Read Akha Iˇsaˬyaˇ 60 Bible Online

Iˇsaˬyaˇ 60 - Akha bible

Iˇsaˬyaˇ 60

¹Yeˬluˇsaˬlehˬ meuˬ-oˇ, tuˇ-awˬ. Nawˬ-euˬ yaw shehꞈ keuˆ le-euˬ meh. Sahˬpaˬ Miˬyehˇ-euˬ yaw shehꞈ kʼahˬ sehˇ, nawˬ-euˬ kʼoeˇ taˆ doˆ laˇ luꞈ meh.

²Tsawˇ jeuˬ nui deuˬ yaw zahˇ bi pymˬ tehˬ kʼawꞈ, nawˬ-euˬ kʼoeˇ taˆ Sahˬpaˬ Miˬyehˇ-euˬ yaw shehꞈ bya le-awˇ, aˬ yawꞈ yaw shehꞈ kʼahˬ sehˇ nawˬ nehˬ-ehˇ jawˇ tehꞈ-a.

³Miˇ tsaˬ tsawˇ jeuˬ dawˬ tawˆ nawˬ-euˬ yaw shehꞈ jaˆ gaˇ laˇ-awˇ, miˇ tsaˬ sahˬ paˬ dawˬ tawˆ luꞈ kʼawꞈ, nawˬ-euˬ yaw shehꞈ uˬ bya bya le gaˇ laˇ tehꞈ-a.

⁴Nawˬ-euˬ tiˬ jawˬ myaˆ nuiˆ byeh-awˇ haw-awˬ. Nawˬ-euˬ tsawˇ haˬ gʼoꞈ laˇ-eu lehˇ uiˬ leˇ luꞈ meh. Gaˇ mahˇ jawˇ-eu nawˬ li deuˬ gʼoꞈ doˆ laˇ-awˇ, nawˬ buˇ deuˬ-ahˇ aˬ cawˬ ciˬ kʼoꞈ ha laˇ tehꞈ-a.

⁵Kʼoeˇ gaˇ mawˇ ngeh nawˇ laˬ kʼaˬ aˇ dzehˬ cehˇ dzeuˇ-awˇ, nui ma cehˇ tahˬ ya tahˬ tehꞈ-a. Miˇ kʼahˬ pyuˇ shuiˇ myawˬ gahˬ nawˬ-ahˇ sha ha laˇ-awˇ, laˆ shaˆ nui baˬ pyuˇ shuiˇ nawˬ-euˬ laꞈ-ahˇ ahˇ le tehꞈ-a.

⁶Miˇdiˬyaˬ miˇ kʼahˬ hawˇ-eu Eˇpaˬ miˇ kʼahˬ-ahˇ neh, myawˬ tawˬ luꞈ-eu law taw baꞈ maꞈ nawˇ jawˇ gaˇ oe tehꞈ-a. Sheˬba miˇ kʼahˬ-ahˇ neh aˬ yawꞈ maꞈ doˆ laˇ-awˇ, shuiˇ hawˇ-eu tsiˇ yaw saw tawˬ laꞈ tehꞈ-a. Sahˬpaˬ Miˬyehˇ-euˬ guiˬ lahˬ-ahˇ, miˇ kʼahˬ zaˬ deuˬ ja byah tehꞈ-a.

⁷Geˬdaˬ meuˬ hawˇ-eu Neˬbaˬyoˇ meuˬ-ahˇ kʼaˇ jawˇ-eu yawˇ deuˬ, lawˇ-eu shehˇ-eu gʼaˇ duˬ nawˇ jawˇ gaˇ teh keuˆ laꞈ jiˇ-awˇ, lawˇ duˬ kʼoeˇ taˆ Sahˬpaˬ Miˬyehˇ-ahˇ ya lawˇ nehˬ tehꞈ-a. Sahˬpaˬ Miˬyehˇ aˬ yawꞈ-euˬ Uˬ duˬ tahˬ nymˇ nymˇ ma-ahˇ, dzeuˇ laˇ ngeh naˆ maˬ tseˇ yaw shehꞈ kʼahˬ sehˇ bi huiˬ tehꞈ-a.

⁸Mˬ dmˇ loꞈ-ehˇ zaw gaˇ duˇ-awˇ, yaˇ miˇ kʼaˬ kʼoeˬ nymˇ-ahˇ gʼoꞈ uˇ leˇ gaˇ duˇ-eu, saˇ baoˬ kʼoeˇ deuˬ aˬ gaˇ-euˬ saˇ baoˬ-a.

⁹Sahˬpaˬ Miˬyehˇ-euˬ tsawˇ haˬ sheuˬ kʼoꞈ ha laˇ-eu gʼaˇ duˬ, gaˇ mahˇ kaˬ gaˇ neh oe-euˬ saˇ baoˬ meh. Tsawˇ jeuˬ dawˬ tawˆ luꞈ aˬ yawꞈ-euˬ tsawˇ jeuˬ-ahˇ taˬ huiˬ ni jahˇ-euˬ, Iˇsaˬleˬlaˆ-euˬ muiˬ-eu shawˇ-eu Miˬyehˇ pyeuꞈ-eu, Sahˬpaˬ Miˬyehˇ-euˬ tsawˇ myahˇ-ahˇ taˬ huiˬ taˬ mahˇ nehˬ-eu gʼaˇ duˬ, pyuˇ hawˇ-eu shuiˇ deuˬ aˬ yawꞈ maꞈ yuˇ laꞈ-euˬ meh.

¹⁰Yeˬluˇsaˬlehˬ-ahˇ Sahˬpaˬ Miˬyehˇ ehˇ-eu, “Boeˇ miˬ siˬ kʼaˬ deuˬ nawˬ-euˬ meuˬ lahˇ gawˬ muiˬ-awˇ, aˬ yawꞈ maꞈ-euˬ sahˬ paˬ deuˬ nawˬ-ahˇ ya mˇ cu tehꞈ-a. Nui ma pehˇ-eu laꞈ kʼoeˇ nawˬ-ahˇ ngaˇ kʼehˬ-euˬ kʼawꞈ, nawˬ-euˬ myaˆ pyawˬ-ahˇ ngaˇ haw-awˇ gʼawˬ shaˬ gaˬ ma.

¹¹Miˇ kʼahˬ sahˬ paˬ deuˬ pyuˇ shuiˇ myawˬ gahˬ sha ha le nya ni, uˬ ciꞈ nah gʼahˇ maˬ ehˇ nawˬ-euˬ meuˬ lahˇ laˇ gʼoˆ pah dzeh taˬ ma.

¹²Ehˇ kʼawꞈ, nawˬ-ahˇ maˬ mˇ cu-eu tsawˇ jeuˬ piˬ-iˇ byoˆ-iˇ tehꞈ-a.

¹³“Yeˬluˇsaˬlehˬ meuˬ-oˇ, nawˬ-ahˇ paˇ tsoˆ muiˬ-awˇ, ngaˬ-euˬ Uˬ duˬ tahˬ nymˇ nymˇ ma paˇ tsoˆ muiˬ-eu laꞈ kʼoeˇ, ngaˬ-euˬ meuˬ heu yaw shehꞈ kʼahˬ sehˇ bi doˆ laˇ-eu gʼaˇ duˬ, Leˬbaˬnoˬ sahˬ kʼaˆ-ahˇ jaˆ-eu muiˬ dui dui-eu daˇ kawˬ pyeuꞈ-eu, miˬ shuˬ, juˬ ni paˬ hawˇ-eu guˇ baˬ luˇ aˇ bawˇ deuˬ-ahˇ, nawˇ jawˇ gaˇ hehˇ keuˆ laꞈ tehꞈ-a.

¹⁴Nawˬ-ahˇ kʼehˬ-euˬ tsawˇ haˬ deuˬ-euˬ aˬ li deuˬ laˇ keuˆ-awˇ, awˆ byaˆ-awˇ nawˬ-ahˇ yaw zeu baw tehꞈ-a. Yaw beh nawˬ-ahˇ yehˬ bawˬ-ehˇ gʼeh-euˬ deuˬ, nawˬ-euˬ aˬ kuiˇ dawˬ peh uˬ duˬ tahˬ laˇ tehꞈ-a. Aˬ yawꞈ maꞈ nawˬ-ahˇ Sahˬpaˬ Miˬyehˇ-euˬ meuˬ lehˇ kuˇ-awˇ, Iˇsaˬleˬlaˆ-euˬ muiˬ-eu shawˇ-eu Miˬyehˇ-euˬ meuˬ lehˇ kuˇ tehꞈ-a.

¹⁵“Nawˬ-ahˇ bye-awˇ byehˇ dzeh-euˬ kʼawꞈ, meuˬ tsoeˬ bi tsoeˬ-iˇ-awˇ ciˬ cuˇ ni jaˆ-euˬ kʼawꞈ, tsawˇ myahˇ huiˬ-awˇ muiˬ dui dui-eu meuˬ paˇ bi pyeuꞈ laˇ-awˇ, tseˇ ziˇ zaˇ ziˇ laˬ kʼaˬ cehˇ-eu jawˇ duˬ bi pyeuꞈ laˇ ma.

¹⁶Aˬ ma zaˬ-ahˇ bo saˆ huiˬ-euˬ loꞈ-ehˇ, miˇ kʼahˬ tsawˇ jeuˬ hawˇ-eu sahˬ paˬ deuˬ nawˬ-ahˇ ya mˇ cu tehꞈ-a. Sahˬpaˬ Miˬyehˇ pyeuꞈ-eu ngaˇ nawˬ-ahˇ ka kʼoꞈ-awˇ, Iˇsaˬleˬlaˆ-euˬ baoˬ huiˬ-eu Miˬyehˇ nawˬ-ahˇ puiˇ pyehˬ nehˬ-euˬ gaˇ kawˆ, nawˇ ya siˬ duˬ tehꞈ-a.

¹⁷“Guiˬ shuiˇ dah zaˇ nawˬ-ahˇ ngaˇ shuiˇ yuˇ laꞈ nehˬ-awˇ, shmˇ hawˇ-eu daˇ kawˬ-euˬ dah zaˇ, pyuˇ hawˇ-eu guiˬ shuiˇ yuˇ laꞈ-awˇ, kʼaˬ lo-euˬ dah zaˇ shmˇ yuˇ laꞈ nehˬ ma. Nawˬ-ahˇ uˆ lahˇ-eu deuˬ nawˬ-ahˇ maˬ paˇ kʼehˬ ni, yaw tsaˬ yaw dawˇ hawˇ-eu tsaˬ leˇ tsahˇ leˇ-eu jeˬ laꞈ kʼoeˇ, nawˬ-euˬ kʼoeˇ taˆ uˆ lahˇ ni ngaˇ jahˇ ma.

¹⁸Haiˬ-eu gaˇ kawˆ maˬ paˇ ya gaˬ haw-ehˇ, nawˬ-euˬ miˇ kʼahˬ-ahˇ laˆ cawˆ-eu jeˬ maˬ paˇ keuˆ le meh. Meuˬ lahˇ gawˬ-euˬ loꞈ-ehˇ nawˬ-ahˇ ngaˇ haw piˇ-awˇ, nawˬ-ahˇ ngaˇ ka kʼoꞈ-eu miˇ neh, ngaˬ-ahˇ nawˇ ya ja ceuˬ-euˬ tehꞈ-a.

¹⁹“Nah gʼahˇ paw nahˇ ma yaw shehꞈ-ahˇ nawˇ maˬ paˇ ya gʼoe-ehˇ, uˬ ciꞈ paw ba la yaw shehꞈ-ahˇ nawˇ maˬ paˇ ya gʼoe meh. Sahˬpaˬ Miˬyehˇ pyeuꞈ-eu ngaˇ-aˬ, mˬ maˬ maˬ byaˆ zaˇ ziˇ nawˬ-euˬ yaw shehꞈ pyeuꞈ ma. Ngaˬ-euˬ yaw shehꞈ kʼahˬ sehˇ nawˬ-euˬ kʼoeˇ taˆ bya ma.

²⁰Shaˬ zahˬ naꞈ-eu nawˬ-euˬ aˇ nah aˇ yamˬ dzeuˇ-awˇ, Sahˬpaˬ Miˬyehˇ pyeuꞈ-eu ngaˇ-aˬ, mˬ maˬ maˬ byaˆ zaˇ ziˇ nawˬ-euˬ yaw shehꞈ pyeuꞈ-awˇ, nahˇ ma hawˇ-eu ba la maˬ tseˇ gmˬ ma.

²¹Nawˬ-euˬ tsawˇ haˬ dawˬ tawˆ yaw tsaˬ yaw dawˇ jeˬ-ahˇ mˇ-awˇ, mˬ maˬ maˬ byaˆ zaˇ ziˇ miˇ kʼahˬ heu za tehꞈ-a. Ngaˬ-euˬ yaw shehꞈ kʼahˬ sehˇ bi doˆ laˇ-eu gʼaˇ duˬ, aˬ yawꞈ maꞈ-ahˇ ngaˬ neh ka-awˇ, ngaˬ neh mˇ taˬ-euˬ kuiˇ zaˇ laꞈ zaˇ pyeuꞈ-eu ma.

²²Teˬ dui nyiˇ dui dui-eu nawˬ-euˬ nymˇ jiˇ tiˬ nymˇ keuˆ ni, huiˬ dui dui-eu tsawˇ jeuˬ tiˬ jeuˬ loꞈ-ehˇ pyeuꞈ laˇ tehꞈ-a. Aˇ yamˬ tsaˬ laˇ ngeh jawˇ, kʼoeˇ loꞈ-ehˇ yaw kawˇ-ehˇ bi pyeuꞈ laˇ ma. Ngaˇ Sahˬpaˬ Miˬyehˇ ma.”