈ kʼaˆ-eu aˇ lawˇ uˆ naw maꞈ uˆ-awˇ, aˬ oˬ loˬ ma aˇ kahˇ kahˇ tsoeˬ-euˬ meh. Naw maꞈ-euˬ ya uˆ dzaˬ-eu deuˬ shiˇ-awˇ, ya uˆ paˆ-iˇ ngeh doꞈ kʼaˆ-eu aˇ lawˇ doˆ le-eu meh.

⁶Naw maꞈ-euˬ aˬ oˬ loˬ ma aˇ kahˇ kʼoeˇ saˬ nmˇ maˬ zaꞈ nya-a. Yawˬ ha neh mˇ-euˬ jeˬ yawˬ ha-ahˇ maˬ sheu lahˇ nya-a. Naw maꞈ gaˇ kawˆ yaw haiˬ tehꞈ-ehˇ jaˆ-awˇ, naw maꞈ-euˬ aˬ laꞈ-ahˇ yaw cawˆ jeˬ tuˆ tehˬ taˬ-euˬ meh.

⁷Aˬ myah luꞈ yaw haiˬ jeˬ-ahˇ naw maꞈ shaˇ noeˬ-awˇ, yaw doeˇ maˬ mˇ-ehˇ yawˬ jawˇ maˬ saˇ-a. Tsawˇ muiˬ-ahˇ sehꞈ-eu maˬ nyi naˬ coeˇ-ehˇ, naw maꞈ kʼaˇ iˇ gaˇ yaw cawˆ jeˬ doˆ laˇ-eu meh.

⁸Naw maꞈ dawˬ peh tiˬ gʼaˬ-iˬ nui saˇ maˬ oꞈ-a. Naw maꞈ mˇ-euˬ yaw tsaˬ tiˬ jeˬ-iˬ maˬ jaˆ-a. Gaˇ ma yaw gʼahˬ kahˇ-ahˇ naw maꞈ cah-awˇ, kʼoeˇ gaˇ kʼaˇ cah-eu tsawˇ haˬ nui saˇ maˬ oꞈ-a.

⁹Iˇsaˬleˬlaˆ tsawˇ haˬ deuˬ heu loꞈ-ehˇ ehˇ-eu meh. “Nga maꞈ-ahˇ kʼehˬ luꞈ-eu deuˬ-euˬ aˬ laꞈ laꞈ kʼoeˇ, aˬ jeˬ miˇ neh Miˬyehˇ maˬ ka kʼoꞈ nehˬ laꞈ-eu gaˇ kawˆ, nymˬ-mˇ nga maꞈ siˬ duˬ-eu ma. Yaw shehꞈ laꞈ kʼoeˇ nga maꞈ cah mawꞈ-eu kʼawꞈ, yaw zahˇ nga maꞈ-ahˇ uˆ lahˇ luꞈ-eu meh.

¹⁰Myaˆ behꞈ loꞈ-ehˇ nga maꞈ laꞈ sawˆ sawˆ-awˇ cah luꞈ-eu ma. Nah gʼahˇ paw kʼawꞈ uˬ ciꞈ loꞈ-ehˇ sahˬ tiꞈ tiꞈ-awˇ, zahˇ tsui ni gʼeh-eu shiˇ-eu miˇ kʼahˬ-ahˇ cah luꞈ gaˇ duˇ miˇ-a.

¹¹Nga maꞈ guˆ-awˇ nui ma cawˆ luꞈ-eu ma. Kʼehˬ-eu kʼaˆ-eu jeˬ hawˇ-eu yaw lehˬ jeˬ laꞈ kʼoeˇ, Miˬyehˇ ka kʼoꞈ le gaˇ loꞈ kʼawꞈ, keuˆ le-eu maˬ baw-a.

¹²“Sahˬpaˬ Miˬyehˇ nawˬ-ahˇ nga maꞈ mˇ lehˬ dui dui-euˬ ma. Nga maꞈ mˇ-euˬ iˬ baˇ nga maꞈ-ahˇ ceh laˇ-awˇ, yawˬ ha iˬ baˇ ahˇ-eu yawˬ ha siˬ duˬ-eu ma.

¹³Nawˬ-ahˇ nga maꞈ puiˬ-awˇ byehˇ dzeh yaꞈ-euˬ laꞈ kʼoeˇ, nawˬ-euˬ mehˬ nah maˬ caw teh ni dehꞈ laꞈ-euˬ ma. Aˬ cawˬ-ahˇ nga maꞈ nawˬ dzaˬ kʼaˆ dzaˬ-awˇ, nawˬ-ahˇ nga maꞈ byehˇ dzeh-euˬ ma. Nga maꞈ nui noeˬ noeˬ-euˬ bahˬ-awˇ, nga maꞈ-euˬ dawˬ jaˬ myawꞈ mehˇ shuiˇ tehꞈ ma.

¹⁴Yaw tsaˬ yaw dawˇ jeˬ-ahˇ teh dzeh nehˬ-awˇ, yaw muiˬ yaw jaˬ jeˬ dawˬ peh maˬ nyiˬ laˇ nya-a. Yaw tsaˬ yaw dawˇ jeˬ meuˬ lehˆ kawˆ-ahˇ coˬ-iˇ-awˇ, yaw sui yaw dawˇ jeˬ jawˇ duˬ maˬ jaˆ-a.

¹⁵Yaw sui yaw dawˇ jeˬ maˬ jaˆ-eu miˇ neh, yaw haiˬ jeˬ maˬ mˇ-ehˇ byehˇ dzeh-eu deuˬ, aˬ cawˬ kʼehˬ duˬ pyeuꞈ-iˇ-eu meh.” Yaw tsaˬ yaw dawˇ jeˬ maˬ jaˆ gaˇ Sahˬpaˬ Miˬyehˇ mawˇ-awˇ, nui ma tiˬ pawꞈ-iˬ maˬ saˇ-a.

¹⁶Kʼehˬ nehˬ kʼaˆ nehˬ gaˇ ya daˬ-euˬ tsawˇ haˬ deuˬ-ahˇ, caw ba nehˬ-eu gʼaˬ maˬ jawˇ gaˇ aˬ yawꞈ zahˬ leˇ-eu meh. Kʼoeˇ miˇ neh aˬ yawꞈ-euˬ baoˬ zmˬ-awˇ, aˬ yawꞈ maꞈ-ahˇ ka kʼoꞈ nehˬ-eu laꞈ kʼoeˇ, yaw tsaˬ yaw dawˇ jeˬ neh laˆ gʼaˬ tehꞈ-a.

¹⁷Shmˇ mehˬ tsoeˬ dm kaˬ-eu loꞈ-ehˇ, yaw tsaˬ yaw dawˇ jeˬ aˬ yawꞈ dm gʼoeˬ-awˇ, ka kʼoꞈ-eu uˬ kʼoˆ kʼoˆ tehꞈ-a. Laꞈ poˆ poˆ-eu pehˇ kʼahˬ aˬ yawꞈ dm-awˇ, nui ma pehˇ-eu pehˇ kʼahˬ pehˇ ma dm daˆ tehꞈ-a.

¹⁸Aˬ yawꞈ maꞈ neh kʼaˇ mˇ-euˬ jeˬ aˬ yawꞈ mˇ kʼoꞈ tehꞈ-a. Muiˇ-eu deuˬ-ahˇ aˬ yawꞈ-euˬ nui ma bi mawˇ-awˇ, puiˬ-eu deuˬ-ahˇ yaw doeˇ jahˇ kʼoꞈ tehꞈ-a. Gaˇ mahˇ kaˬ gaˇ jawˇ-eu deuˬ kʼawꞈ maˬ dzeuˇ-iˇ-a.

¹⁹Aˬ yawꞈ-euˬ baoˬ hawˇ-eu aˬ yawꞈ-euˬ tsawˇ myahˇ-ahˇ, nahˇ ma doˆ kʼehˬ ga kʼehˬ doˆ ni yawˬ gʼaˬ na luꞈ ya guˆ tehꞈ-a. Iˇ jeuˬ jeuˬ-awˇ jaˬ lehˇ lehˇ ma baw-eu loꞈ-ehˇ, aˬ yawꞈ oe gaˇ ya mawˇ tehꞈ-a.

²⁰Sahˬpaˬ Miˬyehˇ aˬ yawꞈ-euˬ tsawˇ haˬ-ahˇ ehˇ-eu, “Naw maꞈ-ahˇ ngehˬ gʼeh-eu gʼaˇ duˬ hawˇ-eu, iˬ baˇ kʼaˇ noeˬ poˆ-eu tsawˇ haˬ dawˬ tawˆ luꞈ-ahˇ, ka kʼoꞈ-eu gʼaˇ duˬ ngaˇ oe ma.

²¹Kʼoeˇ naˇ, naw maꞈ nehˬ-ehˇ ngaˇ dawˬ ma saˇ jaˇ dzaˬ ma. Mˬ maˬ maˬ byaˆ zaˇ ziˇ naw maꞈ bi geuꞈ tsehˆ-eu gʼaˇ duˬ, ngaˬ-euˬ baoˬ hawˇ-eu ngaˬ-euˬ dawˬ deuˬ, naw maꞈ-ahˇ ngaˇ biꞈ gʼaˬ-euˬ ma. Nymˬ-mˇ neh aˇ dahˬ beh-awˇ ngaˬ-euˬ dawˬ-ahˇ naw maꞈ ya naˇ haˬ geuꞈ-awˇ, naw maꞈ-euˬ zaˬ hawˇ-eu oeˬ paˬ oeˬ ma deuˬ-ahˇ kʼawꞈ, mˬ maˬ maˬ byaˆ zaˇ ziˇ jiˇ ni ya mehˬ daˆ leꞈ meh.”