Read Akha Uˬ duˬ 11 Bible Online

Uˬ duˬ 11 - Akha bible

Uˬ duˬ 11

¹Moˇseˬ hawˇ-eu Aˬloˬ-ahˇ Sahˬpaˬ Miˬyehˇ neh zahˇ sahˇ kʼoꞈ heu deuˬ biꞈ nehˬ-euˬ meh.

²Heu-aˬ, miˇ tsaˬ kʼoeˇ taˆ kʼaˇ dehꞈ kʼaˇ jawˇ-eu jeˬ zaˬ deuˬ laꞈ kʼoeˇ, naw maꞈ dzaˬ nya-eu deuˬ pyeuꞈ-eu meh lehˇ, Iˇsaˬleˬlaˆ tsawˇ haˬ deuˬ-ahˇ ehˇ nehˬ-awˬ.

³Kuiˇ sehˬ nyiˬ paˆ baw-awˇ, dzaˇ jiˆ jiˆ-eu jeˬ zaˬ deuˬ dzaˬ kʼmˬ meh.

⁴Ehˇ kʼawꞈ, dzaˇ jiˆ jiˆ-awˇ kuiˇ sehˬ maˬ paˆ-eu jeˬ zaˬ deuˬ maˬ ehˇ, kuiˇ sehˬ paˆ-awˇ dzaˇ jiˆ maˬ jiˆ-eu jeˬ zaˬ deuˬ maˬ ehˇ, maˬ dzaˬ kʼmˬ-a. Law taw-aˬ, dzaˇ jiˆ jiˆ kʼawꞈ, kuiˇ sehˬ maˬ paˆ-eu miˇ neh, naw maꞈ gʼaˇ duˬ maˬ shawˇ-a.

⁵Kuiˬ siˆ zaꞈ siˆ-aˬ, dzaˇ jiˆ jiˆ kʼawꞈ, kuiˇ sehˬ nyiˬ paˆ maˬ baw-eu miˇ neh, naw maꞈ gʼaˇ duˬ maˬ shawˇ-a.

⁶Lahˬ-aˬ, dzaˇ jiˆ jiˆ kʼawꞈ, kuiˇ sehˬ nyiˬ paˆ maˬ baw-eu miˇ neh, naw maꞈ gʼaˇ duˬ maˬ shawˇ-a.

⁷Aˬzaꞈ-aˬ, kuiˇ sehˬ nyiˬ paˆ baw kʼawꞈ, dzaˇ jiˆ maˬ jiˆ-eu miˇ neh, naw maꞈ gʼaˇ duˬ maˬ shawˇ-a.

⁸Jeˬ zaˬ heu deuˬ-euˬ shaˬ jiˇ maˬ dzaˬ kʼmˬ-eu uˬ taꞈ, jeˬ zaˬ heu deuˬ shiˇ taˬ-eu gaˇ maˬ toeˬ ciˆ kʼmˬ-a. Jeˬ zaˬ heu deuˬ-aˬ, naw maꞈ gʼaˇ duˬ maˬ shawˇ-eu jeˬ zaˬ deuˬ pyeuꞈ-eu meh.

⁹Yehˇ ma hawˇ-eu ngaˬ gʼaw kʼaˇ tsoꞈ-eu aˬ geu jeˬ ngaˬ shaˬ maˬ kaˬ, dzaˬ kʼmˬ meh.

¹⁰Ehˇ kʼawꞈ, dahˇ teˇ hawˇ-eu ngaˬ gʼaw maˬ tsoꞈ-eu iˇ cuꞈ laꞈ kʼoeˇ kʼaˇ dehꞈ kʼaˇ uˇ-eu aˬ geu jeˬ maˬ kaˬ, naw maꞈ maˬ dzaˬ kʼmˬ-a.

¹¹Kʼoeˇ loꞈ-ehˇ gʼeh-eu deuˬ-aˬ, maˬ muiˬ maˬ shawˇ-a lehˇ naw maꞈ ya sawˇ meh. Kʼoeˇ deuˬ-ahˇ naw maꞈ maˬ dzaˬ kʼmˬ-eu uˬ taꞈ, shiˇ taˬ-euˬ gaˇ kʼawꞈ, maˬ toeˬ ciˆ kʼmˬ-a.

¹²Dahˇ teˇ hawˇ-eu ngaˬ gʼaw maˬ tsoꞈ-eu iˇ cuꞈ laꞈ kʼoeˇ kʼaˇ jawˇ-eu jeˬ-ahˇ naw maꞈ taˬ dzaˬ.

¹³Aˇ jiˇ deuˬ laꞈ kʼoeˇ heu deuˬ-aˬ, maˬ shawˇ-eu aˇ jiˇ deuˬ pyeuꞈ-eu miˇ neh, naw maꞈ maˬ dzaˬ kʼmˬ-a. Kʼaˬ dzeˇ dzeˇ ma, kʼaˬ dzeˇ jeˬ shiˇ, kʼaˬ dzeˇ bu,

¹⁴kʼaˬ dzeˇ pyawˆ, hawˬ bu byaˆ,

¹⁵awꞈ-aꞈ,

¹⁶law taw aˇ jiˇ, dzeˇ ngawˇ, iˬ ma laˆ shaˆ uiˇ dzoeˬ, bo-mˬ bo lo,

¹⁷dui-mˬ dui bui lui, uiˇ jawˇ lawˇ si, bawˇ tsahˬ jehˆ kʼaˬ,

¹⁸uiˇ za naˆ, shaˬ jiˇ yaw buꞈ dzaˬ-eu aˇ jiˇ,

¹⁹uiˇ za shuiˇ, uiˇ dzoeˬ, ho piˬ doiˬ doiˬ, boeˇ kʼaˬ, heu deuˬ-ahˇ maˬ dzaˬ kʼmˬ-a.

²⁰Aˬ dahˇ tsoꞈ-awˇ, aˬ kuiˇ tsoꞈ-eu[2] aˇ mawˇ deuˬ-aˬ, maˬ shawˇ-a.

²¹Ehˇ kʼawꞈ, aˬ dahˇ tsoꞈ-eu aˇ mawˇ deuˬ laꞈ kʼoeˇ, bawˇ teuˆ tsoꞈ-awˇ teuˆ gahˇ nya-eu aˇ mawˇ deuˬ dzaˬ kʼmˬ meh.

²²Nyehˇ bahˇ deuˬ hawˇ-eu nyoiˬ oiˬ deuˬ naw maꞈ dzaˬ kʼmˬ meh.

²³Ehˇ kʼawꞈ, aˬ dahˇ tsoꞈ-awˇ aˬ kuiˇ oeˬ kahˬ tsoꞈ-eu aˬ nah aˬ dzeˇ aˇ mawˇ deuˬ-aˬ, maˬ shawˇ-a.

²⁴Jeˬ zaˬ heu deuˬ shiˇ taˬ-euˬ gaˇ kʼaˇ toeˬ ciˆ-eu tsawˇ haˬ aˬ geu gʼaˬ maˬ kaˬ, uˬ ciꞈ paw keuˆ ni maˬ shawˇ-eu tsawˇ haˬ pyeuꞈ-eu meh.

²⁵Shiˇ taˬ-euˬ jeˬ zaˬ heu deuˬ laˆ lehꞈ-euˬ tsawˇ haˬ-aˬ, yawˬ ha-euˬ mehˬ tsoeˬ ya lehˬ tsiˬ-awˇ, uˬ ciꞈ paw keuˆ ni maˬ shawˇ-eu tsawˇ haˬ pyeuꞈ-eu meh.

²⁶Jeˬ zaˬ aˬ geu jeˬ maˬ kaˬ, kuiˇ sehˬ tsoꞈ-eu kʼawꞈ, kuiˇ sehˬ nyiˬ paˆ maˬ baw-ehˇ, dzaˇ jiˆ maˬ jiˆ naˇ, maˬ shawˇ-eu jeˬ zaˬ pyeuꞈ-eu meh. Kʼoeˇ loꞈ-ehˇ gʼeh-eu jeˬ zaˬ-ahˇ toeˬ ciˆ-eu tsawˇ haˬ kʼawꞈ, maˬ shawˇ-a.

²⁷Aˬ kuiˇ oeˬ kahˬ tsoꞈ-eu jeˬ zaˬ deuˬ laꞈ kʼoeˇ, laꞈ zaˬ tsoꞈ-eu jeˬ zaˬ deuˬ-aˬ, naw maꞈ gʼaˇ duˬ maˬ shawˇ-a. Kʼoeˇ loꞈ-ehˇ gʼeh-eu jeˬ zaˬ deuˬ shiˇ taˬ-euˬ gaˇ toeˬ ciˆ leˇ-eu tsawˇ haˬ a geu gʼaˬ maˬ kaˬ, uˬ ciꞈ paw keuˆ ni maˬ shawˇ-eu tsawˇ haˬ pyeuꞈ-eu meh.

²⁸Shiˇ taˬ-euˬ jeˬ zaˬ kʼoeˇ deuˬ kʼaˇ sheu dzeh-euˬ tsawˇ haˬ-aˬ, yawˬ ha-euˬ mehˬ tsoeˬ ya lehˬ tsiˬ-awˇ, uˬ ciꞈ paw keuˆ ni maˬ shawˇ-eu tsawˇ haˬ pyeuꞈ-eu meh. Jeˬ zaˬ heu deuˬ-aˬ, naw maꞈ gʼaˇ duˬ maˬ shawˇ-eu jeˬ zaˬ pyeuꞈ-eu meh.

²⁹Miˇ tsaˬ-ahˇ joe joe-ehˇ kʼaˇ cah-eu jeˬ zaˬ deuˬ laꞈ kʼoeˇ, naw maꞈ gʼaˇ duˬ maˬ shawˇ-eu jeˬ zaˬ deuˬ-aˬ, kʼahˬ sehˇ laꞈ pyaˆ, ho caꞈ, uiˇ zawˇ nyoeˇ,

³⁰gʼaˇ gʼawˬ, dahˇ taˆ uiˇ zawˇ ma, uiˇ zawˇ naˆ, boeˬ byaˇ hawˇ-eu, kʼaˬ lawˇ behˇ jehˇ heu deuˬ meh.

³¹Miˇ tsaˬ-ahˇ joe joe-ehˇ kʼaˇ cah-eu jeˬ zaˬ deuˬ laꞈ kʼoeˇ, heu deuˬ-aˬ, naw maꞈ gʼaˇ duˬ maˬ shawˇ-eu jeˬ zaˬ deuˬ pyeuꞈ-eu meh. Jeˬ zaˬ heu deuˬ shiˇ taˬ-euˬ gaˇ kʼaˇ toeˬ ciˆ-eu tsawˇ haˬ aˬ geu gʼaˬ maˬ kaˬ, uˬ ciꞈ paw keuˆ ni maˬ shawˇ-a.

³²Jeˬ zaˬ heu deuˬ shiˇ-awˇ ga daˆ-euˬ daˇ kawˬ maˬ ehˇ, mehˬ tsoeˬ maˬ ehˇ, shaˬ kʼoˆ maˬ ehˇ, pehˇ zeuˇ maˬ ehˇ, mui deuˇ oeˬ lahˬ maˬ ehˇ, maˬ shawˇ-eu mˇ myawˬ pyeuꞈ-eu meh. Mˇ myawˬ kʼoeˇ deuˬ-ahˇ iˇ cuꞈ-ahˇ ya biˬ puꞈ taˬ-awˇ, uˬ ciꞈ paw hawˇ-eu shawˇ-eu mˇ myawˬ pyeuꞈ laˇ-eu meh.

³³Kʼoeˇ loꞈ-ehˇ gʼeh-eu jeˬ zaˬ tiˬ mawˇ na mui deuˇ oeˬ lahˬ laꞈ kʼoeˇ ga ahˇ naˇ, kʼoeˇ gaˇ kʼaˇ ahˇ-eu jeˬ dawˬ tawˆ luꞈ, maˬ shawˇ-eu jeˬ pyeuꞈ-iˇ jiˇ-euˬ meh. Kʼoeˇ miˇ neh, mui deuˇ oeˬ lahˬ kʼoeˇ siˬ ya kʼoˆ paˆ dzeh meh.

³⁴Aˬ myah luꞈ dzaˬ luꞈ-eu dzaˇ deuˬ kʼoeˇ taˆ, mui deuˇ oeˬ lahˬ kʼoeˇ siˬ-ahˇ dahˬ-eu iˇ cuꞈ dzaˆ shehˬ naˇ, maˬ shawˇ-eu dzaˇ pyeuꞈ-iˇ-euˬ meh. Mui deuˇ oeˬ lahˬ kʼoeˇ siˬ-ahˇ kʼaˇ dahˬ-eu dawˇ nya-eu dzaˇ uiˇ dawˬ tawˆ luꞈ, maˬ shawˇ-eu dzaˇ uiˇ pyeuꞈ jiˇ-eu meh.

³⁵Kʼoeˇ loꞈ-ehˇ gʼeh-eu jeˬ zaˬ shiˇ-awˇ ga daˆ-euˬ jeˬ dawˬ tawˆ luꞈ, maˬ shawˇ-eu myawˬ pyeuꞈ-iˇ-eu meh. Jeˬ zaˬ kʼoeˇ shiˇ ngeh ga daˆ-euˬ miˬ dzaˬ tsawˬ bu maˬ ehˇ, miˇ tsaˬ oeˬ lahˬ maˬ ehˇ, ya kʼoˆ paˆ dzeh-eu meh. Myawˬ kʼoeˇ deuˬ naw maꞈ gʼaˇ duˬ maˬ shawˇ-a.

³⁶Kʼoeˇ loꞈ-ehˇ gʼeh-eu jeˬ zaˬ deuˬ shiˇ-awˇ ga daˆ-euˬ jeˬ dawˬ tawˆ luꞈ maˬ shawˇ-a. Ehˇ kʼawꞈ, iˇ cuꞈ tsawˬ biˬ hawˇ-eu iˇ cuꞈ lah duˬ-aˬ, kʼoeˇ loꞈ-ehˇ gʼeh-eu jeˬ zaˬ shiˇ-awˇ ga daˆ kʼawꞈ, yaw shawˇ meh.

³⁷Siˬ yoeˬ sehˬ-eu lehˇ gʼeh-eu siˬ yoeˬ aˇ nuiˆ kʼoeˇ taˆ, kʼoeˇ loꞈ-ehˇ gʼeh-eu jeˬ zaˬ yaw shiˇ ga daˆ kʼawꞈ, siˬ yoeˬ kʼoeˇ yaw shawˇ meh.

³⁸Ehˇ kʼawꞈ, siˬ yoeˬ kʼoeˇ iˇ cuꞈ-ahˇ bi duiˆ gʼaˬ ngeh hawˇ-eu ga daˆ naˇ, siˬ yoeˬ kʼoeˇ naw maꞈ gʼaˇ duˬ maˬ shawˇ-a.

³⁹Dzaˬ kʼmˬ-eu jeˬ zaˬ tiˬ mawˇ na shiˇ taˬ-euˬ gaˇ, tsawˇ haˬ tiˬ gʼaˬ na ya toeˬ ciˆ naˇ, uˬ ciꞈ paw keuˆ ni, tsawˇ haˬ kʼoeˇ gʼaˬ maˬ shawˇ-a.

⁴⁰Tsawˇ haˬ tiˬ gʼaˬ na, shiˇ taˬ-euˬ jeˬ zaˬ kʼoeˇ mawˇ-euˬ shaˬ jiˇ dzaˬ naˇ, aˬ yawꞈ-euˬ mehˬ tsoeˬ ya lehˬ tsiˬ-euˬ uˬ taꞈ, aˬ yawꞈ-aˬ, uˬ ciꞈ paw keuˆ ni maˬ shawˇ-eu tsawˇ haˬ tiˬ gʼaˬ pyeuꞈ-eu meh. Shiˇ taˬ-euˬ jeˬ zaˬ kʼoeˇ mawˇ laˆ lehꞈ-euˬ tsawˇ haˬ aˬ geu gʼaˬ maˬ kaˬ, aˬ yawꞈ-euˬ mehˬ tsoeˬ ya lehˬ tsiˬ-eu uˬ taꞈ, uˬ ciꞈ paw keuˆ ni maˬ shawˇ-eu tsawˇ haˬ pyeuꞈ-eu meh.

⁴¹Miˇ tsaˬ-ahˇ luˆ luˆ-ehˇ cah luꞈ-eu aˇ mawˇ deuˬ naw maꞈ maˬ dzaˬ kʼmˬ-a.

⁴²Joe joe-ehˇ cah-eu deuˬ maˬ ehˇ, aˬ kuiˇ oeˬ kahˬ tsoꞈ-awˇ cah-eu deuˬ maˬ ehˇ, aˬ kuiˇ gʼawˬ mya ni tsoꞈ-awˇ cah-eu deuˬ maˬ ehˇ, naw maꞈ maˬ dzaˬ kʼmˬ-a.

⁴³Aˇ mawˇ kʼoeˇ deuˬ dzaˬ-awˇ, yawˬ ha-euˬ gʼawˇ mawˇ maˬ shawˇ ni naw maꞈ maˬ ya mˇ-a.

⁴⁴Ngaˇ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma. Naw maꞈ muiˬ-eu shawˇ-eu tsawˇ haˬ pyeuꞈ ni, yawˬ ha-euˬ gʼawˇ mawˇ-ahˇ laˆ saˆ geuꞈ-awˬ. Aˬ jeˬ miˇ neh ehˇ naˇ, ngaˇ yaw muiˬ yaw shawˇ ma.

⁴⁵Ngaˇ-aˬ, naw maꞈ-euˬ Miˬyehˇ pyeuꞈ laˇ ni, naw maꞈ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ laꞈ-euˬ Sahˬpaˬ Miˬyehˇ pyeuꞈ-eu ma. Naw maꞈ muiˬ-eu shawˇ-eu tsawˇ haˬ ya bi pyeuꞈ meh. Aˬ jeˬ miˇ neh ehˇ naˇ, ngaˇ-aˬ, yaw muiˬ yaw shawˇ ma.

⁴⁶Ehˇ dzeuˇ yaꞈ-euˬ gaˇ kawˆ heu deuˬ-aˬ, jeˬ zaˬ aˇ jiˇ deuˬ, iˇ cuꞈ laꞈ kʼoeˇ kʼaˇ dehꞈ kʼaˇ jawˇ-eu jeˬ hawˇ-eu, miˇ tsaˬ-ahˇ joe joe-ehˇ kʼaˇ cah-eu jeˬ zaˬ aˇ mawˇ dawˬ tawˆ luꞈ-ahˇ taꞈ leˇ-eu zahˇ dawˬ kʼoꞈ dawˬ pyeuꞈ-eu ma.

⁴⁷Zahˇ sahˇ kʼoꞈ-ahˇ taꞈ leˇ-awˇ, shawˇ-eu jeˬ hawˇ-eu maˬ shawˇ-eu jeˬ maˬ ehˇ, dzaˬ kʼmˬ-eu jeˬ zaˬ hawˇ-eu maˬ dzaˬ kʼmˬ-eu jeˬ zaˬ maˬ ehˇ, naw maꞈ yahˇ-eu laꞈ kʼoeˇ ya tseˇ paˆ geuꞈ meh.