Read Akha Uˬ duˬ 15 Bible Online

Uˬ duˬ 15 - Akha bible

Uˬ duˬ 15

¹Zahˇ sahˇ kʼoꞈ heu deuˬ, Moˇseˬ hawˇ-eu Aˬloˬ-ahˇ Sahˬpaˬ Miˬyehˇ biꞈ-euˬ meh.

²Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. Kʼaˬ dzeˇ zaˬ tiˬ gʼaˬ na, yawˬ ha-euˬ uˬ kʼawˇ-ahˇ maˇ uiˇ yoeˇ naˇ, maˇ uiˇ kʼoeˇ maˬ shawˇ-a.

³Maˇ uiˇ yoeˇ luꞈ-eu maˬ kaˬ, yoeˇ tsiˇ-euˬ maˬ kaˬ, aˬ yawꞈ gʼaˇ duˬ maˬ shawˇ-a.

⁴Aˬ yawꞈ neh kʼaˇ yuꞈ kʼaˇ jawˇ-euˬ yuꞈ zaˇ jawˇ zaˇ deuˬ maˬ shawˇ-a.

⁵Aˬ yawꞈ-euˬ yuꞈ zaˇ-ahˇ kʼaˇ toeˬ ciˆ leˇ-euˬ tsawˇ haˬ aˬ geu gʼaˬ maˬ kaˬ, yawˬ ha-euˬ mehˬ tsoeˬ ya lehˬ tsiˬ shawˇ-awˇ, yawˬ ha-euˬ gʼawˇ mawˇ iˇ cuꞈ ya dzuiꞈ shawˇ-eu uˬ taꞈ, uˬ ciꞈ paw keuˆ ni maˬ shawˇ-eu tsawˇ haˬ pyeuꞈ-eu meh.

⁶Maˇ uiˇ yoeˇ-eu tsawˇ haˬ neh nuiˇ-euˬ tsahˇ-ahˇ nuiˇ zaˬ-euˬ tsawˇ haˬ aˬ geu gʼaˬ maˬ kaˬ, yawˬ ha-euˬ mehˬ tsoeˬ ya lehˬ tsiˬ shawˇ-awˇ, yawˬ ha-euˬ gʼawˇ mawˇ ya dzuiꞈ shawˇ-eu uˬ taꞈ, uˬ ciꞈ paw keuˆ ni maˬ shawˇ-eu tsawˇ haˬ pyeuꞈ-eu meh.

⁷Maˇ uiˇ yoeˇ-eu tsawˇ haˬ-euˬ gʼawˇ mawˇ-ahˇ kʼaˇ toeˬ ciˆ leˇ-euˬ tsawˇ haˬ aˬ geu gʼaˬ maˬ kaˬ, yawˬ ha-euˬ mehˬ tsoeˬ ya lehˬ tsiˬ shawˇ-awˇ, yawˬ ha-euˬ gʼawˇ mawˇ iˇ cuꞈ ya dzuiꞈ shawˇ-eu uˬ taꞈ, uˬ ciꞈ paw keuˆ ni maˬ shawˇ-eu tsawˇ haˬ pyeuꞈ-eu meh.

⁸Maˇ uiˇ yoeˇ-eu tsawˇ haˬ kʼoeˇ gʼaˬ neh duˬ kʼaˬ bi kʼa daˆ-euˬ tsawˇ haˬ yaw shawˇ aˬ geu gʼaˬ maˬ kaˬ, yawˬ ha-euˬ mehˬ tsoeˬ ya lehˬ tsiˬ shawˇ-awˇ, yawˬ ha-euˬ gʼawˇ mawˇ iˇ cuꞈ ya dzuiꞈ shawˇ-eu uˬ taꞈ, uˬ ciꞈ paw keuˆ ni maˬ shawˇ-eu tsawˇ haˬ pyeuꞈ-eu meh.

⁹Maˇ uiˇ yoeˇ-eu tsawˇ haˬ neh dziˬ-euˬ dziˬ gʼa aˬ geu hmˬ maˬ kaˬ, maˬ shawˇ-a.

¹⁰Tsawˇ haˬ kʼoeˇ gʼaˬ neh nuiˇ zaˬ-euˬ myawˬ-ahˇ kʼaˇ toeˬ ciˆ-eu tsawˇ haˬ aˬ geu gʼaˬ maˬ kaˬ, uˬ ciꞈ paw keuˆ ni maˬ shawˇ-a. Tsawˇ haˬ kʼoeˇ gʼaˬ neh nuiˇ zaˬ gʼaˬ-euˬ myawˬ-ahˇ kʼaˇ baꞈ kʼaˇ pi-eu tsawˇ haˬ aˬ geu gʼaˬ maˬ kaˬ, yawˬ ha-euˬ mehˬ tsoeˬ ya lehˬ tsiˬ shawˇ-awˇ, yawˬ ha-euˬ gʼawˇ mawˇ iˇ cuꞈ ya dzuiꞈ shawˇ-eu uˬ taꞈ, uˬ ciꞈ paw keuˆ ni maˬ shawˇ-eu tsawˇ haˬ pyeuꞈ-eu meh.

¹¹Maˇ uiˇ yoeˇ-eu tsawˇ haˬ tiˬ gʼaˬ, yawˬ ha-euˬ aˬ laꞈ maˬ dzuiꞈ shawˇ mi naˆ-ehˇ, tsawˇ haˬ tiˬ gʼaˬ na-ahˇ toeˬ ciˆ naˇ, bi toeˬ ciˆ-euˬ tsawˇ haˬ kʼoeˇ gʼaˬ, yawˬ ha-euˬ mehˬ tsoeˬ ya lehˬ tsiˬ shawˇ-awˇ, yawˬ ha-euˬ gʼawˇ mawˇ iˇ cuꞈ ya dzuiꞈ shawˇ-eu uˬ taꞈ, uˬ ciꞈ paw keuˆ ni maˬ shawˇ-eu tsawˇ haˬ pyeuꞈ-eu meh.

¹²Maˇ uiˇ yoeˇ-eu tsawˇ haˬ neh kʼaˇ toeˬ ciˆ-euˬ miˇ tsaˬ oeˬ lahˬ deuˬ ya kʼoˆ paˆ dzeh-awˇ, kʼoeˇ loꞈ-ehˇ gʼeh-eu tsawˇ haˬ neh kʼaˇ toeˬ ciˆ-euˬ daˇ kawˬ ni tseuˆ deuˬ ya joˆ dzeh meh.

¹³Maˇ uiˇ yoeˇ-eu tsawˇ haˬ kʼoeˇ gʼaˬ taˬ leˇ naˇ, shiꞈ nah keuˆ ni ya jawˇ naˬ-awˇ, yawˬ ha-euˬ mehˬ tsoeˬ lehˬ tsiˬ-awˇ, yawˬ ha-euˬ gʼawˇ mawˇ iˇ cuꞈ tsawˬ biˬ-ahˇ ya dzuiꞈ shawˇ-eu meh. Kʼoeˇ naˇ, aˬ yawꞈ shawˇ-eu tsawˇ haˬ pyeuꞈ laˇ-eu meh.

¹⁴Yehꞈ nah tiˬ nah keuˆ laˇ ngeh, kʼaˬ kʼoeˬ nyiˬ mawˇ maˬ ngeuˇ naˇ, kʼaˬ guˬ nyiˬ mawˇ, Sahˬpaˬ Miˬyehˇ jawˇ-eu Sehˬ gʼawˆ gʼoˆ kʼehˬ-ahˇ aˬ yawꞈ ya yuˇ gʼeh-awˇ, piˇ ma-ahˇ ya biꞈ nehˬ leˇ meh.

¹⁵Piˇ ma gʼaˬ aˇ jiˇ kʼoeˇ nyiˬ mawˇ yuˇ-awˇ, iˬ baˇ shawˇ-eu lawˇ-eu jeˬ gʼaˇ duˬ tiˬ mawˇ hawˇ-eu, miˬ dzaˬ dzah puiˆ-awˇ lawˇ-eu jeˬ gʼaˇ duˬ tiˬ mawˇ ya lawˇ nehˬ meh. Tsawˇ haˬ kʼoeˇ gʼaˬ bi shawˇ laˇ-eu gʼaˇ duˬ, piˇ ma gʼaˬ kʼoeˇ loꞈ-ehˇ zahˇ ya jahˇ nehˬ meh.

¹⁶Tsawˇ haˬ tiˬ gʼaˬ na, aˇ yoeˬ yoeˇ doˆ dzeh naˇ, yawˬ ha-euˬ gʼawˇ mawˇ mawˇ lah-ehˇ ya dzuiꞈ shawˇ-awˇ, uˬ ciꞈ paw keuˆ ni maˬ shawˇ-eu tsawˇ haˬ pyeuꞈ-eu meh.

¹⁷Aˇ yoeˬ kʼoeˇ kʼaˇ yoeˇ lehꞈ-euˬ saˬ paˇ maˬ ehˇ, shaˬ kʼoˆ maˬ ehˇ, ya lehˬ tsiˬ shawˇ-awˇ, uˬ ciꞈ paw keuˆ ni maˬ shawˇ-eu myawˬ pyeuꞈ-eu meh.

¹⁸Kʼaˬ dzeˇ zaˬ hawˇ-eu zaˬ miˬ zaˬ yuꞈ taꞈ jawˇ taꞈ gʼaˬ naˇ, nyiˬ gʼaˬ luꞈ yawˬ ha-euˬ gʼawˇ mawˇ ya dzuiꞈ shawˇ-awˇ, uˬ ciꞈ paw keuˆ ni maˬ shawˇ-eu tsawˇ haˬ pyeuꞈ-eu meh.

¹⁹Zaˬ miˬ zaˬ tiˬ gʼaˬ ba la mawˇ ngeh, shiꞈ nah keuˆ ni maˬ shawˇ-a. Zaˬ miˬ zaˬ kʼoeˇ gʼaˬ-ahˇ kʼaˇ toeˬ ciˆ-euˬ tsawˇ haˬ aˬ geu gʼaˬ maˬ kaˬ, uˬ ciꞈ paw keuˆ ni maˬ shawˇ-a.

²⁰Zaˬ miˬ zaˬ kʼoeˇ gʼaˬ ba la mawˇ ngeh, aˬ yawꞈ neh kʼaˇ yuꞈ kʼaˇ nuiˇ zaˬ-euˬ yawˬ jeˬ na luꞈ maˬ shawˇ-a.

²¹Aˬ yawꞈ-euˬ yuꞈ zaˇ-ahˇ kʼaˇ toeˬ ciˆ-euˬ tsawˇ haˬ aˬ geu gʼaˬ maˬ kaˬ, yawˬ ha-euˬ mehˬ tsoeˬ ya lehˬ tsiˬ shawˇ-awˇ, yawˬ ha-euˬ gʼawˇ mawˇ iˇ cuꞈ ya dzuiꞈ shawˇ-eu uˬ taꞈ, uˬ ciꞈ paw keuˆ ni maˬ shawˇ-a.

²²Zaˬ miˬ zaˬ kʼoeˇ gʼaˬ neh nuiˇ tehˬ-euˬ jeˬ-ahˇ kʼaˇ toeˬ ciˆ-eu tsawˇ haˬ aˬ geu gʼaˬ maˬ kaˬ, yawˬ ha-euˬ mehˬ tsoeˬ ya lehˬ tsiˬ shawˇ-awˇ, yawˬ ha-euˬ gʼawˇ mawˇ iˇ cuꞈ ya dzuiꞈ shawˇ-eu uˬ taꞈ, uˬ ciꞈ paw keuˆ ni maˬ shawˇ-eu tsawˇ haˬ pyeuꞈ-eu meh.

²³Aˬ yawꞈ-euˬ yuꞈ zaˇ-ahˇ maˬ ehˇ, aˬ yawꞈ neh kʼaˇ nuiˇ zaˬ-euˬ aˬ geu jeˬ-ahˇ maˬ ehˇ, toeˬ ciˆ leˇ-eu gʼaˬ-aˬ, uˬ ciꞈ paw keuˆ ni maˬ shawˇ-a.

²⁴Ba la mawˇ luꞈ-eu zaˬ miˬ zaˬ kʼoeˇ gʼaˬ nehˬ-ehˇ yuꞈ taꞈ-euˬ kʼaˬ dzeˇ zaˬ-aˬ, zaˬ miˬ zaˬ kʼoeˇ gʼaˬ-euˬ maˬ shawˇ-eu jeˬ aˬ yawꞈ-ahˇ nyawˬ leˇ-euˬ miˇ neh, shiꞈ nah keuˆ ni maˬ shawˇ-eu uˬ taꞈ, aˬ yawꞈ neh yuꞈ-euˬ yuꞈ zaˇ kʼawꞈ, maˬ shawˇ-a.

²⁵Zaˬ miˬ zaˬ tiˬ gʼaˬ ba la mawˇ-eu aˇ yamˬ maˬ tsaˬ gaˇ, gʼawˬ mya nah keuˆ ni shiˬ yoeˇ-eu maˬ ehˇ, ba la mawˇ-eu aˇ yamˬ-ahˇ, aˇ yamˬ buˬ-iˇ ngeh keuˆ ni shiˬ maˬ tsiˇ leˇ-eu maˬ ehˇ, shiˬ kʼoeˇ maˬ tsiˇ leˇ kʼoeˇ keuˆ ni maˬ shawˇ-a.

²⁶Kʼoeˇ loꞈ-ehˇ pyeuꞈ luꞈ-eu aˇ yamˬ laꞈ kʼoeˇ, aˬ yawꞈ neh yuꞈ-euˬ yuꞈ zaˇ hawˇ-eu, aˬ yawꞈ neh kʼaˇ nuiˇ zaˬ-euˬ yawˬ jeˬ na luꞈ maˬ shawˇ-a.

²⁷Kʼoeˇ deuˬ-ahˇ kʼaˇ toeˬ ciˆ-euˬ tsawˇ haˬ aˬ geu gʼaˬ maˬ kaˬ, maˬ shawˇ-eu miˇ neh, yawˬ ha-euˬ mehˬ tsoeˬ ya lehˬ tsiˬ shawˇ-awˇ, yawˬ ha-euˬ gʼawˇ mawˇ iˇ cuꞈ ya dzuiꞈ shawˇ-eu uˬ taꞈ, uˬ ciꞈ paw keuˆ ni maˬ shawˇ-a.

²⁸Zaˬ miˬ zaˬ kʼoeˇ gʼaˬ shiˬ tsiˇ leˇ ngeh, shiꞈ nah keuˆ ni jawˇ naˬ gʼaˬ miˇ tsa, shawˇ-eu tsawˇ haˬ pyeuꞈ laˇ-eu meh.

²⁹Yehꞈ nah tiˬ nah keuˆ laˇ ngeh, kʼaˬ kʼoeˬ nyiˬ mawˇ maˬ ngeuˇ naˇ, kʼaˬ guˬ nyiˬ mawˇ, Sahˬpaˬ Miˬyehˇ jawˇ-eu Sehˬ gʼawˆ gʼoˆ kʼehˬ-ahˇ aˬ yawꞈ ya yuˇ gʼeh-awˇ, piˇ ma-ahˇ ya biꞈ leˇ meh.

³⁰Piˇ ma gʼaˬ aˇ jiˇ kʼoeˇ nyiˬ mawˇ yuˇ-awˇ, iˬ baˇ shawˇ-eu lawˇ-eu jeˬ gʼaˇ duˬ, tiˬ mawˇ hawˇ-eu, miˬ dzaˬ dzah puiˆ-awˇ lawˇ-eu jeˬ gʼaˇ duˬ tiˬ mawˇ ya lawˇ meh. Zaˬ miˬ zaˬ kʼoeˇ gʼaˬ bi shawˇ laˇ-eu gʼaˇ duˬ, piˇ ma gʼaˬ kʼoeˇ loꞈ-ehˇ zahˇ ya jahˇ meh.

³¹Iˇsaˬleˬlaˆ tsawˇ haˬ deuˬ-euˬ pu gʼahˇ ceh jaˆ-eu ngaˇ jawˇ-eu sehˬ gʼawˆ-ahˇ laˆ jawꞈ-eu baˬ da neh maˬ ya shiˇ-eu gʼaˇ duˬ, Iˇsaˬleˬlaˆ tsawˇ haˬ deuˬ-ahˇ, yawˬ ha-euˬ maˬ muiˬ maˬ shawˇ-eu jeˬ-ahˇ yahˇ yahˇ-ehˇ bi dehꞈ-awˬ lehˇ Moˇseˬ-ahˇ Sahˬpaˬ Miˬyehˇ ehˇ nehˬ-euˬ meh.

³²Zahˇ sahˇ kʼoꞈ heu deuˬ-aˬ, maˇ uiˇ yoeˇ-eu kʼaˬ dzeˇ zaˬ-ahˇ maˬ ehˇ, aˇ yoeˬ yoeˇ doˆ dzeh-euˬ tsawˇ haˬ-ahˇ maˬ ehˇ,

³³ba la mawˇ-eu zaˬ miˬ zaˬ-ahˇ maˬ ehˇ, maˬ shawˇ-eu zaˬ miˬ zaˬ nehˬ-ehˇ yuˬ taꞈ-euˬ kʼaˬ dzeˇ zaˬ-ahˇ maˬ ehˇ, taꞈ leˇ-eu zahˇ sahˇ kʼoꞈ deuˬ pyeuꞈ-eu meh.