Read Akha Uˬ duˬ 13 Bible Online

Uˬ duˬ 13 - Akha bible

Uˬ duˬ 13

¹Zahˇ sahˇ kʼoꞈ heu deuˬ, Moˇseˬ hawˇ-eu Aˬloˬ-ahˇ Sahˬpaˬ Miˬyehˇ biꞈ nehˬ-euˬ meh.

²Tsawˇ haˬ tiˬ gʼaˬ na, maˇ naˇ naˇ-eu maˬ ehˇ, shaˬ ciˬ ciˬ-eu maˬ ehˇ, maˇ cuˬ maˇ lu lu-eu maˬ ehˇ, nyawˬ naˇ doˆ laˇ nya paˬ-ehˇ gʼeh naˇ, piˇ ma Aˬloˬ jawˇ gaˇ maˬ ngeuˇ naˇ, Aˬloˬ-euˬ aˬ li piˇ ma tiˬ gʼaˬ na jawˇ gaˇ ya sheuˬ gʼeh meh.

³Piˇ ma kʼoeˇ gʼaˬ maˇ naˇ-ahˇ pyehˆ tseˇ haw ngeh, kʼoeˇ gaˇ tsoꞈ-eu caꞈ hm deuˬ yaw pyuˇ pyuˇ-ehˇ pyeuꞈ laˇ-awˇ, maˇ naˇ kʼoeˇ shaˬ jiˇ baˆ kʼoˆ naˆ maˬ tseˇ naꞈ naˇ, nyawˬ naˇ-eu maˇ naˇ pyeuꞈ-eu miˇ neh, tsawˇ haˬ kʼoeˇ gʼaˬ maˬ shawˇ-a lehˇ, piˇ ma gʼaˬ ya daˇ tsehˆ meh.

⁴Ehˇ kʼawꞈ, maˇ naˇ kʼoeˇ yaw pyuˇ pyuˇ-ehˇ gʼeh-awˇ, baˆ kʼoˆ naˆ maˬ tseˇ maˬ naꞈ-ehˇ, kʼoeˇ gaˇ tsoꞈ-eu caꞈ hm yaw pyuˇ maˬ pyuˇ naˇ, piˇ ma gʼaˬ, maˇ naˇ naˇ-eu tsawˇ haˬ kʼoeˇ gʼaˬ-ahˇ shiꞈ nah keuˆ ni ya ha lahˇ taˬ meh.

⁵Shiꞈ nah keuˆ laˇ naˇ, piˇ ma gʼaˬ tsawˇ haˬ kʼoeˇ gʼaˬ-ahˇ tiˬ poˆ paˇ pyehˆ tseˇ haw-awˇ, maˇ naˇ kʼoeˇ maˬ huiˬ laˇ-ehˇ, aˬ yawꞈ yaw oeˇ loꞈ-ehˇ tehꞈ-ehˇ jaˆ naˇ, tsawˇ haˬ kʼoeˇ gʼaˬ-ahˇ shiꞈ nah keuˆ ni tiˬ poˆ paˇ ya lahˇ meh.

⁶Shiꞈ nah paˇ byah laˇ-awˇ, piˇ ma gʼaˬ tsawˇ haˬ kʼoeˇ gʼaˬ-ahˇ tiˬ poˆ paˇ pyehˆ tseˇ haw ngeh, maˇ naˇ kʼoeˇ maˬ huiˬ laˇ ni taˬ leˇ mawꞈ laˇ naˇ, tsawˇ haˬ kʼoeˇ gʼaˬ yaw shawˇ meh lehˇ piˇ ma gʼaˬ ya daˇ tsehˆ meh. Kʼoeˇ-aˬ, maˇ naˇ naˇ-eu tehꞈ meh. Kʼoeˇ naˇ, tsawˇ haˬ kʼoeˇ gʼaˬ yawˬ ha-euˬ mehˬ tsoeˬ lehˬ tsiˬ-awˇ, shawˇ-eu tsawˇ haˬ tiˬ gʼaˬ pyeuꞈ laˇ-eu meh.

⁷Ehˇ kʼawꞈ, tsawˇ haˬ kʼoeˇ gʼaˬ-ahˇ piˇ ma neh bi pyehˆ tseˇ gʼaˬ-awˇ, yaw shawˇ meh lehˇ daˇ tsehˆ gʼaˬ-awˇ neh, maˇ naˇ kʼoeˇ paˇ huiˬ laˇ naˇ, piˇ ma jawˇ gaˇ aˬ yawꞈ tiˬ poˆ paˇ ya laˇ meh.

⁸Piˇ ma gʼaˬ aˬ yawꞈ-ahˇ tiˬ poˆ paˇ pyehˆ tseˇ haw-awˇ, maˇ naˇ huiˬ laˇ taˬ-eu gaˇ ya mawˇ naˇ, tsawˇ haˬ kʼoeˇ gʼaˬ maˬ shawˇ-a lehˇ, piˇ ma gʼaˬ paˇ ya daˇ tsehˆ meh. Kʼoeˇ-aˬ, nyawˬ naˇ-eu maˇ naˇ meh.

⁹Tsawˇ haˬ tiˬ gʼaˬ na nyawˬ naˇ laˇ naˇ, piˇ ma jawˇ gaˇ ya sheuˬ laꞈ meh.

¹⁰Piˇ ma gʼaˬ aˬ yawꞈ-ahˇ pyehˆ tseˇ haw ngeh, maˇ naˇ yaw pyuˇ pyuˇ-awˇ, caꞈ hm-ahˇ yaw pyuˇ pyuˇ-ehˇ bi pyeuꞈ laˇ-eu uˬ taꞈ maˇ byahˇ gʼawˬ mya ni doˆ naˇ,

¹¹maˇ naˇ kʼoeˇ-aˬ, nyawˬ naˇ-eu maˇ naˇ pyeuꞈ-eu meh. Tsawˇ haˬ kʼoeˇ gʼaˬ maˬ shawˇ-a lehˇ, piˇ ma gʼaˬ ya daˇ tsehˆ meh. Aˬ yawꞈ-ahˇ ha lahˇ-eu maˬ loˬ-a. Aˬ jeˬ miˇ neh ehˇ naˇ, aˬ yawꞈ-aˬ, maˬ shawˇ-eu tsawˇ haˬ pyeuꞈ-eu bya cehˆ ni mawˇ duˬ laˇ-euˬ meh.

¹²Maˇ naˇ kʼoeˇ huiˬ laˇ-awˇ, tsawˇ haˬ kʼoeˇ gʼaˬ uˬ duˬ-ahˇ neh aˬ kuiˇ keuˆ ni naˇ byah naˇ,

¹³piˇ ma gʼaˬ tiˬ poˆ paˇ ya pyehˆ tseˇ haw meh. Tsawˇ haˬ kʼoeˇ gʼaˬ-euˬ gʼawˇ mawˇ mawˇ lah-ehˇ maˇ naˇ naˇ byah jiˇ-euˬ gaˇ piˇ ma gʼaˬ ya mawˇ naˇ, tsawˇ haˬ kʼoeˇ gʼaˬ yaw shawˇ meh lehˇ, piˇ ma gʼaˬ ya daˇ tsehˆ meh. Aˬ yawꞈ-euˬ gʼawˇ mawˇ mawˇ lah-ehˇ pyuˇ deuˬ ni pyeuꞈ shaw naˇ, yaw shawˇ meh.

¹⁴Ehˇ kʼawꞈ, maˇ naˇ paˇ naˇ doˆ laˇ-eu nehˬ-ehˇ tiˬ poˆ tehꞈ-ehˇ, maˬ shawˇ-eu tsawˇ haˬ paˇ pyeuꞈ-iˇ-eu meh.

¹⁵Piˇ ma gʼaˬ aˬ yawꞈ-ahˇ paˇ pyehˆ tseˇ haw-awˇ, maˇ naˇ paˇ naˇ doˆ laˇ-euˬ ya mawˇ naˇ, maˬ shawˇ-a lehˇ ya daˇ tsehˆ meh. Maˇ naˇ naˇ-eu kʼoeˇ-aˬ, nyawˬ naˇ-eu jeˬ pyeuꞈ-eu miˇ neh, maˬ shawˇ-a.

¹⁶Ehˇ kʼawꞈ, maˇ naˇ taˬ leˇ-awˇ, pyuˇ deuˬ ni paˇ pyeuꞈ laˇ naˇ, piˇ ma jawˇ gaˇ paˇ ya le meh.

¹⁷Piˇ ma gʼaˬ aˬ yawꞈ-ahˇ paˇ pyehˆ tseˇ haw-awˇ, maˇ naˇ kʼoeˇ pyuˇ deuˬ ni pyeuꞈ-iˇ-euˬ ya mawˇ naˇ, tsawˇ haˬ kʼoeˇ gʼaˬ shawˇ laˇ gʼaˬ-euˬ miˇ neh, yaw shawˇ meh lehˇ piˇ ma gʼaˬ ya daˇ tsehˆ meh.

¹⁸Tsawˇ haˬ tiˬ gʼaˬ na, shaˬ ciˬ ciˬ-eu taˬ leˇ gʼaˬ-awˇ neh,

¹⁹yaw pyuˇ pyuˇ-ehˇ gʼeh-eu maˇ cuˬ maˬ ehˇ, neˇ ba ba-eu maˇ naˇ maˬ ehˇ, kʼoeˇ gaˇ paˇ doˆ laˇ naˇ, piˇ ma jawˇ gaˇ ya le meh.

²⁰Piˇ ma gʼaˬ aˬ yawꞈ-ahˇ pyehˆ tseˇ haw-awˇ, maˇ cuˬ maˇ naˇ kʼoeˇ shaˬ jiˇ baˆ kʼoˆ naˆ maˬ tseˇ naꞈ gaˇ ya mawˇ-awˇ, kʼoeˇ gaˇ tsoꞈ-eu caꞈ hm deuˬ pyuˇ laˇ taˬ-euˬ ya mawˇ naˇ, tsawˇ haˬ kʼoeˇ gʼaˬ maˬ shawˇ-a lehˇ, piˇ ma gʼaˬ ya daˇ tsehˆ nehˬ meh. Kʼoeˇ-aˬ, shaˬ ciˬ ciˬ gaˇ neh pyeuꞈ doˆ laˇ-euˬ nyawˬ naˇ-eu maˇ naˇ meh.

²¹Ehˇ kʼawꞈ, tsawˇ haˬ kʼoeˇ gʼaˬ-ahˇ piˇ ma gʼaˬ pyehˆ tseˇ haw ngeh, caꞈ hm maˬ pyuˇ-ehˇ, maˇ naˇ kʼoeˇ baˆ kʼoˆ naˆ maˬ tseˇ maˬ naꞈ ni, ui cuiˆ yaw naˆ naˆ-ehˇ gʼeh naˇ, piˇ ma gʼaˬ tsawˇ haˬ kʼoeˇ gʼaˬ-ahˇ shiꞈ nah keuˆ ni ya ha lahˇ taˬ meh.

²²Maˇ naˇ kʼoeˇ paˇ huiˬ dzehˬ laˇ naˇ, tsawˇ haˬ kʼoeˇ gʼaˬ maˬ shawˇ-a lehˇ piˇ ma gʼaˬ ya daˇ tsehˆ nehˬ meh.

²³Aˬ yawꞈ-aˬ, nyawˬ naˇ-eu tsawˇ haˬ meh. Ehˇ kʼawꞈ, maˇ naˇ kʼoeˇ maˬ huiˬ dzehˬ laˇ-ehˇ aˬ yawꞈ yaw oeˇ loꞈ-ehˇ tehꞈ-ehˇ jaˆ naˇ, shaˬ ciˬ naˇ-eu taˬ leˇ-euˬ maˇ byawꞈ pyeuꞈ-awˇ, tsawˇ haˬ kʼoeˇ gʼaˬ yaw shawˇ meh lehˇ piˇ ma gʼaˬ ya daˇ tsehˆ nehˬ meh.

²⁴Tsawˇ haˬ tiˬ gʼaˬ na, miˬ dzaˬ laˆ lahˇ-awˇ, shaˬ jiˇ yaw pyuˇ pyuˇ-ehˇ pyeuꞈ laˇ-euˬ maˬ ehˇ, neˇ ba ba laˇ-euˬ maˬ ehˇ,

²⁵piˇ ma gʼaˬ tsawˇ haˬ kʼoeˇ gʼaˬ-ahˇ ya pyehˆ tseˇ haw meh. Kʼoeˇ gaˇ tsoꞈ-eu caꞈ hm deuˬ yaw pyuˇ pyuˇ laˇ-awˇ, maˇ naˇ kʼoeˇ baˆ kʼoˆ naˆ maˬ tseˇ naꞈ leˇ taˬ naˇ, kʼoeˇ-aˬ, miˬ dzaˬ lahˇ-euˬ tsahˇ-ahˇ pyeuꞈ doˆ laˇ-euˬ nyawˬ naˇ-eu maˇ naˇ meh. Tsawˇ haˬ kʼoeˇ gʼaˬ maˬ shawˇ-a lehˇ, piˇ ma gʼaˬ ya daˇ tsehˆ nehˬ meh.

²⁶Ehˇ kʼawꞈ, kʼoeˇ gaˇ tsoꞈ-eu caꞈ hm yaw pyuˇ ma pyuˇ-ehˇ, maˇ naˇ kʼoeˇ baˆ kʼoˆ naˆ maˬ tseˇ maˬ naꞈ ni, ui cuiˆ yaw naˆ naˆ-ehˇ gʼeh naˇ, tsawˇ haˬ kʼoeˇ gʼaˬ-ahˇ, piˇ ma gʼaˬ shiꞈ nah keuˆ ni ya ha lahˇ taˬ meh.

²⁷Shiꞈ nah byah laˇ-awˇ, aˬ yawꞈ-ahˇ piˇ ma paˇ pyehˆ tseˇ haw ngeh, maˇ naˇ kʼoeˇ huiˬ dzehˬ laˇ naˇ, nyawˬ naˇ-eu maˇ naˇ pyeuꞈ-awˇ, tsawˇ haˬ kʼoeˇ gʼaˬ maˬ shawˇ-a lehˇ, piˇ ma gʼaˬ ya daˇ tsehˆ meh.

²⁸Ehˇ kʼawꞈ, maˇ naˇ kʼoeˇ maˬ huiˬ laˇ-ehˇ, aˬ yawꞈ yaw oeˇ loꞈ-ehˇ tiˬ jeˬ-iˬ maˬ paˇ laˇ ni jaˆ-awˇ, ui cuiˆ yaw naˆ naˆ-ehˇ gʼeh naˇ, nyawˬ naˇ-eu maˬ ngeuˇ-a. Tsawˇ haˬ kʼoeˇ gʼaˬ yaw shawˇ meh lehˇ piˇ ma gʼaˬ ya daˇ tsehˆ meh. Aˬ jeˬ miˇ neh ehˇ naˇ, kʼoeˇ-aˬ, miˬ dzaˬ puiˆ-euˬ maˇ byawꞈ meh.

²⁹Zaˬ miˬ zaˬ maˬ kaˬ, kʼaˬ dzeˇ zaˬ maˬ kaˬ, tsawˇ haˬ tiˬ gʼaˬ na, uˬ duˬ-ahˇ maˬ ehˇ, mehˬ tahˬ-ahˇ maˬ ehˇ, maˇ naˇ naˇ laˇ naˇ,

³⁰maˇ naˇ kʼoeˇ-ahˇ piˇ ma gʼaˬ ya pyehˆ tseˇ haw meh. Maˇ naˇ kʼoeˇ baˆ kʼoˆ naˆ maˬ tseˇ naꞈ leˇ taˬ-awˇ, kʼoeˇ gaˇ tsoꞈ-eu caꞈ hm deuˬ maˬ mehˇ ni, yaw shuiˇ shuiˇ laˇ taˬ naˇ, nyawˬ naˇ-eu maˇ naˇ pyeuꞈ-eu meh. Tsawˇ haˬ kʼoeˇ gʼaˬ maˬ shawˇ-a lehˇ, piˇ ma gʼaˬ ya daˇ tsehˆ meh.

³¹Piˇ ma gʼaˬ tsawˇ haˬ kʼoeˇ gʼaˬ-ahˇ pyehˆ tseˇ haw ngeh, maˇ naˇ kʼoeˇ baˆ kʼoˆ naˆ maˬ tseˇ maˬ naꞈ-ehˇ, kʼoeˇ gaˇ tsoꞈ-eu caꞈ hm maˬ mehˇ ni pyeuꞈ-iˇ naˇ, piˇ ma gʼaˬ tsawˇ haˬ kʼoeˇ gʼaˬ-ahˇ shiꞈ nah keuˆ ni ya ha lahˇ meh.

³²Shiꞈ nah byah laˇ-awˇ, maˇ naˇ-ahˇ piˇ ma gʼaˬ paˇ pyehˆ tseˇ haw ngeh, maˇ naˇ kʼoeˇ maˬ muiˬ dzehˬ laˇ-ehˇ, caꞈ hm yaw shuiˇ maˬ shuiˇ ni, maˇ naˇ kʼoeˇ shaˬ jiˇ baˆ kʼoˆ naˆ maˬ tseˇ maˬ naꞈ-ehˇ pyeuꞈ-iˇ naˇ,

³³tsawˇ haˬ kʼoeˇ gʼaˬ yawˬ ha-euˬ maˇ naˇ jawˬ jawˬ-ehˇ ya jehˆ dzeh meh. Kʼoeˇ naˇ, piˇ ma gʼaˬ tsawˇ haˬ kʼoeˇ gʼaˬ-ahˇ shiꞈ nah keuˆ ni paˇ ya ha lahˇ meh.

³⁴Shiꞈ nah paˇ byah laˇ-awˇ, maˇ naˇ-ahˇ piˇ ma paˇ pyehˆ tseˇ haw ngeh, maˇ naˇ kʼoeˇ maˬ huiˬ dzehˬ laˇ ehˇ, shaˬ jiˇ baˆ kʼoˆ naˆ maˬ tseˇ maˬ naꞈ gaˇ ya mawˇ naˇ, tsawˇ haˬ kʼoeˇ gʼaˬ yaw shawˇ meh lehˇ piˇ ma gʼaˬ ya daˇ tsehˆ meh. Tsawˇ haˬ kʼoeˇ gʼaˬ yawˬ ha-euˬ mehˬ tsoeˬ lehˬ tsiˬ-awˇ, shawˇ-eu tsawˇ haˬ pyeuꞈ laˇ-eu meh.

³⁵Ehˇ kʼawꞈ, tsawˇ haˬ kʼoeˇ gʼaˬ yaw shawˇ meh lehˇ daˇ tsehˆ gʼaˬ-awˇ neh, maˇ naˇ kʼoeˇ paˇ huiˬ dzehˬ laˇ naˇ,

³⁶piˇ ma gʼaˬ tsawˇ haˬ kʼoeˇ gʼaˬ-ahˇ tiˬ poˆ paˇ ya pyehˆ tseˇ haw meh. Maˇ naˇ kʼoeˇ huiˬ dzehˬ laˇ naˇ, caꞈ hm shuiˇ-eu maˬ kaˬ, maˬ shuiˇ-eu maˬ kaˬ, maˬ shawˇ-eu tsawˇ haˬ pyeuꞈ-eu yaw duˬ baw meh.

³⁷Ehˇ kʼawꞈ, piˇ ma gʼaˬ haw ngeh, maˇ naˇ kʼoeˇ maˬ huiˬ dzehˬ laˇ ni, caꞈ hm yaw mehˇ naˇ, maˇ naˇ taˬ leˇ-euˬ miˇ neh, tsawˇ haˬ kʼoeˇ gʼaˬ yaw shawˇ meh lehˇ, piˇ ma gʼaˬ ya daˇ tsehˆ meh.

³⁸Kʼaˬ dzeˇ zaˬ maˬ kaˬ, zaˬ miˬ zaˬ maˬ kaˬ, tsawˇ haˬ tiˬ gʼaˬ na-euˬ gʼawˇ mawˇ-ahˇ, yaw ba ba-ehˇ gʼeh-eu maˇ naˇ yaw byaꞈ yaw byaˇ-ehˇ doˆ laˇ naˇ,

³⁹piˇ ma gʼaˬ tsawˇ haˬ kʼoeˇ gʼaˬ-ahˇ ya pyehˆ tseˇ haw meh. Maˇ naˇ kʼoeˇ deuˬ yaw pyuˇ aˇ dzehˬ-ehˇ maˬ pyuˇ naˇ, shaˬ jiˇ baˆ kʼoˆ kʼoeˇ taˆ tehꞈ-ehˇ pyeuꞈ doˆ laˇ-euˬ maˇ naˇ pyeuꞈ-eu meh. Tsawˇ haˬ kʼoeˇ gʼaˬ yaw shawˇ meh.

⁴⁰Tsawˇ haˬ tiˬ gʼaˬ, uˬ duˬ tsehˇ kahˇ ga jiˇ-awˇ, uˬ duˬ deˬ-iˇ-euˬ kʼawꞈ, yaw shawˇ meh.

⁴¹Tsawˇ haˬ tiˬ gʼaˬ, naˇ kʼawˇ-euˬ laꞈ taˆ paw hawˇ-eu naˬ paꞈ-euˬ laꞈ taˆ paw uˬ duˬ tsehˇ kahˇ ga-awˇ, uˬ duˬ naˇ caˇ caˇ kʼawꞈ, yaw shawˇ meh.

⁴²Ehˇ kʼawꞈ, uˬ deˬ deˬ-eu tsahˇ-ahˇ, neˇ ba ba-eu maˇ naˇ doˆ laˇ naˇ, nyawˬ naˇ-eu meh.

⁴³Piˇ ma gʼaˬ aˬ yawꞈ-ahˇ pyehˆ tseˇ haw ngeh, neˇ ba ba-eu maˇ naˇ ya mawˇ naˇ,

⁴⁴aˬ yawꞈ-euˬ uˬ duˬ-ahˇ nyawˬ naˇ-eu baˬ da neh, tsawˇ haˬ kʼoeˇ gʼaˬ maˬ shawˇ-a lehˇ, piˇ ma gʼaˬ ya daˇ tsehˆ meh.

⁴⁵Nyawˬ naˇ-eu tsawˇ haˬ-aˬ, mehˬ tsoeˬ yaw pyaˬ ya dm-awˇ, uˬ duˬ tsehˇ kahˇ maˬ kaˆ juˇ ni, yawˬ ha-euˬ myaˆ pyawˬ laꞈ oˆ dzaˬ-ahˇ dehˬ kaˬ-awˇ, “Maˬ shawˇ de. Maˬ shawˇ de” lehˇ ya guˇ meh.

⁴⁶Aˬ yawꞈ nyawˬ kʼaˇ naˇ kʼoeˇ keuˆ ni maˬ shawˇ-eu tsawˇ haˬ pyeuꞈ-awˇ, pu pu dzeˇ-ahˇ, aˬ cawˬ nehˬ-ehˇ gaˇ mahˇ kaˬ gaˇ ya jawˇ meh.

⁴⁷Nyawˬ naˇ-eu maˇ naˇ dawꞈ-eu yawˇ caꞈ hm neh guꞈ taˬ-euˬ mehˬ tsoeˬ maˬ ehˇ, saˬ paˇ neh guꞈ taˬ-euˬ mehˬ tsoeˬ maˬ ehˇ,

⁴⁸shawˇ jehˆ ni gʼeh-eu saˬ paˇ paˇ dzeh maˬ ehˇ, shaˬ kʼoˆ maˬ ehˇ, shaˬ kʼoˆ neh jahˇ taˬ-euˬ myawˬ deuˬ maˬ ehˇ,

⁴⁹kʼoeˇ gaˇ dawꞈ-eu maˇ naˇ kʼoeˇ nyoeˇ la la-eu maˬ kaˬ, neˇ la la-eu maˬ kaˬ, nyawˬ naˇ-eu maˇ naˇ pyeuꞈ-awˇ, piˇ ma-ahˇ ya bi haw-iˇ meh.

⁵⁰Piˇ ma gʼaˬ saˬ paˇ kʼoeˇ-ahˇ pyehˆ tseˇ haw-awˇ, shiꞈ nah keuˆ ni gaˇ mahˇ kaˬ gaˇ ya biˬ dzeh taˬ meh.

⁵¹Shiꞈ nah byah laˇ naˇ, saˬ paˇ kʼoeˇ-ahˇ piˇ ma gʼaˬ tiˬ poˆ paˇ pyehˆ tseˇ haw-awˇ, maˇ naˇ huiˬ laˇ-euˬ ya mawˇ naˇ, saˬ paˇ kʼoeˇ maˬ shawˇ-a.

⁵²Piˇ ma gʼaˬ saˬ paˇ kʼoeˇ ya keuˬ dzeh meh. Aˬ jeˬ miˇ neh ehˇ naˇ, kʼoeˇ-aˬ, huiˬ laˇ luꞈ-eu nyawˬ naˇ-eu maˇ naˇ pyeuꞈ-eu miˇ neh, miˬ dzaˬ neh ya keuˬ puiˆ dzeh byoˆ meh.

⁵³Ehˇ kʼawꞈ, saˬ paˇ kʼoeˇ-ahˇ piˇ ma gʼaˬ pyehˆ tseˇ haw ngeh, nyawˬ naˇ-eu maˇ naˇ kʼoeˇ huiˬ laˇ taˬ-euˬ maˬ ya mawˇ naˇ,

⁵⁴saˬ paˇ kʼoeˇ lehˬ tsiˬ-awˇ, shiꞈ nah keuˆ ni gaˇ mahˇ kaˬ gaˇ bi jaˆ-awˬ lehˇ aˬ yawꞈ dawˬ ya biꞈ meh.

⁵⁵Kʼoeˇ naˇ, aˬ yawꞈ paˇ pyehˆ tseˇ haw ngeh, maˇ naˇ maˬ huiˬ laˇ-euˬ kʼawꞈ, aˬ yawꞈ yaw oeˇ loꞈ-ehˇ nyoeˇ la la-eu maˬ ehˇ, neˇ la la-eu maˬ ehˇ, paˇ ya mawˇ naˇ, saˬ paˇ kʼoeˇ maˬ shawˇ-a siˬ. Maˇ naˇ kʼoeˇ saˬ paˇ-euˬ laꞈ kʼoeˇ paw jaˆ-eu maˬ ehˇ, laꞈ nyiˇ paw jaˆ-eu maˬ ehˇ, saˬ paˇ kʼoeˇ ya keuˬ puiˆ dzeh meh.

⁵⁶Ehˇ kʼawꞈ, piˇ ma gʼaˬ tiˬ poˆ paˇ pyehˆ tseˇ haw ngeh, maˇ naˇ kʼoeˇ ui cuiˆ yaw naˆ naˆ-ehˇ pyeuꞈ-iˇ naˇ, maˇ naˇ dawꞈ luꞈ-eu saˬ paˇ maˬ kaˬ, shaˬ kʼoˆ maˬ kaˬ, maˇ naˇ dawꞈ-eu pehˇ tsahˇ ya tehˬ tsehˆ doˆ meh.

⁵⁷Kʼoeˇ naˇ, nyawˬ naˇ-eu maˇ naˇ kʼoeˇ tiˬ poˆ paˇ doˆ laˇ-awˇ, huiˬ laˇ luꞈ-eu ya mawˇ naˇ, yaw sahˇ gʼaˬ saˬ paˇ kʼoeˇ ya keuˬ puiˆ dzeh meh.

⁵⁸Yaw sahˇ gʼaˬ saˬ paˇ kʼoeˇ lehˬ tsiˬ-awˇ, maˇ naˇ kʼoeˇ byoˆ tsehˆ naˇ, tiˬ poˆ paˇ lehˬ tsiˬ-awˇ, saˬ paˇ kʼoeˇ shawˇ-eu saˬ paˇ pyeuꞈ laˇ-eu meh,

⁵⁹Ehˇ dzeuˇ yaꞈ-euˬ gaˇ kawˆ heu deuˬ-aˬ, yawˇ caꞈ hm neh guꞈ taˬ-euˬ mehˬ tsoeˬ maˬ ehˇ, shawˇ jehˆ ni gʼeh-eu saˬ paˇ neh guꞈ taˬ-euˬ mehˬ tsoeˬ maˬ ehˇ, yawˇ caꞈ hm saˬ paˇ maˬ ehˇ, shawˇ jehˆ ni gʼeh-eu saˬ paˇ maˬ ehˇ, shaˬ kʼoˆ neh guꞈ taˬ-euˬ myawˬ deuˬ maˬ ehˇ, nyawˬ naˇ-eu mehˬ tsoeˬ saˬ paˇ deuˬ-ahˇ taꞈ leˇ-eu zahˇ sahˇ kʼoꞈ pyeuꞈ-eu meh.