Read Akha Iˇsaˬyaˇ 63 Bible Online

Iˇsaˬyaˇ 63 - Akha bible

Iˇsaˬyaˇ 63

¹“Eˬdoˬ miˇ kʼahˬ Bawˇzaˬlahˬ meuˬ-ahˇ neh oe-euˬ, tsawˇ haˬ kʼoeˇ gʼaˬ aˬ suˇ gʼaˬ-a. Yaw shehꞈ kʼahˬ sehˇ huiˬ-eu mehˬ tsoeˬ paˇ neˇ dm-awˇ, baoˬ hawˇ-eu gʼaˬ huiˬ dui dui-eu laꞈ kʼoeˇ, mehˬ hu paw oe luꞈ-eu kʼoeˇ gʼaˬ aˬ suˇ gʼaˬ-a. Kʼoeˇ-aˬ, ka kʼoꞈ-eu baoˬ ahˇ-eu Sahˬpaˬ Miˬyehˇ pyeuꞈ-awˇ, aˬ yawꞈ gʼaˬ leˇ-eu gaˇ kawˆ ja gaˬ-eu lehˇ oe-eu meh.”

²“Aˬ gaꞈ dzaˇ uiˇ jahˇ-eu gʼaˇ duˬ, aˬ gaꞈ aˇ siˬ nawˬ pyehˆ-eu deuˬ loꞈ-ehˇ, aˬ jeˬ miˇ neh aˬ yawꞈ dm-eu mehˬ tsoeˬ yaw neˇ neˇ ta.”

³Sahˬpaˬ Miˬyehˇ ehˇ kʼoꞈ-eu dawˬ heu loꞈ-ehˇ meh. “Miˇ kʼahˬ tsawˇ jeuˬ heu myaˆ ni-ahˇ, aˬ gaꞈ aˇ siˬ nawˬ-eu loꞈ-ehˇ, ngaˇ tiˬ gʼaˬ tehꞈ-ehˇ nawˬ-euˬ ma. Aˬ yawꞈ maꞈ-ahˇ nui ma pehˇ-awˇ nawˬ-euˬ miˇ neh, aˬ yawꞈ maꞈ-euˬ shiˬ teuˆ lehꞈ-awˇ, ngaˬ-euˬ mehˬ tsoeˬ neˇ tseuˆ ni gʼeh-eu meh.

⁴Ngaˬ-euˬ tsawˇ haˬ deuˬ-ahˇ ka kʼoꞈ nehˬ-eu, aˇ yamˬ keuˆ laˇ-euˬ ngaˇ noeˬ tsehˆ-eu ma. Aˬ yawꞈ maꞈ-ahˇ muiˇ-eu deuˬ-ahˇ kʼehˬ-eu aˇ yamˬ tsaˬ laˇ-euˬ meh.

⁵Ngaˬ-ahˇ caw ba le-eu tsawˇ haˬ maˬ jawˇ-eu siˬ laˇ ngeh, zahˬ leˇ dui dui-euˬ ma. Ehˇ kʼawꞈ, nui pehˇ baˬ da gʼaˬ ahˇ laˇ-awˇ, ngaˇ tehꞈ-ehˇ kʼawꞈ gʼaˬ leˇ-euˬ ma.

⁶Nui ma pehˇ dui dui-eu miˇ neh, tsawˇ jeuˬ dawˬ tawˆ luꞈ-ahˇ nawˬ pyehˆ nehˬ-awˇ, aˬ yawꞈ maꞈ-euˬ saꞈ laˇ-euˬ shiˬ, miˇ tsaˬ-ahˇ bi yoeˇ kʼaˇ-euˬ ma.”

⁷Sahˬpaˬ Miˬyehˇ-euˬ gʼoeˇ-eu gaˬ-eu jeˬ, maˬ poˆ maˬ paˇ laˇ-eu gaˇ kawˆ ngaˇ ja gaˬ ma. Aˬ dui kʼoeˇ taˆ aˬ yawꞈ neh kʼaˇ mˇ taˬ-euˬ jeˬ gʼaˇ duˬ, aˬ yawꞈ-euˬ guiˬ lahˬ-ahˇ ngaˇ ja ceuˬ ma. Aˬ yawꞈ-euˬ gʼawˬ shaˬ gaˬ-eu jeˬ hawˇ-eu, maˬ tsehˆ leˇ nya-eu gʼoeˇ-eu gaˬ-eu jeˬ baˬ da, aˬ yawꞈ-euˬ Iˇsaˬleˬlaˆ tsawˇ jeuˬ-ahˇ, muiˬ-eu guiˬ lahˬ tiˬ byah biꞈ nehˬ-euˬ meh.

⁸Sahˬpaˬ Miˬyehˇ ehˇ-eu, “Aˬ yawꞈ maꞈ ngaˬ-euˬ tsawˇ jeuˬ ma. ngaˬ-ahˇ jaˬ myawꞈ maˬ myawꞈ-aˇ” lehˇ ehˇ-awˇ, aˬ yawꞈ maꞈ-ahˇ ka kʼoꞈ-euˬ meh.

⁹Aˬ yawꞈ maꞈ ya daˬ-eu shaˬ zahˬ dawˬ tawˆ laꞈ kʼoeˇ, aˬ yawꞈ maꞈ-ahˇ aˬ yawꞈ ka kʼoꞈ-euˬ meh. Mˬ taˆ gʼaˬ kʼehˇ aˬ yawꞈ maꞈ-ahˇ ka kʼoꞈ-euˬ maˬ ngeuˇ-a. Sahˬpaˬ Miˬyehˇ mawˇ do oe-awˇ ka kʼoꞈ-euˬ meh. Aˬ yawꞈ maꞈ-ahˇ aˬ yawꞈ maˬ haw ni byehˇ dzeh-euˬ, tiˬ jawˇ-iˬ maˬ jaˆ-a.

¹⁰Ehˇ kʼawꞈ, aˬ yawꞈ maꞈ aˬ yawꞈ-ahˇ puiˬ-awˇ, aˬ yawꞈ-euˬ muiˬ-eu shawˇ-eu yaw sahˇ-ahˇ, nui ma shaˬ zahˬ bi mˇ-euˬ meh. Kʼoeˇ baˬ da neh aˬ yawꞈ maꞈ-ahˇ, Sahˬpaˬ Miˬyehˇ muiˇ-awˇ guiˇ deuˆ-euˬ meh.

¹¹Kʼoeˇ naˇ, aˇ hu ba-euˬ aˇ nah aˇ yamˬ pyeuꞈ-eu, Sahˬpaˬ Miˬyehˇ zaˬ kʼaˆ Moˇseˬ-euˬ ziˇ-ahˇ noeˬ keuˆ-awˇ, aˬ yawꞈ maꞈ heu loꞈ-ehˇ ehˇ-eu meh. “Aˬ yawꞈ tsawˇ haˬ aˬ yuiꞈ aˬ tsu deuˬ-ahˇ, iˬ ma laˆ shaˆ laꞈ kʼoeˇ ka kʼoꞈ nehˬ-eu, Sahˬpaˬ Miˬyehˇ kʼoeˇ gʼaˬ nymˬ-mˇ aˬ gaˇ jawˇ ta. Aˬ yawꞈ-euˬ muiˬ-eu shawˇ-eu yaw sahˇ-ahˇ, Moˇseˬ kʼoeˇ taˆ bi keuˆ le-euˬ Sahˬpaˬ Miˬyehˇ kʼoeˇ gʼaˬ, aˬ geu paw iˇ-euˬ ta.

¹²Aˬ yawꞈ-euˬ baoˬ zmˬ-awˇ Moˇseˬ-ahˇ gʼoe-eu laꞈ kʼoeˇ, mˬ maˬ maˬ byaˆ zaˇ ziˇ aˬ yawꞈ tsawˇ myahˇ doˆ ni, aˬ yawꞈ maꞈ-euˬ mehˬ shi laˆ shaˆ iˇ cuꞈ dehˬ paˆ doˆ-euˬ, Sahˬpaˬ Miˬyehˇ aˬ gaˇ jawˇ ta.

¹³Laˆ shaˆ yaw naꞈ aˬ yawꞈ maꞈ tsehˆ doˆ ngeh, Sahˬpaˬ Miˬyehˇ sheuˬ gʼeh nehˬ-eu miˇ neh, deh ga yaw juiˇ-ahˇ cah-eu mahˬ loꞈ-ehˇ, aˬ yawꞈ maꞈ sahˬ tiꞈ maˬ tiꞈ-a.

¹⁴Deh kʼahˬ-ahˇ jeˬ zaˬ teh uiˬ-euˬ loꞈ-ehˇ, aˬ yawꞈ-euˬ tsawˇ haˬ-ahˇ Sahˬpaˬ Miˬyehˇ gʼaˬ naˬ bi naˬ-euˬ meh. Aˬ yawꞈ-euˬ yaw shehꞈ kʼahˬ sehˇ doˆ laˇ ni, aˬ yawꞈ-euˬ tsawˇ haˬ-ahˇ aˬ yawꞈ sheuˬ gʼeh-euˬ meh.

¹⁵Mˬ taˆ jaˆ-awˇ yaw shehꞈ kʼahˬ sehˇ huiˬ-eu, muiˬ-eu shawˇ-eu nawˬ-euˬ nuiˇ duˬ kʼoeˇ taˆ nuiˇ-awˇ, nga maꞈ kʼoeˇ taˆ haw ka leꞈ-awˬ. Nawˇ nga maꞈ-ahˇ gʼawˬ shaˬ gaˬ-eu aˬ gaˇ jaˆ te. Nawˬ-euˬ baoˬ aˬ geu gaˇ jaˆ te. Nawˬ-eu gʼoeˇ-eu gaˬ-eu jeˬ aˬ geu tsahˇ jaˆ te. Nga maꞈ-ahˇ taˬ byehˇ dzeh nehˬ laꞈ.

¹⁶Sahˬpaˬ Miˬyehˇ nawˇ nga maꞈ-euˬ aˬ da ma. Nga maꞈ-euˬ aˬ da yaw dzahˇ Aˬbyaˬhaˬ hawˇ-eu Yaˬkoˆ, nga maꞈ-ahˇ maˬ siˬ nya-euˬ kʼawꞈ, nawˇ nga maꞈ-euˬ aˬ da pyeuꞈ-awˇ, nga maꞈ-ahˇ aˬ myah luꞈ ka kʼoꞈ-euˬ meh.

¹⁷Aˬ jeˬ miˇ neh nawˇ nga maꞈ-ahˇ, nawˬ-euˬ gaˇ ma-ahˇ bi cah gʼawˬ laꞈ te. Aˬ jeˬ miˇ neh nga maꞈ nawˬ-ahˇ byehˇ ni, nga maꞈ-ahˇ nui ma bi gʼahˇ te. Nawˬ-euˬ gaˇ mˇ-eu deuˬ-euˬ myaˆ pyawˬ-ahˇ haw-awˇ, nawˬ-euˬ tsawˇ jeuˬ pyeuꞈ-eu tsawˇ haˬ deuˬ-ahˇ haw-awˇ, nga maꞈ jawˇ gaˇ gʼoꞈ kʼoꞈ le-awˬ.

¹⁸Muiˬ-eu shawˇ-eu nawˬ-euˬ tsawˇ haˬ pyeuꞈ-eu nga maꞈ, muiˇ-eu deuˬ neh tiˬ kʼehˬ tiˬ yamˬ bi teh doˆ-awˇ, nawˬ-euˬ muiˬ-eu shawˇ-eu jawˇ duˬ kʼoeˇ-ahˇ, aˬ yawꞈ maꞈ tsawˬ nawˬ nawˬ-euˬ meh.

¹⁹Nawˇ nga maꞈ-ahˇ maˬ uˆ lahˇ haw-euˬ loꞈ-ehˇ, nga maꞈ nawˬ-euˬ tsawˇ haˬ maˬ pyeuꞈ haw-euˬ loꞈ-ehˇ, nawˬ neh nga maꞈ-ahˇ jahˇ nehˬ laꞈ-euˬ meh.