Read Akha Iˇsaˬyaˇ 7 Bible Online

Iˇsaˬyaˇ 7 - Akha bible

Iˇsaˬyaˇ 7

¹Yoˇdaˬ-euˬ aˬ li pyeuꞈ-awˇ, Awˇziˇ-euˬ oeˬ paˬ pyeuꞈ-eu sahˬ paˬ Aˬkaˆ Yuˇdaˆ miˇ kʼahˬ-ahˇ uˆ lahˇ ngeh, Suˇliˆ sahˬ paˬ Leˬzeˬ hawˇ-eu, Iˇsaˬleˬlaˆ sahˬ paˬ pyeuꞈ-eu Leˬmaˬliˇ-euˬ aˬ li Peˬkah aˬ nyaꞈ Yeˬluˇsaˬlehˬ meuˬ-ahˇ guiˇ deuˆ le-euˬ meh. Ehˇ kʼawꞈ, maˬ deuˆ gʼaˬ nya-a.

²Suˇliˆ guiˇ maꞈ deuˬ Iˇsaˬleˬlaˆ miˇ kʼahˬ-ahˇ oe uiˬ taˬ-euˬ gaˇ kawˆ Yuˇdaˆ sahˬ paˬ ya gaˬ ngeh, aˬ yawꞈ hawˇ-eu aˬ yawꞈ-euˬ tsawˇ haˬ deuˬ dawˬ tawˆ luꞈ guˆ dui dui-iˇ-awˇ, jaˬ lehˇ neh bi baw nyeh-euˬ aˇ bawˇ loꞈ-ehˇ yaw dzuˬ dzuˬ dui dui-euˬ meh.

³Iˇsaˬyaˇ-ahˇ Sahˬpaˬ Miˬyehˇ ehˇ nehˬ-eu, “Nawˬ li Shaˬyaˬshuˇbaˬ-ahˇ sheuˬ-awˇ, sahˬ paˬ Aˬkaˆ-ahˇ tahˬ puˬ leˇ-awˬ. Iˇ cuꞈ lah laꞈ taˆ lah-ahˇ neh caˬ leꞈ-eu uiˇ kʼehˬ-euˬ mehˬ dzaˬ-ahˇ jaˆ-eu, shaˬ nmˇ shaˬ paˇ mˇ duˬ-ahˇ iˇ-eu gaˇ ma kʼoeˇ taˆ, aˬ yawꞈ-ahˇ naw nyaꞈ ya tahˬ puˬ tehꞈ-a.

⁴Nui noeˬ yaw beuˇ beuˇ-ehˇ jawˇ-awˇ, nui ma coꞈ ngehˇ ni taˬ-eu laꞈ kʼoeˇ, aˇ dzehˬ-ehˇ maˬ guˆ-ehˇ maˬ noeˬ shaˬ ni jawˇ-awˬ lehˇ ehˇ nehˬ-awˬ. Suˇliˆ sahˬ paˬ Leˬzeˬ hawˇ-eu Leˬmaˬliˇ-euˬ aˬ li sahˬ paˬ Peˬkah aˬ nyaꞈ-euˬ nui pehˇ-aˬ, miˬ dzaˬ doꞈ miˆ-euˬ kawˬ pyaˇ-ahˇ uˬ kʼoeˬ du-eu loˆ ni tehꞈ meh.

⁵Iˇsaˬleˬlaˆ tsawˇ haˬ deuˬ neh Suˇliˆ tsawˇ jeuˬ nehˬ-ehˇ mehˬ bawˬ mˇ kʼoeˬ taˬ-euˬ jaˆ-eu meh.

⁶Yuˇdaˆ miˇ kʼahˬ-ahˇ aˬ yawꞈ maꞈ uˇ le-awˇ, miˇ kʼahˬ zaˬ deuˬ aˬ yawꞈ maꞈ jawˇ paw pyawˬ ni guˆ tsiˬ nyehꞈ-awˇ, Taˬbeˬlaˇ-euˬ aˬ li-ahˇ sahˬ paˬ ka nehˬ-eu lehˇ lehˬ hmˬ taˬ-euˬ meh lehˇ ehˇ nehˬ-awˬ.

⁷“Ehˇ kʼawꞈ, kʼoeˇ loꞈ-ehˇ maˬ laˆ pyeuꞈ nya-aˇ lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.

⁸Suˇliˆ miˇ kʼahˬ kʼawꞈ, aˬ yawꞈ maꞈ-euˬ meuˬ meuˬ ma pyeuꞈ-eu Daˬmaˬsehˇ meuˬ taꞈ-ehˇ maˬ paˇ kʼaˆ dzehˬ-ehˇ, Daˬmaˬsehˇ meuˬ kʼawꞈ, sahˬ paˬ Leˬzeˬ aˬ yawꞈ-eu mawˇ do taꞈ-ehˇ maˬ paˇ kʼaˆ dzehˬ-aˇ. Iˇsaˬleˬlaˆ miˇ kʼahˬ-aˬ, mehˬ hu paw koꞈ tseˇ ngaˬ kʼoꞈ laꞈ kʼoeˇ, miˇ kʼahˬ tiˬ kʼahˬ maˬ paˇ pyeuꞈ ni pyaˆ-iˇ shaˆ-iˇ jiˇ tehꞈ-a.

⁹Iˇsaˬleˬlaˆ miˇ kʼahˬ kʼawꞈ, aˬ yawꞈ maꞈ-euˬ meuˬ meuˬ ma pyeuꞈ-eu Saˬmaˬliˆ meuˬ taꞈ-ehˇ maˬ paˇ kʼaˆ dzehˬ-ehˇ, Saˬmaˬliˆ meuˬ kʼawꞈ sahˬ paˬ Peˬkah aˬ yawꞈ-euˬ mawˇ do taꞈ-ehˇ maˬ paˇ kʼaˆ dzehˬ nya-aˇ. “Nawˇ jah-eu nui ma maˬ ziꞈ naˇ, aˇ yamˬ gʼawˬ myahˇ ni maˬ gmˬ-aˇ”

¹⁰Sahˬpaˬ Miˬyehˇ neh Aˬkaˆ-ahˇ heu loꞈ-ehˇ paˇ bi tsaꞈ gaˬ-iˇ-euˬ meh.

¹¹“Bi siˬ bi mawˇ-eu jeˬ bi keuˆ le ni, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ shaˇ-awˬ. Shiˇ-eu miˇ kʼahˬ-ahˇ keuˆ ni naꞈ-euˬ miˇ oˆ paw neh laˇ-euˬ bi siˬ bi mawˇ-euˬ jeˬ maˬ ehˇ, mˬ naˆ maˬ tseˇ goˇ-eu miˇ taˆ paw-euˬ bi siˬ bi mawˇ-eu jeˬ maˬ ehˇ, tiˬ jeˬ bi keuˆ le ni shaˇ-awˬ.”

¹²Aˬkaˆ ehˇ-eu, “Bi siˬ bi mawˇ-eu jeˬ bi keuˆ le-awˬ lehˇ ngaˇ maˬ shaˇ, Sahˬpaˬ Miˬyehˇ-ahˇ lawˬ haw-eu jeˬ ngaˇ maˬ mˇ.”

¹³Iˇsaˬyaˇ ehˇ-eu, “Sahˬ paˬ Daˬbiˇ-euˬ shiˬ shaˬ pyeuꞈ-eu gʼaˬ-oˇ, naˇ haˬ-awˬ. Tsawˇ haˬ zaˬ maˬ oˇ coeˇ laˇ ni jahˇ-euˬ tehꞈ-ehˇ maˬ juˬ ni, Miˬyehˇ maˬ oˇ coeˇ-ehˇ pyeuꞈ laˇ ni paˇ jahˇ-eu gʼeh te loˇ.

¹⁴Toˆ-ehˇ jeˬ maˇ-iˬ, Sahˬpaˬ Miˬyehˇ aˬ yawꞈ-euˬ mawˇ do, nawˬ-euˬ kʼoeˇ taˆ bi siˬ bi mawˇ-eu jeˬ bi keuˆ le tehꞈ-a. Shawˇ jehˆ ni gʼeh-eu zaˬ miˬ zaˬ zaˬ guˬ tiˬ gʼaˬ aˬ nyiˇ pi leˇ-awˇ, aˬ li tiˬ li ciˬ-awˇ, Eˇmaˬnoeˬlaˇ,[5] lehˇ myahˇ nehˬ tehꞈ-a.

¹⁵Aˬ yawꞈ huiˬ loˆ laˇ-awˇ, yaw muiˬ yaw doeˇ tseˇ paˆ geuꞈ nya laˇ ngeh, miˇ kʼahˬ zaˬ deuˬ mawˇ neˇ aˬ coeˇ dawˇ-awˇ byaˬ byaˬ uiˇ dzaˬ luꞈ tehꞈ-a.

¹⁶Nymˬ-mˇ nawˬ-ahˇ laˆ guˆ luꞈ-eu sahˬ paˬ teu nyiˬ gʼaˬ-euˬ miˇ kʼahˬ-aˬ, zaˬ kʼoeˇ gʼaˬ yaw muiˬ yaw doeˇ maˬ siˬ nya laˇ mi naˆ-ehˇ, cawˆ-iˇ jiˇ-awˇ jaˆ tehꞈ-a.

¹⁷“Iˇsaˬleˬlaˆ miˇ kʼahˬ hawˇ-eu Yuˇdaˆ miˇ kʼahˬ biˇ paˆ ngeh nah neh dahˬ beh-awˇ, iˬ nah keuˆ ni kʼaˇ ya tahˬ puˬ haw-euˬ shaˬ zahˬ dawˬ tawˆ luꞈ naˆ maˬ tseˇ doeˇ dui dui-eu jeˬ, nawˬ-euˬ kʼoeˇ taˆ maˬ ehˇ, nawˬ-euˬ tsawˇ haˬ deuˬ kʼoeˇ taˆ maˬ ehˇ, nawˬ-euˬ aˇ jeuˬ aˇ ca dawˬ tawˆ luꞈ kʼoeˇ taˆ maˬ ehˇ, Sahˬpaˬ Miˬyehˇ bi keuˆ le tehꞈ-a. Aˬshuˇliˆ sahˬ paˬ-ahˇ aˬ yawꞈ sheuˬ ahˇ leꞈ tehꞈ-a.

¹⁸“Aˇ nah aˇ yamˬ kʼoeˇ yamˬ keuˆ le ngeh, Iˇjiˇtuˆ miˇ kʼahˬ gawˆ laꞈ gawˆ mehˇ doe ni kʼaˇ jawˇ-eu puˬ saˆ dawˬ tawˆ luꞈ-ahˇ maˬ ehˇ, Aˬshuˇliˆ miˇ kʼahˬ-ahˇ jawˇ-eu byaˬ deuˬ-ahˇ maˬ ehˇ, Sahˬpaˬ Miˬyehˇ jaˬ cehˇ cehˇ gaˬ nehˬ tehꞈ-a.

¹⁹Lawˇ kʼmˬ lawˇ gawˆ lo kʼahˬ lo guˇ dawˬ tawˆ luꞈ kʼoeˇ taˆ aˬ yawꞈ maꞈ poˬ gʼa-awˇ, baw duˆ hawˇ-eu jeˬ zaˬ gaˆ kʼahˬ dawˬ tawˆ luꞈ kʼoeˇ taˆ ga byah jiˇ tehꞈ-a.

²⁰“Aˇ nah aˇ yamˬ kʼoeˇ yamˬ keuˆ le ngeh, uˬ jehˆ jehˆ-eu tsawˇ haˬ tiˬ gʼaˬ kuˇ ahˇ leꞈ-eu loꞈ-ehˇ, Uˇpaˬlaˇ lawˇ baˬ nui baˬ paw jawˇ-eu Aˬshuˇliˆ sahˬ paˬ-ahˇ Sahˬpaˬ Miˬyehˇ kuˇ ahˇ leꞈ-awˇ, nawˬ-euˬ uˬ duˬ tsehˇ kahˇ maˬ ehˇ, mehˬ mahˬ maˬ ehˇ, mawˬ gʼaw caꞈ hm deuˬ maˬ ehˇ, nawˬ-euˬ gʼawˇ mawˇ-ahˇ kʼaˇ tsoꞈ-eu caꞈ hm dawˬ tawˆ luꞈ, aˬ yawꞈ neh bi jehˆ dzeh jiˇ tehꞈ-a.

²¹“Aˇ nah aˇ yamˬ kʼoeˇ yamˬ keuˆ le ngeh, tsawˇ haˬ tiˬ gʼaˬ-euˬ mawˇ neˇ mawˇ kʼaˇ tiˬ mawˇ hawˇ-eu ciꞈ myehꞈ nyiˬ ma tehꞈ-ehˇ cu dzeuˇ nya-euˬ kʼawꞈ,

²²aˬ coeˇ dahˬ dui dui-eu miˇ neh, mawˇ neˇ aˬ coeˇ ja leh ya dzaˬ dehˆ tehꞈ-a. Miˇ kʼahˬ heu kʼahˬ-ahˇ kʼaˇ dzeˇ yaꞈ-euˬ tsawˇ haˬ dawˬ tawˆ luꞈ, mawˇ neˇ aˬ coeˇ ya dawˇ dehˆ-awˇ, mawˇ neˇ aˬ coeˇ ja leh ya dzaˬ dehˆ tehꞈ-a.

²³“Aˇ nah aˇ yamˬ kʼoeˇ yamˬ keuˆ le ngeh, aˬ gaꞈ baw duˆ tiˬ heˇ duˆ duˆ-awˇ, pyuˇ maˇ byaˆ tiˬ heˇ byaˆ poeˬ-eu aˬ gaꞈ yaˇ kmˇ dawˬ tawˆ luꞈ, aˬ gah baw duˆ yaˇ saˬ pyeuꞈ jiˇ tehꞈ-a.

²⁴Miˇ kʼahˬ kʼahˬ lah-ehˇ yaˇ saˬ pyeuꞈ jiˇ-euˬ miˇ neh, kaˆ baꞈ-awˇ shaˬ jiˇ ya beuˆ dzaˬ gaˇ keuˆ tehꞈ-a.

²⁵Tsehˬ ma baꞈ-awˇ yaˇ kʼaˇ mˇ dzaˬ-euˬ gawˬ jawˬ gawˬ duˇ deuˬ, aˬ gah baw duˆ yaˇ saˬ pyeuꞈ jiˇ-awˇ, tiˬ gʼaˬ-iˬ maˬ iˇ maˬ laˇ tsehˆ-eu jeˬ zaˬ pyehˬ kʼahˬ pyeuꞈ-iˇ tehꞈ-a.”